Јукалӧм віԍӧмыԍ (ревмаԏізмыԍ) бурԁӧԁчӧм

Кынмӧмыԍ бурԁӧԁчыны јона лӧԍалӧ пач жар (ԏемпература 70°). Јона важԍа віԍыԍјаслы колӧ пыравны пачӧ 40–50-ыԍ; регыԁ, выԉӧн шеԁӧм віԍыԍјаслы — 30-ыԍ кымын.

Бурԁӧԁчыны гожӧмын, шоныԁ повоԃԃа-ԁырјі. Пӧжаԍан пачӧ іԇас-вылӧ воԁтӧԁны віԍыԍӧс: кокјаснас пыщкӧ, јурнас ортсӧ. Гоԉа веԍттіыс пачсӧ тупкыны. Мінут 5-мыԍԏі віԍыԍ зев јона пӧԍалас, јајсӧ быԏԏӧ јемӧн понԁас сущјӧԁлыны. Омӧԉ ԍӧлӧма мортлы колӧ ԍетны сек лӧԋӧԁан (успокоительное) ԉекарство. Ԇоԋвіԇа ԍӧлӧма мортлы ԋекущӧм ԉекарство оз ков. Кујлыны пачын воԇԇа лунјасас мінут 15–20, сеԍԍа пыр соԁтыны мінут 40–50-ӧԇ. Пачыԍ петӧм бӧрын мыԍԍыны шоныԁ ваӧн, косӧԇ чышкыԍны, сеԍԍа воԁны шоныԁ інӧ. Ԇоԋвіԇа ԍӧлӧма мортлы кујім лун помԍа пачӧ пыравны, ԋоԉӧԁсӧ шојтчыны; сеԍԍа бара кујімыԍ пыравны. Омӧԉ ԍӧлӧмалы быԁ кык лун бӧрын шојтчыны. Бурԁӧԁчыны завоԃітӧм-мыԍԏі вежон ԉібӧ вежонӧн җынјӧн-чӧж кыкыԍ лун кежлӧ ԍојӧм бӧрјасын јуны јӧв пыщкын 5–15 војтӧԇ јоԁ. Бурԁӧԁчыны завоԃітӧм-мыԍԏі віԍыԍлы вывті ԍӧкыԁ лоӧ, веԍіг мукӧԁсӧ воԉпаԍӧ воԁтӧԁас, но меԁ, — оз ков еновтчыны. Пач 20 бӧрын понԁас кокԋӧԁны.

Аԁрес та-јылыԍ віԍталыԍлӧн: Москва, Курортная Клиника, д. 13, доктор Иван Петрович Смирнов.