ВА УВТЫН ПОС

БЕДА ЭНА НЫВКАЭЗКÖТ

Эшö неважын Перкоягын, неыджыт деревняын, кöда поздiсьöма Кайскöй волок дынiсь яганёвскöй парма пыдöсö, челядь горöтлöмсянь пельшы эз кыв. А öнi петан öтöрö — гöгöр лöнь, нельки кылö, кыдз дзингöны ыркытiнын номмез, кыдз пиксöны баняэз сайись расокын асланыс поззэзын бордтöм кайпияноккез.

Перкоягскöй школаын месяц ни кыдз чулалiс велöтчан год. Кынымкö недель бöрланьын öтiккез мунiсö пионерскöй лагерьö, мöдiккез — городö экскурсияöн. Кольччисö гортö öтнаныс Виталько да Серёжка. Кольччис эшö Маня Онянова, да мый ни сiйö лыддьыны. «Нывка дак нывка и эм, — шуисö зонкаэс, — чериавны сыкöт он мун, мяч чужьявны тожö он понды». И котрасьны öнi некинкöт. И орсны некинкöт. Гажтöм.

Виталько юис быдса кружка кöдзыт йöв, сёйис кынымкö шöрöм нянь — и пöт. А öнi мый? Может, сунгисьны кытчöкö ыркытiнö да сунасьыштны невна? Пожалуй, сунасян. Бабыс Витальколöн асывсянь рытöдз кок йылын жöдзö, сё кытшöмкö удж керö и внучекыслö спокой бы оз сет: то картов кучитны тшöктö, то гряддэз весöтны. А эта разь зонкалöн уджыс?

Öтöрын готсьöны курöггез, петух кайöма йöр вылö да ванзö-китсасьö, деревня сайын трактор гурöтö — пар гöрö, кытöнкö нывкаэз сьылöны. Натьтö, колхознöй карчйöрын капуста киськалöны. Нем интереснöйыс абу. Быдöс сiдз жö, кыдз удерлун вöлi. Быдöс сiя, мый тöн пеллез кылiсö и синнэз адззисö...

Кысь Витальколö вöлi тöдны, что как раз талун пондöтчасö сэтшöм делоэз, — только видзсьы.

Интересно, кытчö талун Серёжка юрсö пиньöвтiс? Тöн сiя эта кадö пукалiс ни Шерва дорын, кыйис учöтик-учöтик песканоккезöс, а талун некытöн оз тыдав. Поди, аймамыскöт ытшкисьны мунiс? Витальколöн дрöгнитiс сьöлöмокыс, бытьтö емöн кинкö чуткис. Мунiс кö другыс видззез вылö, сэк совсем делоыс умöль. Сэк и кувны гажтöмыссянь верман.

Зоночка сьöвзис посöдз вывсянь канава сайö, сэсся босьтiс бедь да мымда вын шентыштiс йöрыслань: мöдiс кольмöтны петухсö — эн косяв вижлоктö, кöр мортлö гажтöм. Но бедь буткисис петшöррез коласö, эз судзöт сьылiсьсö. «Проктöм курöг», — видiс асьсö зоночка да чеччöвтiс му вылö. Колö мунны, котöртны ылöжык. Аграфена баб, натьтö, думайтö ни, кытчö иньдöтны внучексö — то ли карчйöрö, то ли джодж чышкыны. Вермас и эшö кытшöмкö дело адззыны. Сiя сэтшöм.

Гажтöма шутнялöмöн Виталько иньдöтчис улица шöрöт. Мунiс сiя дзарьясьтöг, не тэрмасьöмöн. Мый дзарьясьны, кöр тöдан, что деревняын öнi только стогодся старухаэз да нимасись кагаэз? Не видзöтны жö нiйö.

— Виталько! Вить! Пырав миянö, ме мыйкö мыччала, — вдруг кылiс зоночка.

Маня Онянова. Конечно, сiя.

Виталько дыша бергöтчис осьта öшынлань, киэсö сюйис вешьян карманнэзö.

— Мый?

— Лок пыр. Ме чудо мыччала. Менам ловья кöчпиянок эм. Видз вылiсь дедö кутöма.

Ловья кöчпиянок! Радувьяс Виталько чепöссис посöдзлань, мöдö вöлi чожжык пырны Маня дынö, да первöй жö поспу вылын тран сувтiс. «Вот эшö! Кыдз учöтик кагаок, ылалi кöчпиянок видзöтны. Тьфу!»

Лöгасис ас вылас Виталько, а эшö ёнжыка лöгасис Маня вылö. Бöбöтлö кытшöмкö косöй сина кöчпиянокöн. Да сiя, Виталькоыс, может, миллионö ни адззылiс кöчпияноккесö и шы оз сет. Тожö чудо адззöма.

— Мый нö он пыр? — казялiс зонкалiсь паймöмсö Маняыс.

— Мый, мый! — нерис сiйö Виталько. — Кöчпиянок — и вдруг чудо. Менам, может, ошпиян эм, да и то ладно. А сэтöн — кöчпиянок.

— Бöбöтчук! Некытшöм ошпиян тэнат абу... Тэ ачыт ошпиян.

— А тэ — шырпиян. Тэнат чикисёккет — кыдз шыр бöжжез!

— Тэ бöбöтчук! И эшö трус. Тэ пö сё бабыткöт узьлан. Нёльöт класс кончитiн, а сё...

Павкис бöра Витальколö. Бöра трусöн шуисö. А мыля?

Виталько кöин моз дзарнитiс Горба керöс вылö, сьöлöмсянь чурс сьöвзис кок увтас. «У, лёкшöр, тэ увья быдöс эта! И кöр тэ аслат местаись нюрас таралан!»

Не весь сiдз Виталько лöгалiс керöсыс вылö. Таво тöвнас сiя ысласис ёрттэскöт лыжаэзöн. И быдöс бур вöлi, кытчöдз эз кайö эта мыс вылö. А сiя, Горбаыс, сэтшöм джуджыт, что дзарнитан улö, и сьöлöмыт кокпятаэзö сiдз и вотьыштас. И Виталько, конечно, эз лысьт ыскöвтны. Быдöнныс ыскöвтiсö, Маня Онянова лэбзис, а сiя — эз. Вот и лоис трусöн, тшыкöтiс нывкаыс одзын авторитетсö. А этö кыдз терпитны?

Виталько öнi только и вермис мыччавны Манялö кулак да бöра сьöвзьыны кок увтас. Маня мыччалiс сылö кывсö и шуис тешитчöмöн:

― Гажтöм лоис? Вот сiдз! Пондан аслат юрöн овны, а не чужöйöн. Висьтав ноко: мыля городас эн мун? Ме, Виталько, горт дозирайтны кольччи, а тэ кинöс дозирайтан? Ольпасьтö? Эд бöбöтiс тэнö Серёжкаыс, лешки-вошки керис.

— Кыдз сiдз бöбöтiс?

— А вот сiдз. Кузьтöв лöсьöтчис экскурсияöн городö, а сэтöн вдруг эз мун. Мыля? Только сiйöн, мыля учительницаыс группаас старостанас Катя Петроваöс пуктiс, а не сiйö. Ачыс эз мун, и тэнö сомуститiс, медбы гортын вöлi кинкöт бöбавны. Эх тэ, кукань!

Былись, кукань и эм! Да кыдз жö этö Виталько одзжык эз вежöрт? Эд Серёжкаыс былись тöвбыт городö лöсьöтчис, нельки виль рюкзак аймамыслö тшöктiс небны, а медбöрья лунö откажитчис мунны. Этö сыбöрын, кöр старостанас Катяöс пуктiсö.

— Эх, Виталько, — дзирыта шушкис сэк другыслö Серёжка пель одзас. И охота бы мунны городас, да мый ме сэтчинiсь эг адззыв? Висьтасис талун асывнас дядько Öльöксан, ошшасис, бытьтö мельница йирись югдандорас, быдса ведра ёдiэзöс кыйöма. Во-от кытшöмöсь! Только тэ, Виталько, некинлö шы эн сет, вежöртiн? Ашын шондi петiкас вуграсьны ветла, вот бурмöта сьöлöмöс!

— А кыдз жö городас? — юалiс Виталько.

— А мый ме городсис эг адззыв? — нюмыртiс тырппесö Серёжка да сьöвзис кок увтас. — Сэтчин жар, бус. Машинаэз одз да бöр... А ёдiэс, висьтасис Öльöксан дядь, быдöс гырисьöсь, госаöсь, умöликкес öтiк абу. Да! — и мечтайтöмöн шутньöвтiс.

— Öтiк асылö быдса ведра кыйöма? — дивуйтчис Виталько.

― Конечно, — шуис Серёжка. — Öльöксан дядь бöбöтчыны оз понды.

— Тöдан мый, Сёрежка? — шушкыштiс Виталько. — Кыдз пондан мунны вуграсьнытö, дак тарснит миян öшынö, а?

— А городас? — гусьöник юалiс Серёжка.

— А мый ме сэтчинiсь эг адззыв?

— Но ладно! Только видзöтлы менам, сыбöрын не мугны. Согласитчис сэк Виталько, а часöт не чери, не город, не ачыс Серёжкаыс. Вот оказия! И кыдз веритны эта бöрын йöзыслö?

И петö, что прав Маня Онянова. Беда, батя, эна нывкаэзкöт!

СЕРЁЖКАЛÖН НАСТРОЕННЁЫС УМÖЛЬ

Виталько бура ни тöдö: умöль овны чочком светас, кöр тэнат аслат характер абу. Он ешты петны öтöрö, а тэнö и трусöн шуасö, и куканьöн шуасö. Кöр тэнат абу аслат характер, сэк и тышкасьны некинкöт он понды. Кутчись, шуам, сiя жö Серёжкакöт, мыля бöбöтiс, дак не рад лоан. Серёжка тушанас ыджытжык Виталькося и кулаккес сылöн ыджытжыкöсь. Сöтас сивилёнö, дак лунтыр пеллезат музыка пондас орсны. Öддьöн тай охота.

Да и виноват разь Серёжкаыс? Тöвбыт мечтайтiс кöть недырик лоны старостаöн, асьсö мыччавны, начальникöн ветлöтыштны, а сэтöн вдруг пуктiсö не сiйö, а кытшöмкö нывкаöс. А кытшöм подвиггез понда? Но ладно, пятёркаэс Катя Петровалöн быдса сумка, но, ладно, кылыс сылöн, дзик бритва, но, ладно, кытчö колö и оз ков кузь нырсö сюйö. Но сёравно эд нывка! Сэтöн кöть кин лöгасяс, не только Серёжка. Сэтöн и Виталько лöгасис бы. Но лоны старостаöн сiя, конечно, некöр эз мечтайт. Кытшöм сiя староста, кöр характерыс абу?

Вот Серёжка — этö да! Настоящöй командир! Мый решитас, дак сёравно керас. Кöть не прав, а сёравно ас моз кусiньтас. Стальнöй характерыс, нем он шу.

И дружитны сэтшöм морткöт кинлö не охота?

И эта разь умöль, что корис не мунны городас сiйö, Виталькоöс, а не кинöскö мöдiкöс?

И споритны да видчыны сэтшöм морткöт разь позьö? Кöть кин шуас — оз позь.

Конечно, öбида кутö, кöр Манька Онянова быдпырся тэнö трусöн да куканьöн шуö. Но да ась шуö. Локтас кад, и Виталько эшö мыччалас, кытшöм сiя трус да кукань. Виталько керас эшö сэтшöм подвиг, кöр Манька Онянова öмсö осьтас.

Эх, чожжык бы керны сэтшöм подвигсö!

Кыдз? Кытöн?

Этö думайтiкö, Виталько иньдöтчис Серёжка ордö. Керис öтiк шаг, сэсся мöдiкö, а сэтöн и ачыс Серёжкаыс пантасис. Абу мунöма видз вылас. Вот эта бур. Пасьталöма сiя талун голубöй майка, вешьян коккесö пидзöсви пуджöма, пельпон вылас кузь вугыршать нöбöтö. Эта только и колiс Витальколö. Кыкöн некытшöм гажтöм оз кут.

— Но и прока тэ узьнытö! — шынньöв пыр панталiс ёртсö Виталько. — Видзчиси, видзчиси тэнö, и мыла орис.

— Этö эд тэ быдлаö ештан, — нюмыртiс тырппесö Серёжа. — Кысь ни тэ сьöрö вöтчыны.

— А мый ме? — öшис Виталько. — Ме нем.

— Видзöтлы менам, а то! — лöгасис Серёжка.

— А вуграсьнытö? Огö разь мунö?

— Локтас кад и мунан.

Ох-хо... Кыдз му вылас овны?

Серёжкалöн талун тожö настроеннёыс умöль вöлöма. Адззан, сразу лöгасис. А мый понда?

Кысь вöлi Витальколö тöдны, что Серёжкалö тöн рытнас невна только эз павк. Мамыс тшöктiс кучитны кык ряд картов, а зоныс и джын рядсö эз кучит. Талун сылö бöра сетiсö удж: кучитны не кык ряд ни, а нёльö. И чорыта вöлi висьталöма, что если эта заданнё оз ло тыртöм, то меднебыт шать лоас чеглалöма сы боккез бердö. Серёжка тöдiс, что мамыслöн сэтшöм кыввес сiдз и кольччöны кыввезöн, но сёжö кöсйисис кучитны не нёль, а вит ряд. Сiя чеччис одз, некой пору кучитыштiс конецöдз сiйö рядсö, кöдö пондöтiс тöн. А сэсся чуткис мыйкö сьöлöмас, юрас, дарсасис дума: öнi Шерваын медгырись чериэз тшыгöсь, кыдз поннэз, и нiя пондасö орöттöг уськöтчыны нельки кулöм нидзыввез вылö. «Мун жö, зону, мун, — шушкис кинкö пель одзас. — Öнi ёдiэз кыян». Ёдiэз, дак ёдiэз. Зонка свистнитiс окучниксö и нельки ачыс эз казяв, кыдз босьтiс вугыршать. И вот сiя мунö.

Эз тöд этö Виталько. Кöбы тöдiс, дак некöр бы эз понды пелитчыны Серёжкаыс дынö ылöстöм басниöн. Вот эшö лэбтас нырсö, мунас вуграсьны öтнас.

— Серёжа, а ме тöн быдса банка пугаггез öктi. Айö пес поткöтлiс, и нiя усялiсö пев ыждаöсь, — перыта пондiс баитны Виталько, медбы бурöтны другсö. — Он верит? Быль! Öтiк сэтшöм госа, кыдз порсь. Ме сiйö тэныт сета...

Медбöрья кыввесö Виталько шуис не öддьöн горöн, думайтiс, Серёжкаыс оз кыв, но Серёжка кылiс. Ох, кылiс, батя! Кыдз сiя дзарнитiс Виталько вылö! Радся-рад лоис, настроеннёыс син одзын вежсис. И мамныс заданнё йылiсь нач вунöтiс. Öнi. позяс сёр рытöдз вуграсьны.

— А менам эшö нидзыв эм. Пöжшöм назём кучаись адззи, — ошшасис одзлань Виталько. — Тöдан, кыдз сiя виклясьö? Дзик настоящöй артист сцена вылын кадриль йöктö. Öддьöн басöк нидзыв.

— Но ладно, мунам инö, — вöлись согласитчис Серёжка.

Виталько чожжык котöртiс гортас, гусьöник, мед эз кыв бабыс, судзöтiс слега коласiсь вугыршать, и кык друг, бытьтö нем эз и вöвлы, котöртiсö ю дорö.

Но не весь жö баитöны: кыдз луныс пондöтчас, сiдз и чулалас.

