ДЯКӦН ГОЗЪЯ

Олісны-вылісны коркӧ дякӧн гозъя вӧлӧсьтын, деревняын. А вӧліны томӧсь. Первойсӧ, дерт, томӧн оз сетны гӧтрасьны, велӧдчыны колӧ. А дякӧнӧ пуктігӧн колӧ гӧтыра ӧбязательнӧ. И вот дякӧн гӧтрасис, выль гӧтыра олӧ. Выль гӧтыр сійӧс радейтӧ ёна; чӧскыда, бура вердӧ, дякӧн толькӧ вичкоӧ петавлӧ служитыштны. Вот и пондіс кызны, ёнмыны. Гӧтыр видзӧдлывлӧ, любуйтчӧ: мужик пондіс ёнмыны. А налӧн деревняас вӧлі Лукерья нима ӧтик баба, знакар пыдди олӧ, тӧдысь туйӧ. Но, дякӧн кызӧ и кызӧ, и думайтӧ:

— Мый нӧ ме понді тадзи кызны, гӧтраси да? Гӧтырӧдз тай нӧ вӧлі зэв вӧсни.

Коркӧ нин и гӧтырыс дуригмозыс кинас тувкнитіс рушкуас:

— Тэ нӧбасян кӧ-а?

Дякӧнлы сійӧ ещӧ ётшвайис сьӧлӧмад:

— Збыльысь кӧ нин нӧбася-а?

Кынӧм быдмӧ и быдмӧ, юр яндзим.

— Час ме ветла коркӧ, мед эськӧ гӧтырӧй оз жӧ казяв, Лука тьӧтка дорӧ петкӧдчывлыны, мый сійӧ шуас, висьталас.

Ӧтчыд рытын сёрӧн, гӧтырысь, кытчӧкӧ помка пуктіс да, муніс Лука тьӧтка ордӧ. А сэні йӧз век овлӧны, локтӧны юасьны сылысь. Но буретш сэки некод абу. Йиркӧдчыштіс кильчӧӧ, Лука тьӧтка петіс:

— Коді сэн!

— Тьӧтка Гликерья, эн ёна шумит, ме локта, дякӧн.

— Мыйла нин, бласлӧ кристос, воин, отеч дякӧн, батюшко? Войын локтан, татшӧм сёрӧн?

— Чӧв, ёна эн шумит. Тэ ордын некод абу?

— Абу некод, абу.

— Но, восьты, сэк сёрнитам.

Лукӧ тьӧтка кильчӧ восьтіс, дякӧн пырис дай шуӧ:

— Дашкӧ, кӧнкӧ кодкӧ кывзысьӧ, вай пӧсйыв пельӧсад каям да сэтӧні сёрнитам гусьӧнджык, мед некод оз кыв. Юр яндзим, видлы вай тэ, он-ӧ тӧд. Ог-ӧ ме нӧбась? Висьтав тэ меным.

Лукӧ тьӧтка чуньясӧн шупайтіс, шупайтіс рушкуас дай шуис:

— Збыльысь ӧд тэ нӧбасян!

— Аттӧ, — дякӧн кабала тор кыскис зептысь: — А кор нӧ эськӧ ковмас мен рӧдитныыс?

Лукӧ тьӧт висьталіс кад, кор колӧ лӧсьӧдчыны рӧдитны.

Дякӧнлы сэтшӧм шог лои. Дерт, сійӧ дон мынтыштіс Лукӧ тьӧткалы и шуӧ:

— Прӧщайтлы сэсся, да эн бара некодлы висьтав. Мед бара некод оз тӧд.

Ёна сійӧ умазитіс, мед оз висьтав.

Гортӧ муніс сэтшӧм шогын. Гӧтырлы оз висьтав, а гӧтыр и шуӧ:

— Мый нӧ сідзикӧн, отеч дякӧн, — нимнас шуас, — татшӧм мыйкӧ тэ лоин зэв невесел?

— А мыйкӧ ме вися, да ковмас, буракӧ, больничаӧ мунны.

— Пӧжалуй, абу здоров тэ, мыйкӧ век гажтӧмасян.

— Гажтӧмася, дерт, вися да, аддзан кутшӧма кынӧмӧй кызіс.

А гӧтыр бара тувкнитіс кинас:

— А дзик нин тэ нӧбасян баба кодь, быттьӧ медбӧръя недельяс новлӧдлан, сы кыза нин рушкуыд.

Дякӧнлы ещӧ чорыда инмис дай думайтӧ:

— Аттӧ, пышйыны ковмас гортысь!

Кабалатор сійӧ частӧкодь видлавлӧ: матысмӧ строк кага рӧдитны. Вот пасьтасис дай гӧтырлы шуӧ:

— Ме муна больничаӧ, эн гажтӧмчы, тэ ов, а ме муна лечитчыны.

