ИЗЬВА, ИЗЬВА...


Изьва, Изьва! Видза олан!
Гажӧй тэ вӧсна зэв бырис:
Кызь во тэ дорӧ эг волыв,
Аддзи — лолӧй гажӧн тырис.

Быттьӧ выльысь лои томӧн,
Кутшӧм вӧлі кызь во сайын.
Видзӧда ме помысь помӧ — 
Гӧгӧр меным радлун ваян.

Вежсьӧмаӧсь тэнад йӧзыд,
Найӧ бергӧдӧны Мусӧ.
Кыдз нӧ лоан накӧд кӧдзыд?
Быдӧнӧс ме шуа «муса».

Сямлуннаныс ывла серсӧ
Вежны велӧдчӧмны тані.
И ог тӧд нин Изьва эрдсӧ, — 
Сійӧ лоӧма выль бана.

Сӧмын ӧтитор ог сор ме — 
Бакур сиктысь джуджыд нӧрыс:
Сэтчӧ волывны эг сёрмыв,
Кодыр кыпӧдчывліс Тӧлысь.

Сулавлі сэн ӧти нывкӧд,
Сійӧ вӧлі — быттьӧ шонді.
Ӧнӧдз помнита ме сывсӧ,
Сэтшӧм сійӧ вӧлі шоныд.

Ӧні корси Бакур сиктысь,
Муса нылӧс ме эг аддзы.
Ӧтнамлы мен Тӧлысь кисьтіс
Эзысь дзирдсӧ козъя садйын.

Мый нӧ вӧчан? Рӧк кӧ суис
Туйяс веськӧдны мӧд вожӧ,
Оз нин ӧтлаасьны найӧ
И оз тырны тувсов гожйӧн.

Век жӧ шуи тӧдса козлы:
«Сійӧ волас кӧ тэ дорӧ,
Висьтав сылы, менам озлы,
Сійӧ косьтіс менсьым морӧс».

1954 во.