ШОНЫԀ КОРԌЫԌЈАС

Паныԁаԍіс ӧш межкӧԁ ԁај јуалӧ:

— „Кытчӧ-ԋін межыс мӧԁӧма?“

— „Шоныԁ гожӧм корԍны.“

— „Мунам щӧщ“ — шуӧ ӧш.

Мунӧны. Паныԁаԍіс порԍ.

— „Кытчӧ-нӧ-ԋін мӧԁін, порԍӧј?“

— „Шоныԁ гожӧм корԍа“ — шуӧ порԍ.

— „Мунам щӧщ міјанкӧԁ.“

Мӧԁісны кујімӧн. Паныԁаԍіс налы ԇоԇӧг.

— „Кытчӧ-ԋін мӧԁӧма ԇоԇӧгыс?“ јуалӧ ӧш.

— Шоныԁ гожӧм корԍны.

— „Сіԇкӧ лок міјан бӧрԍа“.

Мунӧны ԋоԉӧн ԋін. Паныԁаԍіс петук.

— „Кытчӧ ԋін, петукыс мӧԁӧма?“

— „Шоныԁ гожӧм корԍа.“

— „Мі шоныԁ гожӧм-жӧ корԍам. Лок інӧ щӧщ мунам“.

Мунӧны вітӧн. Ԍорԋітӧны, кыԇ кутасны кӧԇыԁ тӧв коԉԉавны. Ӧш шуӧ:

— „Вајӧ-жӧ ӧтвылыԍ керка вӧчамӧј!

Ԁыш лоі уҗавны налы ԁа ставныс кутісны бӧрыԋтчыны.

Меж меԁ војԁӧр шыаԍіс:

— „Мыјнӧ керкаԍыс? менам паԍӧј шоныԁ, аԁԇанныԁ гӧныс“.

Порԍ рукӧстіс:

— „Ме ԋекущӧм кӧԇыԁыԍ ог пов, коԁјыԍа му піӧ ԁај керка оз ковмы“.

Ԇоԇӧг герчкӧ:

— „Ме коз вылӧ каја, ӧԏі борԁӧс воԉсала, мӧԁ борԁнам шебраԍа, кӧԇыԁыԁ менӧ оз і аԁԇы“.

Петук шуіс:

— „Ме сіԇі-жӧ тӧвја, керка оз ков!.

— „Ті кыԇ гаж“, — шуӧ ӧш: „а ме сувтӧԁа керка“.

Ӧтнас ӧш вӧчіс керка, ԁај овмӧԁчіс сетчӧ.

Воіс кӧԇыԁ тӧв. Быԁ ловја лов корԍӧ шоныԁ. Меж ԁыр кынміс, сеԍԍа локтіс ӧш керка ԁорӧ ԁај вӧзјыԍӧ:

— „Леԇ, зонмӧ, шонтыԍны“.

— „Ог леԇ“, шуӧ ӧш: „тенаԁ-ӧԁ паԍыԁ шоныԁ, мыј керкаԍыс“.

— „Он-кӧ леԇ, ӧԁԇӧԁчӧмӧн ԉукышта, ԁај ӧԇӧстӧ жугӧԁа“.

Ӧш гӧгӧр артыштіс ԁај леԇіс.

„Гашкӧ-пӧ збыԉ жугӧԁас ԁа“.

Порԍ кутӧма кынмыны, руксӧ локтӧ:

— „Леԇ, зонмӧ, шонтыԍны“.

— „Ог леԇ“, шуӧ ӧш: „те-ӧԁ му піӧ коԁјыԍан ԁа ԋекущӧм керка оз ков.“

— „Он-кӧ леԇ, керка муԁӧԁтӧ коԁја ԁа аслыԁ-жӧ кӧԇыԁ лоӧ.“

Мыј сеԍԍа керан? Лоі леԇны.

Сіјӧ-жӧ лунӧ локтісны ԇоԇӧг петуккӧԁ. Вӧзјыԍӧны:

—„Леԇ, ӧшкӧј, шонтыԍны міјанӧс“.

— „Ог леԇ“, шуӧ ӧш: „тіјан морт кыкӧн борԁјасныԁ: ӧԏісӧ воԉсаланныԁ, мӧԁнас шебраԍанныԁ. Оз ков тіјанлы ԋекущӧм керка“.

— „Он-кӧ леԇ,“ шуӧ ԇоԇӧг: став ԋіщтӧ кер костјасԍыԁ перјалам, аслыԁ-жӧ кӧԇыԁ лоӧ.“

Мыј сеԍԍа керны? Лоі леԇны ставнысӧ.

Овмӧԁчісны вітӧн ԁаԍ вӧчӧм керкааԁ.