* * *

Ме баитча лишь ныкöт, кин эз öшты совестьсö, донсö,
кинлöн сьöлöмас олö важ деддэзлöн медмича горт,
кинлöн ки эз лэбтiсь пöртны рочö не нывсö, не зонсö,
кинлöн мывкыдас дума, что сiя эшö коми морт.
Ме баитча лишь ныкöт и ки нылö паныт нюжöта,
ась сералöны йöзыс, кинöс миян шогным оз дойд,
мийö Пармаын гортын и кортöн тай огö ветлöтö,
ми и етшаöн кыскамö ассиным комиö додь.
Сiя додьö тöбалöм дöс отирлöн сьöкыт оланыс,
нылöн шоггез и думаэз, кöднатöг овны пондыв,
сэтöн норыс и гажыс, зорöтiсö кöдна миянöс,
сэтöн визыв и югыт, сьöлöм понда меддона кыв.
Коми кыв, тэнö деддэз зорöтiсö важынся-важсянь,
берегитiсö сiдз жö, кыдз дорйöны пилiсь олан,
сiйöн ми род öштiсь вылын, овлö, сераламö-ваксям:
эд, кö выгода лоас, сэк мортыт то жид, то цыган.
Парма мунымлöн шогыс эд оз пальöт «рочыслiсь» онсö,
совесть абу, дак мый мырлö кыввес, кöть мымда тай модь...
Ме баитча лишь ныкöт, кин эз öшты совестьсö — донсö,
кинлöн мывкыдас дума, что сiя эшö Коми Морт.