Маԏерікјас, океанјас-ԁа.

Уҗјас.

Муԍарҗынја карта-вылыԍ віԇӧԁлӧј — ваыс аԉі муыс му-вылын унҗык?

Ваыс унҗык. Арталӧмаӧԍ-ԁа, сіјӧ 2½-пӧв уна муыԍ.

Петкӧԁлӧј карта-вылыԍ меԁпаԍкыԁ васӧ — Ыҗыԁ океан. Сіјӧ ыҗыԁҗык став маԏерікыԍ ӧтлаын.

Сы-бӧрԍа мӧԁ океан ыҗԁа-ԍерԏіыс Јевропа Амерікаа костын. Корԍӧј сіјӧс карта-вылыԍ, шуӧј ԋімсӧ. Енӧ вунӧԁӧј сіјӧс. Ноко тӧԁвылаԁ уԍкӧԁӧј, коԁі меԁвоԇԇа морт сы вомӧн вуҗіс? Петкӧԁлӧј карта-вылыԍ кытыԍаԋ петіс Колумбыс, Му-шӧр (Средиземное) моресӧ-і. Віԇӧԁӧј бурҗыка море-берԁса му ԁор віԅ-вылас. Веԍкыԁа војлаԋӧ мореԍаԋыс Јевропа, зев кӧҗа ԁа курјаа ԁорјаса. Асывлаԁорас Јевропа-берԁас Аԅіја ԉаскыԍӧма, Јевропаыскӧԁ нач помԍа. Вежтас-пыԃԃіыс тајӧ кык маԏерік костас Урал гӧрајас. Лунвывлаԁорас мореԍаԋыс Апріка. Ӧтлааԍӧ оз сіјӧ Аԅіјакӧԁ? Кыті? Јевропакӧԁ ӧтлааԍӧ оз?

Јевропаыԁ, Аԅіјаыԁ ԁа Апрікаыԁ — меԁ гырыԍ маԏерікјас.

Најӧс, кујімнаннысӧ ӧтлаын, шуӧны Асыввывса маԏерікӧн, Важ муӧн ԉібӧ. Мӧвпыштӧ ноко, мыјла сіԇі шуӧны?

Коԁі на-пыщкыԍ меԁыҗыԁыс? Коԁі меԁічӧтыс?

Атлаԋԏіческеј океан сајын ԋоԉӧԁ маԏерік — Амеріка. Віԇӧԁӧј бурҗыка, кущӧм кык пеԉӧ сіјӧ торјалӧ. Мӧԁ-ног Амерікасӧ шуӧны Рытыввывса маԏерікӧн, ԉібӧ Выԉ муӧн. Мыјла сіԇі шуӧны, ноко ԁумыштӧ.

Віԇӧԁлӧ бурҗыка карта-вылӧ, абу-ӧ јешщӧ маԏерікыс? Кӧні сіјӧ? Австраԉіја — меԁбӧрја, меԁічӧт маԏерік. Сіјӧс јешщӧ шуӧны Лунвывса маԏерікӧн. Аԁԇӧмаӧԍ Амеріка-бӧрын ԁыр-мыԍԏі-на јешщӧ.

Австраԉіја, Аԅіја ԁа Апріка костса океанлӧн аслас ԋім. Кыԇі сіјӧс шуӧны? Тајӧ — којмӧԁ океан. Јешщӧ кык океан ем, таыԍ-на ічӧтӧԍ (ічӧт-вӧснаыс ӧні озҗык-ԋін і океанӧн лыԃԃыны, а мореӧн). Ӧԏіыс ԇік муԍар војвылын, а мӧԁыс лунвылас. Корԍӧј најӧс карта-вылыԍ ԁа віԍталӧј ԋімјассӧ.

Став океаныс мӧԁамӧԁыскӧԁ ӧтлаавлӧма.

Гіжӧј ԏетраԃаныԁ океан ԁа гырыԍ маԏерік ԋімјас. Велӧԁӧј најӧс наізԁуч, меԁ пыр тӧԁаԁ.

Карта-вылыԍ вӧсԋі гумага-пыр гіжлаалӧј маԏерік вежтасјас. Вунԁӧј віԅӧԁыс. Маԏерікјассӧ мӧԁамӧԁ-вылас пуктӧмӧн ӧтлааԍԏітӧј — коԁі на-піыԍ меԁыҗыԁ, коԁі меԁічӧт.

Велӧԁчӧј ԍуԍа петкӧԁлыны карта-вылыԍ маԏерікјассӧ, океанјассӧ-ԁа.