ДАРЬЯ КОЧАНОВА


— Тэ коді лоан? — шуис еджыд офицер.
— Ме? Прӧстӧй ныв, код быдмис сьӧд нянь вылын.
— И кытчӧ кутін туй? — Туй? Кытчӧ? Сэтчӧдз ылын...
— Тэ кӧсъян збоявны? Ми тэнсьыд вежам сер!

Тэ гӧрд? — Вир менам банын ӧзйыштӧ на тшук.
Мен шуліс мам: «Сёй кушман, лоан век тэ гӧрдӧн...»
— Тэ сералан?! — Ме кыпыд. Нэм мӧй кута бӧрдны?!
Шог водзын пидзӧс йылӧ некор ме ог сувт!

— Ме аддза, мый тэ збыльысь повтӧм и зэв збой.
Но кодлы служитан? Тэ пурйысь ва эн кой:
Победа — миянкӧд. Не сӧмын — шуд и шонді!

— Ха, ха! — ныв серӧктіс и лӧга вӧчліс син. —
Йӧз лолӧн вузасьны?! Эг кӧсйыв татшӧм чин!
Тат кӧин чукӧр тіян ветлыны оз понды!

1968