Öтамöдöс одзалöмöн локтiсö берегыс дорö, а сэтöн, как раз медчериа местаыс дынын, кыминьтöм пыж вылын тöдтöм старуха пукалö. Кыкнанныс сразу жö — стоп! Дзар керисö öтамöд вылö. «Кин сiя?» — юалiсö Витальколöн голубöй синоккез. «Ог тöд», — гогинь керис Серёжа маликöдз шырöм юрöн.

Тöдтöм старуха, тыдалö, вöлi мыдз. Пукалiс юрсö öшöтöмöн, эз и вöрöтчы. Öт киас сiя видзис кузь бедь, мöднас пыкöталöма тшöкасö. Кöть вöлi жар, а сiя пелитöма вывтас фуфайка, чышьянасьöма. И чышьян увтас эшö кокошник пуктöма. Интереснöй баб. Кытiсь сiя мыччисис?

Кык друг эз тöдö, мый керны. Локны старуха дынö полöм петiс, мунны öнi гортö — тожö некытшöм расчёт абу. Неужели сiдз и сулавны öтiк местаын? А мый, если старухаыс оз мун татiсь рытöдз?

Перво Виталько, а сэсся и Серёжа горöн ыш ловзисисö, öшöтiсö юррез. Вот петас жö лун...

ТÖДТÖМ БАБ

Вель дыр челядь сулалiсö бадь куст сайын, сё видзчисисö, кöр бабыс иньдöтчас аслас туй кузя. А сiя сё пукалiс и пукалiс, кыдз тупка, эз и лэбтывлы юрсö.

— Ылiсянь локтöма, — шушкыштiс Виталько. — Поди, кортöн ветлöтö да?

— Кортöн? Кин öнi кортöн-ту ветлöтö! Быдыслöн няньыс тыр. А локтöма былись ылiсянь: адззан — мыдзöма. Леспромхозiсь, натьтö. Этö лоö — пятнадцать километр люшкис. Поди, важнöй делоöн?

Кытшöм делоöн локтiс Перкоягö тöдтöм старуха, — Витальколö вöлi решительно öткодь. Сылö охота вöлi чожжык пысавны виклясись нидзывсö вугыр бердö и кыйны да кыйны ёдiэз. А старуха пукалiс, эз и думайт вöрзьыны. Ох жö сiйö, бордтöм ракаöс! Адззöма кытчö пуксьыны... Тьфу!

Но вот пöрись морт трек-трек керис юрнас, недырик тулис кöс чуннезöн синнэсö и чеччис. Но мунны эз тэрмась. Сiя перво юсис гумыштiс кырымнас ва, гывьялiс чужöмсö. Сэсся бöра гумыштiс да юис. И только эта бöрын лöсьöтiс бытшöмжыка кокошниксö да нырыштсис бедь вылö. И колiс жö Витальколö как раз эта кадö несйыны! Дас минута сулалiс, немымда охота эз вöв несйыны, а сэтöн вдруг — апчхи! Да сэтшöм горöн, что и пельтöм бы кылiс. А старухаыс пеллеза вöлöма. Сiя сразу жö бергöтчис челядьыслань и казялiс кыкнаннысö. Серёжа, конечно, ештiс гымгыны ёртыслö горбас кулакöн, да мый толкыс? Старуха казялiс нiйö.

— Христос-батюшко! Видзöт, морттэз тай ме дынын вöлöмась, — дивуйтчöмöн шуис тöдтöм баб и паськыта шынньöвтiс.

Шынньöв сылöн вöлi добрöй, голосыс небытик. И синнэс вöлiсö добрöйöсь, немымда эз вачкисьö тупка синнэз вылö. И Витальколö лоис не ас сьöртi, мыля думанас шуис бабсö бордтöм ракаöн.

И Серёжка вежöртiс, что баб, кöда шыннялö сэтшöм добрöя, керны умöльсö нем оз вермы.

— А ме вот сунасьыштi невна, — виноватöя баитiс пöрись морт. — Пукси шоччисьны и ланьтсьöма. Висьталö жö, горадзуллез, кытöн татöн Селиверст Гаврилович Пономарёв олö? Сы дынö могöн локтi.

Виталько дзарнитiс Серёжка вылö, Серёжа — Виталько вылö. Старуха вежöртiс, что зоночкаэс сэтшöм мортсö чередь тöдöны. И быль, Селиверст Гаврилович йылiсь нiя кылiсö первуись.

— М-м... А миянын сэтшöмыс абу...

— Неужели ме сораси? Поди, тiян деревняныт не Перкояг да? — повзьыштiс старухаыс.

— Миян деревняным шусьö Перкоягöн, — висьталiс Серёжа.

— Тэ, баба, эн сорась. Миян деревняным былись Перкояг, — шыасис и Виталько,

— Дак мый нö сэк? Мыля татöн абу Селиверст Гавриловичыс?

— Абу сэтшöмыс...

И вдруг Серёжка сöтыштiс кинас кымöс кузя:

— Эм! Этö эд пастух Öльöшкалöн дедыс! Мыся, кытшöм Селиверст, а сiя вон кин вöлöма! Пельтöм Селько...

— Быль эд! — радмис старуха. — Селькоöн шуöны.

Челядь сэк жö согласитчисö мыччавны Пельтöм Сельколiсь гортсö. Нiя важнöя оськалiсö ордчöн пöрись морткöт, мунiсö пустöй улица шöрöт. Любопытнöй Манька Онянöва мыччывлiс чикисёккеза юрсö öшынö, но Виталько гусьöн мыччалiс сылö кулак да сэтшöм лöгöн дзарнитiс, что видзöтны öтöрö нылочкалöн эз ло некытшöм интерес.

— Тэ ылiсянь, баба? — юалiс Серёжа.

Старуха гогинь керис юрнас, но дыр эз шыась. Зоночка ештiс казявны, кыдз сылöн чужöмыс невна кымöртчис.

— Ылiсянь, кагаэз, öддьöн ылiсянь. Коккез нач орисö.

— Леспромхозсянь?

Старушка чöлiс, сiя бытьтö нем эз и кыв. Серёжалö эта эз гленитчы. Керöны мортлö добрöй дело, а сiя спасибо туйö оз и баит. Но да ладно, чёрт тэкöт. Он баит, дак эн и баит, тэтöг олам.

Деревняыс мöд конецын челядь мыччалiсö старухалö, кытöн олö Пельтöм Селькоыс, и котöртiсö бöр берег дорö. Сэтöн нiя неетша сералiсö. И вöлi мый вылын. Кытöн пö Селиверст Гаврилович олö! Ха! Этö Пельтöмыс? Да сiйö том и пöрись только Пельтöмöн тöдö. Тожö адззöма кинöс Гавриловичöн шуны...

— Серёжка, а кыдз тэ вежöртiн, что Пельтöм Селькоыс — Пономарёв?

— Газетаэз лыддьöтны колö! — горöтчис паныт Серёжка. — Кин мöйму гожумнас председательнымöс критикуйтiс, кöр плотинасö ваыс кырöтiс?

— Былись эд. Ачым заметкасö адззылi. И подпись — С. Пономарёв. Колö жö, а? Вот тэныт и пельтöм Селько. Писатель! Ха...

Эх, кöбы тöдiсö Виталько да Серёжка, кытшöм могöн локтiс Перкоягö эта старухаыс, дак некöр бы эз пондö сiдз серавны. Некöр бы эз пондö!

КÖР ЧЕРИЫС ОЗ КОКАВ

Пугаг, кöдö Виталько сетiс Серёжкалö, вöлi былись госа, кыдз порсь. Этшöм пугаг любöй ёдiлö мася чöскытжык. Кöть неохота, да сёравно пон моз уськöтчан.

Серёжка кужöмöн пысалiс сiйö вугыр бердö и, кыдз керö быд дошлöй черикыйись, куимись сьöвзис сы вылö. И только эта бöрын чапкис вугырсö ваö.

А Виталько кыскис банкаись ассис знаменитöй нидзывсö. Вöлi сiя гöрд, кыз и, кыдз баитöны дошлöй черикыйиссес, öддьöн активнöй. Нидзыв эз вермы овны спокойнöя, сё виклясис и виклясис, старайтчис мезмыны Виталько киись. Но зоночка проворнöя пысалiс сiйö вугыр бердö, сьöвзис тожö куимись и чапкис ваö.

А ваыс талун вöлi сöдз, нельки пыдöссис поснитик галькаэс тыдалiсö, и Виталько бура адззис, кыдз нидзылыс öдззис пиньласьны, виклясьны, öвтчыны öтмöдöрö да чепсасьны. Мöднёж шуны, гаг пондiс йöктыны.

Синва петiс Виталько синнэзiсь, понпутша чужöмыс пыкнитiс биöн, а сьöлöмыс только ток да ток! Медыджыт ёдi, конечно, самнитас этö йöктiсь «шпанаöс» и шедас Витальколöн сумкаö. Сэк вöлись видзöтам, мый пондас баитны Аграфена баб, кöда му вылас медöддьöн радейтö сёйны черинянь. Сэк небось дугдас сетны внучекыслö быдкодь удж, а ачыс пондас иньдыны вуграсьны.

Вот бы сiдз!

Но пондыв! Мымда бы эз виклясь нидзылыс, а ёдiлöн и дукыс абу. Быд минута бöрын зоночка видзöтiс поплавокыс вылö сё гажтöмжыка. Сьöлöмас пырис мыйкö сьöкыт да умöль. Эз радъяв и Серёжа. Пукалiс тожö чöлöмöн, юрсö öшöтöмöн. Чери талун немымда эз кокав. Быдöнныс нiя, тыдалö, вöлiсö пöтöсь и нельки госа пугаг вылö и йöктiсь нидзыв вылö виш эз керö. Кад вöлi öштöм. Да, öштöм вöлi кадыс!

— Быдöс эта ёрдöм старуха увья, — ваас видзöтiкö лöгöн шуис Серёжка.

— Конечно, сы увья, — согласитчис Виталько. — Интересно, мыйлö сiя локтiс? Может, важнöй юöрöн...

— Кытшöм, поди, важнöйöн. Пöрись старухалöн вермасö разь лоны важнöй делоэз?

Эта баснисянь лоис сёжö невна долытжык. Кыкнанныслö вдруг лоис öддьöн охота тöдны, мыйлö локтiс нёштöм старухаыс Пельтöм Селько ордö, кытшöм сэтшöм могöн? Деревняись челядьыс эз пыравлö Селько дынö, мылякö полiсö сыись. Аскодя вöлi старикыс. Юрсиыс гöрд, кыдз шондi, тошыс гöгви. И тожö гöрд, кыдз бикыв. Но мый главнöйыс, дак этö — синнэс. Лöчытöсь, шучкöп бытшкöны, кöр дзарнитас тэ вылö. Не весь жö Аграфена баб шуö Селькосö колдунöн. Только колдуннэзлöн да лешаккезлöн пö овлöны сэтшöм синнэс.

Тыдалö, сьöкыт характерыс. Военнöй годдэз тшыкöтöмась Сельколiсь характерсö. А, может, и сiя тшыкöтiс, что олö öтнас. Эд некин сылöн родняыс абу, только внучекыс, Öльöшкаыс. Пельтöм Сельколöн иньыс важын ни кулöма; зоныс, Öльöшкалöн айыс, öтпыр мунöма кодöн пывсьыны да и чорзьöма баняас. Абу Сельколöн и моньыс, Öльöшкалöн мамыс: дас год мымда ни чулалöм сэксянь, кыдз инькаыт мунöма тшакьявны и абу бертöма — видно, ош лапаэзö шедiс.

Быдтiс Селько внучексö, вердiс и пасьтöтiс, велöтiс, кыдз овны колö:

— Кывзы менö, и быдöс лоас бур да ладно. Да эшö енöс эн вунöт. Сiя быдöнлö отсалö.

— Учительница баитö, еныс пö абу.

— Бöбöтчö. Кöбы не еныс, дак и тэ важын бы эн вöв. Кулiн бы. Шогалiн тэ, Öльöшка. А поп дынö ветлiм и, адззан, — ловья!

— Ме понда кывзыны тэнö, дедiньöй. И енсö понда кывзыны.

— То-то жö.

Сiдз и олiсö кыкöн дед да внучек. Олiсö не тэрмасьöмöн, не асланыс делоö юр некöр эз сюйö.

Эшö кынымкö год бöрланьын Пельтöм Селькоыс Перкоягскöй бригадаын дозирайтiс пода шогья сюэз да видззез, деревняö шоча и мыччасьлiс. А мöйму петiс пенсия вылö и уджавны некытöн эз понды. Но деревняын бöра некöр оз шатлась, сё кытöнкö вöрын «лешачитö», кыдз баитiс öтпыр Аграфена баб. Эта, пожалуй, и буржык, мед лешачитö. Кöть челядьсö аслас тошöн да синнэзöн оз повзьöтлы.

Не, мый бы эн думайт, а оз вермы сэтшöм морт дынö кинкö локны простöй делоöн. Кытшöм сэтшöм мог вермас лоны Селько дынö?

— Колö дзарнитны, мый нiя керöны, — шуис Серёжа и чеччис местасис.

— Кыдз тэ дзарнитан? Нiя, поди, керкуын пукалöны...

— Но и мый? Локтам öшын увтö и дзарнитам.

— Кокнит висьтавны: локтам и дзарнитам! А вдруг шедан?

Но пондыв öнi öмавны Серёжкаöс. Раз пырис мыйкö юрас, дак кык нöшöн кöть сöтав, сёравно бöр оз пет.

— А вдруг кутас, мыся? — повзьöмöн горöтчис Виталько.

Серёжка сэтшöм лöга видзöтыштiс другыс вылö, дзик шуис: кытшöм тэ трус! — и öвтыштiс киöн. Витальколö лоис öддьöн недолыт. Лоис дасiсь умöльжык, нежели сэк, кöр Маняыс шуис сiйö трусöн и мыччалiс кывсö. Зонка перыта сувтiс кок йылö, висьталiс чорыта:

— Ме первöй локта öшын увтас и дзарнита керкуас!

— Первöй?

— Первöй!

— Не, ме первöйыс локта. Ме тэсся ыджытжык и унажык верма казявны. Да и тэ бöра несйыны верман.

Первöй дак первöй. Виталько споритны эз понды. И нiя кыкнанныс чепöссисö котöртны. Нельки вугыршаттезнысö вунöтiсö. Да и гаггез йылiсь некытшöм басни эз вöв. Тожö вунöтiсö.

НЕВЕЖÖРТАНА БАСНИ

Пельтöм Сельколöн айыс вöлöма Перкоягын медбогатöй мортöн, кулакöн. Сiя абу радейтöм соседдэсö и строитлöма керкусö деревняыс конецö, невна торйынжык мöдiк керкуэз дынсянь, самöй лог дорö.

Коллективизация коста пöрись Гаврил пышшöма кытчöкö, и ыджыт керкуын олiс öнi зоныс öтнас, не лыддьыны кö Öльöшкаöс. А мый сiйö лыддьыны? Детина гожумбыт дозирайтö Важ мельница сайын куканнезöс, шоча и гортас кайлö.

Сiдз и олiс Селько öтнас, хозяйство почти некытшöмö эз видз, кöть крепыт заплод сайын тыдалöны гиддэз, амбаррез да эшö кытшöмкö постройкаэз.

Сельколöн керку öшын увтын путриктö ыджыт сад: быдмöны паськыт льöмпуэз, рябинаэз, эмöсь сэтöр кусттэз, малинник. Мöйму, кöр Селько «лешачитiс» кытöнкö вöрын, Виталько да Серёжка размöд пыравлiсö садас. Нем и шуны, чöскыт вöлi ягöдыс. Да и пырнытö садас абу сьöкыт. Колö только муныштны заплод пöлöн, логыс дорöт, и казялан неыджыт ыбöсок, кыт Селько кайöтлö логсис ключ ва да лэдзчывлö аслас сьöд баняö пывсьыны.

