ДЫШЧИК РУШКУ

Олісны-вылісны крестьянин гозъя. Налӧн вӧлі пи. Нимыс сылӧн вӧлі Дышчык Рушку. Батьыс муніс песла, мам пуксис печкыны. Сылӧн уси гӧбӧчас чӧрс.

— Мун, пиӧ, пырав чӧрсла.

Чӧрсла пырис и шуӧ Дышчик Рушку:

— Чӧрс ньылышті, пета да тэнӧ ньылышта.

Петас да печкан ньылыштас, эсся мамсӧ. Петас ывлаӧ. Пес доддя паныд лоӧ.

— Чӧрс ньылышті, мамӧс ньылышті, тэнӧ на ньылышта.

Песнас и додьнас ньылыштіс. Мунӧ водзӧ. Турун доддякӧд паныд лоас.

— Чӧрс ньылышті, печкан ньылышті, мамӧс ньылышті, пес доддя ньылышті, тэнӧ на ньылышта.

И сійӧс ньылыштас.

Водзӧ мунӧ. Свадьба паныд лои.

— Чӧрс ньылышті, печкан, мамӧс, пес додь, турун додь и тіянӧс на ньылышта, — и найӧс ньылыштас. Водзӧ мунас. Ныв паныд лоӧ — вала лэччӧ.

— Чӧрс ньылышті... тэнӧ на ньылышта.

Ныв шуӧ:

— Менӧ эн ньылышт, лок миянӧ мунам да, мамӧ блин пӧжалас да, сійӧс сёй.

— Мунам.

Ныв шуӧ:

— Тэ паччӧрӧ кай да шойччышт, а ми блин тэныд пӧжалам.

Паччӧрӧ кайис Дышчик Рушку да и унмовсис. А эня-ныла пач ломтісны, рач донӧдісны да донӧдісны, Дышчик Рушкулы кынӧм вылас ляс пуктісны. Дышчик Рушкулӧн рушку потіс. Сэсся чӧрс уйкнитіс, печкан, сэсся ставныс петісны. Быдӧн нывлы пасибӧ висьталісны.