ЗЫБКАДОРСА СЬЫЛАНКЫВ


Ӧввӧ, ӧввӧ, ичӧт пиӧй,
     Сьӧлӧмшӧрӧй, узь!
Пемыд войысь нинӧм повны,
     Войыс абу кузь.
Асъя кыа бӧрын лоас
     Бара гажа лун.
Зыбка дорысь тэнад мамыд
     Некытчӧ оз мун.
Ог ме дона пиӧс эновт,
     Некодлы ог сет.
Менам зарни, мича кага
     Бура узяс мед!
Эзысь лэптысьӧма тӧлысь,
     Быттьӧ еджыд юсь...
Ӧввӧ, ӧввӧ, муса пиӧй,
     Сьӧлӧмшӧрӧй, узь!
Понда висьтавны ме тэныд
     Уна-унатор:
Мыйла, кыдзи тэнад батьыд
     Томӧн лоис дзор;
Мыйла уджалігас сійӧ
     Шойччӧгсӧ оз тӧд;
Кыдзи усьтӧдз сійӧ тільсис,
     Сӧмын эз вӧв пӧт.
Сэки уджалысьыс вӧлі
     Медся ичӧт морт.
Сэки уджалысьлӧн вӧлі
     Кӧрталӧма борд.
Ӧні олӧм миян вежсис,
     Батьыд лои сюсь...
Ӧввӧ, ӧввӧ, дона пиӧй,
     Сьӧлӧмшӧрӧй, узь!
Коркӧ быдман, пондан тӧдны
     Ӧнъя оласног.
Ӧтув сиктсаяскӧд овны
     Лоас тэнад мог.
Тӧлысь кисьтӧ эзысь югӧр,
     Пышйӧ пемыд вой.
Ӧні тэнӧ, ичӧт кага,
     Бубуля оз сёй.
Нинӧм повны, кӧть и буксӧ
     Вой шӧр войын сюзь!
Ӧввӧ, ӧввӧ, зарни пиӧй,
     Сьӧлӧмшӧрӧй, узь!