«ПЕГАШ»
Марина радейтӧ ассьыс быдтассӧ — рудов гӧна, кузь пельяса кроликӧс. Чеччас вольпась вывсьыс, мыссяс, пасьтасяс и пыр жӧ мыйкӧ петкӧдас Пегаш нима кроликыслы — то морков, то кын капуста листъяс. Кролик бура тӧдӧ ассьыс ичӧтик кӧзяйкасӧ, котӧрӧн локтас Мариналы паныд, водз кокъяссӧ лэптас нывкалы пидзӧс вылас.
Васӧд синъясыс кроликлӧн меліӧсь-меліӧсь, быттьӧ кӧсйӧны висьтавны сёян вайысьлы ыджыд аттьӧ. Пегаш оз дзик пыр уськӧдчы сёян тасьтілань. Ичӧт гӧрд кывнас заводитас нювны Мариналысь кияссӧ, кӧдзыд нырнас тувкӧдыштас кокъясас.
Нывка топӧдас кроликӧс морӧс бердас, дыр малалас небыдик гӧнӧдыс, гыжйыштас пель костъяссӧ, весалас гыж костъясас чукӧрмӧм няйтсӧ. Пегаш жуйвидзӧ. Лӧсьыд, тыдалӧ, кор сыкӧд меліалӧ кӧзяйкаыс. Сэсся быттьӧ дум вылас усьӧ сёяныс, чеччыштас нывка водзысь, зіля мӧдас калскыны-сёйны тасьтіӧ пуктӧм вӧлӧгасӧ.
А тӧлысь нёль сайын кролик вӧлі сэтшӧм ичӧтик да омӧлик, пуксьӧдан кӧ кыкнан ки пыдӧс вылад — тӧрас. Аддзис да мездіс ассьыс быдтассӧ Марина кань вомысь. Локтӧ вӧлі кино вылысь гортас, и друг потшӧс бокысь чеччыштіс тӧдтӧм кань. Вомас кватитӧма кроликпиӧс, сійӧ чужъясис кокъяснас да нораа горзіс. Марина босьтіс моски бокысь бедь, уськӧдчис кань бӧрся. Мӧдыс, буракӧ, эз виччысь татшӧмторсӧ, лэдзис вомсьыс кроликпиӧс, а ачыс гырыся чеччалігтыр усйысис-пышйис керкаяс сайӧ. Марина босьтіс мезданторсӧ. Кроликпи вӧлі ловъя на. Кымынкӧ лун видзис паччӧрас, вердіс кагаӧс моз шоныд йӧлӧн нёнь помысь. Кроликпи кутіс сӧвмыны. Гожӧмнас Марина ассьыс быдтассӧ лэдзлывліс котравны ӧшинь улас, быд лун вайліс Пегашлы свежӧй турун, пу коръяс.
Пегаш ӧдйӧ быдмис. Гӧныс лои шыльыд да сук. Радейтліс сійӧ дурны аслас кӧзяйкакӧд. Марина петас керкасьыс да горӧдас: «Пегаш! Пегаш!». Кролик чеччалігтыр котӧртӧ нин нывкалы паныд. Исалӧ Мариналысь кияссӧ, эз-ӧ кӧзяйкаыс вай сылы кутшӧмкӧ чӧскыдтор.
— Ак тэ, мути, дженьыд бӧж, чӧскыдтор радейтысь, — малыштас сійӧс Марина. — Бур, мый рӧзбойник каньыд сэки тэнӧ эз удит джагӧдны. Со кутшӧм мича да ыджыд лоин.
Пегаш, быттьӧ гӧгӧрвоӧ ошкӧмсӧ, то ризнитлас-котӧртлас йӧр гӧгӧр, то табъя кокъяснас тотшкӧдыштас кильчӧ пос вылын.
Лунысь-лун Мариналы аслас быдтасыс лои мусаджык. Локтасны нывка дорӧ пӧдругаясыс и тшӧтш нимкодясьӧны кроликӧн. Некодӧс сійӧ оз тӧдтӧмт, быдӧнкӧд дась ворсыштны да дурыштны. Нывкаяс чилзӧны да вӧтлысьӧны ышмысь Пегаш бӧрся.
