БӦРԀӦԀЧЫԌ
Коркӧ олісны-вылісны пӧрыԍ гозја. Пӧчӧыс віԍміс ԁај кулі. Олӧны вӧлі најӧ ԍӧԁ вӧр шӧрын. Ԋекоԁ маты гӧгӧрын ез вӧв. Пӧԉӧ ӧтнас коԉі, ԋекоԁ абу бӧрԁыԍ ԋі каԅтыштыԍ пӧчӧӧс. Боԍтіс пӧԉ мешӧкӧ кујім гоз чіпан ԁа мӧԁіс бӧрԁыԍӧс корԍны. Паныԁаԍіс ош ԁај јуаԍӧ:
—„Кытчӧ-нӧ, пӧԉӧыс, мӧԁӧма?“
— „Бӧрԁыԍӧс корԍа, пӧчӧј кулі-ԁа“.
— „Боԍті менӧ“ шуӧ ош: „кужа-ӧԁ бӧрԁныԁ.
— „Кужан те бӧрԁны?“ пӧԉ јуалӧ.
Ош равӧстас:
„Ԍомајбырӧј ԁај пӧчанӧј менам!..
Жаԉ-ӧԁ те меным зев!..“
— „Он куж он, бӧрԁны. Ԉокыԍ горзан сӧмын?“
Бара мӧԁіс воԇӧ. Паныԁаԍіс ручкӧԁ.
Руч јуалӧ:
— „Кытчӧ-нӧ, пӧԉӧ, мӧԁін?“
— „Бӧрԁыԍӧс корԍа, пӧчӧј кулі ԁа.“
— „Ме зев маԍԏер бӧрԁны. Боԍт менӧ.“
Лӧԍӧԁчісны ԁоныԍ: быԁ бӧрԁӧмыԍ чіпан.
Бӧрԁӧ лыԃԃӧԁлӧмӧн руч:
„Шонԁібанӧј ԁај пӧчӧј,
Асылын воԇ четчыԍӧј,
Шыԁ-рок пуыԍӧј.
Пӧԉӧс пӧттӧԇ верԁыԍӧј.
Мыјла бара еновтін
Асԍыԁ пӧԉӧтӧ-а?“
Бӧрԁӧ руч кыз ԍінваӧн.
Норміс щӧщ пӧԉӧлӧн ԍӧлӧмыс: чужӧм бан паԍтаыс кіԍԍӧ ԍінваыс.
Мӧԁыԍ щӧктіс лыԃԃӧԁлыны, ԁај којмӧԁыԍ, ԁај ԋоԉӧԁыԍ. Ԋоԉӧԁԍыԁ мынтыԍныԁ ԋінӧмӧн лоі, чіпаныԁ оз тырмы, гортас веԍіг чіпаныс ез коԉ.
— „Он-кӧ мынтыԍ чіпаннаԁ, аԍтӧ ԍоја“, шуӧ руч.
— „Ручіԉӧј-бӧжіԉӧј“, шуӧ пӧԉ: „Лок мунам гортӧ, мынтыԍа“.
Руч вӧтчіс пӧԉӧ бӧрԍа. Гортас пӧԉ мешӧкӧ ԍујіс кык пон, вылас пуктіс кујім чіпан ԁај ԍетіс ручлы.
Кыскӧ руч мышку вылас ноп. Сувтіс шојтчыны мыр берԁӧ. Час-пӧ шојтчіг моз ӧԏі чіпан ԍоја. Ԍојіс ԁа бара мӧԁӧԁчіс воԇӧ. Мӧԁыԍ шојтчыны сувтіс ԁа мӧԁ чіпан ԍојіс. Сіԇі кујімнансӧ ԍојіс. Ԋоԉӧԁыԍ воԍтігӧн мешӧкыԍ понјас асвылас уԍкӧԁчісны. Руч муртса ловјӧн воіс гортас, ԇебԍіс ԁај јуаԍӧ:
„Пеԉјасӧј, пеԉјасӧј, ԍінјасӧј, ԍінјасӧј! ті-нӧ мыј керінныԁ менам пікӧ волігӧн?“
„Мі віԇӧԁім, понјасыԍ тенӧ віԇім.“
„Кокјасӧј ԁа кокјасӧј! мыј-нӧ ті вӧчінныԁ менам пікӧ волігӧн?“
— „Мі котӧртім, віԇім тенӧ понјасыԍ.“
— „Тенӧ, ԁыш руԋӧ бӧжӧј мыј керін?
Лӧгаԍіс бӧж ԁај шуӧ:
„Ме мырјыԍ-мырјӧ, пуыԍ-пуӧ крукаԍлі, меԁ тенӧ понјас кутасны!“
„Аттӧ-пӧ, со кущӧм те вӧлӧмыԁ! Налӧ, понјас, ԍојӧ менԍым бӧжӧс!“
Чургӧԁіс руч бӧжсӧ гу вомӧԁыс. Понјас кваԏітісны бӧжсӧ ручлыԍ ԁај аԍсӧ щӧщ гуԍыс кыскісны.