Но пырны эта ыбöсокöт талун полöм петiс: вдруг садас оча кымöс пантасян Селькокöт?

Ковсис пелитчыны йöр коласöт перво карчйöрö, сэсся карта сайöт мунны чом дынö, вöлись водны кынöм вылö и кыссьыны öшыннэслань. Одзын виклясис Серёжка, бöрас Виталько. Кыссясö метр-мöд, кывзiсясö — и бöра одзлань. Серёжка инмывлiс кытшöмкö лöчыт дора галя бердö и зубыта дойдiс кынöмсö. Виталько гырыштiс кисö, и öнi сiя садейтiс, кыдз сотöм.

Керкуыс дынö сибалiкö, невна бöра кывзiсисö, шоччисьыштiсö. Серёжка мыччалiс ёртыслö ныр вылас: эн несйы! — и бöра пондiс виклясьны пыдын бороздаöт.

Нö вот и стена. Öнi колö невна кыссьыны канаваöт, сэсся сувтны мудьöт вылö и дзарнитны керкуас.

Кыдз и баитчисö, мудьöт вылö первöй кайис Серёжка. Сiя лякасис керку стенаыс бердö, сувтiс кок чуннез вылö и кань моз кыссис öшынлань. Виталько куйлiс не кулöм не ловья. Сы кымöс вылын мыччисисö гырись ньылöм воттез, тырппес вöрисö и, кыдз нарочно, пондiс кильöтны нырас. И, конечно, несйис бы, если бы эз завидуйт эта минутаö другыслö. Кытшöм вына характерыс! Кытшöм сiя смелöй! Адззан, кыдз видзöтö öшынас! Мый сiя адззö?

— Некин сэтöн абу, — мудьöт вывсянь лэдзчикö шушкыштiс Серёжа.— Кытöнкö керку саяс бобгöны. Садас, натьтö.

Зоночкаэз стена пöлöн вешшисö карталань. Тэрмасьöмöн петiсö бöр йöрыс коласöт, котöртiсö лог дорö, ыбöсокыс дынö.

— Льöмпуэз увтын нiя. Сэтчин беседка эм, — висьталiс Виталько.

— Ачым тöда, — шуис ёртыс. — Пырам малинникас и кывзiсьыштам, мый лёбöны.

Сiдз и керисö. Кыссисö кынöм вылын малинникöт, ляпкисисö пес поленич бокö, кöдö Селько тэчöма заплодыс да кытшöмкö важ столб коласö. Эстöн Виталько чувствуйтiс асьсö бура. Казялас кö Селько, дак сразу котöрт ыбöсокöттяс логö, некытшöм йöр вуджны оз ков. Бур и сiя, что поленич сайсянь не только быдöс кылö, но и тыдалö. Эта öддьöн бур.

Селько и старуха пукалiсö неыджыт пызанок сайын. Нiя сёрнитiсö и юисö чай. Зоночкаэз ёна дивуйтчисö, кöр казялiсö, мый керöны кык пöрись. Чай юöны! Этö сэк, кöр небоын пöжö шондi, öтöрын жар, что и лолавны немöн?! Интереснöй отир. Сувтöтöмась одзаныс самовар, кружкаэз, кытшöмкö туис вайöмась — и пируйтöны. Селько пöрччалöма йöрнöс сикöджсö, люзь пымалöма. Чужöмыс сылöн гöрдöтöм, и быдöс ни: и юрсиыс, и тошыс, и кымöсыс — вöлiсö чим гöрдöсь. Ордчöн сыкöт нельки меднöй самоварыс кажитчис сьöдöн, бытьтö чугун.

— Сiдзкö, шогалö отец-батюшконым? — гажтöма бобгыштiс Селько — Жаль.

— Шогалö, сват, шогалö, — сiдз жö гажтöма отвечайтiс старухаыс. Эшö одзжык сiя чöвтöма ассис фуфайкасö и öнi пукалiс öтпöвсöн. И чышьянсö чапкöма, только кокошниксö кольöм. Чужöмыс старухалöн тожö куш ньылöм, нач рушмöма. Нö чайсö сё юис и юис. Кöтöтас кружкаас чочком калач, курччöвтас невночка, пöлялас-керас чайсö и юö учöтик гульккезöн, чöскöтö öмсö.

— И матушкаыс татöн тожö шогавны пондiс, — юöртiс Селько. — Ог и тöд, мый сыкöт керны.

— Веськöт тэ сiйö, батюшко. Еныс оз вунöт, — чайсö юикö баитiс старуха и кыскис писис учöтик баночка. — Вот вайи городiсь... Дона лекарство.

— Быдöс кера, мый верма. Вот, ужо, кыска сiйö öтiк лöнь местаö. Хозяйкаыс добрöй. И мошшесö лэдза... Но, веськыта висьтавны, полöм петö! Кынымись ни баитi батюшкоыслö, медбы эз иньдав сэсся татчö, дак оз кывзы. Эд быдöс делосö тшыкöтны позьö.

— Этö сiдз. Но мый жö керны, сэтшöм сылöн воля. Ми вонöкöт поперег сувтны ог лысьтö. Сiя миянöс вердö, сiя шонтö. Тэ уж служитышт эшö невнасö, бура тöда — эта медбöрья гöстя.

— Ладно, мый-нибудь арталам. Кöиннэсö ачым пантала, ачым и кольлала. Не первуись. А мый жö эшö висьталiс юрвердiсьным? Эд не весь тэнö иньдiс?

— Не весь, батюшко, не весь. Лыддьöтöма кыськö тай: война вылын пö овлö и сiдз, кöр солдат чапкö пишальсö, медбы одзлань врагыскöт пессьыны.

— Мыйкö не сiдз сiя одзжык баитлiс...

— Сiдз и тшöктiс быдöс керны, сiдз и тшöктiс, батюшко. Колö пö, медбы эз дöнзьы нылö, ёрдöммеслö. Ыджыт нылöн вынныс, ох, ыджыт. И приказ миянлö сетöма строгöй — осьтны виль поз.

— Да мый жö эта сэтшöмыс, о, господи, господи, — киэзнас паськыта öвтiкö, баитiс Селько. — Кыным год берегитi, синöся буржыка берегитi, сё думайтi — пригодитчас. И быдöс, петö, весь. А вдруг потоп лоас — мый сэк киö босьтан? Тöрмöм бедь?

— Лоас виль потоп, лоас и виль ковчег, — висьталiс старуха. — Вонö сiдз и шуис: важыс пö немлö.

— А плотинасö кырöтiс, — öвтыштiс кинас Селько. — Кöиннэз котрасьöны, палестина косьмö. Следдэз... Следдэз...

Следдэз...

— Греххез миян, греххез. Но ен отсалас.

— Енсö сэтчö нем каттьыны.

― Висьталöма святöйыс: ентöг öтiк шаг он кер.

— Миян делоын сiя не отсасись, — шуис Селько. — Вот только наследникöс ассим, Öльöшкасö и повзьöтла мукöдпырся. А сiдз — пустöй места.

— Мый тэ, мый тэ! — повзьöмöн пондiс баитны старуха. — Стыдитчы, батюшко!

— Э-э, пустöй места. Важын казялi — пустöй. Эз отсав сiя миянлö, — öддьöн гажтöма шуис Селько и содтiс: — Ас вылö колö надейтчыны, а сэсся нем. Вот кöс тшак да калитöм ореххез буди. Кöс тшакыс адззисяс. Кывсьö, босьтöны пö мукöддэс?

— Бытшöм я?

— Лöсялас.

Виталько чувйыштiс ёртыслö бокас:

— Но и важнöй делоэз! Палестина, ореххез, кöс тшак... Мунам?

Серёжка гогинялыштiс юрнас. Кывзiсисö невна и тырмас. Но старуха вдруг лэбтiс юрсö, тури моз нюжöтiс голясö:

— Оте-те-тёть!

Дзик курöг готсис. Сыбöрын бöра чирöстiс и бöра — оте-те-тёть!

«Икота кутчисис», — вежöртiсö челядьыс.

Старик шупыта чеччöвтiс местасис, чепöссис керкуö.

— Кöдзыт ва петкöта, быдöс чулалас, — шуис мунiкас.

Челядь гусьöник кыссисö ыбöсокыс дынö, мöдiсö петны. И колiс жö эта кадö Витальколö несйыны! Апчхи! Да сыбöрын эшö — апчхи! Старуха сразу жö бергöтiс юрсö и... казялiс. Казялiс кыкнаннысö.

— Тi мый эстöн керат? — юалiс сiя. Серёжа бергöтчис старухалань, шуис гажтöма:

— Бабу, ми мяч шупкалiм, и сiя усис кытчöкö этчö, льöмпуэс коласö. Ми этчин, öтöрас орсiмö... А сiя лэбзис татчö. Тэ эн адззыв?

— Оте-те-тёть! Эг эд, челядь, адззыв. Вон, буди, этчин, петшöрас. Оте-те-тёть!

— Кин сэтчин, сваття? Кинкöт баитан? — вдруг кылiс Сельколöн кыз голос.

— Да вон челядёккез садат мяч уськöтöмась. Кошшöны тай.

— Челядёккез?! — рявкнитiс Селько. — Вот босьта шать да мыччала нылö мячсö! Нiя, понгöннэз, натьтö, бöра сэтöр сёйны пырисö. Ужо!

Кöр Селько босьтас шатьсö да локтас вороткаыс дынö, челядь видзчисьны, конечно, эзö пондö. Нiя нетшкöвтчисö местаись и öдззисö лэбзьыны. Прыг-прыг-прыг! Пондыв-ко вöт.

И только лог пыдöсас вежöртiсö, что керисö бöра нёштöм дело: йöз басни кывзiсö.

И кöть бы интереснöй басни, а то...

Но не каждöй басни позьö сразу вежöртны...

УМÖЛИК ОЛАН

Нем вöлi керны Витальколö да Серёжкалö, эз тöдö, кытчö юррез пиньöвтны, и нiя, стыдтöммез, шпионитiсö честнöй пöрись йöз сьöрын. А вот пастух Öльöшка эта кадö вочис киссьöм öсек, кералiс потшшез, медбы йöрйыны виль загон, сыбöрын коялiс загонас сов-лизунец, а кöр шондiыс кайис юр весьтö, вашöтлiс куканнезöс Важ мельница йир дорö юктавны. Поскотинаын уджыс тырмис, и павжунöдз Öльöшка сiдз мыдзис — öдва кок вылын öшшис.

Ёна мыдзис Öльöшка. Сы векнитик и нятьöсь чужöм кузя шороккезöн визывтiс ньылöм, кузь коккес гардчисö, и зоночка паддялiс, кыдз сувтöм вöв. Быдöс сылöн кузь мыгöрыс ветлö одз да бöр, бытьтö кытшöмкö лёк вын сöталö спинаас зорöн. Кöда ладорсянь бы эн видзöт, а басöкöн Öльöшкаöс некыдз он шу — вöснитик сiя, дзик майöг, виньöрик. И паськöмокыс сыри-быри, öшалö пельпоннэз вылын, кыдз полакала вылын мешöк.

Уджалö Öльöшка бытшöма, быдöс старайтчö керны сiдз, кыдз велöтö зоотехник Иван Степаныч, но сёравно Перкоягын шуöны сiйö супонейöн. Лякасис эта нёштöм нимкодьыс, и зыртыштны сiйö и гывьявны он вермы. Неудачнöя пондöтчис Öльöшкалöн оланыс, нем и шуны, öддьöн неудачнöя: одз кольччис айтöг-мамтöг, быдмис умöлика, часто шогавлiс. Натьтö, быдкодь шогöтыс увья и пукалiс школаын быд классын кык годöн, öдва вуджис витöтö, да сэтчö и сибдiс. Ковсис чапкыны велöтчöмсö. Пельтöм Селько кутчöтiс ассис наследниксö пастучитны, медбы эз сёй зонкаыс няньсö весь. И бур — уджалö детина, вайö колана польза и дедыслö, и колхозлö. Но сёравно Öльöшкалö умöля овсьö.

Гажтöм дозирайтны куканнесö öткöн. Нельки деревня дынын гажтöм, а эстöн, Пыдöстöм нюр дынын, и баитны нем. Гöгöр пемыт вöр сулалö, нюр ольсассьö, дзарнитан — мороз спинатö сывьялö. Луннас эшö позьö овны, а вот ойнас делоыс нач ни умöль. Только водан избушкаö нар вылö, только кунян синнэтö, а ыбöс сайын и пондöтчö сякöй дивовежа, нюрсис и вöрсис сiдз и петö куль табуныс, тешитчö морт вылын. Вöрас ойбыт нёштöмасьö кинкö, нюрын туруныс орöттöг кышöтö. Не весь жö пöрись отирыс баитö: лешаккес эна страшнöй местаэзын сымда — кöть пруд прудит. И совсем бы не олан вöлi, кöбы Öльöшка эз босьт сьöрас бур ёрттэзöс. Этö первöй делоöн, конечно, öжöг, мöд делоöн — чер. Öддьöн бур ёрттэз нiя, отсалöны. Дед Селько быдпырся касьтывлö: узьны эна ёрттэзтöг нюр дорын некыдз оз позь — вермас нечистöйыс. Кöр водан узьны нюр дорись избушкаö, обязательно пернапасав кымöстö, сэсся крестав öшын да потолокись тшын петан осьта, сыбöрын — ыбöс. Да эн вунöт сувтöтны ыбöс дынö сотчöм öжöг, эн вунöт сiдзжö сöтны порогö ассит чертö. Куль табуныс да быдкодь нечистöй дукыс смертись етшажык полö, нежели сотчöм öжöгись да черись. А вот талун ойнас Öльöшка чуть только юрсö эз öшты. Луннас сiя ёна мыдзис: ковсис дыр вöтлiсьны порозок сьöрын, кöда пышшöма вöлi загонсис дзибö. Чеччöвтöма, кöш кымöс, йöр вевдöрöт и котöртöма пон тöдö кытчö. Неетша ньылöм кисьтiс Öльöшка, вöтлiсьöв-керис срам кукань сьöрын, но панöвтiс сёдаки, йöртiс загонö окояннöйöс. Мыдзувья водiс детинаыс нар вылö шоччисьыштны, да сiдз и онмöссис казявтöг. Кымöс ассис эз пернапасав, чер порогö эз затшкы — сiдз и онмöссис. И вот, пожалуйста: ойшöрнас дрöгнитiс вöрыс. пуэз куснясьны пондiсö, нюрын рявкнитiс кинкö. Беда! Чеччöвтiс Öльöшка, дзарнитiс öтöрö, а сэтчин — Христос тэ, батюшко! — тоша мужик сулалö. Лешак! Бур, что Öльöшка ештiс креставны ыбöссö да молитва шушкыштны: «Свят, свят!» А то бы...

Кыдзкö неважын вовлiс татчö дед Петрован. Кывзiс Öльöшкаöс и неетша сералiс, сыбöрын серьёзнöя висьталiс, что абу му вылас некытшöм нечистöй вын, что быдöс эта — öтiк сказка.

Эз верит Öльöшка, гогинь-гогинь керис пашмöм юрнас.

