КӦВԀУМ
Олісны-вылісны пӧрыԍ гозја. Ӧтчыԁ пӧԉ шуӧ пӧчлы:
— „Пӧжав, пӧчӧ, кӧвԁум. Зев јона веж петӧ?“
— „Мыјыԍ-нӧ пӧжала?“ шуӧ пӧч: „пыԅыԁ абу-ԁа“.
— „Пыԅ абу?! Кумтӧ чышкышт ԁа јӧртӧԁтӧ гурјышт, гашкӧ і чукӧрмас“.
Пӧч кывзіс пӧԉлыԍ. Кум чышкіс, јӧртӧԁ гурјіс. Пыԅ нӧк піӧ гуԁраліс, выј піјын кӧвԁум пӧжаліс. Сеԍԍа пуктіс ӧшіԋ вылӧ.
Ԁыш лоі кујлыны кӧвԁумлы ӧшіԋ вылын, — четчыштіс ӧшіԋ улӧ, сеԍԍа туј вылӧ, ԁај ԏурны кутіс. Ԏурӧ кӧвԁум. Паныԁ локтӧ кӧч.
— „Кӧвԁумӧј, кӧвԁумӧј, ме тенӧ ԍоја!“
— „Ен ԍој менӧ, кӧчыԉӧј-чојыԉӧј. Ме теныԁ ԍылышта“.
Кӧч пеԉсӧ чошкӧԁӧмӧн кывзыны понԁіс ԍылӧм.
„Ме кӧвԁум, кӧвԁум,
Кум җоҗыԍ кӧвтӧм,
Јӧртӧԁ пыԁӧсыԍ гурјӧм,
Нӧк сорӧн гуԁралӧм,
Пач пыԁӧсӧ ԍујлӧм,
Ӧшіԋ вылын кујлӧм.
Пӧԉыԍ ме пышјі,
Пӧчыԍ ме пышјі,
Теыԍ, јӧј кӧчыԍ, пышја ԋін.“
Сеԍԍа туј куԅа воԇӧ ԏурны кутіс. Кӧч „кук-ку — пукты“ коԉі. Паныԁаԍіс кӧвԁумлы кӧјін:
— „Кӧвԁумӧј, кӧвԁумӧј, ме тенӧ ԍоја!“
— „Ен ԍој менӧ, кӧјінӧј. Ме теныԁ ԍылышта, кывзы! Бара ԍывны горӧԁіс:
„Ме кӧвԁум, кӧвԁум,
Кум җоҗыԍ кӧвтӧм,
Јӧртӧԁ пыԁӧсыԍ гурјӧм,
Нӧк сорӧн гуԁралӧм,
Пач пыԁӧсӧ ԍујлӧм,
Ӧшіԋ вылын кујлӧм.
Пӧлыԍ ме пышјі,
Пӧчыԍ ме пышјі,
Кӧчыԍ кокјас песлалі,
Теыԍ, кӧјіныԍ, пышја ԋін.“
Ԏурӧ воԇӧ кӧвԁум. Паныԁ локтӧ ош!
— „Кӧвԁумӧј, кӧвԁумӧј, ме тенӧ ԍоја!“
„Ен-жӧ бара, ошкӧј, ԍој. Ме теныԁ зев лӧԍыԁа ԍыла.“
Боԍтіс ԍывны:
„Ме кӧвԁум, кӧвԁум,
Кум җоҗыԍ кӧвтӧм,
Јӧртӧԁ пыԁӧсыԍ гурјӧм,
Нӧк сорӧн гуԁралӧм
Пач пыԁӧсӧ ԍујлӧм.
Ӧшіԋ вылын кујлӧм
Пӧԉыԍ ме пышјі,
Пӧчыԍ ме пышјі,
Кӧчыԍ кокјас песлалі,
Ԉок кӧјіныԍ весаԍі,
Теыԍ, ошкыԍ, абу ԍӧкыԁ пышјыны“.
Ԏурӧ воԇӧ кӧвԁум туј куԅа. Паныԁ локтӧ руч.
— „Олан-вылан, кӧвԁумӧј! Кущӧм те міча, банјӧмыԁ быԁӧн!“
Кӧвԁумлы зев ԋімкоԃ ошкӧмыԁ. Горӧԁіс ԍывны ручлы:
„Ме кӧвԁум, кӧвԁум,
Кум җоҗыԍ кӧвтӧм,
Јӧртӧԁ пыԁӧсыԍ гурјӧм,
Нӧк сорӧн гуԁралӧм,
Пач пыԁӧсӧ ԍујлӧм,
Ӧшіԋ вылын кујлӧм.
Пӧԉыԍ ме пышјі,
Пӧчыԍ ме пышјі,
Кӧчыԍ кокјас песлалі,
Ԉок кӧјіныԍ весаԍі,
Ош гыж улыԍ мыні,
Теыԍ, ручыԍ, мына-ԋін“.
— „Аттӧ, лӧԍыԁа-жӧ-ԋін те ԍылан — кӧвԁумӧс ошкӧ руч: „сӧмын вот ме пӧрыԍмі ԁа омӧԉа кыла-а. Он-нӧ пукԍыв меным ныр вылӧ ԁа гораҗыка ԍылышт?“
Кӧвԁумлы вывті ԋімкоԃ лоі ошкӧмыԁ. Четчыштіс ручлы ныр вылас ԁа горӧԁіс ԍывны:
„Ме кӧвԁум, кӧвԁум“...
Ручлы сіјӧ волі і колӧ: амкԋітіс, ԁај кӧвԁумыԁ ез ло.
