КОМІ ԈІԎЕРАТУРА (ГІЖӦԀ)
Важӧн зев шоча вӧлі аԁԇывлан коміӧн гіжӧм ԋігајастӧ. Комі јӧз еԍкӧн зев раԃејтӧ комі ԋігатӧ-ԁа оз лыԍтны вӧлі гіжны комінас — полӧны роч чіновԋікјасыԍ. Ревоԉутсіја бӧрын комі гіжӧԁ ловԅіс. Комі јӧз понԁа тӧжԁыԍыԍјас ԍӧлӧмԍаԋыс боԍтчісны дорјыны кыв ԁа кутісны гіжавны комі ԋігајас. Сӧмын оз вӧлі тӧԁны кущӧм шыпасјасӧн (буквајасӧн) колӧ гіжавны комінас: ӧԏі шуӧ таԇ-пӧ колӧ гіжны, мӧԁ шуӧ етаԇ-пӧ, роч буквајасӧн-пӧ, лаԏінскејӧн-пӧ. Секі ӧԏі комі кыв граммаԏіка тӧԁыԍ мортлӧн (В. А. Молоԁсов) лӧԍӧԁӧма-ԋін вӧлі комі шыпасјас (буквајас). Сеԍԍа ԁыр ԍорԋітӧмӧн, бӧрјыԍӧмӧн Сыктывԁін кара-Јаренска сјезԁјас вылын шуӧма вӧлі гіжавны став комі ԋігајассӧ В. А. Молоԁсов лӧԍӧԁлӧм комі буквајасӧн.
Піԏірӧ закажітӧма вӧлі шріфт. Ӧні Сыктывԁін карса комі ԏіпографіјаын ем пуԁ 100 кымын комі шріфтыс. Комі шріфт сіјӧ пеԉӧс ізјыс комі ԉіԏературалӧн.
Ревоԉутсіја ловԅӧԁіс комі муӧс. Петісны комі гіжыԍјас (поетјас): гора ԍылан кыв гіжыԍ М. Н. Ԉебеԃев, ревоԉутсіја поет Варыш (А. А. Маегов), јуморіст Ԋобԁінса Віттор (В. А. Савін), естет Ԍӧлӧм (В. Т. Чісталев), саԏірік Е. В. Коԉегов, Віԅ (В. И. Лыткін), Жан Морӧс (И. Т. Чисталев), Санԁрік Мікол (Н. А. Шаков), М. Уԉныров і мукӧԁ, унаӧн-на...
Коміӧн зев уна гіжӧма. Ӧні комі ԋіга леԇан інын орігінаԉ пјесаыс 50 гӧгӧр ем, сеԍԍа роч вылыԍ лӧԍӧԁӧм гашкӧ 100-ыԍ уна. Ԍԏікотвореԋејасыԁ лыԁтӧм-щӧттӧм.
Уна еԍкӧн ем сӧмын оз вермыны печатајтнысӧ. Міјан комі муын сӧмын ӧԏік ԋеыҗыԁ ԏіпографіја. Вонас сіјӧ вермӧ печатајтны сӧмын 300 ԉістбока ԋіга. Таԇтӧ вочасӧн веԍіг огӧ уԃітӧј школајасын велӧԁчан ԋігајассӧ печатајтны. Ԁумыштан тајӧс ԁа ԍӧлӧмыԁ мајышмунӧ. Коԁі раԃејтӧ комі ԋігајас, коԁлы ԁона комі ԉіԏература, корӧј комі облаԍтса јурајаслыԍ ыҗыԁҗык ԏіпографіја, ԉібӧ торја комі ԏіпографіја!
Ӧні комі ԋігајас поԅас суԇӧԁны ԁонвылӧ Комі ԋіга леԇан іныԍ (
