ГУАК ГУАЛИКОВИЧ
Кӧнкӧ-некӧнкӧ олӧ-вылӧ Бористӧй князь. Тышкасьнысӧ Гитлер кодь жӧ, зэв наян. Нимыс вӧлі Гуалик Зиладонович. Гӧтырыс вӧлі сылӧн Малфида Тимофеевна. Сійӧ вӧлі зэв озыр, китрӧй да лукав. Сылы вӧлі подчиняйтчӧ дас кык государство. Пӧкӧритӧм государствояс сылы дань мынтӧны быд во разнӧй зверь куӧн — низь куӧн, тулан куӧн, руч куӧн, анча куӧн, мӧскӧн и вӧлӧн.
Бористӧй князьлӧн вӧлі заптӧма деньгаыс куим пӧгреб, а ветлан-мунан деньгаыс сідз ветлӧ. Нӧшта вӧлі сылӧн дас кык багатыр, и медся ёныс на пиысь Великосил — дас нёль арӧса, быдмӧ на.
Бористӧй князь некодысь эз пов. Сӧмын ӧти печаль вӧлі сылӧн — кага эз чужлы. Князь гозъя ёна тӧждысисны, кыдзи эськӧ пи ли, ныв ли нажӧвитны. Ёна кевмысисны.
Коркӧ гӧтырыдлӧн и кутіс быдмыны рушку. Кад воис, и чужис пи. Нимсӧ сылы пуктісны Гуак. Гуак Гуаликовичлы вежай пыдди бӧрйисны Великосилӧс. Бористӧй князьлы зэв любӧ лои пи чужӧмыд, да тӧлысь кежлӧ бесплатнӧ восьтіс став лавкаяссӧ.
Бористӧй князь шуис ӧкмыс арӧс тыртӧдз некодлы не петкӧдлыны писӧ и некытчӧ не лэдзлыны. Вежайсӧ, Великосилӧс, индіс пиыс дорӧ телохранительӧн:
— Видз, — шуӧ, — да мед некоді эз аддзывлы!
Вот вежая-пиа кутісны овны дас коймӧд судтаын. Гуак Гуаликович быдмӧ не по дням, а по часам. Олісны сідз и лун, и мӧд, и вежон. Во джын коли. Детина быдмӧ зэв бура. Гуак коркӧ и шуӧ вежайыслы:
— Вежайӧ, лэдзлы менӧ ывла вылӧ. Сэтшӧма гаж петӧ видзӧдлыны вӧльнӧй светсӧ. Он кӧ лэдз — кула. А вежайыс шуӧ:
— Ветлы да кор айыдлысь разрешенье. Кор бать-мам благӧслӧвитасны, сэки ме тэнӧ и лэдза. А ӧні ог, пиӧ, лэдз.
Гуак Гуаликович да вежай лэччисны бать-мам дорӧ. Гуак и кутіс кевмысьны:
— Лэдз, любезнӧй айӧ, ывла вылас петавлыны.
Бать эз лэдз:
— Ӧкмыс арӧсӧдз некытчӧ ог лэдз. Ов гортын, сёй да ю, ёнмӧдчы!
Мортлы шог лои: кутшӧм пӧ тайӧ олӧм, видзӧны пӧ менӧ тюрьмаын моз.
Тырис нин сылы куим арӧс. Великосил вежайыс кодь тушанад лои. — А, — шуӧ, — коли бурӧн он лэдзӧ, пышъя!
Ӧкмыс арӧсӧдз нӧ кысь вермас овны татшӧм тӧлка да ён мортыд, керкаыд дзескыд сылы!
Вот коркӧ рытӧ-бурӧ кӧмасис-пасьтасис гусьӧн, кокчӧр костас кинжал сюйис и петіс дворечысь вой шӧр кад гӧгӧр. Некутшӧм сёйӧд ни юӧд эз босьт. Мӧдӧдчис сійӧ кытчӧ син видзӧдӧ, кытчӧ кок нуӧ, ачыс оз тӧд кытчӧ, эз на некор петав да.
Муніс лун дай мӧд, дай коймӧд. Вежон нин мунӧ, век ӧтарӧ нырӧн. Воис Великӧй ты дорӧ. Гӧгӧр гажа да югыд, садъяс быдмӧны. «Вот, — думайтчӧ, — кӧні олӧмыс! Кутшӧм тані вӧрыс-садйыс! А ме со бать ордын тюрьмаын моз ола».
А поводдяыс зэв лӧнь. Гуак Гуаликович видзӧдӧ ва вылӧ. Друг мыйкӧ кутіс васӧ резны-кыпӧдны сыв нёль-ӧ-вит вылнаӧ. Пуны кутіс ваыс. Сэсся кыпӧдчис васьыс дас кык кока змей. И кутіс змейыд резны-локны Гуакыд дінӧ. Локтіс да кутіс джагӧдны:
— Кыдзи тэ юасьтӧг-висьтасьтӧг локтін да ме садйын гуляйтан!
Гуак Гуаликович кутіс таджъясьны-пыксьыны. Тышкасисны найӧ час кык-ӧ-куим. Кытчӧ пыксьыласны кокӧн, татшӧм гуранъяс кольӧны. А посни пуяссӧ ставсӧ лякӧны-нырӧны турун моз. Сэн найӧ суткиӧн-джынйӧн вермасисны. Гуак Гуаликович мӧд сутки тыригас сетіс змейтӧ му бердас дай виис. Аслас чужӧмыс вир да раз, быдсӧн чапалӧма змейыд — син ни пель оз тыдав. А кулігас змейыд чирӧстіс да чирӧстӧмыс кыліс дас кӧкъямыс верст. Чирӧстӧмтӧ и кыліс ӧти пастук, ты бокад вӧлӧма да.
— Мый тайӧ, — думайтчӧ, — коді горӧдіс? Нэм на эг кывлы татшӧм чирӧстӧмтӧ.
Вот коркӧ Гуак Гуаликовичлӧн садьыс петіс да мӧдӧдчис гортлань.
— Аттӧ, — шуӧ ачыс, — бать-мамлысь благословенньӧ эг босьт да, вот мый сэсся лои.
А Бористӧй князь сэк кості лэптіс тревога: пи, пӧ, воши код тӧдас кытчӧ. И юӧр лэдзис — юӧртіс телефонӧн и радиоӧн, и газетъяс пыр: вошис пӧ пи, да эз-ӧ кодкӧ кывлы ли, аддзывлы ли. Став народсӧ Бористӧй князь тшӧктіс чукӧртны ас княжествоас, уна державаысь. Чукӧртіс и кутіс быдӧнлысь юасьны:
— Эн-ӧ кодкӧ аддзылӧ пиӧс? Воши менам пиӧ!
Некод эз вермы висьтавны. А юӧртӧ кыліс пастукыд, локтіс дай висьталіс:
— Вот, — шуӧ, — помещиклы ме пастукала кызь во. Некор на эг кывлы Великӧй ты дорысь сэтшӧм чирӧстӧмтӧ. Синмӧн эг аддзыл, а кывны — кывлі. Колӧ видлыны, эз-ӧ сэні мыйкӧ ло.
Бористӧй князь аттьӧаліс пастукӧс.
Коли лун дай мӧд. Гуак Гуаликовичыд ачыс локтӧ — ставнас лӧзӧдӧма, пыктӧма, сёрнитны нин оз вермы. Больничаӧ нуӧдісны, кутісны лечитны ёна. И мортыд кутіс бурдны.
Пи тырвыйӧн бурдіс коркӧ и воис гортӧ. Бать-мамлы любӧ. Бара восьтісны лавкаяс. Гуак Гуаликович бара кутіс важ моз овны гортас. Оліс сійӧ сідзи вежон-мӧд, гашкӧ, во джын. И бара кутіс гаж петны гуляйтыштны. Бара вежайыслысь кутіс корны:
— Вай лэдз ывла вылӧ, абу ӧд нин ме дзоля.
Арӧс вит нин сылы вӧлі. А Великосил оз лэдз:
— Ме аснаукӧн ог вермы тэнӧ лэдзны. Бать-мамыдлысь ветлы да юав.
Гуак Гуаликович кутіс кевмысьны айыслы:
— Рӧдимӧй батюшко, лэдзлы жӧ менӧ гуляйтны вӧльнӧй свет вылас!
— Кор кад воас, сэки и лэдза, — шуӧ батьыс.
— А лэдзанныд — муна, и он лэдзӧ — муна!
Эз кывзы айсӧ Гуак Гуаликович. Вой узис. Мӧд асыв босьтіс дас кык багатырӧс и петіс гортысь.
А Гуак Гуаликовичлӧн вӧлӧма воронӧй вӧв, сыкӧд ӧттшӧтш чужлӧма. Вот найӧ босьтісны сийӧс-завод — седелка черкраснӧй, пражки олляшнӧй, шиень булатнӧй, пӧдпруга шёлковӧй, стремена серебраннӧй. Вӧвъяс вылӧ пуксисны дас кык багатыр, дас коймӧд Гуак Гуаликович. Вартіс вӧлӧс Гуак, кутісны скачитны пу йывъяссьыс выліті, ен пивъяссьыс уліті. Мӧдӧдчисны найӧ Пучай ю вылӧ купайтчыны. Пучай юлӧн пасьтаыс — ӧти километр, зэв джуджыд да визув. Муткыралӧ, запусысь моз и лэччӧ ваыс.