Школаын учительница тожö авторитетнöя висьтасьлiс, что некытiсь некин эшö öтiк лешакöс абу адззылöм, что повны нач некинiсь. Кыдз не веритны учительницалö? И Öльöшка дугдывлiс сэк повны. Но öтiк дело — школаын и гортын, и совсем мöдiк делоыс вöрын. Пыдöстöм нюр дынын. Совсем мöдiк делоыс. Талуння ойся случай бöрын зонкалöн сьöлöмокыс сё эшö кытöнкö кокпятаын, юрас кытшöмкö свальнöй шум, спина кузя, кыдз казьмöтан сiйö, нидзыввез виклясьöны. Асывнас ки-кок дрöжитiс, сёйны некытшöм охота эз вöв, йирышлiс сухар — чуть эз öсöт. Уджалiс павжунöдз, мыдзис, а сёйны бöра неохота. Тыдалö, быдкодь думаыссянь да полöмыссянь конец локтö. Не весь жö юр сiдз и потласьö, сiдз и тронгö, бытьтö колокол. Мый бы эн шу, а пышшыны колö эта вöрись, пышшыны ылöжык. Но кыдз и кытчö?

Вовлiс неважын, городiсь Колька Сгодин, тожö перкоягскöй сирота, чудоэз висьтасис: велöтча пö городас училищеын, чожа каменщикöн лоа, ола пö быдöс готовöй вылын. Корис Öльöшкаöс сьöрас, кöсйисис сюрöтны училищеас. Дед Селько эз лэдз внучексö, баитö, гажтöм тэтöг лоас. Кывзiс дедсö Öльöшка, жалейтiс сiйö. А жалейтнытö мый понда?

Кытчö воштiсьны, кыдз овны одзлань?

Лэдзчывлiс Öльöшка ключ дорö, сукар кöтöтiс, бöра йирыштiс. Гажтöм, сьöлöм гудрасьö. Колö мунны. Колö сьöвзьыны эта олан вылö — и пышшыны. Перво городö, а сэсся кыдз ен шуас. А, поди, ветлыны Петрован дед дынö, висьтавны сылö быдöс, мый тöдö, совет корны?

Полöм петö сёдаки. Полöм петö!

ВИЛЬ ЛУН — ВИЛЬ ДЕЛОЭЗ

Часто ойезнас Виталько адззывлö быдкодь бытшöм вöттэз. То вöтасяс сiя, бытьтö кыскис Шерваись сэтшöм ыджыт щука, что и лэбтыны öтнас оз вермы, кыдзовöй кряжся сьöкытжык.

То вöтасяс, бытьтö пятёркаэз сы дневникын дасiсь унажык, нежели Катя Петрова дневникын. То öвтö сiя лöчыт сабляöн и мунö атакаö öтлаын Чапаевкöт. Вражескöй тылын разведчикöн вöлi... Учёнöй роботкöт английскöй кыв вылын баитiс, öтпыр Тöлiсь вылö лэбзьывлiс. Сякöйыс вöлi.

А талун сiя нем эз вöтась. Кыдз водiс, сiдз и ланьтiс, дзик вийöм. И вöлi причина. Шедiс-даки Витальколö дружокыссянь. Серёжка кыкись сюйыштiс сылö горбас, мыля несйис Пельтöм Селькоыс садын, и тшöктiс отсавны кучитны картов.

— Уджалыштан невна, дак и несйыны дугдан! — висьталiс Серёжа.

И нем он кер — ковсис кучитчыны. Павжунсянь рытöдз кучитiсö. Киэз орисö сiдз, кыдз некöр эз орлö. Чужöм вылöт шоррезöн визывтiс ньылöм. Поснитик бус пырис öмö, синнэзö, пидзöссэз дрöжитiсö.

Виталько сiдз мыдзис, что öдва-öдва локтiс гортöдз. Локтiс, водiс сарайö турун вылö да и онмöссис ужнайттöг. И узис сiдз — некытшöм вöт эз адззыв.

Саймис сiя сёрöн и, конечно, не ачыс.

— Тэ дыр мöдан узьны, дышкучик? — треситiс сiйö бабыс. Дышкучик тай! Адззылiс бы, кыдз Виталько уджалiс тöн дружокыс карчйöрын...

— Аймамыт важын ни видз вылын, натьтö, пымавтöдз ытшкисисö, а тэ сё нюжласян. Вот стыдтöмыс...

Виталько бытьтö нем эз и кыв. Сiя нельки синнэсö эз осьтлы. Мöднёж, пондiс карöтны сыбурна, что бабыс пеллесö тупкалiс. И сэк вöлись чужис баб юрын öтiк хитрöй дума.

— Виталько! А мый ме тэныт висьтала? Кывзы жö: лэдзчи тöн ю дорас, а сэтöн вугыршаттезныт валяйтчöны. Лэбтi öтiксö, кыски вугырсö васис, а вугырыс бердын...

— Кин шедöма?! — чеччöвтiс Виталько.

— Налим! Да сэтшöм кыз! Истово порсьпиян... Чериэс царствоын, тыдалö, урядникöн вöлöма.

Лэдзчис Виталько сарайись, кöдзыт ваöн чужöмсö гывьялiс. И только сэтöн кватитчис: налиммес гожумнас вугыр бердö некöр оз кутчисьö. Бöбöтiс Аграфена баб. Бöбöтiс и сэк жö удж адззис.

— Ветлы, кагу, Петрован дед ордö, шогалö пö сiя. Нöбöт вот туисок, матор сэтöн. Ась старикыс чай манас юö, долытжык, поди, лоас.

Мунны дед Петрован ордö? Этö позис бы. Дед Петрован öддьöн бытшöм морт, не Пельтöм Селько. Мый бы эн кор, сiйö и сетас. Неважын пыж сетлiс Шерва сайö вуджлыны, сэсся эшö пиксаннэз керлiс. И мунны сы дынö позис бы. Но эд Петрованыс — Манялöн дед. Эд Маняыс бöра сiйö трусöн шуас, тшыкöтас лунтыр кежö настроеннё. Да и Серёжка нывка пастухöн вермас нимтны...

Но и мед! Мый сылö колö, мед сiйö и лёбö. Виталько решитiс мунны. Серёжа вылö тöн сiя ёна лöгасис. Сiдз лöгасис, что сетiс аслыс кыв не дружитны сэсся сыкöт. Тырмас. Тожö друг. Городö мунны эз лэдз, тöн мыйлöкö Селько керку дынö кыскис, горбö тэчöв-керис да эшö кучитчыны тшöктiс.

— Кытöн туисокыт? Давай котрася, — шуис бабыслö Виталько.

Öтöрын, кыдз и тöн, курöггез готсьöны, петух вижлоксö летö. И сiдз жö, кыдз и тöн, небоын шондi югьялö. Кокнитик лöз тшынок кöвьясьö воздухын, уйö Монастырскöй рас весьтöт, Горба мыс дынöт. Кытöнкö ылын-ылын кривзöны туриэз. Натьтö, Важ мельница сайын. Ылын сэтчинöдз, куим верста, поди, лоас, а кылöны туриэс.

— Виталько-о! Виталько! Тэ кытчö мунан? — вдруг кылiс Серёжкалiсь голос.

Ванзы кöть мымда. Витальколö тэ дынöдз и дело абу. Мöдiс сiя и шы не сетны, да Серёжка локтiс паныт, киас котёлок нöбöтö.

— Петрован дед ордö муна,— юöртiс сiя. — Айö тöн кык ёдi кыйöма. Дедöлö тшöктiс нöбöтны. Шогалö пö.

— А ме ма нöбöта. Во! — горöтчис Виталько. Горöтчис и сразу повзьыштiс. Сiя казялiс тöння тöдтöм старухасö. Мунiс сiя деревняыс шöрöт леспромхоз ладорö. Тыдалö, бöр гортас люштiс. Медбы не пантасьны сыкöт, челядьыс чожжык пырисö Петрован оградаö.

Петрован дед куйлiс посöдзын, ыркытiнын. Аслыс постелясö сiя лöсьöтöма öн увтö, медбы ойнас эз курччасьö номмез. Öнi öныслiсь дорсö старик лэбтöма, и, кöр дзуркнитiс посöдз ыбöсыс, сiя сразу жö казялiс челядьсö. Дед слабöя шынньöвтiс и пондылiс чеччыны, но гусьöник ойнитiс и лэдзис юрсö бöр.

— Но пырö, пырö смелöйжыка, дозирайтö деднытö, — шуис сiя гажтöма.

Оссис керку ыбöс, и посöдзö петiс Маня Онянова. Нывка дивуйтчыштiс, кöр казялiс гöссесö, кажитчö, нельки повзьыштiс. Медбы Маняыс эз ешты шуны трусöн, Виталько горöтчис тэрмасьöмöн:

— Деда, ме тэныт ма вайи. Бабö тшöктiс.

— А ме свежöй чери вайи, — висьталiс Серёжа.

— То тай мый! — шуис шынньöвсорöн старик. И бöра пондылiс чеччыны, и бöра нем эз пет.

Маня видзöтiс дед вылö осудитöмöн, горöтчис строгöя:

— Тэ, деду, эн вöрöтчы! Тэныт колö куйлыны спокойнöя. Тэнат жö косыт висьö.

— Косö, кагу, косö. Кынмалi, тыдалö, кытöнкö, — шуис старик. Сiя недыр кежö куньлiс синнэсö, кывнас нюлiс кöс тырппесö и пыдына лолалiс. Сэсся öдззис кашляйтны — курзык, курзык. Моросас эта коста мыйкö бульöтiс и кижгис. Маня висьталiс челядьыслö:

— Этö бур, что масö вайитö. Мамö иньдывлiс асывнас Пельтöм Селько ордö, дак сiя эз эд сет. Абу, шуö, öтiк воть.

Виталько да Серёжа дзарнитiсö öтамöд вылö.

— Абу пö? — дивуйтчис Виталько. — Дак кыдз жö сiдз — абу. Эд...

Виталько мöдiс висьтавны, что нiя тöн асьныс адззылiсö, кыдз Пельтöм Селькоыс гöститöтiс манас кытшöмкö тöдтöм старухаöс, но эз ешты висьтавны: Серёжка сiдз бытшкис сiйö синнэзнас, что мöдыс вежöртiс — баитны эта йылiсь оз туй.

— Жаднöй Селькоыс, — шуис Маня. — Но да ладно. Часöт ми пыртам чаггез и таганка вылын пизьöтам йöв. Дедö юас сiйö масорöн и сразу веськалас.

— А черисö? — юалiс Серёжа.

— А сыись ми пуам черива. Панялас дедö дзирыт черивасö и бур лоас, — висьталiс Маня. — Черивасö дедö öддьöн радейтö. Тэ, поди, черисö ачыт кыйин, Серёжа?

Серёжалö öддьöн охота вöлi не срамитчыны нывкаыс одзын, охота вöлi мыччавны асьсö дошлöй черикыйисьöн, да мый ни керан...

— Эг. Айö тöн кыйöма.

Маня нем эз шу, нельки öтiк кыв эз горöтчы. А эд вермис бы нюмыртны тырппесö и висьтавны мыйкö сэтшöмö... Öддьöн бы сэк умöль вöлi Серёжкаыслö.

Нывка лöсьöтiс кастрюля, пыртiс гуись йöв. А Виталько да Серёжа öктiсö öтöрись чаггез. Чожа горöдзын, таганка увтын, пондiсö чеччавны гажа бикыввез. Маня пуис черива.

Шерба пусис чожа. Зоночкаэз отсалiсö дедлö пуксьыны ольпасяс, Маня вайис сылö тыр бекöр дзирыт черива. Старик довольнöя шынньöвтiс, но сёйны эз вермы: сылöн треситчисö киэс.

— Ужо, деду, ме тэныт отсала, — шуис Маня. — Вай-ко верда.

— Кыдз учöтик кагаöс? Не, ме ачым. Вот этадз...

Дед пуктiс паньсö, кыкнан кинас босьтiс пым бекöрсö и... давай юны! Юис и шыннялiс. Да эшö баитiс:

— Ме кыдз умöлик солдат. Умöлик солдатлöн голенище сайын некöр пань абу. А сёйны колö. Мыйöн? Чöвтасö сылö котелокö шыд, дак сiя ме моз жö...

— Дед, а тэ солдатöн вöлiн? — юалiс Виталько.

— Кык война вылын пишались лыйси. Германскöй — раз, колчаковскöй фронт — два... Да эшö коллективизация коста лыйсьыныт ковсис.

Эна кыввез бöрын дед — бульк, бульк, бульк! — юис быдöс черивасö.

— Спасибо тiянлö, дружоккез, — шуис челядьлö. — Вöлись сьöлöмö бурмис.

А Маня вайис сылö эшö йöв. Да не простöйö, а масорöн. Дед юис быдса кружка. И челядь казялiсö, кыдз сы кымöс вылын мыччисисö первöй ньылöм воттез.

— Но вот и бур. Пымалi. Öнi быдöс шогöтö ньылöмнас петас. Вот эшö рытнас баняö ветла. И бöра — топ-топ! — мусö тальны пондам.

Дед водiс гатш, вевттисис тулупöн. Зоночкаэз лöсьöтчисö мунны. И сэтöн Виталько бöра несйис. Апчхи!..

— Э-э, тэ мыля несъян? — юалiс дед Петрован. — Тэ, поди, кынмалiн и ме моз жö шогалан?

— Не, сiя оз шогав, — висьталiс Серёжа. — Сiя, деда, пыр несйö. А унажыксö сэк, кöр полö мыйиськö...

— Вот эшö дивовежа. Первуись кыла, — дивуйтчис Петрован.

МЫЙ ПОНДА ПАВКИС ÖЛЬÖШКАЛÖ

Маня босьтiс ведра и чеччалöмöн котöртiс Пельтöм Селько керку сайö гумыштны логсис ключ ва. Виталько да Серёжка пукалiсö эта кадö поспу вылын и, кыдз пыр, пиньгисисö.

— Тэнат кылыт сажень кузя, сiдз и öвтчö öтмöдöрö, — шуис Серёжа.

— А кин кыввесö меряйтiс? — юалiс Виталько.

— Лешак меряйтiс! Вежöртны невночка колö. Тэ эд часöт чуть только эн висьтав, что тöн йöз басни кывзiмö.

— Но и мый?

— А вот сiя и эм! Тэныт охота, медбы миянöс кузьпеллезöн шуисö? Висьтав — охота?

— Некин миянöс оз шу. Ме думайта, дед Петрованлö позяс висьтавны быдöс.

— Да тэ мый? Умокыт немымда абу. И мыйлö ме тэкöт кутчиси...

Сьöкыт вежöртны Серёжкаöс, öддьöн сьöкыт. Мукöдпырся морт кыдз морт, мый колö, сiйö и баит сыкöт, а мукöдпырся кывджын оз тöр. И мыля сiя быдторсис лöгасьö? Мый психуйтö? Поди, сё эшö вунöтны öбидасö оз вермы? Эд не шутка: думайтiс старостаöн пуксьыны, а сэтöн — на тэныт! — пуктiсö кытшöмкö Катькаöс... Натьтö, эта и эм. Эх, тожö морт! Адззöма мыйсянь лöгавны. Виталько важын бы вунöтiс...

— Серёжа, давай сэсся некöр ог пондö пиньгисьны. Эта умöль делоыс, — миритчöмöн шуис Виталько.

— Умöль дак эн и ов!

— Серёжа, мыля тэ сэтшöм?

— Этö эшö кытшöм?

Кин тöдö, мыйöн чулалiс бы эта басниыс, если бы Виталько эз вежöрт другыслiсь думасö: нарочно кутчисьö, медбы перво гымгыны горбö кулакöн, а вöлись сюйыштны киö окучник. То тай эшö!

Виталько чеччис местасис и пöлiнясьöмöн иньдöтчис гортас. И мунiс бы, кöбы эз казяв Маняöс. Нывка мымда вын котöртiс Пельтöм Селькоыс керку ладорсянь.

— Ой, ой...

Перво Серёжа, а сыбöрын Виталько чепöссисö Манялö паныт.

