ВОЙВЫВСА ПАЛЬМА
Сьӧрт грездсянь неылын, неыджыд межа помын, уна во быдмис тшап да мича сус пу. Кутшӧм бур морт садитлӧма сійӧс — некод оз тӧд. Йӧз костын ветлісны уна пӧлӧс сёрнияс. Ӧтияс висьтавлісны, мый пусӧ садитліс роч морт, кодӧс царскӧй чиновникъяс ыстылӧмны войвылӧ, кыдзи революционерӧс. Мӧдъяс висьтавлісны, мый быдмис сійӧ кӧйдысысь, кодӧс вайліс Печораысь коми вӧралысь. Вензьыны ог кутӧй.
Тӧдса ӧтитор: сулаліс сійӧ уна-уна во. Сус пуӧс частӧ нартитлісны кӧдзыд вой тӧв да васӧд лым, корсюрӧ мыськавліс шоныд зэр да шонтыліс мелі шонді. Сійӧ тӧдліс йӧзыслысь шогсӧ и радлунсӧ. Пу улын том йӧз висьтасьлісны радейтчӧм йылысь, пелька йӧктылісны нывъяс, сьывлісны праздникъяс дырйи олӧма йӧз.
Пушкыра «пальмаӧс» радейтлісны пӧрысьяс и челядь, вӧралысьяс и чери кыйысьяс. Пулӧн кыз вожъяс вылын, кодъяс шевгӧдчылісны гӧгӧр, быд ар быдмисны гӧгрӧс кольяс. Найӧ ас дорас кыскисны челядьӧс. Но судзӧдны кольяссӧ вӧлі сэтшӧм жӧ сьӧкыд, кыдзи джуджыд йирысь лэптыны биа из.
Век жӧ детинкаяс пиысь медся збойясыс да пелькъясыс кавшасьлісны пу вылӧ. И сэки важиник картузъяс, чериӧн да вотӧсъясӧн ляксялӧм зепъяс тырлісны сир дука чӧскыд ӧрешкиӧн.
Сус пусӧ, дерт жӧ, медся радейтлісны челядь. Весиг сэк, кор детинкаяс пиысь ӧти, сьӧд юрсиа Митрей, уси пу вывсяньыс, ми эг вермӧй кедзовтны войвывса «пальмаӧс».
Митрей дыр туплясис вольпасьын, ымзіс да ружтіс, но ми важ моз лэччывлім пу дорӧ да чукӧртлім сус кольяс, кодъясӧс сійӧ шыбитліс му вылӧ, сэсся нулім найӧс висьысьлы. Миян друг регыд бурдіс, но джуджыд пу вылӧ некор нин эз кайлы.
Сійӧ кадсяньыс коли комын воысь унджык. Ми лоим верстьӧ войтырӧн. Важӧн абу сус пу. Да и ичӧтик Сьӧрт грезд оз тыдав. Сэтчӧс олысьясыс мунісны коді кытчӧ: ӧтияс карӧ, мӧдъяс овмӧдчисны орчча сиктӧ.
Но йӧзыс абу на вунӧдӧмаӧсь тайӧ тшап пусӧ, частӧ казьтылӧны сійӧс. Казьтылӧны праздникъясӧ и прӧстӧй лунъясӧ.
Эг вунӧд сійӧс и ме. Мӧдӧд во ӧшинь улын быдмӧ томиник сус, кодӧс вайисны геологъяс ылі Печорасянь. Быд пӧрйӧ, кор ме матыстча сы дорӧ, дум вылӧ усьлӧны челядь кадӧй, аслам ёртъясӧй.
Дерт, аслым оз нин удайтчы чӧсмасьны чӧскыд ӧрешкиясӧн, но челядьӧй да внукъясӧй, тӧдӧмысь, видласны найӧс. И сэки бур кывъясӧн казьтыштласны мортӧс, коді садитіс тайӧ пусӧ.