Найӧ мунісны пӧшти вежон. Толькӧ дрӧжжитӧ муыс. Мыйӧн Пучай ю тыдовтчис, Гуак пыр и пӧрччысис. А Великосил и шуӧ:
— Тані ӧд, вежапи, оз позь купайтчыны! Коді купайтчылӧма, ловйӧн абу на петлӧма.
— Ок, повзьӧмныд тай! — шуӧ Гуак.
Вӧв вывсянь чеччыштіс ваӧ и километра джын кымын варччис ва воча, сэсся ва бӧр кывтіс километра вит кымын. Чери моз и ворсӧ. Сэсся бӧр петіс берегӧ да локтіс дас кык багатыр дорӧ.
— Ті нӧ мый видзӧданныд!? Ме купайтчи да ёнми быдӧн. Зэв глянитчис. Вай ставным купайтчам!
А багатыръяс оз лысьтны, вӧвъяс вылысь оз и лэччыны.
— Нӧрӧвитлӧ либӧ, — шуӧ Гуак Гуаликович, — ме бара на купайтчышта.
Пырис ваӧ, вуджис ю шӧрӧдз и друг воши — вапытшса змей кватитіс Гуакӧс. Дас кык багатыр повзисны быдӧн: «Мый нӧ, кытчӧ воши? Бористӧй князь ставнымлысь юрнымӧс керавлас».
Шогсисны, шогсисны дас кык багатыр. Керны нинӧм. Найӧ бӧр гортлань бергӧдчисны. А компасыд абу дай ылалісны, туйтӧ оз тӧдны, сьӧдас мунӧны.
Но мед найӧ ветлӧны. А васа змейыд кыскис Гуак Гуаликовичӧс пещераӧ, му пыдӧсӧ. Куим ӧдзӧс сайӧ пыртіс. Быд ӧдзӧсын кызь вит пудъя томан.
— Ак, — шуӧ, — Гуак Гуаликович, томӧн тай петӧмыд гуляйтны. Мыйла тэ юасьтӧг кутін купайтчыны менам юын? Тэнӧ ме ӧні ловйӧн ог лэдз! Часлы, ветла песла, ломта кӧрт пачӧс, жарита да сёя, ульӧн тэнӧ ог кут сёйны, — шуӧ змейыд.
Думайтчыны кутіс Гуак, шогӧдіс.
— Аттӧ, — шуӧ, — бать-мам благословенньӧтӧг муні да, со мый артмис. Кыдзкӧ ог-ӧ вермы татысь спаситчыны?
Думайтчис, думайтчис да босьтіс юрысь шапкасӧ и сӧвтіс сэтчӧ дзимбыр. «Кор кутас пырны, синмас койышта да оз-ӧ путайтчы. Вот эськӧ кутшӧмкӧ ӧружйӧ кӧ», — думайтӧ ачыс.
Маласис-керис вылысь и улысь — нинӧм эз сюр. Чеччыштліс, да ки улас веськалі кӧрт йитӧд. Кык кинас дернитіс, да йитӧдыд и ори. Киас коли этатшӧм кӧрт палич.
— Вот тайӧ бур. Первой дзимбыр лыанас койышта, сэсся тайӧн варта! — шуӧ.
Воис змей, кутіс ломтыны кӧрт пач. Кылӧ, восьтіс первой томан — йиркмуні воссис первой ӧдзӧс. Ачыс ропчитӧ:
— Эй, Гуак Гуаликович, локта ӧд ме, жарита тэнӧ да ньылышта!
— А гашкӧ, тэнӧ на жаритасны. Кыдзи удайтчас, — шуӧ Гуак Гуаликович.
— Ок, ещӧ и сёрнитӧ — эштӧма нин тэнад том олӧмыд, эштӧма!
Змейыд восьтіс мӧд ӧдзӧс.
— Ок, Гуак Гуаликович, эз ӧд ков гортсьыд петны. Прӧщайтчы жӧ том олӧмыдкӧд!
Восьтіс коймӧд ӧдзӧстӧ.
— Эй, добрӧй молодеч, лок жӧ, лок! Жарита тэнӧ кӧрт пач вылын да ӧтчыдысьӧн ньылышта!
Юртӧ сюйис ӧдзӧсӧ змейыд, а Гуак и койыштіс дзимбырнад.
— Ок, ещӧ и коясьӧ!
Змейыд кутіс синъяссьыс дзимбырсӧ перйыны — гудйыштӧ да гудйыштӧ. Гуак Гуаликович сетыштіс паличнад юрас.
— Эн кучкась перчаткинад! — горзӧ змейыд.
Омӧлика кучкӧмыд сылы нинӧм кодь. Гуак Гуаликович кыкнан кинас кутчысьӧмӧн бара вартіс. Сэсся ещӧ да ещӧ — юрсӧ пазӧдіс, юр вемыс быдсӧн петіс.
Гуак петіс пещераысь, кыскис змейлысь тушасӧ няша вылӧ да столбӧ гижис: «Гуак Гуаликович куш кырымнас виис змейӧс». Ачыс сэсся мӧдӧдчис сэтчӧ, кытчӧ кольлі дӧрӧм-гачыс.
Локтіс сэтчӧ — тӧварышъясыс абуӧсь. И воронӧй вӧлыс абу.
— Аттӧ, — шуӧ, — вот вӧлисти тай лоӧ кувны тані: вӧвтӧгыд ӧд он мун.
Ӧтарӧ ветліс, мӧдарӧ ветліс. Аддзис вӧвтӧ — пельӧдзыс вӧв вӧйӧма няйтӧ. Коркӧ дырӧн вӧвтӧ шедӧдіс сійӧ. Бӧр ӧтлаасисны да восьлӧн веськӧдчисны гортлань. Вӧв и ачыс — тшыгӧсь.
Лун и мӧд мунӧны. Вӧв мыйкӧ да мыйкӧ век курччыштӧ, дай справитчис. А Гуак и эбӧстӧм. Мунісны да мунісны. Коркӧ и воисны Бористӧй княжествоӧ. Бать-мамлы зэв любӧ — бара на пиныс воис. Звӧнӧн встречайтісны.
А дас кык могучӧй багатыр абу на и волӧмаӧсь. Найӧ веськалӧмаӧсь дзик мӧдлаӧ.
Ветлӧдлісны найӧ вежон куим. Коркӧ и кылісны морт шы: «Тпру!» да «Ыть!», да «Бӧрӧзда!» горзӧ. Ещӧ на мунісны вежон кык. Морт гӧлӧс кылӧ, а некод оз тыдав. Коркӧ дыр мысьт аддзисны — дядьӧ гӧрӧ серӧй вӧла.
— Здорово, дядь! Гӧран? Кыдзи асьтӧ шуӧны? — юалӧны багатыръяс.
— Микула Селянинович ме, — шуӧ дядьӧ.
— Мый нӧ гӧран этатшӧм лёк мусӧ? Ставыс тай из.
— А вот кӧсъя тась нянь сёйны. А ті кытчӧ-мый мӧдӧдчӧмныд?
— А ми дасьӧс сёям, — шуӧны багатыръяс. — Петім вӧльнӧй светас асьнымӧс петкӧдлыны да йӧзсӧ аддзӧдлыны.
Асьныс эськӧ ылалӧмны, оз тӧдны гортӧ туй.
— Вот, дядьӧ, ми кытшовтім став светсӧ нин да кывлім — эстӧн-эстӧн нималӧ Бористӧй князь. Кӧн нӧ сэтчӧ туйыс? — юалӧны Микулалысь.
— Ок, бур пиян, багатыръяс, ылын ӧд сійӧ, тӧлысь джын на колӧ мунны. Вот этадзи кӧ пыр мунанныд, и воанныд.
Микула Селянинович кутіс думайтчыны, мый пӧ тані ме гӧра. Йӧзыс пӧ тай гӧртӧг олӧны да пӧтӧсь. Часлы пӧ, ме йӧзыс моз кута овны.
Гӧрсӧ и койыштіс сійӧ. Койыштіс да жаль лои. Шуӧ:
— Ме, багатыръяс, уджавтӧгыд овнытӧ ог вермы. Вайӧ гӧрсӧ бӧр, гашкӧ, ковмас на коркӧ.
Кыкӧн мунісны, гӧрас кутчысисны — эз и вӧрзьы гӧрыд.
— Эй, — шуӧ Микула Селянинович, — кӧсъянныд став светсӧ пӧкӧритны, а гӧр он вермӧ лэптыны! Мунӧ гортаныд ӧдйӧ, да бур морт шӧрӧ эн веськалӧ — пӧгибӧ воанныд!
Найӧ сэсся прӧщайтчисны Микула Селяниновичкӧд да чукӧрнаныс веськӧдчисны Бористӧй княжество корсьны.
Мунісны найӧ тӧлысь джын. Коркӧ и воисны Бористӧй княжествоӧ. Встречайтісны дас кык багатырӧс звӧнӧн, пушкаясысь лыйсьӧмӧн, разнӧй нязганӧн. Бористӧй князь вӧчис праздник, гашкӧ, тӧлысь кежлӧ. Став государство гуляйтӧ. Толькӧ юӧны да сёйӧны.