— Мый лоис? — öтiк öмись юалiсö нiя.

— Ой, Пельтöм Селькоыс Öльöшкасö вартлö! Муна оградаыс бокöт, нем ог думайт и вдруг кыла, кыдз Öльöшкаыс вижжитö. Дзик порсь, кöр сiйö бöрись коккезöт кыскöны...

— Öльöшкаöс вартлö?!

Зонкаэз котöртiсö Пельтöм Селько керку дынö, ляпкисисö заплод бердö. И эзö ни некöда думайтö, бур эта али умöль — видзöтны щельöт йöз оградаö. Мöртiсö синнэзнысö щеляс, пеллез öшöтiсö, асьныс нельки лолавны дугдiсö.

Пельтöм Селько кутöма Öльöшкаöс куртка сикöджöт и видзö, дзик дзодзогöс. Öльöшка эз ни виклясь, сiдз кыдз ремень кöдöн вурöма дедыс, куйлiс öнi му вылын — шоччисис. Шоччисис, тыдалö, и ременьлöн хозяиныс. Селько лöга видзöтiс внучекыс чужöмö и баитiс öддьöн внушительнöя:

— Куим ошöс аслам векын велöтi, учёнöйезöн кери, а тэнö, понпиянöс, и подавно велöта. Ме тэнö кера мортöн. Да вежöрт тэ сiйö, зырымöсь бедь: не ас понда ме старайтча, а тэ понда. Кывзiсян менö, дак еныс счастье сетас, мывкыд содтас.

— Нем меным оз ков, — сыркьялiс Öльöшка.

— Мый?! Да кыдз этö нем оз ков?! Мыйлö нö сэк му вылас чужин? Ноко висьтав — мыйлö?

— Ог тöд.

— Вот сейчас пондан тöдны.

Селько мышкыртчис, босьтiс киас ремень.

Öльöшка öдззис виклясьны, чеччавны кокись кок вылö.

— Оз ков, оз ков, деда! — чирзiс сiя.

— А-а, сiдзкö, оз ков! Ноко висьтав сэк, мыйлö чужин му вылас? Но, чожжык баит, а то сейчас шырзьышта!

— Тэнö кывзыны, деда, да эшö енöс, — синвасорöн шуис Öльöш.

— Но и кывзы сэк! А то — ог, ог... Ме тэныт сета — ог! Керан быдöс сiдз, кыдз висьталi. Да видзöтлы менам — эн аснырав. Охота му вылас овны, дак кывзы енсö. Нето босьта чери юртö, кыдз петухлiсь, — марс орöта. Сымда и дело.

Öльöшка шы эз сет. Сiя только вирскис нырнас и гусьöник ойзiс.

Челядьлö öддьöн охота вöлi мыйöнкö отсавны Öльöшкалö, да мыйöн отсалан? Вöлiсö бы гортын гыриссез, шум бы лэбтiсö, страститiсö бы Селькоöс судöн. Но сiя и эм, что гортын öнi только нимасись челядь, кынымкö старуха да шогалiсь дед Петрован. Тöдö Пельтöм Селько, кöр «велöтны» внучексö. «Мыля Öльöшкаыс норасьны милиционер дынö оз мун? Мыля оз пышшы? Ме бы öнi жö пышши», — думайтiс Виталько.

Но Öльöш эз и думайт пышшыны. Сiя сулалiс грознöй дедыс одзын мышкыртöм юрöн, сё пильскис. Кöр висьталiс, что пондас кывзыны енсö и керас быдöс, мый тшöктас дедыс, Селько кыскис кармансис кытшöмкö свиттялана предмет и вайöтiс Öльöшкалö öм дынас.

— Окав, понгöн, да сет клятва. Он кö кер, мый висьталi, сразу лоан чарöтöм. Вежöртiн?

― Вежöртi, деда, — шуис Öльöш и окалiс предметсö. Сiя вöлöма учöтик енок.

— Но вот сiдз. Öнi мун да дозирайт куканнетö, — горöтчис Селько и чужйис Öльöшкалö косысся невна улöжык.

Челядь чепöссисö котöртны.

ГАЖТÖМ ДУМАЭЗ

Виталько мунiс гортас, а Серёжка иньдöтчис баняэз сайись расокö. Сы моросын гыжьясисö каннез, сьöлöмсö нырыштiс мыйкö сьöкыт да нёштöм, и зоночкалö колiс кытчöкö мунны, сайöвтчыны и невна думайтыштны öткöн.

А кытчö сэсся мунан, кыдз не расокö? Серёжка важын казялiс: кöр тэныт сьöкыт, дак только татöн и верман веськавны, вашöтны горетö. Видас мамыс аснырöн нето нечулимöн — Серёжка локтö расокö и думайтö, мыля сiйö видiсö. Пуктасö школаын двойка — бöра татчö локтö. Ветлöтыштас невна пуоккез коласын, шутнялыштас — видзöтан, быдöс небурыс да сьöкытыс лэбзяс кытчöкö, рознитчас, кыдз туман. А талун сьöкыт вöлi, öддьöн сьöкыт.

И Серёжка пырис расокас кошшыны аслыс бур минутаэз. Былись гажа татöн пельöсокыс, мича. Сэтöн тэныт и кыдзоккез пантасьöны, сэтöн и пипуэз шушкöтчöны, свиттялан лыса кöзоккез эмöсь. Воздухыс сöстöм да небытик, кок увтын мöймуся кöс листтэз кышöтöны, кузь вуджöррез нюжласьöны. А главнöйыс — кайез. Быд пуок вылын нiя сьылöны. Настоящöй рай.

Рай, да только не Серёжка понда.

Пырис зонка пипуэз коласö, тыр морос кыскис небытик воздухсö, а кокнитжык эз ло.

Öбидитiсö мортöс, ёна öбидитiсö.

Мöйму гожумнас школьниккез ветлiсö экскурсияöн Ниндуль нима тыок дынö. Старостанас сэк вöлi Серёжа.

Тöвся каникуллэз коста ветлiсö леспромхозö видзöтны виль машинаэз. Старостанас кинöс пуктывлiсö? Серёжаöс.

А öнi?

А öнi пуктiсö Катя Петроваöс. Мыля?

Быдлаын Серёжа да Серёжа, а сэтöн вдруг Катя.

И лоö: мун зонка городö да эн аснырав, кывзы нывкаöс. Мый сiя тшöктас тэныт, сiйö и кер. Тшöктас Катя дежуритны общежитиеын, дак дежурит. Тэ подчинённöй.

Пыран столовöйö сёйыштны, а Катя сразу команда сетас: «Вай пызан вылö нянь да паннез!» Тэ и вай.

Нетушки, спасибо!

Серёжка висьталiс, что сылöн висьö кынöмыс и некытшöм городö оз мун.

Спасибо!

И вот ковсьö думайтны. Кыдз сiдз петiс? Мыля не сiйö старостанас пуктiсö? Поди, лöгасис учительницаыс? Поди, норасис кинкö, мыля морт-мöдлö немись лёнö сетiс, ас туйö дежуритны тшöктiс?

Кин этö вермис норасьны?

Поди, Васька Порсев?

Прокыс некытчö абу, а тожö ерепенитчö, кыкись ни Серёжкаöс Самохвалöн шуис. Порсь дак порсь и эм.

А, поди, Петька Лунегов?

Вермас и сiя. Тожö косöя дзарьялö, прокод пильскö, мылякö генералöн шуö да эшö карикатураэз рисуйтö. Öтпыр сэтшöмö рисуйтöма — сьöласьны охота вöлi. Морт не морт, петух не петух. Кöть карикатураыс увтын öтiк кыв эз вöв, а быдыс мылякö хитрöя Серёжалань дзарьялiс...

Эх, да мый ни сэтöн юр вийны. Тöдан разь, кин вермис тэ вылö норасьны? Некöр он тöд.

Но да ась, ась! Ась пуктöны старостанас кöть Манька Оняноваöс, кöть Васька Порсевöс, кöть Катька Петроваöс. Ась пильскöны-сералöны. Серёжа эшö мыччалас асьсö. Да, да, мыччалас. Эшö быдöн завидуйтны пондас. Вот талун жö керас мыйкö сэтшöмö — и быдöс деревня пондас Серёжкаöс киын новйöтны. Пондас быдыс баитны: «Вот кытшöм сiя вöлöма. А ми эг и тöдö. И мыля старостанас не сiйö пуктiсö...»

Сэк вöлись видзöтам, мый тi сьывны пондат, сэк тi быдöнныт — Ванькаэз, Манькаэз, Катькаэз — пондат тöдны, кыдз асся вынажыккöт баитны. Ужо!

Сэтöн усис эшö тöдвылас öтiк волшебнöй штука. И Серёжка öдззис чикнявны.

Кытшöм бытшöм расокыс вöлöма! Сразу кокнитжык лоис, сразу быдöс думаэз виль туёк вылö кежисö, юрвем югдiс.

Спасибо тэныт, расок!

Дыр ветлöтiс Серёжа, талис мöймуся кöс листтэсö, кывзiс пипуэзлiсь шушкöмсö. Сiя ветлöтiс и думайтiс. Серёжа думайтiс сы йылiсь, мый керас аслас обидчиккезкöт сэк, кöр быдöс деревняыс пондас новйöтны сiйö киын. Перво-наперво вештiсяс Катькакöт, мыля эз откажитчы лоны старостанас, сэсся быдöнлö сьöрсьöн-бöрсьöн тэчас горббезö и тшöктас кучитны ассис картов. А мый? Геройлö быдторсö керны позьö.

И только Серёжка ештiс думайтыштны этадз, лоис сэтшöм долыт да бур! И ветлöтны расокöт сразу охота öшис. И думайтны тожö охота эз ло. И кöр казялiс, что думайтны лоис совсем не охота, сiя петiс расоксис. Ась öнi сэтi мöдiк ветлöтö, Серёжкалö мöдiк удж адззисяс. Колö, например, купайтчыны, невна гажöтчыштны.

Петiс Серёжка расокись и сразу Виталькоöс казялiс. Сiя пукалiс берег дорын и, кыдз колдун, мыйкö думайтiс. Серёжкалö эшö долытжык лоис. Друг! Кöть öтiк да друг эм. Кöть сiя согласитчис не мунны городас. Кöть сы вылын позяс командуйтны...

— Вить! А, Вить!

Виталько бытьтö эз и кыв. Нельки эз и дзарнит сылань.

— Виталько, тэ лöгалан я мый я?

Лэбтiс юрсö Виталько, дзарнитiс Серёжкалö синнэзас.

— Не, ме ог лöгав.

Вот эта друг! Некöр оз лöгав!

— Дак мый нö сэк?

— Ме думайта. Ме думайта, мыля Пельтöм Селько Öльöшкасö пыркöтiс, мый тшöктiс керны? А кытшöм кöиннэз йылiсь тöн старухаыс лёбис?

— Хо, адззöм мый йылiсь думайтны. Но лёбис и лёбис. Етша разь мый йылiсь пöрись морттэз лёбны вермасö. Не, думайтны сэтöн совсем нем. Давай лучше купайтчам.

Витальколö важын ни охота вöлi купайтчыны и согласитчис. Сiя казялiс, что Серёжка вежсьöма, и сыкöт öнi позьö мунны кöть кытчö. А эд эз ни мöд сэсся кутчисьны сыкöт, мöдiс век лöгавны. Ох-хо...

Шуис не öддьöн гажöна:

— Ладно, мунам купайтчыны.

ТАЛИСМАН

Купайтчисö джын час мымда, резсисö ваöн, вöтлiсисö öтамöд сьöрын. Сэсся ветлiсö парниккез дынö, мöдiсö видзöтны, кыдз нывкаэз уджалöны да сьылöны песняэзнысö.

Вöлi, конечно, и мöдiк мог: видзöтны-керны быдöс и, позяс кö, то чипны теплицаись гусьöник кынымкö огурец. Но, висьталам веськыта, нем эз пет. Парниккез дынын главнöйöн уджалö коктöм Öльöксан. А эта сэтшöм морт, что лучше не кутчисьны.

Мöйму Черанёва деревняись куим бöб зонка пемыт арся ойö пыравлöмась вöлi Öльöксан хозяйствоö. Пырöмась öтнаныс, а петöмась — не. Öльöксан казявтöг шамыртöм куимнаннысö и кыскöм сельсоветö. Вот тэныт и коктöм!

И талун, кöр казялiс Серёжкаöс да Виталькоöс, тшыг кöин моз сэк жö уськöтчис ны вылö:

— Тi мыйлö татчö локтiт? Бöра огуреццез гусявны, колхозлö убыток керны, а? Ноко, марш татiсь!

Сымда и вöлi. Нельки Серёжка асныравны эз понды. Шымыртiс бöжсö и петiс ворота сайö. Виталько тожö петiс, мунiс юрсö öшöтöмöн, кыдз вартлöм пон. Кыкнаннысö маитiс öбида. Эз ештö локны, и сразу вашöтiсö.

Но чожа, казялiсö, что лöгалöны весь. Коктöм Öльöксан тöдiс нылiсь несöстöм думаэзнысö. Ого! Кутчись эта коктöмкöт! Война вылын сiя вöлöм разведчикöн, неöтпыр ветлöма фашистскöй тылö, ловйöн кутöм сэтчин не öтiк фрицöс и вайöтöм штабö. И эшö бы, натьтö, не öтiк фрицöс кутiс, кöбы эз ранитö коксö. Не весь жö ачыс генерал кышалöма сы морос бердö куим орден да нёль медаль. Герой.

Не, кутчисьны сэтшöм морткöт оз лöсяв. И öбидитчыны сэтшöм морт вылö оз туй. Раз локтiн недобрöй думаöн, то и мун, кыдз локтiн. А мый нö сэсся?

И Серёжка да Виталько мунiсö.

Мунiсö деревняö, пуксисö асланыс любимöй местаö, пöлiньтöм пыжыс дынö, и öшöтiсö юррез. Керны вöлi нем.

— Умöля ми кадсö чулöтамö, — дыр думайтöм бöрын шуис Виталько.

Серёжкалöн настроеннёыс вöлi бур и сразу согласитчис:

— Чудак! А кин тэныт висьталiс, что бура? Конечно, умöля. Но эн тöждiсь. Чожа мый-нибудь да пырас юрö. Оз вермы сiдз лоны, медбы юрö нем эз татшкись. Сэк вöлись лоас дело.

Виталько водiс гатш и, кымöрö орöттöг видзöттöн, вдруг шуис мечтайтöмöн:

— Вот бы волшебнöй кыв тöдны. Но, сэтшöмö... Медбы шуны сiйö и сразу, мый колö, сiя и шогмис. Ме бы сэк горöтi: «Ракета, ракета! Пуксьы миянö!» Пуксис бы татчö ракета, ми тэкöт, конечно, пырим бы сэтчö и лэбзим Тöлiсь вылö. Но сiдз овлö, конечно, только сказкаын. Абу волшебнöй кылыс.

— Кöть кин шуас — абу, — горöтчис Серёжка. — А вот штука öтiк эм. Волшебнöй...

Виталькоöс кытшöмкö вын казявтöг чапкис местасис, пуксьöтiс ордчöн Серёжкакöт.

— Кытшöм штука?

— Волшебнöй, мыся. Талисманöн шусьö. Кывлiн сы йылiсь? Но дак вот. Кинлöн эм сэтшöм штукаыс, сыкöт некытшöм беда оз вермы лоны. Мый бы эн понды керны, сёравно керан. Менам дедöлöн вöлöма талисманыс.

— Дедытлöн?

