ДЫР ТЭНЫД ОВНЫ, ЧУКЧИ!

Дженьыдӧсь арся лунъясыд. Нёль час на и вӧлі, а ывлаыс заводитіс нин рӧмдыны. Вӧрын лунтыр ветлӧдлӧм бӧрын мӧдӧдчи гортӧ. Пельпомъясӧс личкисны пув тыра пестер да пищаль.

Патронъяс видзан сумкаын радӧн-радӧн куйліс 16 зарад. Лунтыр кыскалі сьӧрысь пищальӧс, повзьӧді вель уна сьӧла-тарӧс, но лыйны ни ӧти пӧткаӧс эг вермы.

Оз прӧстӧ шуны: вӧтчан кык кӧч бӧрся — некоднаннысӧ он кый. Ме, дерт, ӧти кӧчсӧ кыйи: пестер тыр лэччӧді пув. Но тар шыдӧн нуръясьыштны эз удайтчы. Нинӧм он вӧч, пӧткаяс жӧ ассьыс няньсӧ сёйӧны, некодлы абу окота веськавны вӧралысь син улӧ.

Лэччи вӧр кыскалан паськыд туйӧд, кодӧс унаысь нин талявлі тулыс-аръяснас. Корсюрӧ сявкнитлывліс шочиник зэр, сэсся бара заводитас пӧльтны васӧд тӧв. Вӧрыс вочасӧн гежӧдмис, шочджыка кутісны паныдасьлыны и чӧдлач да пув розъяс. Сӧмын гӧрд шляпаа гут кулан тшакъяс сярвидзисны туй пӧлӧн.

Кок улын трачмуні-чеги кос ув. И сійӧ жӧ здукас, воськов кызь сайын, кыліс бордъясӧн шенасьӧм шы. Эг на удит лэдзны пищальӧс пельпом вылысь, посньыдик пуяс костысь кыпӧдчис ыджыд чукчи. Ме чуйми: чукчи аскӧдыс лэбӧдіс неыджыд кос понӧль. Но лэбзьыны ылӧ эз вермы, уси бӧр: тыдалӧ, личкис ковтӧм грузыс.

Пестерӧс ӧдйӧ пукті муӧ, кватиті пищальӧс, котӧрті сэтчӧ, кытчӧ пуксис пӧтка. Вель дыр кынькъялі пуяс гӧгӧр, ачым мӧвпала, кыдзи аски кута вильӧдны дозмӧр кок. Кытшовті мӧдысь... коймӧдысь. Но пӧтка некӧн оз тыдав, быттьӧ му пырыс муніс.

И сэки син улӧ уси сісь конда. Матыстчи сэтчӧ, дрӧгнитіс сьӧлӧмӧй. Месянь воськов куим-нёль сайын куткырвидзис сійӧ, кодӧс корси. Чукчи эз лэбзьы, сӧмын ёнджыка топӧдчис конда бокӧ. Кык гӧгрӧс син видзӧдісны пищаля морт вылӧ. Уськӧдчи чукчи дінӧ. Сійӧ кӧсйис лэбзьыны, но эз вермы.

Топӧді пӧткаӧс морӧс бердӧ, а сійӧ некыдз оз кӧсйы сетчыны, кучкалӧ менӧ бордъяснас, нетшкысьӧ. Кокас тыдаліс вӧв сиысь путшкӧм петля, кодлысь помсӧ кӧрталӧма понӧльӧ.

Лои гӧгӧрвоана: чукчи шедӧма лэчкӧ, орӧдчыны абу вермӧма, но век жӧ путьмӧма пышйыны понӧльнас. Дерт, юрнас кӧ веськалі лэчкӧ, мынтӧдчыны эз вермы.

Чукчиӧс кӧсйи ловйӧн лэччӧдны гортӧ, но сэні жӧ ӧткажитчи аслам мӧвпъясысь. Сідзи нин сійӧ ёна мучитчӧма, колӧкӧ, кымын лун оліс тшыгйӧн, дзебсясис зверьясысь, йӧзысь.

Пӧрччи коксьыс петлясӧ, малышті сьӧд юрӧдыс, сэсся качӧді вывлань. Чукчи, бордъяснас швачкӧдчигтырйи, ылыстчис месянь, а регыд и дзикӧдз воши.

— Дыр тэныд овны, чукчи! — сӧмын и удиті горӧдны.

Татшӧмторъясыд некор оз вунны.