Бористӧй князь, Гуак Гуаликович и Великосил юӧны ӧтлаын. Айныс и коддзыштіс коркӧ. Коддзис, дай шуӧ:
— Вот, бара ставным ӧтлаынӧсь. Ми кодь ёныс ӧні вӧльнӧй свет вылас мӧд абу. Ми пӧкӧритім нин дас кык государство. Вуг кӧ сюрас миянлы, мусӧ бергӧдам. Став светсӧ аслыным пӧкӧритам. Нелямын во сэсся празднуйтны кутам!
Мортыд гажмыштіс да ышмис прамӧя. Эсійӧ Гитлерыд моз жӧ ошйысьӧ пӧкӧритны став мусӧ аслыс. Пӧкӧритам пӧ кутшӧм эм му вылас государство. Зэв ӧд скӧр да мудер вӧлі сійӧ.
Но ладнӧ. Мед сійӧ ошйысьӧ. Вот, кылӧ, кодкӧ тутсӧ тутсанӧн:
— Бористӧй князь, пет вай вермасьны, вынӧн бертчыны. А он кӧ пет, став царствотӧ жугла и сота!
Думыштчыны лои Бористӧй князьлы. Вель гажа эськӧ вӧлі да палялі тай, шай-паймуні.
А тутсіссӧ Прекраснӧй Созомент. Преподобнӧй Луд вылын на сійӧ, квайтымын верст сайын на. Бористӧй князь и шуӧ:
— Коли воис, ветлам да пӧкӧритам Прекраснӧй Созоментӧс.
Дас кык багатыр пуксисны дас кык вӧв вылӧ, боевӧй паличьяс босьтісны и давай скачитны Луд вылӧ.
Воисны и сувтісны километр кымын сайӧ. И кутісны сёрнитчыны, кодлы первой уськӧдчыны Прекраснӧй Созомент вылӧ.
— Первой лоӧ мунны Великосиллы, — шуӧ Бористӧй князь. — Он кӧ вермы, сэки ми зырӧдам.
Прекраснӧй Созомент шойччӧ вӧлі шатёрын. Шатёр дорас йирсьӧ вӧлыс — зэв ыджыд: вӧв кынӧм увтіыс ставныс эськӧ тӧрасны мунны.
— Аттӧ, ён жӧ, тыдалӧ, ачыс. Татшӧмыс тай некор на эз нимавлы. Код нӧ тайӧ татшӧмыс да кысь? — сёрнитӧны багатыръяс.
Прекраснӧй Созомент казяліс да петіс шатёрысь. Сӧліс багатырскӧй вӧв вылӧ и воча петіс Великосиллы. Ӧти вачкис вӧлыслы, мӧдыс вачкис вӧлыслы. Уськӧдчисны воча. Прекраснӧй Созомент лӧсьӧдчис да вартіс. Великосил уси, кыдзи корӧсь пӧв. Уси муӧ, и садьыс воши.
— Аттӧ, — шуӧ Бористӧй князь, — Великосилӧс ӧд уськӧдіс. Мый кутам керны?
Гуак Гуаликович скӧрмис сэтчӧ да вартіс вӧлыслы — вӧлыс вӧйис пидзӧсӧдзыс. Мӧдысь вартіс, да вӧлыс морӧсӧдзыс вӧйис. Гуак Гуаликович коймӧдысь вартіс. Вӧлыс скӧрмис, сӧрвитчис да зырӧдіс Прекраснӧй Созоментлы воча. Гуак Гуаликович вартіс боевӧй паличнас, Прекраснӧй Созомент эз вермы кутчысьны да уси. Гуак Гуаликовичлӧн вӧв кыкнан водз кокъяснас сувтіс Созоментлы морӧс вылас. Гуак кыскис саблясӧ да кӧсйӧ нин керыштны. А Прекраснӧй Созомент и кутіс кевмысьны:
— Ак, могучӧй багатыр Гуак Гуаликович, эн сет меным смерть. Ме ӧд Амазонскӧй принцесса Велиума. Ме ӧд эг лок тэныд противник вылӧ, локті ме рӧвеснича вылӧ. Глянитча кӧ, лоан меным любимӧй рӧвесник.
Гуак Гуаликович и мездіс морӧссӧ. А сьӧлӧмас быттьӧ би сюйисны. Кутісны найӧ сэні сёрнитны-тӧдмасьны, имяннӧй чунькытшъясӧн вежсисны. Амазонскӧй принцесса и шуӧ:
— Могучӧй багатыр Гуак Гуаликович, ме вылӧ эн видзӧд, мый ме татшӧми. Ӧні ме абу чветнӧй платтьӧа. Вот куим лун мысти ыста калёнӧй стрелаӧн портретӧс. Тэ видзӧдлы, глянитча кӧ да ковны кӧ кута, лок корасьны Амазонияӧ. Босьт запас куим во кежлӧ, запастӧг туйӧ эн пет.
Найӧ сёрнитігкості Великосил кутіс ыма-амакывны, палявны кутіс.
Велиума прӧщайтчис Гуак Гуаликовичкӧд, пуксис вӧв вылӧ. Ӧтиыс ӧтарӧ муніс, мӧдыс — мӧдарӧ. Гуак Гуаликович муныштіс тӧкӧтьӧ да кутіс юрсисӧ нетшкыны:
— Ак, воліс гӧтырпуыд ас кокнас, да, йӧйыд, лэдзи! Ӧні сэсся куим во виччысь!
Локтісны гортӧ. Гуак Гуаликович водіс и висьмис ныв вӧснаыд — оз сёй ни оз ю. Лун оліс, мӧд оліс. Коймӧд лунтӧ оз нин вермы виччысьны. Тӧкӧтьӧ на заводитчӧ кыа, югдӧ нисьӧ оз пӧраыс, сюйліс кисӧ юрлӧс улас — портретыс сэні нин, воӧма. Кабала пытшкӧ тубыртӧма.
Пешкыльтіс кабала — сэтшӧм мича ныв, красавица: яй пырыс лыыс тыдалӧ, лы пырыс вемыс, вем пырыс ставыс, мый керсьӧ свет вылас. «Аттӧ, кутшӧм мича, — думайтӧ Гуак Гуаликович. — Сейчас жӧ муна корасьны Амазонияӧ!»
Гуак Гуаликович муніс Великосил дорӧ да кутіс висьтавны гӧтрасьӧм йылысь думсӧ.
— Чӧв, — шуӧ Великосил, — кытчӧкӧ мунан, невестаыс корсьтӧм на!
— А менам корсьӧма нин, со.
Сетіс Амазонскӧй принцесса Велиумалысь портретсӧ. Великосил мыйӧн аддзис, пидзӧс вылас и уси. Нинӧм эз вермы кыв шуны.
— Сейчас жӧ мунам и корасям, мед кодкӧ оз мырддьы. Лок, ӧні жӧ лэччам, бать-мамлысь благословенньӧ корам, найӧ тшӧктасны-оз тэд гӧтрасьны.
Вежая-пиа лэччисны бать-мам ордӧ, улыс судтаӧ.
— Вай, бать, благӧслӧвит гӧтрасьны, — шуӧ Гуак Гуаликович.
А бать и шуӧ:
— Чӧв, дона пи, Гуак Гуаликович, тэд дас куим арӧс на, том на зэв. Дай невестаыс на корсьтӧм.
— А менам корсьӧма нин!
— Коді сэтшӧмыс? Кысь?
Гуак Гуаликович петкӧдліс Амазонскӧй принцессалысь портрет. Бористӧй князь акӧстіс толькӧ.
— Сейчас жӧ мунам! Кӧть став светсӧ путкыльтам, а тайӧ красавицаӧс чуктӧдам! Асьнымӧс ог жалитӧ ни!
Вот сэсся мам и бать сетісны благословенньӧ. Ставыс сӧгласитчисны пинысӧ мӧдӧдны корасьны Амазонияӧ.
Мунны-мунны, а кытчӧ муннысӧ? Вӧлӧн ни подӧн он во сэтчӧ. А ваӧн зэв ылын. Бористӧй князь чукӧртіс государствосьыс став йӧзсӧ да кутісны тӧлкуйтны, кыдзи воны Амазонияӧ.
— Му кузя, — шуисны, — он во — нюръяс да тыяс, и быдсяма лёк местаыс эм уна.
Шуисны вӧчны судно — куим винтӧн, куим трубаӧн и куим пачӧн. Обшивайтны первой сорт стальӧн. Лӧсьӧдны пӧ колӧ и парус, мед мунны винтӧн и парусӧн.
Сідзи и шуисны керны. Вайӧдісны мастеръясӧс, кутісны стрӧитны вой и лун. Деньга оз жалитны — грабитӧм деньгаыд Бористӧй князьлӧн уна, оз жалит.
Судно вежонӧн и эштіс. Видлісны суднолысь сила — сэтшӧм бур да ён, портсӧ ставнас кутіс вӧрӧдны.
— Тайӧ вермас нин мунны, — шуисны видлалысьяс.
