Колӧ вӧԃітны уна картупеԉ

Мі, комі војтыр, абу велалӧмаӧԍ чӧсмаԍны. Меԁтыкӧ ԋаԋ вӧлі унҗык а, мукӧԁ торјыԁ веԍкоԃ.

Ԋемеч бара мӧԁ-ног ԍорԋітӧ: сылӧн меԁтыкӧ унҗык картупеԉ вӧлі. Картупеԉнаԁ сіјӧ бура-ԋін олас, јона чӧсмаԍас. Секі сылӧн лоӧ пӧттӧԇыс порԍ јај, јӧв, выј. Картупеԉтӧ сіјӧ секі ԍојас выј, гос, јӧв пыщкын. Сы-вӧсна ԋемеч асԍыс ічӧԏік муԍыс унҗыксӧ картупеԉ улӧ лӧԍӧԁӧ. Сылӧн картупеԉыԁ меԁ муса тор, сіјӧ кужӧ сетыԍ чӧскыԁ, пӧтӧс ԍојан лӧԍӧԁны. Ԋоԉ-віт мынԁа уна ԋаԋ-ԁорыԍ сіјӧ бурсӧ боԍтӧ. 213 метр ыҗԁа муаԁ меԁ уна пыԃԃі-ԋін воас 82 кілограмм ԋаԋыԁ. Картупеԉыԁ сетчӧ-жӧ артмас 1228,5 кілогр.-ԁорыԍ унҗык. 1228,5 кілогр. картупеԉыԁлӧн пӧтӧсыс лоӧ 327,6 кілогр. ԋаԋкӧԁ воча.

Зев бура воас картупеԉ пуктан-кӧ іԁ бӧрын, торја кујӧԁ оз веԍіг ков; зев бур лоас тулыснас-кӧ гӧрӧм воԇвылас сіјӧ мусӧ верман кіԍкавны 455 кв. метр. улӧ 32,64 кілогр. пӧјім. Сетыԍ картупеԉ јона быԁмӧ, котырмӧ. Картупеԉ улӧ му колӧ гӧрны кыкыԍ. Војԁӧр арын пыԁыҗык гӧрны, коԉны піԋовттӧг. Воԇ тулысын піԋовтны ԁа мӧԁыԍ гӧрны, мӧԁыԍ тулысын гӧрны пуктӧм воԇвылас му шоналӧм бӧрын. Бурҗык вылӧ картупеԉ пуктӧны плуг улӧ, гӧр улӧ. Кыкыԍ гӧрыштӧм костӧ колӧ пуктыны ԁа оз бӧрӧзԁаас ков картупеԉтӧ шыблавны, а пуктавны бокас, меԁ сӧмын 5 саԋԏ. пыԁӧ лоӧ муас.

Мыјӧн муртса мытчыԍас корјыс, колӧ піԋовтны мусӧ. Сеԍԍа 30 саԋԏ. кымын суԁта быԁмӧм бӧрын колӧ муԁјыны, муԁјыԍаныс ем нарӧԍнӧј. Колӧ-кӧ уна картупеԉ воӧм, лун 10–12-мыԍԏі мӧԁыԍ поԅӧ муԁјыны. Муԁјыԍансӧ поԅӧ арԏеԉӧн боԍтны карыԍ ЕПО-пыр. Картупеԉ бӧрын поԅӧ кӧԇны бара іԁ кујӧԁтӧг. Со кущӧм бур тор картупеԉыԁ. Чӧскыԁ пӧтӧс ԍојан мортлы ԍетӧ, порԍјасӧс щӧгӧԁӧ, мӧсјаслыԍ јӧв соԁтӧ, мутӧ ԋебԅӧԁӧ, вынԍӧԁӧ.

Унҗык-кӧ колӧ тӧԁны та-јылыԍ, јуаԍӧј аграномјаслыԍ.