— Ага. Бабö, кöр пондiс кувны, дак быдöс меным висьталiс. Кыкись, шуö, дедыт ветлiс война вылö, и эзö вийö. Гортын, шуö, бандиттэзкöт тышкасис, и тожö эзö вийö. И мый бы эз кер дедö — быдлаын удача. Мунас вöрö ошöс вийны — вияс. Лэдзчасö мужиккез ю дорö чери кыйны, некинлö öтiк ар оз шед. А дедö только сiйö и керö: кыскалö да кыскалö ыджыт щукаэз.

— Вот тай эшö мый! Этö кытшöм жö талисман вöлöм?

— Трубка! Простöй трубка. Ас киэзöн сiйö дедö керлöма, Дедöс, тöдан, колдунöн кöркö шувлöмась. И трубкаыс вöлöм не простöй.

― Первуись кыла. Вот бы видзöтны этö трубкасö. Тэ мыччалан?

— Верма мыччавны. Тöн ме сiйö чуланiсь адззи. Дженытик сэтшöм, кыдзовöй швавись керöм. Öт конецас мундштук, а мöдас, кытчö табаксö тэчöны, чёрт — сюрреза, тошока. Ме думайта, эта чёртын и эм быдöс делоыс, волшебнöй выныс.

Виталько, вежöртана, эз верит некытшöм чёртлö, но сёжö... Мыйыс му вылас оз овлы? Кöр охота керны подвиг, дак и чёртлö веритан.

— Лок мунам, видзöтам! Серёжка шы оз сет

ВИЛЬ ТÖДСАЭЗ

Серёжка шы эз сет Витальколö. Сiя просто эз ешты гöрöтчыны нем. Зонкалöн лэчыт пеллез вдруг кылiсö кытшöмкö тöдтöм шыэз. Сiя ладорсянь, кöдöрö визывтö Шерваыс, пондiс кывны негора шовкöтöм, дзик кинкö вачкалiс оча долонь — шовк, шовк, шовк... Недыр мыйись тöдтöм шыэз пондiсö кывны совсем матын.

— Мотоцикл локтö, — шуис Виталько.

— Хо, мотоцикл! Ваыс кузя? А поди, моторнöй пыж?

— Быль эд, сiя! Вон, таланьö пöльтö!

Моторнöй пыжжез медбöрья кадö Шерваöт уялiсö часто. То ягöдалiссез кытчöкö кайöны, то туруналiссез, а мукöдпырся и вöралiссез мыччасьлiсö. Но нiя уялiсö сувтчывлытöг, сё боки да боки кытчöкö пöльтiсö. И нiя старайтчисö унажыксö уявны сёрöн рытнас нето ойнас, кöр деревняись оз нёджжасьö лишньöй синнэз. А талун моторка сувтiс как раз сiя местаö, кытöн кык друг кыйлiсö черисö, пöлiньтöм пыжыс дынö. Сiя плавнöя, жагöника сибöтчис берег дорас. Пыжись чеччöвтiсö кык морт. Öтыс вöлi ыджыт мыгöра да ён, ныр увтас сьöд видзисö усоккез, а мöдыс томыник, чужöмыс, кыдз и Витальколöн, куш понпутш. Кыкнанныс пасьталöмась виль комбинезоннэз, брезентовöй курткаэз, кöмалöмась кузь голенищеа сапоггез. А пыжас! Челядь казялiсö кык пишаль, ыджыт рюкзак и эшö кытшöмкö ящик.

— Здорово, вонöй! — жмитiс Витальколiсь кисö виньöрикыс. — Сет меным одзöсöн кынымкö понпутш!

И öдззис серавны: ха-ха-ха!

Сьöд усоккеза мужикыс здоровайтчис Серёжакöт.

— Кыдз тэнö шуöны, богатырь? — юалiс сiя. — Серёжаöн.

— Хо! Вот делоыс! Эг ешты локны, сразу тёзкаöс панталi. Эд и менö Сергейöн шуöны. Да-да! Сергей Петровичöн. Вот и тöдсасим.

Виталько да винерикыс тожö тöдсасисö. Шуисö том мортсö Володяöн, Владимир Васильевичöн.

— Но, дружоккез, висьтасьö, кыдз кадсö чулöтат? — тшöктiс Сергей Петрович.

Сiя пуксис берег дорас, лöсьöтiс куритны. Владимир Васильевич водiс кыминь. Сiя, тыдалö, эз курит: босьтiс курыт турун за и давай нямлявны öмас.

Виталько эта коста ештiс чувйыштны Серёжкалö бокас, шуис гусьöн:

— Вот тэныт и удача. Эг ештö казьтыны трубкасö — и адззан — сразу!

— Ме жö шуи тэныт — волшебнöй! — дзирыта шушкыштiс Серёжа.

Нiя пуксисö ордчöн локтöм морттэскöт, висьталiсö, что олöны умöля, а сэсся и юасьны öдззисö.

— Тi геологгез? — юалiс Серёжа.

— Не совсем. Ми изыскателлез, — висьталiс Владимир Васильевич. — Миянлö сетiсö заданнё: мый бы эз вöв, а пыравлыны Пыдöстöм нюр сайö, видзöтны, позяс я татчö осьтны виль леспромхоз.

— И туй тшöктiсö кошшыны, медбы кыскавны вöрсö Шерва дорö, — содтiс Сергей Петрович.

Виталько перыта дзарнитiс другыс вылö, Серёжа осьта öмöн видзöтiс Виталько вылö. Кыкнанныслöн синнэз öзйисö вöвлытöм биоккезöн. Челядь перво нем эз вермö горöтчыны. Эд виль леспромхоз йылiсь баитлiсö важын ни, и вот вöлись!

— Дядя, эстöн посёлок лоас? — юалiс Виталько.

— Лоас виль посёлок. Ой и лун эстöн пондасö гурöтны машинаэз, шовкöтны бензомоторнöй пилаэз, а тракторрез зыксянь вöрас прокод говк пондас паськавны, — табаксö куритiкö баитiс Сергей Петрович.

— А миян бöрын нефтеразведчиккез локтасö. Адззасö кö нiя нефть, а мöдiк геологгез адззасö, шуам, кытшöмкö руда, то этчö строитасö город, и тiянлö некöр оз ло гажтöм, — содтiс Владимир Васильевич.

Челядьлö быдöс эта ёна гленитчис. Гленитчисö и асьныс изыскателлес. Бытшöм мужиккез, гажаöсь кыкнанныс. Вот бы мунны öтлаын ныкöт Пыдöстöм нюр сайö! Вот бы адззылiсö быд берсясö!..

Трубка, трубка, отсав!

— Дядя, а вдруг од вермö сюрны нюр саяс, сэк и посёлоксö оз строитö? — юалiс Виталько аслас понпутша тöдсалiсь.

— Кыдз этö ог вермö? Мыля?

— Дак баитöны тай пöриссес, оз пö туй нюр саяс мунны, зыбун пö кöть кинöс ньылыштас...

Владимир Васильевич шынньöвтiс лукавöя, чапкис öмсис турун засö.

— Обязательно сюрам. Абу сэтшöм места, кытчö бы эз вермы сюрны советскöй морт. Страналö колö вöр. А сiя вон, адззан, тыдалö? Неужто ог босьтö? Обязательно босьтам.

И Сергей Петрович шынньöвтiс и тожö висьталiс:

— Обязательно босьтам. Только колö старайтчыны, перво быдöс видзöтны-нёджжöвтны, сувтöтны план, лыддьыны, кыным год кежö тырмас вöрыс, и сэк... Сэк быдöс лоас бур. А часöт, дружоккез, мыччалö деревнянытö. Ноко видзöтам, кыдз олат.

ГЕРОЙ МОГИЛА ДЫНЫН

Перкояг деревняын быдöссö öтiк улица. Сы шöрын, мысок вылын, быдмöны ыджыт кыдззез, тöв и гожум öтмоз увгöны вековöй кедррез.

Кедррес да кыдззес увтын, медбасöк местын, сулалö пöввезiсь керöм пирамидка. Кöр матöжык сибöтчан сы дынö, дак öт боксис казялан нёль пельöса кöрток. Сы вылö гижöмась басöк букваэзöн:

А. П. Сальников.

1910 - 1934

Сергей Петрович да Владимир Васильевич локтiсö пирамидкаыс дынö, босьтiсö юр вылiсь фуражкаэз, сулалыштiсö невна чöлöмöн и вöлись жагöник гöгöртiсö могиласö. Сергей Петрович гогинялыштiс юрнас, шуис негорöн:

— И татöн, вöр пыдöсас, классовöй пессьöм мунöма. Томöн кинкö шедöма вийнытö. Натьтö, настоящöй морт вöлi.

— Сэтöн, дядя, миян колхозiсь первöй председатель узьö. Андрей Павлович Сальников. Сiйö бандиттэз вийöмась, — висьталiс Виталько.

— Сiдз. Миян враггез неетша медбур отирлiсь вирсö кисьтiсö. Сьöкыт пессьöмыс вöлi.

Изыскателлез ветлöтыштiсö могилаыс дынöт, дыр дзарьялiсö вековöй пуэс вылö, тыдалö, любуйтчисö нiйöн. Виталько да Серёжка бура тöдiсö, кин сэтшöм вöлi первöй председательыс, дед Петрован не öтпыр ни висьтасис нылö Андрей Павловичыс йылiсь, и зоночкаэз мöдiсö подробнöя юöртны асланыс виль тöдсаэзлö, кыдз татöн мунiс классовöй пессьöмыс, кыдз бандиттэз вийисö Сальниковсö. И юöртiсö бы, но совсем видзчисьтöг — вот уж былись дзик му пытшкись петiс-сувтiс ны синнэз одзö Пельтöм Селько. Локтiс сiя кысянькö, шуис кыз голосöн:

— Мир тiянлö, добрöй отир!

Серёжа да Виталько сiдз и дрöгнитiсö. Вот кутас часöт Селькоыс да ременьнас öдззас пöльтны, кыдз пöльтiс Öльöшкасö! Но Селько нельки эз и дзарнит ны вылö. Сiя важнöя жмитiс изыскателлезлiсь киэз и шынньöвтiс. Ох, кыдз сiя шынньöвтiс! Истово пон, кöр сылö хозяиныс мыччалас пöжшöм коска.

— Мый, бöра нефть кошшатö? — гажöна юалiс сiя.

— Не, миян мöдiк могным. Миянлö колö вöр, — шуис Сергей Петрович.

— Сiдз. А ме думайтi — нефть. Мöйму кежавлiсö татчö нефтеразведчиккез, лун-мöд ветлöтiсö.

— Но и мый?

— А мунiсö бöр. Мöдiсö нюр саяс вышка сувтöтны. Да кытчö тэ. Видзöтiсö-видзöтiсö да öвтыштiсö киöн: не вуджны пö нюрсö. Техникаыс оз лöсяв — слабöй.

Селько висьталiс этö гажöна. Изыскателлез кывзiсö сiйö и невна гажтöмтчисö.

— Сiдзкö, оз позь нюр саяс шедны?

— Оз позь. Зыбун сэтöн. Буди, Кайскöй волокöт... Вовлiсö кытшöмкö годö учёнöй инькаэз, лекарственнöй туруннэз кошшисö, дак нiя смелöйöсь вöлiсö. Дыр павьялiсö нюрас. Да чуть беда эз шогмы. Пондöмась веськыта мунны да и инмöмась осьтаö. Öдва ештöмась бадь куст бердö кутчисьны. А ме как раз нюр дорас турунок гогналi. Кыла, лёкгоршöн ванзöны. Босьтi потш да и кысси кынöм вылам. Öдва шедтi кыкнаннысö. А то бы — смерть. Дас руб меным сетiсö...

Челядь кывзiсö Сельколiсь баснисö осьта öммезöн. Изыскателлез гогинялiсö юррезöн.

— Беда, — шуис Сергей Петрович. — Неужто сэтшöм зыбуна нюрыс? А миянлö висьталiсö, бытьтö лэдзöмась прудсö и нюрыс тарс-тарс косьмöма. Эз разь косьмы?

— Полöм петö видзöтны. Лешаччöй места, — висьталiс Селько. — Нельки тöвнас оз кынмывлы. Сiдз парыс и кайö, бытьтö самоварись. Лешаччöй места.

— Колöм тай былись вертолёт корны, — гажтöмтчис изыскатель.

Селько вдруг вачкис кинас бок кузяс, горöтчис асьсö осудитöмöн:

— Да мый ми эстöн пукалам? Эд мыдзит, кынöм сималö. Локтö пырам керкуö, сёрнитыштам сэтчин. И сiдз гожумбыт öтнам пукала, кыдз мыр, шоча и отирсö адззывла, шогалiсь пенсионер. Локтö пырам. Вон менам короминаö... Самовар сувтöтам, мыйкö пуамö.

— Дзирытсö позьö панялыштны, — шуис Володя.

— Быдöс лöсьöтам! — горöтчис Селько.

И нуöтiс эд гортас кыкнансö! Вот кытшöм ош! Челядь эз и ештö баитыштны, кыдз колö. А кытшöм охота вöлi корсьыны нюр саяс. И кытiсь только поннэс Селькосö вайöтiсö...

МЫЛЯ НIЙÖ НУÖТIС ПЕЛЬТÖМ СЕЛЬКО

Ашынас зоночкаэз лунтыр ветлöтiсö, кыдз öшöмöсь. Нiя эз и тöдö, мый думайтны и кытчö воштiсьны. Размöд лэдзчывлiсö чериавны и быдпырся чапкавлiсö вугыршаттезнысö берег дорö, нельки öтiк песканöс эзö кыйö. Пыравлiсö Шерваö купайтчыны и сразу жö казявлiсö: купайтчыны талун совсем неохота. Эд колö жö! Изыскателлез мунöмась кошшыны Пыдöстöм нюр сайö туй, а нiя, Виталько да Серёжа, бöра кольччисö öтнаныс. И мунöмась Изыскателлез не кинкöт-нибудь, а Пельтöм Селькокöт. Недобрöй Селько одзжык пыр ветлывлiс вöрас öтнас, а сэтöн ачыс корсьöма лоны проводникöн.

— Жаднöй Селькоыс. Тыдалö, деньгатор решитöм заробитны, — неöтпыр ни шуис Виталько.

— Может, и сiдз...

Кык друг куйлiсö берег дорас, видзöтiсö голубöй небоö, думайтiсö. А юрö, кыдз нарочно, только Пельтöм Селько и пырö. Дзугис сiя быдöс дело. Кöбы не сiя, дак изыскателлес тöн согласитчисö бы босьтны челядьсö сьöраныс. Вайöтiсö сiйö сюраэс берегыс дорö, мыйлöкö гортас рочалiс.

И мыля нылö волшебнöй трубкаыс эз отсав? Мыля сiя эз вашöт Пельтöмсö дыв?

— Абу, тыдалö, сылöн выныс, — гажтöма шынньöвтiс Виталько.

— Кыдз абу? Эм! Только колö веритны. Пондан кö веритны, дак должен лоны. Тыдалö, только секрет сылöн эм. Öтпыр отсалас, мöдöтпыр оз, сэсся бöра отсалас. И эшö öтiк тор бабöсянь кылi: кöр отсалас, дак некöр дивуйтчыны оз ков. А тэ тöн дивуйтчин, бöбöв.

Серёжка баитiс сэтшöм серьёзнöя, что позис думайтны: быльнöя веритö трубкаыслö.

А кин тöдö, может, и быльнöя пондiс веритны. Кöр охота керны подвиг, дак кöть мыйлö веритан. И лешаклö и чёртлö.

Деревня сайын дугдывтöг шовкöтiс движок, качайтiс колхознöй карчйöрö ва. Горба мыс сайын шумитiс трактор — гöрис пар. А Шерваын, деревняыс весьтын, качайтчис изыскателлезлöн моторнöй пыж. Сергей Петрович да Владимир Васильевич кольöмась сiйö, асьныс мунöмась подöн Монастырскöй яг сайö, Кайскöй волокö. И кытшöм бöра гажтöм!