Но ладнӧ. Запас грузитісны куим во вылӧ. Грузитісны вӧр запас: ремонт кӧ ковмас вӧчны. Мастеръясӧс, техникъясӧс босьтісны морт сё вит, дзонь войска.
Гуак Гуаликович кутіс прӧщайтчыны мам-батьыскӧд. Батьыдлӧн синваыс и петіс:
— Гашкӧ, тэнад бергӧдчӧм оз ло да. Ме пӧрысь нин. Мый и лоас мекӧд. Ті ставныд мунанныд, ме ӧтнам коля.
— А ме ӧд бӧр локта куим во мысти.
— Но ладнӧ, — шуӧ Бористӧй князь. — Благӧслӧвита, дона пи, ылі муӧ ветлыны. Менам эм апанча — пуктан кӧ юрад, штык ни пуля оз сибав. Сэсся эм панцыр, ещӧ сійӧ сета, морӧстӧ кутас видзны. Ещӧ эм талисман — чуняд кӧ сюян, коктӧ кутас видзны. Ещӧ эм вирсонӧвӧй шы — кодлы йывнас тшукӧдан, сійӧ и кулӧ.
Гуак Гуаликович пасьтасис-кӧмасис по-боевому, прӧщайтчис, судно вылӧ сӧліс и мӧдӧдчисны куим му сайӧ, Амазонияӧ, Амазонскӧй принцессаӧс коравны.
Мунісны лун, мунісны вит, мунісны вежон море вывті. Судно муткыртӧ-мунӧ винтӧн и парусӧн. Вот сэсся тыдовтчис Татарскӧй царство. Татарскӧй царицаыс лэччӧма пристань дорӧ да кык еджыд чышъянӧн ӧвтчӧ.
— Эй, Гуак Гуаликович, сувтлы вай. Ме пӧгибӧ вои, разнӧй народ разнӧй кыла лои — мунзыр да манзыр, чуваш да сиваш. Эз кутны подчиняйтчыны. Кӧні коми, кӧні тотара, кӧні мунзыр, кӧні манзыр. Нинӧм ог гӧгӧрво, и оз кывзыны. Сибӧдчылан кӧ, сё кызь блюд тыр зӧлӧта сета пӧрадок лӧсьӧдӧмысь. Мед ставыс татара ног кутасны сёрнитны.
А Гуак Гуаликович ӧтвечайтӧ:
— Ӧні кадыс абу, корасьны муна!
— А ӧні кӧ он эшты, бӧр косігад кӧть сибӧдчыл.
— Гашкӧ, сэки сибӧдчыла.
Судно эз и сувтлы, век муніс водзӧ. Татарскӧй царство колис бӧрӧ. Татарскӧй царствосянь судно муніс ещӧ мӧд сы дыра. Воисны Индийскӧй царствоӧ. Тані некод эз встречайт, звӧн ни нязган, нинӧмыс оз кыв.
— Видзӧд, — шуӧ Гуак Гуаликович, — эз и встречайтны тані. Чӧвлы, мӧдысь бӧр косігӧн сибӧдчылам да тӧдмалам, кодъяс тані олӧны.
Бара мунісны вежон и мӧд, и коймӧд. Толькӧ море, сэсся нинӧм. Вот коркӧ ӧти матрос и казяліс: ӧти шонді улын мӧд шонді, му бердас.
— Мыйла тайӧ кык шонді? — тӧлкуйтӧны судно вылын.
Некод нинӧм оз тӧд. Ветлісны, висьталісны Гуак Гуаликовичлы. Гуак петіс палуба вылӧ, видзӧдліс подзорнӧй трубкаӧ.
— Тайӧ, тыдалӧ, Трикирила Золотоверхия кар, ставнас червонӧй зӧлӧтаысь. Дыр кӧ кутан видзӧдны, синмыд бердӧ.
Гуак Гуаликович тшӧктіс сибӧдчыны кар дорӧ. Матыстчыны кутісны, да босьтіс лёк поводдя. Качайтіс да качайтіс, путкыляліс-паткыляліс. Ставсӧ жугліс, трубаяс и парусъяс и став народсӧ йӧймӧдліс. Жугліс-дрӧбитіс суднотӧ да шыбитіс берегӧ, самӧй портас.
Но ладнӧ. Коркӧ и садьмыны кутісны йӧзыс — кодкӧ доймӧма, кодкӧ кольмӧма, кодкӧ кулӧма.
Карысь лэччис куим зӧлӧта каретаын Проклятӧй Лютра. Босьтіс Гуак Гуаликовичӧс и катӧдіс ас ордас. Кайигас Гуак Гуаликович сетіс приказ: судно вӧчны важсьыс бурджыка.
Вот Проклятӧй Лютра да Гуак Гуаликович воисны двореч дорӧ. Дворечыс — видзӧдны он вермы, ставнас югъялӧ, зарниӧн ломзьӧ. Пырисны. Гуак Гуаликович да Великосил пуксисны пызан сайӧ гӧститны. Дерт, сэні кӧлӧкӧльнӧй звӧн, пушкаясысь лыйсьӧм, разнӧй-разнӧй музыка и нязган. Лютра петавліс да локтіс сэтшӧм чветнӧй платтьӧа.
— Вот, Гуак Гуаликович, мыйкӧ кӧсъя юавны. Позяс-оз?
— Позяс.
— А вот сідз и сідз. Ме нин тэнӧ виччыся кызь ӧкмыс во. Ме тэнӧ тӧді чужтӧдзыд на дас ӧкмыс во водз, жӧник вылӧ аслым видзлі. Уна жӧник воліс, ме некод сайӧ эг мун. Босьтан-он?
— Проклятӧй Лютра, ме тэнӧ ог вай, — шуӧ Гуак Гуаликович.
— А он кӧ вай, и олас, — шуӧ Лютра.
Сёрни помасис, сёйсис-юсис. Судно дась. Гуак Гуаликович кутіс мунны. Лютра прамӧя эз и прӧщайтчы. Подӧн мӧдӧдіс вежая-пиаӧс.
А Лютра ордйӧдіс найӧс мӧд уличаӧд. Пӧрччысьӧма да налы воча петіс:
— Эк, Гуак Гуаликович, эта вылӧ нӧ вежыд оз пет али?
— Оз, — шуӧ, — пет.
— Оз кӧ, и олас, — шуӧ Лютра, — гашкӧ, мӧдысь каитчыны на кутан!
Но ладнӧ. Великосил да Гуак Гуаликович судно вылӧ пырисны, и судно мӧдӧдчис. Бӧрд кӧть сьыв сэсся.
Мунісны найӧ лун, мӧд дай коймӧд. Нёльӧд лунӧ бара лёк поводдя кыскис. Воддза серти куим пӧв ёнджыка путкылявны кутіс. Бара ставыс чегласис да бара косӧ шыбитіс, берегӧ, ді вылӧ. Коді доймӧма, коді восӧ.
Бара кутчысисны ремонт вӧчны. Гуак Гуаликович тшӧктіс важсьыс ёнджыкӧн керны — бронь пуктыны кык пӧвстӧн. Мастеръяс, техникъяс, садьмыштісны да, кутчысисны ремонтӧ. Гуак Гуаликович да вежайыс босьтісны вирсонӧвӧй шы да кайисны ді вылӧ.
Ді вылыс туӧма бадьясӧн, турунӧн, ниаясӧн и пожӧмъясӧн. Гуак Гуаликович да Великосил гижасьӧны-керӧны, кутшӧм пуяс быдмӧны, кутшӧм турунъяс эмӧсь. Ставсӧ гижалӧны. А кадыс тулыс, быдсӧн чветитӧ.
Вежая-пиа мунісны, мунісны сідзи. Воис яма — струба кодь. Зэв джуджыд. Видзӧдлісны — гу пыдӧсыс оз тыдав, пемыд.
— Аттӧ, Гуак Гуаликович, — шуӧ Великосилыс, — пыдӧсыс оз тыдав. Дай кодкӧ вӧчӧма чугуннӧй столб. Пыдӧссӧ колӧ тӧдмавны. Видзӧдлісны бинокльӧн — пыдӧсыс тыдалӧкодь. Пыднаыс кӧкъямысдас сыв кымын. Кутісны бурджыка видзӧдны — сэні морт сулалӧ бауӧн, кӧрт чепӧн столбас дорӧма. Гуак Гуаликович шуӧ:
— Вай горӧдлам. Тайӧ абу буртор.
— Код тані ямаас? — ӧтчыд горӧдісны. Эз кыв. Мӧдысь горӧдісны, бара эз кыв. Коймӧдысь горӧдісны:
— Коді сэні, крещеннӧй али некрещеннӧй?
Кодкӧ, кылӧ, шыасис му пытшкысь:
— Тайӧ, — шуӧ, — ме, крещеннӧй. Ті нӧ коді?
— А тайӧ ми, Гуак Гуаликович да Великосил.
— Ог верит!
— А тэ нӧ ачыд коді?
— Ме Жеогонь дядь. Ола нин тані куим во, а вердӧны куш идзасӧн да рабйӧн, чӧвтлӧны скӧтлы моз. Ог, — шуӧ, — верит тіян висьталӧмлы. Гуак Гуаликовичлы, менам арталӧмӧн, ӧні дас куим арӧс да куим тӧлысь. Батьыс на сійӧс ӧкмыс арӧсӧдз эз кӧсйы лэдзлыны гортсьыс. Ог, — шуӧ, — верит.
