КАД


Сьӧлӧмыд друг тэнад ӧзъяс
Думъястӧ сьыланӧ гартны.
Уна тай олігад кӧсъян,
Этша тай ки помсьыд артмӧ.

Гижны тэ кӧсйылан ыджыд,
Ыджыд да мича поэма.
Пуксян — и перӧыд мыджӧ, — 
Кывбур оз чуж кузьджык нэма.

Думайтан, пукалан ӧтнад,
Жуглалан юртӧ, а кадыс...
Сійӧ оз сулав — век рӧдтӧ,
Видзӧдан, сійӧ нин... Адӧй!

Сійӧ нин мӧд нэмӧ вуджӧ.
Вӧтӧдан сійӧс, но кысь нин!
Тэ водзӧд весиг оз вуджӧрт,
Бӧрвыв тэ сійӧс он кыскы.

Шыяссӧ муртса кӧ кутам,
Пасйыштам бумага вылӧ,
Эськӧ ми тырам нин шудӧн,
Эськӧ сэк быдӧн нин сьылам.

Сӧмын тай... Быд ногыс овлӧ,
Ошйысьны некод ог кужӧй.
Ӧлӧмыд — сійӧ ӧд олӧм,
Кад костсӧ ас ногыс вуджӧ.

Гижигам дум вӧліс ӧти — 
Бурторсӧ кыпӧдны вылӧ,
Бурторсӧ, югыдсӧ, кӧть и
Вынлунныс этша на кылӧ.

Нэрӧсь кӧ найӧ на — томӧсь,
Ёнмасны, — быдмӧны, артышт.
Быдмасны неуна ов мысть.
Босьтасны ставнас му шарсӧ!