— Пегаш, Пегаш, — ӧта-мӧд вежмӧн горзӧны найӧ. — Мудзтін миянӧс. Дугды пышъявныд. Лок, донукӧй, татчӧ. Эн пов, ог ӧд ӧбидитӧй. Малыштам сӧмын.
Кролик чепӧсйылас нывкаяс дорӧ, сэсся бӧр заводитас котравны.
Тадзи и олісны-вылісны кузь кӧсаяса Марина да дженьыдик бӧжа Пегаш.
Пуксис ар. Пуяс вылын вижӧдісны коръяс. Марина ветлӧдліс школаӧ. Кӧть гортса уджъяс учительнича сетлывліс уна, нывка пыр аддзыліс кад ворсыштны Пегашкӧд, кодысь лунтырнад ёна бырлі гажыс.
Шойччан лунӧ, кор Мариналы оз вӧлі ков мунны школаӧ, мамыс водз чуксаліс нывсӧ:
— Марина, тэнад ӧд нимлун. Гашкӧ, гӧсьтъясӧс чукӧртлам?
— Ой, ме дзикӧдз вунӧді. Дас ӧти арӧс тырӧ, да, мам?
— Сідз, донукӧй, сідз. Быттьӧ дзик на неважӧн пызан увті вӧлі уялан, а со нёльӧд классӧ нин котралан.
— Мамук, а позьӧ мем ассьым пӧдругаясӧс чай юны корлыны? Галяӧс, Светланаӧс, Риммаӧс...
— Кодӧс кӧсъян, сійӧс и кор. И дедыд ордӧ пырав. И Груня тьӧткаыдлы висьтав. А ме тэныд со именнича пирӧг-шаньга пӧжала...
Марина пыр и эновтіс шоныд вольпасьсӧ, тшӧтш заводитіс отсасьны мамыслы. Вала петаліс, картупель кулис. Бара дум вылас уси Пегашыс. Кынӧмыс, кӧнкӧ, сылӧн сюмалӧ.
— Мамук, ме вердышта Пегашӧс и дзик пыр котӧртла дедӧясӧ, а сэсся пӧдругаясӧс кора. — Марина босьтіс киас кроликлысь сёян дозсӧ, но мамыс сувтӧдіс сійӧс.
— Кроликтӧ талун оз ков вердны. Ме Ӧльӧксан дядьтӧ кори, начкас сійӧс. Нимлун кузяыд чӧскыд жаркӧй вӧчам.
Маринаӧс тайӧ кывъясыс сэтшӧм ёна повзьӧдісны, кисьыс уси тасьтіыс.
— Ог сет! Некодлы ме ог сет ассьым Пегашӧс! Мыйла нӧ сійӧс начкыны? Ог сет! Оз ков меным некутшӧм нимлун.
Нывка кураліс тасьтіӧ киссьӧм кролик вӧлӧгасӧ, а бандзибъяс кузяыс синваыс тюрӧбӧн визувтіс.
— Абу ӧмӧй жаль Пегашыс? Кутшӧм сійӧ тӧлка да мича. Ме сійӧс пыр жӧ дзеба, медым некод оз аддзы.
Мамыс шӧйӧвошліс, а сэсся шоныд кияснас кутыштіс нывкасӧ, фартук помнас чышкаліс синвасӧ.
— Мед тэ ног лоас. Эн бӧрд. Нимлунӧ оз бӧрдлыны. Ме эг чайт, мый Пегашыд тэныд сэтшӧм муса.
— Колӧкӧ, Пегашыд абу нин и ловъя? — видзӧдліс Марина мамыс вылӧ и котӧрӧн уськӧдчис аслас быдтас дінӧ.
Мамыс ыджыда ышловзис. Сылы кыдзкӧ эз ло лӧсьыд, мый виччысьтӧг дӧзмӧдіс ассьыс нывсӧ. Марина вель дыр эз бергӧдчы гортас. Мамыс тшӧтш петіс гидӧ, кӧсйис видзӧдлыны, мый сэні вӧчӧ нылыс. Матыстчис ӧшинь дорас да чуймис: Марина Пегашсӧ топӧдӧма морӧс бердас и помвыв малалӧ небыдик гӧнӧдыс.