Муніс гортысь, петіс кытчӧкӧ, кутшӧмкӧ туйлань. Кытчӧкӧ мунӧ, кӧнъясынкӧ узьлывлӧ. Уджавны некӧн оз уджав. Сійӧ гӧтырыслысь гусяліс сарапан, пасьталіс да шаллясис нывбаба пыдди. А рушку вомӧдзыс. И полӧ век. Коркӧ бара кабалатор видліс, а сылы тайӧ числӧясӧ рӧдитны колӧ. Зэв ёна шог босьтіс, и думайтӧ:

— Мед эськӧ талун бурджык кӧзяйка дорӧ жӧ узьны веськала. Талун рӧдитны ковмас меным.

Ӧтилаын юасис узьны, гозъя вӧлі олӧны да лэдзисны сійӧс, эз и ӧткажитны.

— А мен эськӧ вот паччӧр колӧ да, кынмалі да шонтысьыштны, паччӧраныд узьтӧдӧй менӧ.

Найӧ вольсалісны:

— Вод, вод. Ми огӧ паччӧрын узьлӧй, ми крӧватьын узьлам!

А налӧн вӧлі мӧскыслы куканясьны талун колӧ. Мӧс вӧлі кӧдзыд картаын. Шоныд места эз вӧв, а кӧдзыд вӧлі зэв. Найӧ гозъя и сёрнитӧны:

— Кодным водз садьмам, колӧ мӧс дорад лэччывны, видзӧдлыны. Мед эськӧ куканьным оз жӧ кынмы.

Сэсся коркӧ и унмовсьыштлісны, а дякӧн пыр на узьӧ. Узьыштісны ичмонь гозъя, садьмис кодыскӧ дай шуӧ:

— Мӧстӧ видзӧдлыны колӧ петавлыны, гашкӧ, и куканясьӧ. Гашкӧ, и кынмӧ куканьыд.

Петісны и збыльысь нин сійӧ, буракӧ водӧм бӧраныс куканясьлӧма. Куканьыс ёна нин кынмӧма, и шуӧны:

— Аттӧ, паччӧрад узьысь эм, эськӧ вот тайӧ шонтӧдны колӧ пыртӧдны паччӧрӧ-а. Вай пасьтӧ быдмалам, — кӧзяиныс шуӧ кӧзяйкалы, — да пыртӧдам паччӧрӧ.

А дякӧн узьӧ зэв ёна, оз кывлы нинӧм. Куканьӧс пасьӧн быдмаласны и пыртасны керкаӧ, дякӧнсьыс пыдӧджык паччӧрад и пуктасны, пасьӧн быдмалӧмӧн. Кӧдзыдінсьыд куканьыд воис да оз шыась. Асьныс бӧр водісны да унмовсисны.

Коркӧ дякӧн садьмис дай думайтӧ:

— Господи, кыдз бара господь отсалас меным талун рӧдитныыс. Дерт нин, талун ковмас рӧдитны, ыджыд труд пуктыны.

А куканьыд вӧрзьыштіс сэтӧні пась пиад.

— Мыйкӧ тай нӧ тані эм нин?

Вӧрзьыштігад пасьыд вешйыштӧма, дай куканьыд и куш лоӧма. Ки нюжӧдіс, видліс, ныр помыс самӧй сюри куканьыдлӧн.

— Благӧслӧви кристос, эг ӧд и тӧдлы, кыдзикӧн менам кагаыд петӧма. Господьыд отсаліс, ёна кевми да, меным рӧдитныыд, эг и тӧдлы. Но, а яндзимыс мый ыджда! Кытчӧ тайӧс явитны лысьтан? Мый ме тайӧн кера? Да ӧд и ыджыд зэв.

Но, а ветлӧдлігмозыд да шогсигмозыд дякӧныд ёна нин омӧльтчис, кынӧмъяс вӧснялӧма нин. Ветлӧдлігад эз и пӧрччысьлы, пыр пупайканас узьліс, а век сійӧ пӧрччысьӧмӧн паччӧрад шоналӧма дай асьсӧ видлалӧ: и правда, кынӧм дзольдӧма. Зэв эськӧ любӧ лои, мый рӧдитӧм эз тӧдлыны, эз мучитчы:

— А кытчӧ тайӧ ме понда воштыны? Час ме тайӧс, мед оз садьмы, петкӧда да струбааныс чӧвта.

Куканьтӧ босьтас дай петкӧдас, колодечӧ брун чӧвтас. «Кагаысь» мыні.

— Сэсся позьӧ ӧні гӧтыр дорӧ мунны бӧр. Толькӧ эськӧ со мед некытысь оз кывны, некод оз висьтав!

И муніс гӧтыр дорад, лечмӧма. Гӧтырлы зэв любӧ:

— Сэсся он вись?

— Ог.

И вот сэсся сідзи найӧ овмӧдчисны бура.