— Вернӧ, — шуӧ. — Ӧтиным Гуак, а мӧдным Великосил.
— Ог верит. Найӧ кӧ воисны, налӧн эськӧ вӧлі вирсонӧвӧй шы.
— А миян эм!
— Вайӧ либӧ тшукӧдлӧй шынас чугуннӧй столбӧ, — кутіс кевмысьны Жеогонь.
Гуак Гуаликович босьтіс вирсонӧвӧй шысӧ да тшукӧдіс чугуннӧй столбӧ. Чугуннӧй столб колсмуні-поті.
— Здравствуй, племянник, — Жеогонь петіс да шуӧ.
— Здравствуй, Жеогонь дядь. Ме тай тэнӧ эг тӧд, а тэ тӧдін менӧ.
— А ме тэнӧ рӧдитчытӧдзыд на тӧдлі. Ме тэнӧ важӧн нин виччыся. Не кӧ тэ, не мынлыны меным татысь.
Зэв ёна найӧ сэтӧн сёрнитісны.
— Вай ветлам ме ордӧ, — шуӧ Жеогонь. — Менам вӧлі тані имение и семья. Ӧні, кӧнкӧ, нинӧмыс нин абу, ставсӧ сотісны да жуглісны.
Мунісны куимӧн видлыны Жеогоньлысь имение — кольӧма сӧмын местаыс. Ставсӧ жугӧдӧма.
— Вот, — шуӧ, — племянник, эн лӧгась, а гӧститӧдны нинӧмӧн ог вермы. Мый сэсся керан? А кытчӧ нӧ мӧдін ачыд?
— Ме, — шуӧ, — мӧді Амазонияӧ, Амазонскӧй принцесса Велиумаӧс корасьны аслым гӧтыр вылӧ. Ылын-ӧ ещӧ сійӧ?
— Ок, — шуӧ, — Гуак Гуаликович, абу на матын. Мунны кӧ — воӧн-джынйӧн на. Но ме кӧ тэнӧ нарадита, воан аски лун шӧр кежлӧ. Вот менам сумкаын эм немродӧвӧй лук. Сета тэд кык лук. Мунны кутан, да воас би застава. Туй оз ло тіянлы. Немродӧвӧй луксӧ ӧтиӧс босьт да водзвылад койышт — биыс воссяс и туй воссяс. Сотӧмысь эн пов сэки. Мӧд луксӧ пукты морӧс зептад матӧ. Нуждаӧ кӧ воан, чӧвт ас водзад, и ме сэні лоа. Бӧр косігад шыасьтӧг эн мун. Ме, гашкӧ, тшӧтш тікӧдныд ветла Бористӧй князь царствоӧ. Ме ӧд тіян жӧ котырысь. Ме и отсавлі Бористӧй князьлы пӧкӧритны дас кык государствосӧ.
Гуак Гуаликович да Великосил сэсся прӧщайтчисны Жеогонькӧд, сӧлісны вӧчӧм судно вылӧ и водзӧ мӧдісны.
Мунісны найӧ час кык-ӧ-куим, сэсся тыдовтчис би — сотӧ, матӧ оз сибӧд.
Гуак Гуаликович кыскис зепсьыс лук, койыштіс ас водзвылас, да би воссис. Судно пырис, кык би костӧд муныштіс, и воисны Амазонияӧ. Амазонскӧй принцесса Велиума кыліс суднолысь свисток да ӧкмыс каретаӧн лэччис встречайтны. Здоровайтчис Гуак Гуаликовичкӧд, пуксьӧдіс ас каретаӧ да катіс царскӧй дворечӧ. Невеста юрбитіс бать-мамлы кок улӧ да шуис:
— Вот воис менам рӧвесник, висьталӧй мыйкӧ.
Чукӧртчисны рӧдвуж, сёрнитчисны и ладмӧдчисны — ӧкмыс бӧчка жемчуг приданнӧй, кык бӧчка драгоценнӧй камень, ӧти бӧчка бриллиант. А мукӧдторйыс нин сэсся мыйта колӧ. Шуисны аски венчайтчыны.
Этатшӧм жӧ вӧлі тувсов кад. И вот друг кутіс пемдыны. Пемдӧ и пемдӧ, кымӧр абу-а. Арся вой кодь лои пемыд. И кинь сявгӧ, би киньыс сідзи и лэбӧ. Повзисны весиг. Мый тайӧ татшӧмыс? Сэсся, кылӧ, кодкӧ буксӧ-тутсӧ:
— Вайӧ татчӧ Амазонскӧй принцесса Велиумаӧс. Он кӧ сетӧ, ставсӧ жугӧда и сота да тӧлӧда пӧимсӧ.
А буксӧ, вӧлӧм, биӧн лолалысь багатыр Кощей. Ачыс ӧкмыс сыв кузя. Тушаыс — морт, а бӧжыс — змей. Прамӧ биӧн локтӧ, сотӧ. Сійӧ кувлытӧмтор, некыдзи вины он вермы. Гуак Гуаликович корис бур вӧвсӧ, панцыр да вирсонӧвӧй шы. Лӧсьӧдчис петны паныд.
Гуак зырӧдіс. Матыстчыны кутіс, да биӧн сідзи и сотӧ Кощейыд. А Гуак Гуаликовичыдлӧн панцырыс бисӧ бӧр бергӧдӧ. Асьсӧ ачыс и сотіс биӧн лолалысь багатырыд. Гуак сибӧдчис Кощей дінӧ, шынас тшукӧдіс. Биӧн лолалысь багатыр кусыньтчис, бӧжнас сетіс да царство джынсӧ жугӧдіс. Кулігас Кощей горӧдіс на:
— Ак, Проклятӧй Лютра, виис тай менӧ Гуакыд!
Гуак Гуаликович чергӧдіс Кощейӧс да гортлань мӧдӧдчис. Тӧкӧтьӧ на муныштіс, километра ли, мӧд ли, и бара кутіс пемдыны. Дзик дзурс пемыд лои. Йиркӧдӧ-локтӧ чардалӧмӧн дас кык би кӧлеса вылын Проклятӧй Лютра.
— Аттӧ, — шуӧ Лютра, — менсьым дзӧля вокӧс тай виин! Казнита ӧні тэнӧ!
Гуак и повзис: виас татчӧ Проклятӧй Лютраыд. Вӧлыс сылӧн повзис жӧ дас кык би кӧлесаа Лютраысь, пидзӧс вылас уси. Гуак Гуаликович оз и тӧд, мый вӧчны. Дум вылад сылы уси немродӧвӧй лукыд. Босьтіс питшӧгсьыс да койыштіс ас водзас — Жеогонь дядьыс локтіс дас кӧкъямыс би борда вӧлӧн. Жеогонь вӧтӧдіс Лютраӧс сынӧдас. Вочаасисны найӧ и сибдісны. Пӧшти садьтӧг видзӧдӧ вӧлі Гуак налысь тышсӧ. Проклятӧй Лютра да Жеогонь олісны сэні ӧкмыс час. Некоді нинӧм эз вермы вӧчны ӧта-мӧдыслы, и найӧ мунісны ӧтиыс ӧтарӧ, мӧдыс мӧдарӧ. Ывла бара югдіс, быттьӧ нинӧм и эз вӧвлы.
Гуак Гуаликович бара пуксис вӧв вылӧ да тэрмасьтӧг мӧдӧдчис Амазонияӧ. Но ладнӧ. Гуак Гуаликович думайтӧ: «Дыр нюжӧдны нинӧм — пир да свадьба вӧчны дай венеч улӧ».
Венчайтчыны мунісны соборнӧй вичкоӧ. Престол гӧгӧр ӧти пӧв гӧгӧртісны, мӧдысь. Сэки друг вичкоӧ пырис сюра меж. Великосил казяліс — мыйкӧ абу ладнӧ. Бергӧдчис, воча муні и кутіс межӧс. Сюрӧдыс босьтіс и кыскис ывлаӧ. Гуаклӧн да принцессалӧн коли сӧмын чунькытшӧн вежсьыны. Но вот мыйкӧ клопмуні, лыбис лӧз тшын, да кор тшыныс разаліс, — невеста некӧні нин абу, воши. Гуак коли вичко шӧрӧ попъяскӧд. Кытчӧ лои Велиума — некод нинӧм оз тӧд. Коді шуӧ: поті вичкоыс, коді шуӧ: гымньӧв лыйис.
Керны нинӧм. Гуак Гуаликович шогаліс, шогаліс, пуксис судно вылӧ и веськӧдчис бӧр мунны. Коркӧ воис Жеогонь дядьыс ордӧ.
— Здравствуй, Гуак Гуаликович, невеста шеді-эз?
— Эз шед. Лои локны невестатӧг. Сідз и сідз лои, вошис венчайтчигкості. Локті тэ дорӧ, он-ӧ тӧд, кысь корсьны.
— Ок, — шуӧ, — дона племянник, ог тӧд, кытчӧ сійӧ лои. Сійӧ пырысь-пыр корсьны он на вермы. Вай, чӧвлы, корсям мӧдӧс, важ дорысь бурджыкӧс!
