АРСЯ ДЗОРИДЗ


Мутницаса знатнӧй звеньевӧй,
ыджыд сьӧлӧма да зэв бур нывбаба-орденоноска
Евдокия Егоровна Ивановалы.




Тэ скатерт вольсалін да пызан вылад тыр
Быд сёянсӧ мен вайин: «Сёйышт жӧ, эн тшыгъяв.
Сёй пӧттӧдзыд и ю. Со сурыс кутшӧм быгъя!
Эн видзчысь тэ, эн пов, — тэн тырмас, нем оз быр».

Кӧть вӧлі ме дзик пӧт, но видлі черинянь
И быгъя суртӧ тэнсьыд юи быдса кружка.
Ӧд абу радейттӧм ки вӧчӧма да кужтӧм,
А сяма, тэрыб ки, и ставыс чӧскыд, шань.

Ми сёйим и сэк тэкӧд варовитім дыр,
Тэ висьталін, совхозын мунӧны кыдз уджъяс.
Оз лёка, — зіль, бур йӧзлы омӧльтор оз вужъясь,

А шонді сетӧ ки, мед гажлун вӧліс тыр.
Ме радлі кывзігам, но сэк жӧ лоис шог,
Кор шуин: «Менам верӧс? Усис. Бӧр... оз лок».

1969