Машінајас ԋӧбавны ӧтувтчӧм
Уна воԍа војнаӧн креԍԏанскӧј овмӧс јона омӧԉтчіс: гӧгӧр кіԍԍаліс, жугавліс, важміс. Омӧԉтчісны, жугавлісны щӧщ му-віԇ уҗалан кӧлуј. Војнаӧԇыс-ԋін најӧ ез ошканаӧԍ ԁа уна вӧвны, ӧні ԇікӧԇ ԋінӧмӧ воісны. Выԉӧс ԁа бурҗыкӧс лӧԍӧԁны унаӧн оз вермыны, ԍӧмыс оз суԇԍы. Еновт-кӧԏ му-віԇтӧ, ԋемторјӧн уҗавны.
Колӧ кыԇкӧ корԍны туј сещӧм пікыԍ мезԁыԍны. Колӧ ӧтувтчавны арԏеԉјасӧ ԋӧбны віԇ-му уҗалан машінајас. Ӧткӧн сещӧм машінајас ԋӧбны он вермы, вывті ԁонаӧԍ. Веԍіг плуг ԉібӧ кӧсуԉа гӧԉ креԍԏаԋін ас кежас оз вермы лӧԍӧԁны. Ӧтувтчӧмӧн кокԋіа лӧԍӧԁан, ԁонтӧм сувтас-і. Ӧткӧн уҗалігӧн гӧр-піԋаыԁ комі креԍԏаԋінлы лун 5–6 сӧмын ковмылас, мукӧԁ пӧрасӧ најӧ веԍ бок вылас кујлӧны: муыԁ еща, уҗавны ԋемтор. Вітӧ-квајт луннаԁ уҗалігӧн, тӧԁӧмыԍ, гӧр-піԋаыԁ ԁонсӧ асԍыс ԁыр оз вермы вештыны, уна во ԋужӧԁас. Арԏеԉӧн уҗалігӧн шојтчӧг налы озҗык понԁы ԍурны: ӧԏі орԁыԍ мӧԁ орԁӧ понԁас ветлыны, регыԁҗык ԁонсӧ вештас. Сеԍԍа ыҗыԁҗык машіна-кӧ лӧԍӧԁан — шуам вунԁан — креԍԏаԋіныԁ матајтчас: бергӧԁчыныс машінанас му вылас оз кут тӧрны (міјан тан мујас зев посԋіӧԍ). Ӧтувтчӧм јӧз вермасны віԇ-мутӧ ӧтлаыԍ корны, уҗавны сек шогмас: віԇ-мујас гырыԍӧԍ лоӧны, паԍкыԁӧԍ. Сеԍԍа ӧтувтчӧм јӧзлы кокԋіԁҗык уҗԁыԍны, ескасныҗык налы. Ӧтка мортыԁлы оз-на зев ԍетны ԍӧмтӧ. Ӧтувтчӧм јӧзыԁ сіԇі і вӧчӧны: оз-кӧ суԇԍы асланыс ԍӧмыс ԋӧбны кущӧмкӧ машіна, ԉібӧ гӧр, ԉібӧ плуг, — уҗԁыԍасны, сеԍԍа ԋӧжјӧԋікӧн, кымынкӧ воӧн мынтасны.
Сіԇкӧ, машінајас лӧԍӧԁавны ӧтувтчӧмыԍ со кущӧм бур: уҗ ԁонтӧммӧ, гӧԉ креԍԏаналы щӧщ поԅӧ уҗавны машінајасӧн, ковмас-кӧ — уҗԁыԍны кокԋі. Машінаӧн уҗалігӧн віԇ-мутӧ поԅӧ паԍкӧԁны, ыҗԁӧԁны, лӧԍӧԁны гырыԍ машінајас.
Му-віԇ уҗалӧм уҗнуӧԁан інјас еԍкӧ тӧжԁыԍӧны ԍетны креԍԏаналы машінајастӧ, воԍталӧны кӧн-ԍурӧ склаԁјас, ԁа еща, ԍӧмыс-жӧ оз тырмы. Сещӧм склаԁјасԍыс уҗалан каԁӧ лун-мӧԁ кежлӧ поԅӧ боԍтлыны колан машіна торја ԁон вылӧ.
Меԁԍа бур креԍԏаналы ӧтувтчавны лӧԍӧԁны віԇ-му уҗалан кӧлуј, машінајас. Ԋӧбаԍны ԍӧм уҗԁасны. Машінајасӧн уҗалігӧн унҗык прӧст пӧра лоӧ креԍԏаналы, вермасны мукӧԁ тор уҗавны: віԇ-мутӧ соԁтыны, уна пӧлӧс ԋаԋ, турун вӧԃітны.
Віԇ-мутӧ уҗалӧмыԍ машінаӧн сещӧм ыҗыԁ ԁа тӧԁчана бур, мыј креԍԏаналы ԋемтор і віԍтавны сы-јылыԍ јонасӧ, аԍныс гӧгӧрвоасны. Машіна ԋӧбалан ӧтувтчаныԁ уналаын ӧні воԍԍалӧ, регыԁ бырӧ віԇ-му уҗалан кӧлујыԍ суԇԍытӧмыԁ.
Важ коми гижӧд