— Оз ков меным мӧдыд, — шуӧ Гуак Гуаликович. — Вай отсав Амазонскӧй принцессаӧс меным корсьны.
— Ок-ок-ок, сьӧкыд лоӧ сійӧс корсьны. Менам вичкоын эм чугун бӧлбан, кӧлдун. Сійӧ вермас тӧдны, вермас висьтавны. Но мукӧдсӧ сійӧ дыр оз висьтав.
— Ме вичча кӧть лун, кӧть тӧлысь, кӧть во, — шуӧ Гуак.
Жеогонь петіс вичкоӧ, кутіс кевмысьны. Кевмысис лун и мӧд, и коймӧдӧс. Нёльӧд луннас чугун бӧлбан висьталіс:
— Ловъя принцесса Велиума, но шедӧдны пӧ сійӧс — ковмас тэд либӧ Гуаклы юртӧ пуктыны. А кодлы юр пуктыны, ог тӧд.
Жеогонь петіс вичкоысь да шуӧ:
— Вот, Гуак Гуаликович, невестаыд ловъя, но куим во чуктӧдны оз на позь. А куим во мысти эськӧ и позяс, да тэд ли мен лоӧ юрнымӧс пуктыны.
— Всё равно, — шуӧ Гуак, — ог чӧвтсьы, кута перйыны.
— Но либӧ ветлы гортад, да куим во кор тырӧ, лок ме дорӧ. Эм батьыдлӧн вирсонӧвӧй меч. Сытӧг эн лок, сытӧг оз шед.
Гуак Гуаликович прӧщайтчис, сӧліс судно вылӧ и мӧдӧдчис гортлань. Трикирила Золотоверхия царство дорті муніс, некод эз шыась. Водзӧ муніс. Лун муніс, мӧдӧс муніс, воис Индийскӧй царствоӧ. Сибӧдчис судноыс портӧ. Гуак Гуаликович Великосилкӧд кайис да пырис дворечӧ. А Индийскӧй царствоын царыс вӧлі Далмат — ӧти кока улӧс вылын пукалӧ, чӧв олӧ, юр оз бергӧд. Эз и видзӧдлы сійӧ Гуак вылӧ. Вежая-пиа куритчисны, а эсійӧ оз и сёрнит. Цар Далмат оліс, оліс дай бергӧдчис жӧ.
— Аттӧ, кысь да мый ті усинныд татчӧ?
— Сідз и сідз, — шуӧ Гуак Гуаликович.
— Ок, томӧн на петӧма гуляйтнытӧ.
Уна кыв сійӧ эз и шу. Олыштіс да шуӧ:
— Менам ті кодь жӧ пи эм. Дас ӧкмыс арӧса нин, а ывла светӧ эг на лэдзлыв. Оз-ӧ позь вайӧдлыны сійӧс, силасӧ видлыны?
— А вайӧд, — шуӧ Гуак Гуаликович.
Кык багатыр костын вайӧдӧны сійӧс, багатыр Прекраснӧй Альдонӧс, кисӧ-коксӧ дорӧмаӧсь. Кыськӧ пышйӧдӧмтор ли, мый ли. Ӧдзӧсӧд ӧдва тӧрӧ, сэтшӧм ён. Госыс прамӧ тыдалӧ, быттьӧ вый чӧлан.
Разисны чепъяс, да Гуак Гуаликовичкӧд здоровайтчис Прекраснӧй Альдон.
— Вот ковмас вермасьны тайӧяскӧд, — шуӧ цар Далмат.
Гуаклӧн весиг сьӧлӧмыс кынкодь лои: Прекраснӧй Альдон кабырсӧ чабыртлас, да ва петӧ, сэтшӧм чорыд киыс.
— А коли тшӧктан, лоас вермасьны, — шуӧ Альдон.
Цар Далмат вешйис ылӧджык. Дворечыс вӧлі каменнӧй, ӧшиньыс уна, а мореыс матын. Гуак Гуаликович да Прекраснӧй Альдон сувтісны паныдӧн и кутчысисны. Гуак и шуӧ:
— Вот босьт менӧ и песлав, кыдзи верман. Кодарӧ верман, сэтчӧ шыбит!
Альдон босьтіс Гуакӧс, ӧтарӧ и мӧдарӧ заводитліс песовтны. Гуак эз и вӧрзьывлы. Мыр моз сулалӧ.
Далмат и повзис. Сэсся Гуак Гуаликович босьтіс ки пӧвнас, песовтіс, да Альдонлӧн чугун колоша кокыс швачмуні Далматлы ныр-вомас — ставсӧ разис, стенсӧ жугӧдіс да мореӧ лэбзис. А Далмат садьтӧг уси.
— Ак молодеч, — шуӧ Альдон, — тэ тай меысь ёна ён!
Коркӧ Далмат садяс воис.
— Вот, мый коран, Гуак Гуаликович, сійӧс и сета!
— Нинӧм оз ков, — шуӧ Гуак. — Прекраснӧй Альдонӧс босьта сьӧрысь, сэсся нинӧм.
Индийскӧй цар кӧсйис кывзысьны водзӧ. Мунісны, мунісны. Воисны Татарскӧй царствоӧ. Гуак Гуаликович сибӧдчыліс да колис Великосилӧс пӧрадок лӧсьӧдны, а ачыс да Альдон гортлань веськӧдчисны.
Вот и воисны коркӧ Бористӧй князь царствоӧ. Матыстчисны, да толькӧ гӧрд тыдалӧ — ставсӧ сотӧмаӧсь. Гуак Гуаликович ветлігкості дас кык государство ӧтувтчисны да Бористӧй княжествосӧ жугӧдісны, Бористӧй князьлысь синсӧ перъялісны, сюйисны тюрьмаӧ.
Гуак локтіс, чужйис томанӧ да пырис тюрьмаӧ дай кутіс юасьны:
— Кодъяс тані тюрьмаас эмӧсь?
— Кодкӧ тай, кылӧ, воис ас морт, — шуӧ Бористӧй князь.
— Ме локті — Гуак Гуаликович. Этатчӧдз тэнӧ керисны?
— А вот тай мый керисны миянкӧд. Ог верит, ыштӧ пиӧ менам ловъя!
Ӧтиыс висьтасьӧ пиӧн, а мӧдыс оз верит.
— Ме эськӧ да, — шуӧ Гуак Гуаликович, — мый меысь, нинӧм ог вермы керны.
— А збыль кӧ пи, верман лечитны и справитны менӧ, и царствотӧ бӧр кыпӧдны.
— А кыдзи тэнӧ верма лечитны?
— Да, — шуӧ Бористӧй князь. — Сьӧкыд судзӧдны лекарствотӧ. Гашкӧ, и юртӧ пуктан, гашкӧ, и он. Уна му сайын, уна ва сайын олӧ Огненнӧй Щит — Пламеннӧй шы. Верман кӧ сійӧс, ак, сылӧн эськӧ литра сӧптыс. Сійӧн эськӧ и лечма ме.
— Висьтав туйсӧ, да ме ветла, — шуӧ Гуак.
Тӧлкуйтісны-сёрнитісны. Гуак прӧщайтчис бать-мамкӧд, петкӧдіс воронӧй вӧвсӧ, пуксис и мӧдӧдчис во кежлӧ.
Муніс, муніс восьлӧн, дай морттӧ кутіс вугрӧдлыны. А Ивашко, медся ыджыдыс, коді рӧзӧритіс Бористӧй княжествотӧ, и вӧтӧдіс Гуакӧс. Ивашко казяліс Гуаклысь вугралӧмтӧ да лӧсьӧдчис уськӧдчыны. Вартіс вӧвсӧ, локтіс да кучкис кӧрт паличӧн. Гуак эз и вӧрзьывлы. Ивашко бара кутіс кыйӧдны. Мӧд пӧв зырӧдіс да кучкис. Гуак бара на эз казяв. Ивашко дивуйтчӧ ас вылас. Ещӧ зырӧдіс да кыкнан кинас вартіс. Гуак бергӧдчис.
— Ак, тані тай номъяс курччасьӧны!
Бергӧдчис дай кутіс Ивашкоӧс. Ивашко и шуӧ:
— Ме ӧд тэнсьыд силатӧ пробуйтлі, позьӧ оз тэд мунны Огненнӧй Щит дорӧ. Позьӧ ветлыны, морттуй и вын-эбӧс тэнад эм.
— Но ладнӧ, — шуӧ Гуак. — Мун, кысь локтін, а ме ветла нин.
Ивашко сетіс кисӧ, а Гуак шамыртіс кык кисӧ сылысь, да киыс воча-воча и пузис. Сідзи сылӧн и коли нэм кежлас.
Гуак Гуаликович муніс лун, муніс мӧдӧс, коймӧдӧс. И думайтчыны кутіс: «Тайӧ вӧлӧн ме некытчӧ ог во. Дас во ковмас мунны». Воис Югыд ты. Ваыс зэв югыд, синва кодь. Гуак Гуаликович аддзис ордым.
— Вот эськӧ тай туйыс, да тайӧ вӧвнад ог во, тыдалӧ.
