ЕНКӦЛА АРТМӦМ

Мулӧн
Кӧнкӧ вылын-вылын,
Кӧні енэжыс
Ойдӧ, паськалӧ, пӧрӧ
Еджыдӧ...
Кӧні кадыс и ӧдыс
Надзмӧны.
Кӧні, дерт жӧ, и менӧ
Аддзӧны.
Кор ме мудза да
Эбӧссьым пета,
Кор став вынӧс ме
Быдмӧглы сета,
Сэсянь ыстӧны меным
Козин –
Еджыд чӧвлунсӧ
Асывводзӧ.
Сьӧкыд кайнысӧ
Меным сэтчӧ:
Сійӧн югыдыс
Вылам лэччӧ...
Кокни лымйӧн.

Валӧн
Верма лэптыны
Сӧмын найӧс,
Кодъяс сӧстӧмджыкӧсь меысь
Пытшкӧснаныс.

Сынӧдлӧн
Ме зэв кокни и юрсигусь бордъя,
Йита сьӧлӧмъяс сьӧлӧмъяс ордӧ.
Артмӧ муслун и дзик ӧткодь лов шы,
Медым некод оз бӧрд ни оз шогсьы –
Кокни тӧвруӧн синвасӧ косьта
И енкӧла паськыдсӧ восьта.

Билӧн
Вильшасьны, серавны, сьывны,
Паськавны здукӧн и... сывны!
Ломавны шондіӧн, пӧжны,
Морт вирсӧ ворсӧдны, вежны!
Петавны синсьыс би ньӧвйӧн –
Ставсӧ ме кужа да верма!..
___________
Сӧмын синтӧмлы югдӧдны туйсӧ
Ме ог вермы,
Кор сьӧлӧмсьыс
Куса...