Рыт да асыв.

Бара мачнаным велӧԁчам. Бурещ луншӧркаԁын опыт вӧчам. Лӧԍӧԁам мачнымӧс сіԇі, меԁ міјан респубԉіканым лоӧ југԁӧԁӧм інас шӧрас. Ӧні віԇӧԁламӧ, мыј му мӧԁарас, меԁпемыԁ інас? (Сіјӧ інтаснас лоӧ Ыҗыԁ океан). Тӧԁӧмыԍ, вој. Пасјам сеті крестӧн.

Лун ԁа вој міјанлы ԍурі. Вајӧ корԍамӧ рыт ԁа асыв кӧні. Зев кокԋі гӧгӧрвоны, мыј најӧ пемыԁа југыԁа вежтасасӧԍ. Сіјӧ вежтасјасас бурещ лоӧны: ӧтарас — Амеріка, мӧԁарас — Аԅіја. Коԁарас асывыс? Коԁарас рытыс? Меԁым рыт-асывсӧ тӧԁмавны, тӧԁвылаԁ вајӧԁӧј му бергалӧмсӧ: асыввывлаԋӧ, веԍкыԁківыв сіјӧ бергӧԁчӧ. Ԋӧжјӧԋікӧн мачтӧ бергӧԁӧ веԍкыԁківыв ԁа кыјӧԁӧ, коԁарӧ — југыԁлаԋӧ аԉі пемыԁлаԋӧ — вешјас Аԅіјаыԁ. Ті каԅалаԁ, сіјӧ мунас пемыԁлаԋӧ, вуҗӧрӧ понԁас пырны. Сіԇ-кӧ, Аԅіјаын лоӧ вој, а војыԁ рыт-бӧрын овлӧ. Мӧԁарԍаԋыс — Амерікаыԁ — југыԁлаԋӧ мытчыԍӧ: сені шонԁі петӧ — асыв.

Меԁым тајӧ јураԁ бурҗыка пукԍас, меԁ оз вун кыԇі тӧԁмавны кӧні лун, вој, асыв ԉібӧ рыт, тащӧм віԁлӧмсӧ унаыԍ вӧчӧј. Боԍтӧј, шуам, Амерікаын меԁ лун вӧлі. Сы-ԍерԏі сеԍԍа віԍталӧј, кӧні секі вој, асыв, рыт.

Вӧчӧј со кущӧм опыт-і. Пуктӧј мачаԁ кӧні ті олаԁ, чут. Лӧԍӧԁӧј сетчӧ луншӧркаԁ. Ԋӧжјӧԋікӧн бергӧԁӧј мачтӧ веԍкыԁківыв. Тіјан чутыԁ војԁӧр вуҗӧрӧ пырас (рыт ԁа вој лолӧны), сеԍԍа мӧԁарԍаԋыс бӧр југыԁӧ петас (асыв лоӧ).

Таԇі віԁлалӧмӧн ті каԅалаԁ, мыј быԁлаын му-вылын аслас каԁ. Міјанын-кӧ луншӧркаԁ, міјаныԍ асыввывлаԋын ԍорҗык-ԋін. Мӧԁарӧ, міјанԍаԋ рытывлаԋын воԇ-на, луншӧркаԁыс-на јешщӧ абу.