«ТЭНӦ КӦ ЭСЬКӦ КУПЕЧӦ ПӦРТІСНЫ...»

— Петыр, а Петыр?

— Мый?

— Мый эськӧ тэ кутін керны, тэнӧ кӧ купечӧ пӧртісны?

— Кутшӧм купечӧ?

— Кыз зобъя купечӧ, кодлӧн горшыс паськыд, а зепъясыс джуджыдӧсь. Мый эськӧ сэки тэ кутін керны?

— Ме эськӧ став тӧварсӧ судзсьытӧм йӧзлы юки, а купечыдлы ныр-вомас сеталі.

— Кыдз нӧ эськӧ тэ, Петыр, вермин аслыд ныр-вомад сетавны?

— Кыдзи аслым?

— Да тэ ӧд и лоин эськӧ кыз зобъя купечнад?

— Коді тайӧс шуӧ?

— Ме шуа: тэнӧ кӧ эськӧ, мися, купечад пӧртісны, мый эськӧ тэ сэки кутін керны?

— Висьтала тай, ме эськӧ купечыдлы ныр-вомас сеталі.

— Некыдз тайӧ, Петыр, оз лӧсяв.

— Зэв лӧсялӧ. Сеталі эськӧ дай ставыс.

— Тэ тай, Петыр, вӧлӧмкӧ, дзик йӧй.

— Тэ, Иван, ачыд йӧй. Видзӧдтӧ, купеч дор сулалан.

— Ме купеч дор ог сулав, а сӧмын пример вайӧді: тэ кӧ, эськӧ, мися лоин купечӧн...

— Коді тайӧс шуӧ?

— Тьфу!

Тайӧн и помасис Иванлӧн Петыркӧд сёрнитӧмыс. Некыдз эз гӧгӧрво Петыр, мый уджалысь мортӧс кодкӧ вермас весиг вӧтын пӧртны кыз зобъя купечӧ.