Вӧв вылысь лэччис да лэдзис вӧвсӧ: «Кытчӧдз ог требуйт, гуляйт!»
Вӧв муніс. Гуак коли ӧтнас. Тӧкӧтьӧ муныштіс да аддзис сус пу. Кайис да ув вылӧ пуксис, сан моз кыйӧдчӧ. Пукаліс час дай мӧдӧс. Коркӧ и рыт воис, пемді. Войсӧ оліс. Югдыны кутіс, да сы ордымӧдыс локтӧ дас кык кока, куим юра змей. Бӧрсяньыс пиыс локтӧ. Зэв ӧтчыд-ӧтчыд тувччышталӧны, дукасьӧны. Гуакыд эз лысьт уськӧдчыны.
Змейяс лэччисны ты дорӧ да ваасисны час кык.
— А мый лоны — ло, шыбитча! — шуӧ Гуак.
Мама-пиа змейяс ваасисны да кутісны кайны. Гуак прамӧ шыбитчис сан моз змей пилы вылысас. Мамыс пышйис. А змей пи новлӧдліс да новлӧдліс Гуакӧс. Сутки бӧрын слабитны кутіс. Гуак Гуаликович заводитіс нӧшавны паличнас. Змейпи ещӧ на сутки новлӧдліс, сэсся эбӧссьыс уси дай шуӧ:
— Ой, Гуак Гуаликович, эн ви менӧ, лоа тэныд вернӧй слугаӧн, нэмӧс кута подчиняйтчыны тэныд.
Гуак эз ви. Пуксис змей вылӧ и мӧдӧдчисны аэроплан моз.
Вежон мунісны да воисны поле вылӧ. Лӧз-лӧз полеыс, быдлаын сэні куйлӧ виӧм йӧз — война вӧлӧма.
— Аттӧ, кутшӧм кось вӧлӧма. Кодкӧ ловъя морт тані эм-абу? — юалӧ Гуак.
— Ме тані, — кодкӧ, кылӧ, шыасис.
— Кутшӧм нӧ тан тыш мунӧма?
— Иван роч багатыр да Змей Улан воюйтісны куим сутки.
Гуак водзӧ мӧдӧдчис. Муніс, муніс, да бара поле воис. Народсӧ сю моз вольсалӧма. Бара на Иван роч багатыр да Змей Улан тышкасьӧмаӧсь. Бара муніс, муніс, да коймӧд поле вылӧ воис. Бара сэтшӧм жӧ, быдлаӧ лякӧма йӧзсӧ.
Гуак Гуаликович аддзис сэсся шатёр. Шатёр дорын зэв ён, багатырскӧй вӧв ветлӧ, сёйсьӧ. Гуак эськӧ и кынӧм увтіыс тӧрас мунны.
— Аттӧ, ён жӧ, тыдалӧ, Иван роч багатырыд, — думайтӧ сійӧ.
Гуак пырис шатёрӧ — Иван роч багатыр узьӧ. Гуак чукыльтчис бокас дай водіс и унмовсис, ныр горӧн узьӧ.
Узисны, узисны сідзи. Кад коли. Иван роч багатыр чеччис да петіс вӧвсӧ видзӧдлыны. Гуаклысь змейтӧ и аддзис.
— Аттӧ, — шуӧ, — кодкӧ воӧма змей вылын. Навернӧ, Гуак, нималӧ вӧлі сійӧ да. — Иван роч багатыр пырис шатёрӧ. Видзӧдӧ — джодж шӧрын узьӧ морт.
— Видзӧд, водӧма и шойччӧ, менӧ абу и садьмӧдӧма. Мед узьӧ, кытчӧдз узьсяс.
Коркӧ садьмис Гуак Гуаликович. Здоровайтчисны. Сёрнитісны-баитісны, сёйисны-юисны.
— Менам талун ӧд медбӧръя бой Змей Уланкӧд, — шуӧ Иван роч багатыр. — Он-ӧ отсышт меным? Змей Уланлӧн эм кӧлдун ныв. Ме тышкася сы вӧсна.
— Отсышта, — шуӧ Гуак.
Но ладнӧ. Кад воис. Иван роч багатыр петіс, кытчӧ налӧн вӧлі шуӧма, тышкасьны. Змей Улан виччысьӧ нин. Найӧ уськӧдчисны воча да кутісны тышкасьны. Иван роч багатырӧс Змей Уланыс нылыскӧд кутісны вермыны. Личкисны Иванӧс. Гуак Гуаликович зырӧдіс да ставсӧ жугліс да пазӧдіс. Иван роч багатыр сувтіс:
— Но, Гуак Гуаликович, тэ лоан меным ыджыдджык вок: Спаситін тэ менӧ смертысь.
Коркӧ воис рыт. Гуак Гуаликович водіс узьны — ун оз лок. Думайтчӧ: «Мӧда ньӧжйӧндзи, нинӧм тані сэсся керны».
Прӧщайтчисны дай Гуак Гуаликович мӧдіс водзӧ. Воис сійӧ Георгиевскӧй царствоӧ. Ставсӧ жуглӧмаӧсь, йӧзсӧ виӧмаӧсь, кольӧмаӧсь сӧмын куим ныв — зэв мичаӧсь. Гуак Гуаликович лэччис змейпи вылысь да пырис улі судтаас. Анна Григорьевна сэні вурсьӧ.
— Здравствуй, Анна Григорьевна!
— Здравствуй, Гуак Гуаликович!
Сёрнитісны-баитісны, да Гуак Гуаликович юалӧ:
— Эм-ӧ нӧ кодкӧ тэысь мичаыс да меысь ёныс?
— Эм мӧд судтаын меысь мича. А тэнсьыд ёнлунтӧ ог на тӧд. Бабаяс дорад тай зэв сюсь кылан-а.
Гуак Гуаликовичлы эз кажитчыны сылӧн кывъясыс — ӧти кокас тальччис, мӧдсӧ чашкӧдіс и колис сэтчӧ. Сэсся кайис мӧд судтаӧ. Сэні Елена Григорьевна вурсьӧ.
— Аттӧ, — шуӧ, — Елена Григорьевна, кодкӧ тэысь мичаыс да меысь ёныс эм-абу?
— Меысь мичаыс эм коймӧд судтаас, Лидия Григорьевна. А тэнсьыд ёнлунтӧ ме ог тӧд, бабаяскӧд зэв тай ён кылан-а.
Гуак Гуаликович бара ӧти кокас тальччис, мӧдсӧ чашнитіс и койыштіс. Сэсся кайис коймӧд судтаӧ. Лидия Григорьевна дінӧ. Сёйисны-юисны, сёрнитісны-баитісны. Гуак бара юалӧ:
— Эм-абу тэысь мича, а меысь ёныс?
— А тэнсьыд ёнлунтӧ, — шуӧ, — ог тӧд. А меысь мичаыс эм Вакрамлеевскӧй царствоын Настасья Вакрамлеевна. Вот сійӧ мича. Но сэтчӧ пырны он вермы. Кар гӧгӧрыс зэв ён крепость. Ме кӧ нарадита, кокниа пыран. Сэні ворота эм. Воротаас сулалӧ зэв ён багатыр, лун шӧр бӧрын сӧмын синсӧ куньлӧ — Чапча-Панча, белая Апанча и Сорокишная Шляпа. Тэ мун, матыстчы лун шӧр бӧрын первой часын и зырӧд котӧрӧн.
Но, Гуак Гуаликович прӧщайтчис и мӧдіс змей вылын. Воис Вакрамлеевскӧй царствоӧ. Крепость дорӧ воис и кутіс видзӧдны, кор лоас лун шӧр. Сэсся змейлы вачкис, зырӧдіс и Чапчаӧс прамӧя таляліс. Пырис крепостьӧ. Настасья Вакрамлеевна эз и вевъяв пасьтасьны, сэтшӧмӧн и суис сійӧс Гуакыд.
Здоровайтчисны. Гуак Гуаликовичлы зэв кажитчис Настасья Вакрамлеевна. Во джын оліс сэні Гуак, мам и бать весиг вунліны. Коркӧ и дум вылас уси мам-батьыс.
— Аттӧ, виччысьӧны нин менӧ, кӧнкӧ.
Кутіс прӧщайтчыны Настасьякӧд.
— Пи кӧ, — шуӧ, — ваян, крест сета, ныв кӧ чужтан, чунькытш сета. Слӧймыла кӧ, пырала бӧр локтігӧн.
И мӧдӧдчис. Муніс лун и мӧд, и коймӧд. Век пемыд вӧр. Вот коркӧ сэсся аддзис туй бокысь зэв ыджыд юр. Тшукӧдліс шынас, да юр лыыд толькӧ тронакылӧ.
— Вот важӧнтӧ ён жӧ войтыр вӧвлӧмаӧсь!
Юрыд и горӧдіс:
— Ак тэ, смел багатырӧ. Эн вывті ошйысь, и тэнад юрыд лэбзяс.
— Коді нӧ тэ ачыд?
— Росланьӧй Прокурьевич ме вӧвлі. Огненнӧй Щиткӧд тышкасим, да юрӧс керыштіс. Тушаӧй верст сайын куйлӧ. Ог кӧ тэнӧ нарадит, не вермыны тэд Огненнӧй Щитӧс. А нарадита кӧ — верман, и менӧ лечитан.
