ВУНӦДІН ТЭ МЕНӦ


Вылын гӧгрӧс Тӧлысь — 
Югыд, яр.
Лӧнис лунся тӧлыс,
Узьӧ кар.
Сотчӧ менам морӧс,
Ог узь вой.
Сывйыштчӧ тэ дорӧ
Небыд сой.
Но оз аддзы тэнӧ,
Некыдз оз.
Вунӧдін тэ менӧ
Вӧтӧс моз.

А ӧд кыдз пу дорын
Сьӧлӧмтӧ
Визыв шор кыв-ворӧн
Вӧзйин тэ.
— Некодыр ог вунӧд,
Лӧзов син,
Тэкӧд ставсӧ муна, — 
Висьтавлін.
Но оз аддзы тэнӧ
Сывйӧй, оз.
Вунӧдін тэ менӧ
Вӧтӧс моз.

Сӧмын мича кывъяс,
Мелі нюм,
Сӧмын вына сывъяс,
Поезд шум
Тӧд вылӧ мен колис,
Быттьӧ висьт.
Муслун йылысь доли,
Но эз письт.
Сыв оз аддзы тэнӧ,
Некыдз оз.
Вунӧдін тэ менӧ
Вӧтӧс моз.

1962 во.