К. Ф. ЖАКОВ

Г. С. Лыткин гіжіс ԋігајас комі школалы. Но комі школаын ԋінӧм ез вежԍы, важ ногыс велӧԁісны рочӧн. Абу тај вӧлӧм секі комі ԋіга сајын коміӧн велӧԁӧмыԁ. Г. С. Лыткінлӧн ԋігајасыс унҗыкыс печатајтан-інас і кујлан коԉіны. Коԁі воліс комі школаӧԇ, сіԇ-жӧ тупԉаԍіс, оз вӧлі кужны комінас лыԃԃыныс-ԁа. Велӧԁны-жӧ коміӧн ез ԋекоԁ і ԁумајтлы, — роч шовіԋістјаслы. Колӧ вӧлі коԍаԍны, песԍыны руԍіфікаторјаскӧԁ, колӧ вӧлі комі јӧзлы правосӧ корԍыԍ мортјас. Вот сещӧм мортыс вӧлі К. Ф. Жаков.

Сіјӧ чужӧма Сыктывԁін карувса Выԉгорт грезԁын 1868 воын. Вӧлӧма прӧстӧј креԍԏаԋінлӧн пі. Быԁтор сылы вӧлӧм окота тӧԁны, сіјӧс тӧԁны колӧмыс пыр воԇӧ кыскӧма велӧԁчыны. Важӧн гӧԉ јӧзлы ԍӧкыԁ вӧлі велӧԁчыны. Жаковлӧн велӧԁчӧмыс быԁса поема. Сыктывԁін карыԍ сіјӧ велӧԁчыны мунас пыжӧн 700 верст сајӧ (паракоԁјас абу-на вӧлӧмаӧԍ). Гӧԉ јӧзлы уԋіверԍіԏетӧ тујыс вӧлі тупкӧса. Јона лоі Жаковлы песԍыны тујсӧ воԍтігӧн, ԁа соԁтӧԁ сіјӧ ԍурі јешщӧ пӧԉіԏікаыԍ. Попјас ԁа пӧԉітса нарӧԍнӧ сіјӧс ез леԇны воԇӧ велӧԁчыны. Попјас јекзамен вылын проваԉіталісны, пӧԉітса ез леԇ сіјӧс мӧԁ карӧ мунны (секі сіјӧ вӧлі Вӧлӧгԁаын).

Комын арӧсӧн сӧмын сіјӧ верміс пырны Уԋіверԍіԏетӧ. Кончітіс сіјӧ зев бура Піԏірса Уԋіверԍіԏетыԍ (Ист.-фил. Фак.). Бура велӧԁчӧмысла коԉӧԁісны ԉексіја лыԃԃыны Уԋіверԍіԏетас. Сеԍаԋ сіјӧ 10 во чӧж ветлывлӧ велӧԁны посԋі јӧзјасӧс (воԏак, череміс, комі), гіжӧ ԋігајас. Меԁбӧрја војасын сіјӧ вӧлі Пԍікоԋеврол. Інԍԏітутын пропессорын. Ӧні Жаков Естоԋіјаын ԉечітчӧ.

К. Ф. Жаков меԁвоԇԇа комі пропессор, учонӧј-етнограф, комі поет. Кӧԏ сіјӧ і гіжіс рочӧн, но сылӧн гижӧԁыс комі олӧм-јылыԍ („В хвойных лесах“, „Под шум северного ветра“, „Очерки из жизни рабочих и крестьян“). Комі јӧз сылӧн ԁум вывԍыс ез вунлы. Быԁ ԍорԋіын, быԁ гіжӧԁын сіјӧ ԁӧжналіс: комі школалы-пӧ колӧ комі кыв, колӧ-пӧ кыпӧԁны комі куԉтура. Ԋекоԁ ез вӧв сыыԍ кынԇі комі јӧз вӧсна ԍӧлӧмԍаԋыс тӧжԁыԍыԍ мортыс. 1908 воын комі муӧ кӧсјісны вајны (переԍеԉітны) Роԍԍіјаыԍ мукӧԁ пӧлӧс јӧзӧс, кӧсјісны мырԃԃыны комі јӧзлыԍ пармајассӧ. Сувтіс паныԁ К. Ф. Жаков, ӧтнас сіјӧ сувтіс став „учонӧј“ кырнышјаслы воча; гіжаліс стаԏԏајас, ԁоклаԁјас лыԃԃіс мувыв гырыԍјас воԇын: оз-пӧ поԅ сещӧма комі јӧзӧс кеԇовтны, сіјӧ-пӧ ачыс щыг-ԋіԍӧ-пӧт олӧ комі муын, ԋеԁапӧштӧ-пӧ сетчӧ јешщӧ јӧзӧс вајны.