ОТСАЛӦЈ ЩЫГЈАЛЫԌЈАСЛЫ

Коԁі ез тӧԁлы щыгјалӧм? Ежва јывсалӧн ԋекор оз вун 1919 во. Оз вунӧԁны кыԇі ԍојлісны кач, кыԇі ԁунԁывлісны, кулалісны; оз вунӧԁны, кущӧмӧԍ чеԉаԃныс вӧліны, кыԇі најӧ кі-кокԍыныс уԍліны, кулалісны. Оз ков сіјӧс вунӧԁны! Оз вун і салԁатјаслӧн щыгјалӧм!

Таво лун вылын ԋаԋ ԋӧԏі ез во: ставыс коԍміс. Војԁӧр вӧлі кытыԍ ԋаԋсӧ міјанӧ вајӧны, таво сені щыгјалӧны. Щыгјалыԍыс ԋеԉамын міԉԉон ԁорыԍ унҗык. (Став комі јӧзыс міԉԉон җын сӧмын). Налы ԍојны ԋінӧм, став іԇассӧ-ԋін, скӧтнысӧ-ԋін ԍојӧмаӧԍ. Щыгысла ԁа віԍӧмысла вывті уна кутӧма јӧзыс кувны. Самараын-пӧ уԉіч вывԍыс быԁ вој ԍурӧ ветымын-квајтымын морт шој. Ставыс најӧ щыглы кулӧм јӧз. Сіԇі кулӧны быԁ карын, быԁ ԍіктын Волга куԅа. Чеԉаԃыс, тӧԁӧмӧн јешщӧ јона кулӧ. Быԁлаын-пӧ туј куԅа тупԉаԍӧ шој; мӧԁӧԁчасны, коԋӧрјас, ԋаԋ корԍны, ебӧсԍыныс уԍасны ԁа туј вылас і кулӧны.

Ветлӧԁлӧны быԁлаын чеԉаԃ, віжӧԁӧм чужӧмаӧԍ, куш лыныс, паԍкӧмтӧмӧԍ. Корԍыԍӧны, абуӧ коԁкӧ шыбытӧма ԍојантор.

Вывті уна щыгјалыԍыс. Быԁсӧнлы-кӧ ԍетны пуԁ-җынјӧн тӧлыԍ кежлӧ, ковмас кыԅ міԉԉон пуԁ ԋаԋ ӧԏі тӧлыԍ кежлӧ. Выԉ ԋаԋ вотӧԇ ԍо ԋеԉамын міԉԉон пуԁ. Правіԏеԉство ԋекоԁ отсавтӧг сы мынԁа ԋаԋсӧ лӧԍӧԁны оз вермы, колӧ боԍтчыны быԁсӧнлӧн отсавны кыԇ мыј верманныԁ.

Кымын ԁыр кежлӧ еновтчам отсалӧмыԍ, сымын уна јӧз, уна чеԉаԃ щыгла кулӧ.

Баԏјас-мамјас, чојјас-вокјас, отсалӧј! Ічӧԏік отсӧг вермас мезԁыны ӧԏі мортӧс щыглы кулӧмыԍ.

Отсалӧј ԋаԋӧн, паԍкӧмӧн, ԃеԋгаӧн. Чујԁӧј мукӧԁӧс отсавны!

Енӧ вунӧԁӧј асԍыныԁ щыгјавлӧмнытӧ.

Јіҗтӧј ԍӧлӧмӧԇныԁ щыгјалыԍјаслыԍ шоглунсӧ, енӧ вунӧԁӧј најӧс!

Вомынын Мікајлӧ Мікајлӧвіч Каракчіев, ыҗыԁ ԍемјаа морт, ыстӧма щыгјалыԍјаслы пуԁ ԍу ԁа паԉто. Сіјӧ мортыс, тыԁалӧ, тӧԁӧ щыгјалӧмсӧ, оз жаԉіт ԍетны щыгјалыԍјаслы. Сіԇ-жӧ вӧчӧј мукӧԁ.