ВИКТЯ


Мый сэтшӧм водз тэ чеччин, Виктя, тайӧ лун?
Код пальӧдіс — эн пӧттӧдз веськӧд чӧскыд ун?

И кытчӧ тэрмасян тэ шондіыскӧд тшӧтш?
Тэн куртанінӧдз колӧ вуджны ыджыд кӧдж?

— Мед мунны куртны, меным оз ков вуджны кӧдж,
А чеччи сы вӧсна ме шондіыскӧд тшӧтш,

Мый эштіс куртаныс да виччысьӧ комбайн:
Янтарнӧй шепа воис муяс вылын нянь.

И ӧтвыв тӧрыт став колхозӧн шуим ми
Дас лунӧн идравны став шобді, рудзӧг, ид.

Ми ӧні лоам муяс вылын — ныв и зон,
Ӧд кӧртсӧ дорӧны стӧч сэк, кор сійӧ дон.

И муніс Виктя сэтчӧ, кӧні няньлӧн помтӧм эрд,
И кажитчис — эз морт, а быттьӧ шонді ӧзйис сэн.