БАРА ВОЙ


Сирпемыд вой, и бара мен оз узьсьы,
Ун  оз нин лок, кӧть мыйта сійӧс кора.
Ме мӧвпала сы йылысь, мый эз судзсьы,
А сьӧлӧм шӧрын турӧб бӧрдӧ нора…

Ме мукӧддырйи вӧтӧн аддза тэнӧ
И, кыдзи коркӧ, воськов вӧча паныд.
Кӧть вӧтъясын ме кӧсъя лоны сэні,
Кысь зэв нин уна визувтӧма ваыс.

А тӧдан, ме ӧд нинӧм на эг вунӧд,
Но казьтылӧмысь овлӧ сэтшӧм сьӧкыд.
Сы здукӧ весиг чӧскыдторйыс курыд,
Кыдз эз нин ӧтчыд вӧвлы, войт оз пӧткӧд.

Зэв тшӧкыда сэк юасьлывла ассьым:
«А позис кӧ мен олӧм кыдзкӧ вежны?»
Кӧть туйыс водзын мытшӧдтӧм и паськыд,
Мед другысь косны бӧрӧ либӧ кежны…