АФАНАСЬЯ

А. Е. Мингалёвалы,

"Вымскӧй" совхозлӧн Туръяса отделениеын уджалысьлы

Пета гажа нӧрыс йылӧ,
Аддза юлысь помтӧм эрд.
И сэсь гӧлӧс тэнсьыд кыла, — 
Сыӧн юргӧ Емва берд.

Афанасья, Афанасья,
Ёль кодь сӧдз да мелі син,
Тэ йӧз шудлы сиин асьтӧ, — 
Тэкӧд содӧ менам вын.

Эн-ӧ тэ дас куим арсянь
Вӧлӧ доддясь лэдзны кер?
Эз-ӧ тэнсьыд Сыктывкарсянь
Босьтны тшӧктывны пример?

Вӧрын и крестьянскӧй уджын
Некор некӧні он чот.
Тэ быд уджсӧ вӧчны кужан,
Тэныд быдлаын почёт.

Афанасья, Афанасья,
Ёль кодь сӧдз да мелі син,
Тэ йӧз шудлы сиин асьтӧ, — 
Тэкӧд содӧ менам вын!

1963 во.