ВІԆ БУРМӦԀӦМ
Кымын уна турун, сымын уна скӧт, кујӧԁ, ԋаԋ. Тајӧ быԁ віԇ-му уҗалыԍ тӧԁӧ еԍкӧ-ԁа, сӧмын оз пыԃԃі пукты. Быԁӧн мырԍам, тӧжԁыԍам, му ԁӧԅӧрітам, огӧ веԍіг мӧвпыштӧј мыј сајын бурлуныс мулӧн. Мутӧ мі вынԍӧԁам, ԋебԅӧԁам, быԁног ԁӧԅӧрітам. Віԇ вылӧ омӧԉа віԇӧԁлам. Коԁ-ԍурӧ сӧмын мырјас гашкӧ перјавласны, вущјас вунԁавласны, лӧпјас весыштласны, кустјас керыштласны. Віԇԇыԁ-ӧԁ му-моз-жӧ ԁӧԅӧр віԁчыԍӧ. (Оз поԅ ыжӧс ӧтарӧ шырны).
Воыԍ воӧ віԇјасыԁ омӧԉтчӧны, топалӧны, тырӧны, таԉаԍԍӧны. Сынӧԁыс оз кут ветлӧԁлыны муԍінӧԁыс, став бур турун вужјыс пӧԁас, кулӧ, мытчыԍаласны ԉок турунјас: шома кор, ежӧр, куз. Сещӧм віԇјас вущӧԍԍасны, омӧԉтчасны. Сеԍԍа тулыс-арнаԁ скӧтӧс віԇӧмӧн, таԉӧԁӧмӧн ԇікӧԇ-ԋін помалӧны віԇјастӧ. Креԍԏаԋін нораԍӧ віԇ щыкӧм вылӧ, веԍіг еновтӧ, выԉлаӧ кутчіԍӧ віԇ вӧчны.
Бурҗык лоӧ, важсӧ-кӧ бӧр вынԍӧԁан, бурмӧԁан, ещаҗык вын сетчӧ бырӧ. Меԁ војԁӧр колӧ віԇтӧ ԋебԅӧԁны муӧс-моз. Быԁ тулысын му сывтӧԇыс-на колӧ кӧрт ԍӧкыԁ піԋаӧн піԋовтны, меԁ став ԋіщкыс шеԁалас, ԋещкыԍас, секі турун вужјасыԁ ԉічмунӧны, бӧр ловԅаласны бур турунјасыԁ. Мукӧԁ полӧны, ԍӧԁӧԇ піԋовтӧм бӧрын-пӧ оз пет турун. Петас, нӧшта кык-мынԁа унҗык быԁмас туруныс. Віԇтӧ мутӧ-моз-жӧ колӧ вынԍӧԁлыны. Турунјасыԁ-ӧԁ ԍојантӧг оз-жӧ быԁмыны. Ԋекор вынԍӧԁлытӧгыԁ-нӧ кытыԍ турунлы ԍојансӧ боԍтны? — ԋекыԍ. Сіјӧн-ӧԁ і бырӧ туруныԁ. Вынԍӧԁны поԅӧ воԇ тулысын пӧјімӧн кіԍкалӧмӧн. Сыыԍ бур — верман-кӧ морт кујӧԁ кіԅӧртӧм ваӧн кіԍкавны. Вывті-кӧ-ԋін јона щыкӧма віԇԇыԁ, секі оз отсав піԋовтӧмыԁ ԋі пӧјімӧн кіԍкалӧм, вермас ԇікӧԇ кушмыны. Секі колӧ віԇтӧ муӧс-моз-жӧ гӧрны ԁа турун кӧԇны. Арԍаԋ віԇ гӧрны, сеԍԍа ӧԏі воӧ шојтчӧԁны коԍкӧм улын. Сы бӧрын кӧԇны ԋаԋ турункӧԁ. Нӧшта бур лоӧ верман-кӧ кујӧԁыштны. Таԇтӧ віԇԇыԁ коԍкӧмнаԁ, ԋаԋнаԁ шојтчыштас ԁа бара кутас уна турун вајны.
Креԍԏаԋін вермас шуны: віԇтӧ-кӧ-пӧ-нӧ ме гӧра коԍкӧм улӧ, кыԍ турунсӧ боԍта? — Оз-ӧԁ ков став віԇтӧ ӧтпырјӧ гӧрны, ічӧԏік торјасӧн поԅӧ, наԇӧԋікӧн, вочасӧн.
Турун кӧјԁыс поԅӧ суԇӧԁны аграномјас-пыр, налыԍ јуаԍӧмӧн кӧԇны.
Воԇ тулыс, ԍор ар веԍіг оз поԅ скӧтӧс віԇ вылӧ леԇны. Васӧԁ, ԋебыԁ віԇјастӧ таԉаласны, скӧт коктујӧԍԍас, ва гӧптаԍас, сеԍԍа ԋіщкаԍас, вущӧԍԍас. Сы-кынԇі скӧт ԍојӧ меԁ бур турунсӧ, омӧԉсӧ коԉӧ, најӧ сеԍԍа воасны, кӧјԁыс гылӧԁӧны воԇӧ кежлӧ, сіԇі віԇјасыԁ омӧԉтчӧны. Ԋекӧн ԋін-кӧ скӧтӧс віԇны, поԅӧ сӧмын кос повоԃԃа-ԁырјі ыщкӧм бӧрын, меԁ оз таԉаԍ. Меԁԍа-ԋін омӧԉ тулысԍа таԉалӧмыԁ.
