КОМІ ОБЛАԌТ
Сарјас ку-піԍыс петісны: песԍісны комі јӧзӧс рочӧ пӧртны. Сещӧм пӧԉіԏіка комі јӧзӧс торјӧԁліс, јансӧԁліс. Комі јӧз вӧлі олӧны 4–5 губерԋаын. Оліс комі јӧз губерԋа пеԉӧсјасас, сіјӧ олӧм вылӧ ез і віԇӧԁлыны прамеја. Ԋекоԁ комі јӧз вӧсна ез тӧжԁыԍ — Комі муын быԁԍама озыр луныс ем (руԁајас, вӧр, непԏ), а комі јӧз кынӧм пӧтсӧ корԍны ветлывлісны ԍурс (1000) верст сајӧ, завоԁјасӧ. Ӧні комі јӧз ӧтлааԍісны, воԍтісны Комі Облаԍт. Комі Облаԍт воԍтісны сы понԁа, меԁ комі јӧз ачыс вермас бергӧԁлыны ас олӧмнас; меԁ комі јӧз ӧԁјӧҗык соԁасны-быԁмасны мывкыԁнас (развівајтчасны); меԁ комі јӧз щыгјалӧмыԍ ԁугԁасны, мед воԍԍасны завоԁјас-пабрікајас. Комі муын лоӧ комі куԉтура, лоӧны коміӧн ԍорԋітыԍ суԃԃајас, коміссарјас.
Комі Облаԍтын јур карыс Сыктывԁін кар (Уԍԏсысоԉск). Облаԍтын квајт карув (уезԁ): Јемԁін, Сыктыв, Лузберԁ, Кулӧмԁін, Іԅва, Уԁора.
Комі Облаԍтын со мынԁа олыԍ:
| 1. Јемԁін карулын | 13.984 верӧс (мужчин) | 18.272 аԋ (женщин) |
| 2. Удорса -"- | 4.359 -"- | 5.956 -"- |
| 3. Сыктывԁін -"- | 26.388 -"- | 34.710 -"- |
| 4. Лузберԁ -"- | 9.809 -"- | 12.436 -"- |
| 5. Кулӧмԁін -"- | 11.750 -"- | 15.925 -"- |
| 6. Іԅва -"- | 9.439 -"- | 12.561 -"- |
| Ставыс | 75.829 верӧс | 99.920 аԋ. |
Ӧнја Комі Облаԍтын ставыс 175.749 морт. Пӧԍԏі ставыс комі, мукӧԁ пӧлӧс олыԍ зев еща. Но облаԍтӧ абу-на јешщӧ став коміыс пырӧма.
Коміјасыԁ јешщӧ олӧны Печӧра пӧлӧн, Пермскӧј губерԋаын, Јатскӧјын. Најӧӧс-кӧ лыԃԃыны, коміыԁ мӧԁ тамынԁа соԁӧ.
Коміјас нӧшта олӧны Ԍібырын 15–25 ԍурс-гӧгӧр. Став коміыс лоӧ ԋоԉ ԍо ԍурс гӧгӧр (400.000).
