Лун ԁа вој.
Асланыԁ мачјас-вылӧ, коԁӧс-тај му-пыԃԃі віԁлалам, рісујтӧј ылӧссӧ (приблизительно) маԏерікјас, океанјас-ԁа. Сеԍԍа вӧчӧј со кущӧм віԁлалӧм. Кутӧј мачтӧ ӧшіԋ веԍтын. Мачсӧ шуамӧј муӧн, а ӧшіԋ југыԁсӧ — шонԁі југӧрӧн. Быԁлаӧ-ӧ мач-вылаԁ ӧшіԋ југыԁыс інмас? Тӧԁӧмыԍ, оз. Бурещ мач җыныԁ лоӧ пемыԁын, мач вуҗӧрын. Сіԇ-жӧ і муыԁкӧԁ: му җынјыс пыр вуҗӧрын. Мі шуам: сені ӧні пемыԁ, вој. Југыԁінас — лун. Луныс ԁа војыс пыр мӧԁамӧԁыскӧԁ вежлаԍӧны, муыс шонԁіыслы кор ӧтар боксӧ мытчӧ, кор мӧԁарсӧ-ԁа. Муыԁ-ӧԁ ԁугԁывтӧг ас гӧгӧрыс (ԁурпоп-моз) бергалӧ, веԍкыԁлаԁорӧ, рытыввывԍаԋ асывлаԋӧ.
Важӧн чајтлӧмаӧԍ, шонԁіыс-пӧ му гӧгӧрыс бергалӧ, муыс ӧԏілаын сулалӧ. Сеԍԍа тӧԁмалӧмаӧԍ му ыҗԁасӧ ԁа шонԁі ыҗԁасӧ ԁај ԁугԁӧмаӧԍ аԍсӧ ылӧԁлыны. „Муыс-пӧ-тај вӧлӧм шонԁі гӧгӧрыс кыщлалӧ“, шуӧмаӧԍ.
Боԍтӧј мачјастӧ ԁа гӧгрӧԁлӧј најӧс, кыԇі-тај ыргӧн ԉібӧ езыԍ ԃеԋга ԁорыш-вылас гӧгрӧԁлывлам. Мач гӧгралігас чуԋ-улаԁ коԉӧны вӧрԅывлытӧм чутјас. Му-вылын емӧԍ-жӧ сещӧм чутјасыс, на гӧгӧр і бергалӧ муыс. Сіјӧ чутјасыс шуԍӧны мучӧрспомјасӧн. Ԁумӧн-кӧ мучӧрспомјассӧ віԅӧн ӧтлаалам, сіјӧ мунас муԍар-пырыс, кыԇі-тај глобусын чӧрсыс глобус-пырыс мунӧма. Збыԉсӧ, ԃерт, ԋекущӧм му чӧрс абу, сіјӧ сӧмын ԁумын. Сіјӧ віԅ гӧгӧрыс (чӧрс гӧгӧрыс) муыԁ 24 час бергӧԁчӧ, суткіӧн шуӧны.
Глобус-вылын ԁа муԍарҗынјаса карта-вылыԍ корԍӧј мучӧрспомјас: Војвывлаԁорсасӧ, Лунвывлаԁорсасӧ-і.
Важ коми гижӧд