— Тöдан мый, — вдруг шуис Виталько. — Ме думаöн, нечистöй эстöн делоыс. Ме сiдз думайта: эта ёрдöм старухаыс не простöй кöиннэз йылiсь баитiс. Эд Селькоыс мый шуис: «Ачым ме нiйö пантала и ачым кольлала...» Кинöс сiя панталас и кольлалас? Кöиннэсö?

— Öнi и ме казялi — нечистöй делоыс, — шыасис Серёжка. — Эстöн мыйкö эм. Кытшöмкö важнöй юöр отец-батюшкоыс иньдöм, а кытшöмö — нем ог вежöрт.

— А кытшöм мошшезöс нiя касьтылiсö? Кытшöм старухаöс веськöтны тшöктiс?

— Кытшöм, кытшöм? А ме разь тöда? — лöгасис Серёжка, кöдалöн быдкодь думаыссянь юрыс ни висис. — Поди, вöрас нылöн мачуркаэз эмöсь, кöднö оз туй мыччавны йöзыслö. Адззылiн, кыдз манас сiйö гöститöтiс? Сёй, шуö, эн жалейт, асланым маыс. — А Сельколöн карчйöрас быдöссö öтiк мачурка.

— Быль эд! — дивуйтчис Виталько. — Может, Селькоыслöн пасека вöрас эм, и сiя полö, медбы изыскателлес эз адззö? Вот и кутчисис проводникöн. И нуöтiс сiя нiйö кытчöкö ылöжык, лешаччöй местаö.

Дыр эшö баитiсö дружоккез Селько йылiсь, сiдз и этадз бергöтiсö-керисö, а нем эз вермö артавны. Только рытнас ни усис нылö тöдвылö Петрован дед, решитiсö висьтавны сылö быдöс, мый кылiсö Пельтöмыс садын.

Дед Петрован пукалiс посöдзын. Вöлi сiя, тыдалö, сё эшö нездоров, бледыник и слабöй, но уджалiс ни: лэдзчылöм Важ мельница дынö кыйны чери и öнi весöтiс кельчиэз.

— Юи тöн манас йöвсö, рытнас баняын пывси и вот веськалi. Öнi бöра позьö чатрасьны. Талун, адззат, чериок невна кыйи, ягöд вöрас сёйи. Висьтала ме тiянлö — гöрд сэтöрыс воöма ни. И озъягöд тожö. Пыри Монастырскöй ягас, а сэтöн кытшöмкö инькаэз да старухаэз павьялöны ни, öктöны ягöдсö.

Медбöрья годдэзö Монастырскöй ягын гожумбыттэзöн öктiсьлiсö городiсь да леспромхозiсь инькаэз. Локтасö нiя быдса машинаэзöн, гайзöны вöрас, шырзьöны сэтöр да пуягöд, чöд öктöны.

— Ми ашын дедöкöт тожö мунам. А то öктасö быдöс, — шуис Маня.

Виталько лöгöнмоз дзарнитiс сы вылö. Серёжа вöлi тожö недовольнöй. Колö дело йылiсь баитны, а сiя пелитчö аслас ягöдöн. Маня дырни он жö понды висьтасьны, кыдз нiя кывзiсисö Пельтöм Селько садын. И колö я висьтавны этö? Может, дед Петрован видас нiйö умöль делоыс понда?

Но висьталiсö сёжö. Кöр Маня пырис мыйлöкö керкуö, Виталько висьталiс. Дед Петрован кывзiс пеллесö öшöтöмöн, тожö шуис, что страннöй юöр вайöма старухаыс. Но вдруг öвтыштiс киöн:

— Но нiйö вакрамешö. Пельтöм Селько томсянь кытшöмкö старушкаэзкöт да старичоккезкöт вежмасьö. Кин тöдö, мый нiя лёбисö.

— А мыйлö сiя изыскателлескöт мунiс?

— Но мунiс да и ладно. Поди, тшöктiсö туй мыччавны и деньга кöсйисö. Вот и мунiс.

Дед Петрованлöн весöтсис чериыс, и сiя лöсьöтчис пырны керкуö.

— Мунат ашын мекöт? Ягöдалам невна и черисö бöра кыям.

— Конечно, мунам. Может, изыскателлесö панталам. Нiя эд сэтчин жö мунöмась, — шуисö кыкнанныс.

ÖЛЬÖШКАЛÖ ÖДДЬÖН УМÖЛЬ

Аграфена баб панталiс внучексö посöдз дынын.

— Тэ дыр эшö асныравнытö пондан, а? Вот босьта шать да кыдз пöжа боккетö. Лунтыр кытöнкö шатласьö. А картовсö кин пондас кучитны?

Бöра картов! Да кöр ни сiя вакрамешö мунас!

— Тэ, баб, только картов и тöдан, а менам важнöйжык делоыс эм.

— Кытшöм эшö дело? Мыля — важнöй?

— Мыля, мыля! Мыля айыс Илья!

Аграфена баб минута сьöрна осудитöмöн гогинялiс юрнас, мыйкö мöдiс жö висьтавны, да нем и горöтчыны эз вермы.

— Ашын менö одз саймöт, баба, — корис Виталько. — Дед Петрованкöт ягöдавны мунам...

— Но вот вöлись! — радмис бабыс. — А то лун-лун весь шатласян. Да мый ни эта сэтшöмыс?

Колö висьтавны, Аграфена баб ёна радейтiс не только черинянь, но и вареннё. Вöвлi, пуктас тöвнас чайö öтiк панёк да сэтшöм чöскыта юас, что эсся лунтыр öмас нем оз и босьтлы, медбы не курöтны сiйö. Вот мыля Виталько юöрöн пöрись морт кольччис öддьöн довольнöй.

— Мун сёй да вод одзжык. А то саймöтан тэнö. Виталько эз понды мугны, сразу кайис сарайö.

А дед Петрован ордын эта кадö пукалiс виль гöсь. Только ештiсö мунны челядьыс, кыдз старик дынö пырис Пельтöм Сельколöн внучекыс, Öльöшкаыс. Пыравлiс сiя и одзжык, мукöдпырся просто пукалiс и кывзiс стариклiсь басни, мукöдпырся корлiс няньтор, сiдз кыдз «дедö бöра кытчöкö мунiс и меным эз коль öтiк крöшки». Дед Петрован жалейтiс детинасö, шуис сiйö беднöй сиротаöн и, мымда вермис, отсалiс сылö.

А талун Öльöшка эз кор нем. Вöлi сiя бледыник, кытшöмкö ненормальнöй: киэс дрöжитiсö, тырппес тожö.

— Мый тэкöт, зонка? Он я шогав? — юалiс дед.

— Шогала, тыдалö, — мыкталöмöн шуис Öльöшка. — Юр потласьö-висьö, сёйны нем ог вермы и узьны тожö. Кык ой ни бытшöмика эг узь. Только ланьта и сэк жö кинкö нырыштö. Места ог адззы...

— Вот мый! Да тэныт, детина, öнi жö колö больницаö мунны. Эд кувны верман.

— Кула, натьтö...

Öльöшка вöлi öддьöн гажтöм, мылякö вачкисис старик вылö. Зонка дзарьялiс дед вылö полöмöн, кынымиськö осьтлiс öмсö, мыйкö мöдiс висьтавны, но эз вермы.

— Давай, ашын жö больницаö котöрт. Тэ шогалан, — шуис Петрован.

— Куканнесö некинкöт кольны.

— Нем ныкöт оз ло, — висьталiс старик. — Ужо, ме лун-мöдсö верма дозирайтны. А тэ веськöтчы. Кылан?

Öльöшка гогинялыштiс юрнас, вирс-вирс керис нырнас. Сiя дыр чöлiс, пукалiс юрсö öшöтöмöн.

― Деда... деда... Мый ме мöда висьтавны...

― Мый сэтшöмыс? Поди, кынöмыт сималö? Ох, тэ, бедолага. Ужо, мыйкö вая. Вот чериок кыйи. Шерба пуам.

— Оз ков, деда. Ог вермы сёйны.

— Мда-а, олан. Мый нö мöдiн висьтавны?

Кытчöкö пельöсö видзöтiкö, Öльöшка ыш ловзисис и нем эз висьтав. Старик вежöртiс, что зонкаыс ёна шогалö, и эшö öтпыр тшöктiс ашын жö мунны больницаö.

— Сэтчин тэнö живо-два веськöтасö. Молодец лоан.

— Кула, натьтö, — шуис гажтöма Öльöшка.

Сiя согласитчис мунны ашын жö больницаö, и дед успокоитчис.

— Меным бы армияö чожжык, — гортас мунтöн горöтчис Öльöшка. — Сэтчин бур бы вöлi. Деда... кыдз тэ думайтан... Деда...

Старик лöсьöтчис кывзыны. Но зонкаыс бöра пыдына ыш ловзисис и мунiс гортас. Сiдз нем эз и висьтав, кöть, тыдалö, мыйкö ёна сiйö маитiс. Дед Петрован, кöр водiс аслас постеляö, дыр бергалiс бокись бок вылö, старайтчис онмöссьыны.

А оныс эз вöв. Син одзын дзик ловья сулалiс несчастнöй Öльöшка, кытшöмкö надеяöн видзöтiс сы вылö, мыйкö мöдiс висьтавны. А мый? Кин тöдö.

Ланьтiс старик только югдандорас ни и то кытшöмкö сьöкыт, беспокойнöй онöн.

ВАЖ МЕЛЬНИЦА САЙЫН

Медбы не кольччыны тöв кежö вареннётöг, Виталькоöс бабыс саймöтiс шондi петан дорын. Зонка сэк жö котöртiс Серёжка дынö и саймöтiс сiйö. Вöлись кыкнанныс локтiсö Петрован ордö. Старик и внучаткаыс вöлiсö кок йылын ни. Нiя вердiсö челядьсö бытшöм чериваöн, сёйисö асьныс.

Кöр шондi ештiс только калькавны пу йыввез бердiсь, нёльнанныс иньдöтчисö Шерва дорись расокöт Важ мельницалань, кытöн пастух Öльöшка дозирайтiс ассис куканнесö. Ю весьтын путриктiс туман, коясис сьöкыт ульсöтöн. Быд турун за вылын свиттялiсö серебрянöй доноккез — гырись воттез. Вöрын быд куст сайын чивзiсö кайез. Гажа вöлi асылыс, мича да гора. И настроеннё челядьлöн вöлi бур. Нiя котöртiсö одзын, горöтлiсö, öвтчисö туиссэзöн. Куимнанныс туиссэсö босьтiсö ыджытöсь, медбы не кольны ягöдсö городскöй инькаэслö.

Важ мельница дын сланнез вывсянь киссис ва, шумитiс йирас. Мельница важын ни эз уджав, вöлi сiсь и пöлiньтчöм. Плотинасö эшö одззуну кырöтiс, и прудас ваыс вöлi етша. Мельницаыс сайын, важ шутёммез вылын, тёсовöй навес увтын баксiсö куканнез. Öльöшка мунöма, тыдалö, больницаас, абу лэдзöма табунсö йирсьыны.

— Но вот, — шуис дед Петрован. — Лэдзам нiйö загонсис и вашöтам Монастырскöй видз вылö. Сэтчин туруныс нюр дорас небытик. Сэтчин, расас и сэтöрьяин эм. Тыр туиссэз öктат А ме уджалышта Öльöшкаыс туйö, шогавны зонкаыс пондöма, колö отсавны.

— Сiйö дедыс ременьöн тöн вартлiс, — юöртiс Виталько.

— Ременьöн? Мыля?

— Кытшöмкö удж тшöктiс керны, а Öльöшкаыс оз бы вöлi кер...

Виталько да Серёжа висьталiсö быдöс, кыдз вöлi делоыс. Старик кывзiс и нёштöма видiс Селькосö, шуис сiйö мортсёйисьöн и паразитöн.

— Детинаöс ременьöн! Да позьö разь этö керны? Бöбсялiс мужик, совсем бöбсялiс. Неужто быдöс эта несчастнöй плотина увья? Öддьöн сiя колö. Пруд вöлi паршивöй, зыбун только аркмöтiс, видззез да вöрсö тшыкöтiс. И колö эта плотина увья юр öштыны. И колö, эта понда внучекöс пыркöтны! Вот зверь!

Тыдалö, айыс кодь жö сiя. Вот норася Наган Наганычлö, — сiя живо-два Сельколö дас сутки кежö казённöй горт адззас.

— Айыс сылöн тожö дикöй вöлi? — юалiс Серёжа.

— Селькоыслöн? Настоящöй кöин вöлi. Сiя эта мельницаын уджалiс. Юöв-керис, паразит, отирыслiсь вирсö. Öтлаын монаххезкöт гудыртiс, поппезлö служитiс.

Старик осьтiс загонсис завор, лэдзис куканнесö. Петiсö нiя öддьöн чожа, тыдалö, вöлiсö тшыгöсь. Тридцаться унажык куканёк прыг да прыг чеччалiсö Монастырскöй видзлань, тэрмасисö йирсьыны. Медодзын чеччалiс сьöдсера порозок. Сiя лэбтiс бöжсö, зурасис и öвтчис юрнас.

— Боёк куканёкыс, визыв, — ошкис сiйö дед.

— А нiя Пыдöстöм нюрас озö пырö? — юалiс Виталько.

— Озö. Сэтчин йöр эм...

Витальколö охота вöлi кывзыны дедсö, охота вöлi тöдны монаххезлöн олан йылiсь и пондöтiс басни:

— Монаххес мый нö татöн керисö?

— Йöзсö бöбöтлiсö, — висьталiс Петрован.— Олiсö нiя монастырас кык сотняся унажык, сё енлö юрбитiсö, корисö аслыныс бур олан. А главнöй монахыс, нылöн командирыс, вöлi отец Исидор, настоящöй святöйöн лыддисис. Мый сiя тшöктас керны, монаххес сiйö и керöны. Тшöктас кузь лун юрбитны, нiя юрбитöны, тшöктас ыб вылын уджавны — уджалöны. Быдöс эстöн — и вöрыс, и ыббес, и юыс — вöлi сы кипод увтын. Медбогатöй морт татöн вöлi. Да сэтшöм лöг — истово вöрдядь. Монаххесö, кöдна асныралiсö, отец Исидор зорöн вартлывлiс, быдса суткиэзöн тшыгйöн видзис да вичкуын пидзöссэз вылын сулöтлiс. А вичкуыс монастырас ыджыт вöлi, золотöй купола. Вöвлi, колоколыс кыдз öдззас тронгыны, дак говкыс валлэзöн ветлö, перкоягсалiсь пеллез чанöтö. И отирыс татчö быдладорсянь вовлывлiсö. Кинöс греххез вöтасö — юрбитны локтö, кин шогалö — локтö веськöтчыны да здоровье енлiсь корны. Быдыс сьöрас деньга вайö, нянь, яй. Отец Исидорлö только эта и колö. Кывсьывлiс, золотоыс пö сылöн быдса ящик öксьывлöма.

— Вот Кащей! — дивуйтчис Маня. — Мыйлö сылö сымда золотоыс?

