БЫДМӦНЫ ПЕЛЫСЬЯС
Уна жӧ таво пелысьыд! Кутшӧм ӧшинь улӧ он видзӧдлы, кӧні быдмӧ тайӧ пуыс, быдлаын чим гӧрд вотӧсъяс ӧшалӧны. Пелысь розъяс сэтшӧм чукӧраӧсь, пуыслысь вӧсньыдик вожъяссӧ весиг личкӧмаӧсь.
Кор пелысьяс вылысь гылалісны коръясыс, найӧ пондісны тыдавны ещӧ на ылӧдзджык.
Вӧрын оз быд во артмыв пелысьыд, но таво и сэні пӧткаяслы позьӧ быд лун гӧститны. Шор бокъясын сы мында пелысьыс, сувт кӧть да дыр любуйтчы.
Вель тшӧкыда нин усьлывлӧ лым. Войяснас кынмавлӧ, лунъяснас кӧдзыд зэр дӧзмӧдчӧ. Кольӧ ещӧ вежон кык-куим, и бара тӧв заводитчас. Но пелысь розъяс дыр на пондасны ӧшавны пуяс вылын, гажӧдны ветлысь-мунысьясӧс, вежнысӧ петкӧдлыны челядьлысь, кокньыдика качайтчыны, кор кыпӧдчылас тӧв.
Кынмавлӧм бӧрын пелысьыд лоӧ ёна чӧскыдджык, варенньӧ кӧть сыысь пу, кӧть сідзи сёй.
Мекӧд орчча керкаын радейтӧны тайӧ вӧсни кока быдмӧгсӧ. Ӧшинь улас, гашкӧ, кызь пелысь пу быдмӧ. Васька дядь на найӧс садитліс во дас сайын. Пуяссӧ садитысьыс абу нин ловъя, но ас йывсьыс колис бур казьтылӧм.
Тайӧ аслыссяма мича пуяссӧ радейтам ог сӧмын ми, найӧ мусаӧсь да коланаӧсь и лэбачьяслы, весиг ошлы. Вотӧстӧм воясӧ Мишка Топтыгин вель тшӧкыда матыстчылӧ пелысь пуяс дорӧ, ёсь гыжъяснас нетшкӧ налысь розъяссӧ. Век нин вӧлӧга, и горшыд веськалӧ, и чӧскыд, и нуръясьыштны сюрӧ. И таръяслы да сьӧлаяслы пелысьыд зэв нимкодь. Пуксьы пу вылас да сӧмын кокась, ёна оз ков корсьысьны, орчча и дась сёяныс.
Пелысьтӧ, дерт, медся ёна радейтӧны пелыськайяс, кодъяс войвылӧ волӧны лунвылысь, уна тысяча километр сайысь. Лэбӧны саридзьяс, пармаяс вомӧн, медым быдтыны тані пиянсӧ.
Пелысь, лежнӧг, тусяпу вотӧсъяс зэв мусаӧсь и юрсиакайяслы. Тайӧ лэбачыс зэв ёна мунӧ кеня вылӧ: небыд гӧна, ыджданас кеня кодь кымын жӧ.
Юрсиакайлӧн юр вылас чурвидзӧны кузь гӧнъяс, бӧжыс дженьыдик, бордъясыс да голя улыс сьӧдӧсь.
Октябрын, кор поводдяыс кӧдздӧдас, тайӧ лэбачьясыс виччысьтӧг воӧны карӧ. Мӧдасны лэбавны гырысь чукӧръясӧн. Аддзасны пелысь пуяс, пуксяласны сэтчӧ и здукӧн куштасны найӧс.
На волӧм бӧрын пелысьлӧн кольӧны сӧмын тыртӧм вожъясыс.
Пируйтасны вежон-мӧд пелысь пуяс вылын, сэсся лэбзясны водзӧ.
Пелыся воясӧ тайӧ лунвывса гӧсьтъяссӧ позьӧ татысь аддзывны весиг ноябр тӧлысьын. Оз тэрмасьны мунны. Да и кытчӧ тэрмасьны, кор сёяныс сюрӧ татысь?
Тайӧ лэбачьясыс вӧчӧны и буртор: пелысь вотӧссӧ нёнялӧны, а вотӧс пытшкӧссьыс кӧйдыссӧ бӧр шыблалӧны му вылас. А кӧйдыссьыс выль пелысь пуяс быдмӧны. Му вылас лоӧ ещӧ на гажаджык да мичаджык.
