ЙӦЙ ПИ

Олісны-вылісны гозъя. Налӧн чужи пи. Коркӧ пи быдмис, толькӧ дзик йӧй лои. Батьыс кулі и йӧй пи мамыскӧд коли. Мам кутіс сур пуны и писӧ ыстіс тьӧтка ордӧ тагла.

— Мун ветлы, — шуӧ, — вай таг.

Йӧй пи мунас, тьӧткалысь таг корас и мӧдӧдчас гортас. Таг сылӧн кыш-кышмунӧ.

— Эн бара кышӧдчы, босьта да койышта, — шуӧ йӧй.

Таг бара кыш-кышмунӧ. Сійӧ босьтас дай койыштас. Гортын мамыс юалӧ:

— Вайин тагтӧ?

— Кышӧдчӧ да койышті.

Коркӧ сёйны пуксясны, налӧн паньяс абу.

— Мун, — шуӧ мамыс йӧйлы, — ветлы тьӧткаыд ордӧ паньла.

Пи мунас, тьӧткалысь корас пань и бӧр мӧдас.

Мунӧ дай аддзӧ: туй вылын ракаяс косясьӧны.

— Мый нӧ ті, ракаяс, паньтӧг сёянныд? Налӧ инӧ паньястӧ.

И сійӧ босьтас дай ракаяслы шыбитас. Гортӧ воас. Сылысь мам юалӧ:

— Вайин паньястӧ?

— Ракаяс сёйӧны паньтӧг туй вылын, да ме налы сеті.

— Ок, тэ йӧй, йӧй! — шуас мамыс.

Оласны, оласны, да мам пӧжасьны кутас. Кватитчас, сов налӧн бырӧма. Мам пиӧс ыстас тьӧтка ордӧ совла.

— Мамӧ сов корис, — шуӧ йӧй тьӧткалы.

Тьӧтка сетас сов, и сійӧ мӧдӧдчас гортӧ. Мунӧ дай аддзӧ: туй вылын мӧс коктуйысь пон ва лакӧ.

— Понмӧй, понмӧй, мый нӧ тэ дубыднас васӧ лакан? На инӧ ме тэныд солала.

Босьтас да став совтӧ мӧс кок туйӧ кисьтас.

Гортас мам шуӧ:

— Вайин совтӧ?

— Эг, туй вылын пон дубнас ва лакӧ, да ме сылы васӧ солалі.

Мам сійӧс зэв видас, видас, да мый йӧйлысь босьтан, сідзи и эновтас.

Оласны, оласны, коркӧ мам пондас юм гудравны, налӧн гырничыс абу. Мӧдӧдас пиӧс тьӧтка ордӧ гырничла. Пи мунас и корас гырнич. Тьӧтка сылы сетас. Гортӧ мунӧ и видзӧдӧ туй бокӧ, а сэн сулалӧ мыр.

— Мырйӧй, мырйӧй, тэнад пельыд оз-ӧ кынмы? Кынмӧ кӧ, на, шапкаӧда, — шуӧ йӧй.

Сэсся босьтас дай мырйӧс гырничӧн шапкаӧдас.

Воас гортас. Мам юалӧ:

— Вайин гырничтӧ?

— Эстӧн мыр сулалӧ, сылӧн пельыс кынмӧ, ме сійӧс гырничнад шапкаӧді.

Мам видас, видас да сьӧвзяс и ыстас йӧйӧс вӧв юктавны, а вӧв кутас вийсьыны.

— Эн, бара, вийсьы! Регыд ме тэнсьыд ныртӧ керала.

Вӧв век вийсьӧ. Сійӧ босьтас чер да вӧвлысь нырсӧ и керыштас. Керкаӧ пырас. Мам юалӧ:

— Юкталін вӧвтӧ?

— Вийсьӧ, да ме сылысь нырсӧ керышті, — шуӧ йӧй.

Мам сійӧс зэв ёна видас дай нӧйтас.

Сы бӧрын коркӧ мам ыстас писӧ мӧсъясӧс юктавны. Йӧй петас. Мӧсъяс зэв баксӧны.

— Энӧ, бара, баксӧй. Регыд ме юръяснытӧ керала, — шуӧ йӧй.

Мӧсъяс оз дугдыны, век баксӧны. Сійӧ босьтас чер дай мӧсъяслысь юръяссӧ кералас. Керкаӧ пырас. Мам сылысь юалӧ:

— Юкталін мӧсъястӧ?

— Баксӧны да, ме юръяснысӧ налысь кералі, — шуӧ йӧй.

Мам зэв скӧрмас пи вылӧ, босьтас дай вӧтлас гортсьыс. Ӧні на сійӧ олӧ-вылӧ да йӧйталӧ.