ГВОЗДИКА


Кор тӧлысь вуджис помтӧм енэж эрд,
Мен полігтырйи сетін гӧрд гвоздика
Да шуин: «Зэв кӧ гажтӧм лоас тэд,
Мед сьӧлӧмтӧ пыр мекӧд сійӧ йитӧ».

Ме вӧлі кӧдзыд, муслун би эг тӧд
И ӧтнамӧн дзик торъялӧм моз олі.
Мен ставыс вӧлі арся вой кодь сьӧд,
И йӧзӧ петны лун шӧрын ме полі.

Но ичӧт дзоридз вӧчис ассьыс удж, — 
Мен вайис сійӧ сьӧлӧмӧ выль олӧм:
Кор видзӧдла, то казяла быд сутш,
Мый меысь ӧні гажтӧмлуныс полӧ.

Бур киӧн быдтӧм дзоридзьяслӧн би
Ас выннас сывдӧ полюс вылысь йи!

1962 во