— Вай нарадит либӧ, — шуӧ Гуак.
— Тэ, — шуӧ юрыс, — нималана кодь морт. Но лечиттӧг менӧ эн чӧвт. Вот, Гуак Гуаликович, кывзы: Огненнӧй Щитлӧн сабляыс менам юр улын, керыштігас уси. Толькӧ аслас сабляӧн верман сійӧс вины. Ӧні саблясӧ ог на сет. Матыстчан сы дорӧ, да первой тшынӧн пӧдтыны кутас. Тэ и висьтав: ме, шу, локта бур думӧн, а ог лёк думъясӧн, локта тэд бур слугаӧн. Сэсся кутас биӧн сотны. Бара на сідзи шуан. Ньӧжйӧникӧн да ньӧжйӧникӧн матыстчан. Сылӧн тэ кодьыс комын кык, тэ лоан комын коймӧд. Сійӧ пуктас тэнӧ конюкӧн. Бура уджав. Сэсся пуктас старшӧй конюкӧ. Тӧлысь мысти сійӧ обход вӧчас — ас участоксӧ кытшовтӧ быд тӧлысь. Ме весьтӧ локтас и сувтас. Ті кыв шуны онӧ лысьтӧ. Сійӧ сувтас дай ышловзяс. Ті чӧв олӧ. Мӧд тӧлысь бара кытшовтас и бара ышловзяс — пу увъясыс весиг чегласясны. Коймӧдысь кытшовтас да ышловзяс — став кос пуыс чегӧ. Тэ и шу сэки: «Позьӧ-оз нӧ мыйкӧ юавны?» — «Позьӧ», — шуас. «Вот ми коймӧдысь нин тані кытшовтам и век ӧти местаын ышловзян». — «Да вот, — шуас, — Росланьӧй Прокурьевич юр улын эм менам сабля, колӧ кыдзикӧ чуктӧдны». Сэки тэ и ошйысь, ме пӧ верма судзӧдны. Унаӧн локны эн кӧсйысь, ӧтнад лок да босьт. Мыйӧн сабляыд сюрӧ, Огненнӧй Щитыд воча локтас да кевмысьны кутас. Тэ сійӧс матӧ эн сибӧд. Сійӧ кутас бӧрыньтчыны-петитчыны. Воас дворечыс дорӧ да бергӧдчас. Сэки и шӧрышт!
Гуак Гуаликович муніс и аддзис Огненнӧй Щитӧс — прамӧя тшынӧн, сэсся биӧн пӧдтыны кутіс. Гуак сувтіс пидзӧс вылас да кутіс кевмысьны. И пыр кутіс матыстчыны и матыстчыны. Коркӧ и бердӧдзыс воис.
Кыдзи нарадитіс Росланьӧй Прокурьевичлӧн юрыс, Гуак сідзи и керис. Огненнӧй Щит босьтіс сійӧс конюкӧ, сэсся старшӧй конюкӧ. Тӧлысь тырис, да Огненнӧй Щит петіс кытшовтчыны. Воис Росланьӧй юр дінӧ да ышловзис. Мӧд тӧлысь бара кытшовтіс и бара ышловзис. И коймӧд тӧлысь сідз жӧ. Гуак Гуаликович и юаліс Огненнӧй Щитлысь, мыйла сійӧ сідзи ышлолалӧ.
— А вот Росланьӧй Прокурьевич юр улын эм менам сабля. Керышті, да киысь мыні.
— Да ме верма судзӧдны саблятӧ, — шуис Гуак Гуаликович.
— Ветлам ставӧн да шедӧдам!
— А ставӧннас оз артмы, ӧтнамлы колӧ мунны.
Огненнӧй Щит сӧгласитчис. Гуак Гуаликович ветліс ӧтнас, босьтіс саблясӧ. Огненнӧй Щит нин паныд локтӧ.
— Неужели тэ вермин чуктӧдны? — юалӧ Гуаклысь. — Тэ тай молодеч! Вайлы нудъяссӧ видла, гажӧй нин бырис.
— А ӧні ме ог сет. Йӧз дырйи сета.
Огненнӧй Щит кутіс петитчыны бӧрӧн. Дворечӧ пыригӧн и бергӧдчис. Сэтчӧ Гуак Гуаликович шӧрыштіс сійӧс. Сӧптсӧ пырысь-пыр босьтіс бутылкаӧ. Став бур йӧзыс вӧлӧма Огненнӧй Щит тюрьмаын. Гуак ставсӧ лэдзис вӧля вылӧ. «Кыдзи кужанныд, сідзи и олӧ!»
Змей вылӧ пуксис и муніс Росланьӧй дінӧ. Юрыс и шуӧ:
— Вай юрӧс ӧтлаӧд!
Гуак йитіс юрсӧ тушаыскӧд и мавтіс Огненнӧй Щит сӧптӧн. Куим лун мысти пӧ ловзяс. Ачыс водзӧ муні. Воис Вакрамлеевскӧй царствоӧ. Вой. Пемыд. Кодкӧ паныд сюри. Заводитісны вермасьны. Гуак Гуаликович пешкыльтіс противникыслысь платтьӧсӧ да аддзис ассьыс крест — пиыс вӧлӧма.
— Аттӧ, коді вӧлӧма. Тайкӧ ӧд юртӧ керала! Вот ӧд мый ӧдйӧ быдмӧма.
Тасянь Гуак Гуаликович муніс Григорьевскӧй царствоӧ, сэсянь Иван роч багатыр царствоӧ. Коркӧ и гортас воис. Пыр жӧ мавталіс синъяссӧ, да мам и бать синмаӧсь лоисны.
Кутіс куим во тырны. Гуак Гуаликович сӧліс судно вылӧ да муніс Жеогонь дядьыс дінӧ.
— Вирсонӧвӧй мечсӧ вайин? — юалӧ Жеогонь.
— Вайи, — шуӧ Гуак.
— Но, сідзкӧ, вирсонӧвӧй мечсӧ босьта ме, а вирсонӧвӧй шысӧ босьтан тэ.
Найӧ сёрнитісны-тӧлкуйтісны и мӧдӧдчисны шедӧдны Гуаклысь невестасӧ. Мунісны, мунісны судноӧн, да море кутіс помасьны. Воис лёк бадь. Жеогонь чӧвтіс кык лук, да сэтчӧ воисны би борда кык зверь. Найӧ пуксисны и воисны берегӧ. Вуджисны ласта, да воис из гӧра. Некутшӧм щель ни тшупӧд, сэтшӧм мольыд стен.
— Вот, — шуӧ Жеогонь, — гӧра йылас кыпӧдчан, да Кощей зырӧдас. Миянлы ковмас керавны став войскасӧ. Сэсся воас дас кык би кӧлеса вылын Проклятӧй Лютра. Кор ми ӧтлаасям сынӧдас, тэ мусяньыс видзӧд. Менӧ кӧ Лютра вермыны кутас, вирсонӧвӧй мечсӧ ме чӧвта. Тэ эн узь, а кут сійӧс, мед сы киӧ мечыс оз сюр — кыкнаннымӧс вияс. Тэ ӧтнад колян. Ме тэд сета став родӧвӧй луксӧ. Татысянь кӧкъямыс верст сайын тыдалӧ Сукарев башня. Сэні крепость. Сэтчӧ сідзи эн пыр. Воротаас лев и змей сулалӧны. Родӧвӧй луктӧ койышт да найӧ усьӧны. Мӧд воротаын Кощейлӧн вокыс сулалӧ — сылы кык лук чӧвт. Коймӧд воротаын мамыс Лютралӧн — Аспида. Сылы куим лук чӧвт. Та бӧрын кай башня йылас — сэні Амазонскӧй принцессаыд и эм.
Жеогонь шыбитіс кык лук, да кык би борда вӧв воис. Кайисны гӧра йылӧ да став войскасӧ Кощейлысь керавлісны. Сэсся Лютра локтіс. Жеогонь да Лютра сибдісны. Куим сутки сідзи тышкасисны. Лютра кутіс вермыны, да Жеогонь чӧвтіс вирсонӧвӧй мечсӧ. Сэсся кыкнанныс — Жеогонь и Лютра усины.
Гуак воис Сукарев башняӧ. Воротаас лев да змей сулалӧны. Немродӧвӧй луксӧ койыштіс да найӧ усины. Мӧд воротаын сулалӧ Кощейлӧн вокыс. Гуак койыштіс кык лук. Коймӧд воротаын Аспида. Куим лук сылы койыштіс. Сэсся кайис башня вылӧ. Невестаыд сылӧн косьмӧма нин быдӧн, корӧсь кодь, ӧдва ловъя.
Гуак Гуаликович мавтіс сійӧс Огненнӧй Щит сӧптӧн, дай принцесса кутіс ловзьыны. Гуак окыштіс невестасӧ.
Сэтысянь найӧ мунісны Амазонияӧ да венчайтчисны. Пируйтісны-свадьбуйтісны и пуксисны судно вылӧ. Дыр ли, регыд ли Гуак Гуаликович воис Бористӧй княжествоӧ и кутіс гӧтырыскӧд зэв бура овны да вывны.
