ВЕЛӦДЧЫСЬ НЫВЪЯСЛЫ


Зэр киссьӧ кӧшысь моз му вылӧ.
Му мыськӧ зэрӧн ассьыс бан;
Яг бӧрдӧ сыркъялӧмӧн, кылӧ,
Лунвылӧ лэбӧ куваркан.

— Шог, гажтӧм коньӧрлы мем, дӧзма, —
Тадз шуӧ чукчилы сьӧд тар, —
Сьӧд, са кодь чужӧма, лӧг синма,
Со локтӧ, кылӧ, пемыд ар.

Лӧнь рытъяс колины зэв ылӧ,
Сьӧд вӧрлӧн паськӧм киссьӧ бӧр;
Кыдзпиян шушкӧдчӧны, кылӧ.
Оз узь, а мӧвпалӧ сьӧд вӧр.

Вӧр кості ветлӧдлӧ тшыг кӧин,
Ён, ыджыд ош сэн сёйӧ чӧд;
Сэт, сьӧд вӧр шӧрті, мунӧ войын
Том нывка: оз тай повны мӧд!

Мый корсьӧ сійӧ сэсь, сьӧд вӧрысь?
Мый босьтіс сылысь пемыд вӧр?
Оз жӧ ӧд пышйы, кӧнкӧ? Кодысь?
Код вӧтлӧ сійӧс, кутшӧм ньӧр?

Ас сиктысь мунӧ сійӧ карӧ.
Жаль сылы аслас чужан сикт,
Но сьӧлӧм сылӧн мунны корӧ:
Век карлань кыскӧ — дзикӧдз пик!

Сьӧд пемыд войяс Коми муын,
Гаж пытшкын кывтӧны быд ар.
Сэн ворсан, йӧктан, сьылан шыын
Дум вылӧ оз нин волы кар.

Пӧсь вира сьӧлӧмсӧ том нывлысь
Оз бурмӧд чужан сиктса гаж;
Ӧд гажсӧ вӧчны колӧ выльӧс,
Мый эм сэн гажыс? Ставыс важ.

Лёк сорӧн быдмалӧма важсянь,
Бур костас тырыс сэні пеж;
Гаж нора, шог пыр кыссьӧ лёкысь,
Кӧть босьт да ставсӧ выльӧн веж.

Пельк, мелі сьӧлӧмыс том нывлӧн,
Топ тӧдӧ сиктлысь сьӧкыдлун:
Пель водзас век ӧтарӧ сылӧн
Топ кодкӧ пискӧ: «Мун да мун».

Сьӧд, пемыд олӧмысь ныв пышйӧ:
Со кутшӧм вӧтлӧ сійӧс ньӧр;
Мед югыд вежӧрӧн нин гортӧ,
Сьӧд, пемыд сиктӧ воны бӧр.

Мед пемыдъяссӧ сиктысь вины,
Мед вайны сиктӧ югыдлун;
Мед отсӧг нывбабалы сетны,
Мед вайны шуда долыдлун.