Мыјла перјӧны налогјас

Гӧгӧр кіԍԍіс, жугавліс ԍіԅім воԍа војнаӧн. Кӧрттујјас, паракоԁјас омӧԉа ветлӧны, пабрік-завоԁјас омӧԉа уҗалӧны. Колӧ најӧс боԍтԍӧԁны, ԇоԋтыны, выԉыԍ вӧчны, меԁым најӧ важ-моз кутісны уҗавны. Унҗык-кӧ уҗалӧны пабрік-завоԁјас — унҗык воас креԍԏаналы тӧвар. Лоӧ-кӧ тӧвар, гӧрјас, піԋајас, быԁтор мыј креԍԏаԋінлы колӧ, сіјӧ понԁас асԍыс овмӧс боԍтԍӧԁны, јонҗыка віԇ-му уҗавны, мукӧԁ ногӧн нажӧвітны. Сіԇкӧ — креԍԏаԋінлӧн овмӧс боԍтԍӧԁӧмыс пабрік-завоԁјас уҗалӧм-сајын.

Пабрік-завоԁјасӧс ԇоԋтыны колӧ ԍӧм, капітал. Сіјӧ ԍӧмсӧ госуԁарство вермӧ кык-ногӧн лӧԍӧԁны: леԇны гумага ԃеԋга, ԉібӧ перјыны вот. Гумага ԃеԋга леԇӧм — сіјӧ лоӧ ужԁыԍӧм; гумага ԃеԋга — правіԏеԉстволӧн рӧспіска. Кор правіԏеԉство леԇӧ гумага ԃеԋга, сек сіјӧ кӧсјыԍӧ на-пыԃԃі мынтыԍны езыԍ-зарԋіӧн.

Војԁӧр Сӧвет-влаԍтлы ԍӧмсӧ лӧԍӧԁны лоі гумага ԃеԋга леԇӧмӧн. Сӧмын, кымын уна ԃеԋга леԇан, сымын сіјӧ ԁонтӧммӧ. Сещӧм ԁонтӧмман ԃеԋганаԁ вузаԍны-ԋӧбаԍны оз шогмы. Боԍтԍӧԁны пабрік-завоԁјас верман сек, кор ԃеԋгалӧн ԁоныс ԁугԁас чінӧмыԍ. Ԃеԋгалӧн ԁон оз кут чінны сек, кор правіԏеԉство ԁугԁас ԃеԋга леԇӧмыԍ. Ԃеԋга леԇӧмыԍ кӧ ԁугԁан — ковмас правіԏеԉстволы бӧр кыскыны важ леԇӧмсӧ ас кіас. Ԃеԋга кыскыны верман сӧмын вот перјӧмӧн.