ВЫЛЬ КЫВ

Ыджыд перемена дырйи веськыда джоджӧ пуксьӧмӧн Гриша да Евлог ворсісны шашкиӧн. Ёна жӧ лёка кодкӧ вӧчалӧма партаяссӧ — пӧлӧса, шашкинад кӧ ворсны пуксян, пыр и шлювгасны, сэсся корсяв джодж пасьтала разалӧм шашкиястӧ. Та вӧсна быть лоӧ ворсны джоджын. Гришалӧн дамкаыс пырис кузь туйӧ да сӧмын шливъяліс бӧрӧ-водзӧ, некыдзи Евлог эз вермы сэтысь сійӧс судзӧдны, кӧть и унджык на сылӧн выныс коли. Та вӧсна детинка гыжъялыштіс юрсӧ да кузякодь думыштчис.

— Евлогий сійӧ бара нин выль петантуй корсьӧ, экспериментируйтӧ, — шыасис Василиса Николаевна, коді кадысь кадӧ видзӧдлывліс ворсысьяс вылӧ.

Кӧть Евлог сідзи эз и сяммы кыйны Гришалысь дамкасӧ тайӧ кузь туй вывсьыс, но учительницаӧн шуӧм выль кывйыс кажитчис сылы. Ӧд мукӧддырйиыс челядькӧд сёрнитігад сэтшӧм лӧсьыда позьӧ сюйыштны сійӧс ас местаас, мед петкӧдлыны, мый тэ мукӧдсьыс сюсьджык.

Лун-мӧд мысти арифметика урок вылын дӧска дорын Евлог кыдзкӧ кузьджыка думайтчис задача вылас и Василиса Николаевна дӧзмыштіскодь:

— Но мый нӧ тэ, Евлогий, татшӧм дыр он вермы решитны?

Та вылӧ Евлог и вочавидзис Василиса Николаевнасянь жӧ кывлӧм кывйӧн:

— Экскрементируйта!

Ни челядь, ни ачыс Евлог эз и гӧгӧрвоны, мый вылын Василиса Николаевна наысь бергӧдчӧмӧн дыр синва петмӧныс сераліс.