― Пон тöдö, — шуис дедыс. — Баитлiсö тай одзжык: кинлöн унажык золото, сылö эшö унажык колö. Сiдз и отец Исидорлö. Годiсь годö богатсялiс, кыдз черань, крепитiс монастырсö: дона ликкез öктiс, каменнöй вичку строитiс, виль муэз весöтiс, уна вöввез да мöссэз видзис. Монаххез да миян кодь беднöй отирыс быдöс сылö керисö нянь кусöк понда. И Сельколöн айыс, Гаврилыс, уджалiс отец Исидорлö, мельникöн перво служитiс. Кöть эз и вöв монах, а тожö асьсö святöйöн лыддис, мыля чожа богатсялiс. И кыдз не богатсявны? Локтас мужик сюок изны, а сiя изöмыс понда сю корö. Джынсö монастырлö сетас, а мöд джынсö — аслыс. А кöр богатсялiс, пондiс беднöй крестьяналiсь пашня мырддьыны. Кинлöн буржык муыс, сылiсь и мырддьö. Кинлöн выныс абу, сiйö муö сюйыштö, ас вылас уджöтö. Кулакöн лоис. А кулак да поп вексö öтдор сулалiсö. Паныт нылö эн горöтчы — ульöн сёясö. Вот и Селькоыс сэтшöм жö недобрöй куль, кыдз и айыс. Сiя эд, паразит, томнас прокод монаххезкöт дружитiс, монастырас и узьлiс мукöдпырся. Сэтчин кытшöмкö код монах и курччöвтöм сылiсь пельсö тышкасьтöн. Ох-хо, мыйыс эз вöв.

— А кытчö монаххес воштiсисö? — юасисö челядь.

— Хо, вот сiя и эм! — гажöн горöтчис дед. — Нырыштiм нылiсь позсö, сымда и дело. Терпитiс, терпитiс народыс, да мыла орис, керис революция. Кывлiт сы йылiсь? Но вот и бур, кывлiт дак. Ленин висьталiс миянлö: вашöтö поппесö да богатöйесö дыв, керö счастливöй олан, лоö асьныт хозяиннэзöн. Ми сiдз и керим. Перво царьöс вашöтiм, а вöлись и богаттёсö. И монаххезлö олан эз ло.

МОНАСТЫРСКÖЙ РАСЫН

Пыдöстöм нюр дорын, Важ мельница сайын, сулалiс паськыт рас. Только öтi-öтi пантасьлiсö кушиноккез: монаххез весöтлöмась вöрас ыбоккез, кöдзлöмась зöр да анькытш. Коллективизация бöрын энö ыбоккесö гöрлiс Перкоягскöй колхоз. А öнi, кöр колхозыс öтлаасис мöдiк колхозкöт и быдöс ыббесö пондiсö гöрны только тракторрезöн, вöр шöрись пашнясö чапкисö: пыртан ны вылö тракторöн, дак и бергöтчыны он вермы — дöмасся не паськытжыкöсь. Но не видзны жö мусö весь. И колхоз лöсьöтiс сэтчö поскотина: вевттис тёсöн загон, сувтöтiс пастухлö избушка. И гожумбытöн олöны татöн куканнез. Туруныс быдмö небытик да чöскыт, унажыксö дикöй клевер, шыранькытш да ситурун. Куканнеслö öддьöн лöсялö.

Дед Петрован иньдiс челядьсö сэтöрьяинö, а ачыс пуксис избушкаыс порог вылö и пондiс керны виль туис. Öт синнас туисыс вылö видзöтö, а мöднас — куканнез вылö.

А челядь гайзiсö вöрас, сералiсö. Гöрд сэтöр вöлi сымда, что кöть содззезöн курав. Старухаэз, кöднö дед Петрован адззылöм тöн, сэтöрьяинсö орддьöмась боки. И мöдiккез сэтöн абу на öктiсьöмась. Быдöс ягöдыс дзонь вöлi. Виталько некой пору тыртiс ассис ыджыт туиссö и давай тыр кырыммезöн сюйны сэтöрсö öмас. Серёжка тожö öктiс туистыр и кольччис довольнöй: талун, натьтö, оз ни вид мамыс. Вареннёсö эд тожö любитö. А Маня сё öктiсис и öктiсис. Туиссö сiя босьтöма сэтшöмö, что быдса ведра тöрас, а поди и унажык.

— Кыдз тэ сы ыждаса гортат кайöтан? — юасисö зоночкаэз.

— Ме вына, — шуис Маня. — Ме этшöммесö кык туис верма нöбöтны.

Виталько да Серёжка только öвтыштiсö киэзöн. Кутчись Манякöт, дак эшö не сiйö кылан. Вот кольны бы öтнасö, небось, сразу öдззас пильскыны. Мый бы эн шу, а вöр эм вöр. Пуэс вон кытшöмöсь: ыджытöсь, тошаöсь. Сэтшöм пуэз коласын, натьтö, и ош мегырасьлö. Öткöн полöм петö ветлöтны вöрас. Изыскателлес, тыдалö, сiйöн и босьтiсö сьöраныс Пельтöм Селькосö — тожö полöны... Интересно, кытöн нiя öнi, мый керöны? Поди, вуджисö ни нюрсö, ветлöтöны ягас, видзöтöны вöрсö? Жаль, эз босьтö зонкаэсö сьöраныс.

Кытчöдз Маня тыртiс ассис ведёрнöй туиссö, Виталько да Серёжа лэдзчывлiсö нюр дорас, кошшисö ключ ва, медбы кöтöтны горшшез. Ветлöтiсö дыр, нёджжöвтiсö не öтiк бадь куст увтö, а ва некытöн эз вöв, нельки пыдын гöппез косьмöмась. Жар таво гожумыс, быдса месяц ни оз зэрась, нельки Пыдöстöм нюрын оз быльксав ваыс. И вдруг Виталько сöтiс кинас кымöсыс кузя.

— Серёжа, а кытшöм палестина йылiсь Селькоыс лёбис старухаыслö? — юалiс сiя. — Не эта я нюр йылiсь?

— Быль эд! Натьтö, эта нюр йылiсь. Нач, шуö, косьмыны пондiс...

Зоночкаэз дыр видзöтiсö нюрас, мыйкö думайтiсö.

— Вот бы ветлыны сэтчин, — шуис вöлись Серёжка. — Поди, изыскателлес сэтчин ни...

— Вöям. Кылiн, мый Селькоыс висьталiс? «Öшыннэз» пö эмöсь...

— Нiйö позяс орддьыны. А зыбуна местаэзöт ми лыжаэзöн мунам. Эмöсь миян важ лямпаэз — кысовкаэз. Сэтшöм паськытöсь ― кöть ю вылöт ыслась. Дедö кöркö керлöм.

Лямпаэз! Вот эта дело. Да эд сiя, Виталько, лыддьöтiс ни кытшöмкö книгаись, кыдз зоночкаэз мунöмась зыбунöт лямпаэзöн! И кыдз сiя одзжык эз кватитчы ны моз керны? Эх, осьта öм. Бöра Серёжка первöй вежöртiс. Öнi бöра нырсö кымöрöдз лэбтас.

Но Серёжа юрö пырис ни «идея», и лэбтавны нырсö эз понды.

— Тöдан мый? Давай пыралам нюрас. Пешлам зыбунсö, — терпитас оз, — шуис сiя.

Виталько, конечно, согласитчис. Кык друг чеччöвтiсö öтiк кöчка вывсянь мöдiк вылö. Сэсся сувтлiсö веж нитшöн вевттисьöм ежа вылö. Нем страшнöйыс абу. Терпитö муыс. Только дюттясьö невна, но да мед — ежаыс крепыт, оз ор. Зоночкаэз мунiсö эшö невна одзлань, кывзiсисö. И кыдзкö казявтöг инмисö осока коласö. Кок увтын пондiс бульчикайтны ва. И сэтöн Виталько чирöстiс, бöрöн-бöрöн пондiс петитчыны.

— Тэ мый? — повзьыштiс Серёжа.

— Котöрт чожжык! Сэтöн куст увтас, ваас — змей, — горöтчис Виталько и öдззис котöртны. Серёжка мымда прок чеччалiс сы сьöрын.

— Локтi бадь дынас, а сiя кыдз нюжöтас голясö! — висьтасис Манялö Виталько.

— Он бöбöт?

— Вот эшö! Кыдз сiя пышкыштiс — шш-ш!.. Но, думайта, öнi жö чушкас. Вот гад. Не весь бабö баитлiс — змейез пö нюрас эмöсь.

— И ме кывлi — эмöсь пö, — шуис Серёжка.

Манялöн туис вöлi тыра ни, и челядь котöртiсö дед Петрован дынö. Старик кывзiс Витальколiсь висьтасьöмсö и хитрöя шыннялiс.

— Первуись кыла, что эта нюрын змейез олöны, — шуис сiя.

— Дак тэ, деду, он верит? Эд ме сiйö адззылi, — дорйисис Виталько.

— Не, зону, змейез татöн абу, — серьёзнöя баитiс дед. — Тэнö повзьöтiс...

— Кин?

— А вот часöт видзöтам...

Быдöнныс мунiсö Виталько сьöрын, старайтчисö не шумитны. Витальколöн шырöм юрыс пондiс казявтöг мышкыртчыны, понпутша чужöмыс öзйыштiс. Мый, если бöра сiя повзис немись? Öдззасö сы вылын серавлыны, пондасö тешитчыны...

Бадь куст дынö локтiсö жагöна, сайласьöмöн. Дед Петрован öлiс челядьсö кинас: эд кышöтö, эд пишкö ныррезöн. Витальколö охота лоис несйыны и сайöвтiс нырсö кидолоньнас. И сёжö... несйис! Апчхи! И куст увтас кыдз пышнитас кинкö! Нельки дед Петрован петитчыштiс бöр.

— Но вот, сiдз и эм. Вöр утка сёр пияноккезöс осокаас пöжöм. Учöтикöсь эшö нiя, оз на лэбалö. Вот мамыс и повзьöтлö тiян коддесö. Локтö мунам, эд мешайтö сылö. Колö думайтны, эстöн баддясникыс сайын ты эм. Эд мунö, вöят...

Виталько эз тöд, кытчö воштiсьны, стыдитчöмöн дзарнитiс кынымиськö Маня вылö, полiс пантасьны синнэзнас Серёжкакöт. Серёжкалö и аслыс, тыдалö, вöлi недолыт. Сiя эз понды, ваксьыны, нельки кулакнас эз гымгы Витальколö горбас.

— Деда, сiдзкö былись татöн змейес абу? — юалiс сiя.

— Некöр эг пантавлы. Миян ладорын нiя век эз овлö. Маня нюмыртiс тырп дороккесö, пильснитiс кидолоняс:

— Геройез! Но и геройез! Кинiсь повзит?

— А тэ бы эн повзьы? — строгöя юалiс Серёжка.

— Вот эшö!

— Нет, висьтав честнöя: эн бы повзьы?

Маня шы эз сет, нельки пильскыны дугдiс. Сiя таво первуись ягöдалiс, öктiс тыр туис сэтöр, интереснöй тор адззылiс — уткаöс! — и позьö разь немись тшыкöтны ассис настроеннё? Лучше не кутчисьны зонкаэскöт.

Медбы кежöтны баснисö мöдiк туёк вылö, сiя юалiс дедыслiсь:

— А Пельтöм Селькоыс, деда, тожö богатöй вöлi?

— Богатöй вöлi кöркö. Но вот диво: колхозас первöй пырис. Айыслö паныт мунiс. Нёль вöв пыртiс, мöссэз куимö. Айыс пöльтiс сiйö бедьöн, сэсся ёрдiс и мунiс кытчöкö монаххезкöт. Колхозсö терпитны эз вермы. Монаххес, кöр кылiсö, что колхоз татöн лоас, сразу жö рознитчисö. Быдöнныс кытчöкö воштiсисö. А монастырьыс сотчис. Кывсис, бандиттэз сотöмась. А поди, асьныс монаххес. Кин тöдö. Важын ни эта делоыс вöлi. Не öтiк дас год чулалiс. Монастырь местас только петшöр öнi быдмö, сэсся нем абу.

— А золотосö кытчö нö главнöй монахыс воштiс? — юалiс Серёжа.

— И этö некин оз тöд. Может, дзебис кытчöкö. Адззат, вöр быдлаын. Пондыв, кошшы. Монастырьсö бандиттэс сiйöн и сотöмась пö, мыля золотосö абу адззöмась. И асьсö, Исидорсö, коллективизацияыс коста некин ни эз адззыв. Пöрись вöлi. Поди, кулiс кытöнкö.

Дед Петрован малыштiс векнитик тошоксö, öвтыштiс киöн:

— Тырмас ны йылiсь. Мунам лучше павжнайтны...

НЮРЫС КОСЬМÖМА

Кöр локтiсö бöр куканнес дынö, дед Петрован сразу жö казялiс, что табунас абу сьöдсера порозокыс. Чепöссис öтiклаö — абу, котöртiс мöдiклаö — абу. Локтiс нюр дорас и паймыштiс: куканьыс вуджöма йöрсö, чеччöвтöма сы вевдöрöт.

— Видзöт, кытшöм лешакпиян! — лöгасис дед. — Нюрас пырöма! Вöяс эд, вöяс... Вот беда!

Дед шупыта вуджис йöр саяс, корис дынас Виталькоöс да Серёжкаöс.

— Босьтö кузьжык беддез, панöвтö чожжык сiйö. Тэ, Виталько, веськытланяс мун, а ми Серёжкакöт шульгалань котöртам, — тшöктiс Петрован. — Только жагöник, эд инмö зыбунас.

Сiя мымда прок котöртiс кусттэз коласöт, чеччалiс кöчкаэз вылöт. Невна бокижык котöртiс Виталько. Киас зоночка видзис кузь бедь, кöдö кыскис йöрыс коласiсь. Бедьнас Виталько пешлiс гöппез коласiсь ежасö. Ежаыс быдлаын вöлi крепыт, бедь немымда эз мöртчы. Эта коста сiя думайтiс: «Если волшебнöй трубкаыс, то ог вöй. Чур менö, чур!»

Куканёк казялiс, что сiйö мöдöны панöвтны, и öдззис котöртны. Котöртiс сiя веськыта нюрас, и дед ёна повзис: вермас инмыны «öшынö» и сэк конец, вöяс нюр пыдöсö. Но Серёжка да Виталько вöлiсö чожжыкöсь куканьысся. Нiя шупыта одзалiсö сiйö и, беддезöн öвтчикö, панöвтiсö, вашöтiсö бöр Монастырскöй яглань. И, колö висьтавны, кыкнанныс казялiсö öтiк тор: нюрыс нiйö терпитö. И не только нiйö, нельки куканёксö терпитö. Эта жö как раз сiя, мый колö. Нюрöт позьö ветлöтны. И, конечно, Пельтöм Селько шуис палестинанас этö нюрсö. Мыля сiя полiс, что косьмас нюрыс?

Кусттэз сайсянь нiя казялiсö неыджыт ты. Сiя быльс видзис совсем матын, сiя местаын, кытöн повзьöтчис уткаыс. Тыдалö, уткаыс эта тыын и уявлö. Кытшöм сiя ты? Может, чериыс сэтöн шуксьöмöн шуксьö, а нiя нем оз и тöдö. Не, мый бы эн баит — интереснöй нюрыс. Поди, тожö волшебнöй? Колö сiйö буржыка вадзöтны, кытчöдз оз зэрась, колö ветлöтыштны сы кузя эна жар луннэзö.

— Адззылiн, мый шогмö? — горöтчис Виталько, кöр нiя куканёксö вашöтiсö бöр табунас. — Терпитö нюрыс!

— И ты эм. Вот, натьтö, сэтöн чериыс! Поди, черисö и сайлалö Селькоыс да? Если осьтам виль ты, то Катька Петровалöн овсяс оланыс, — радуйтчис Серёжа.

Дед Петрован эз ни вöв ны дынын. Сiя кералiс потшшез, медбы вылынжыкö керны йöрсö. Маня пукалiс избушка дынын, любуйтчис виль туисöн. Басöк туисыс, öддьöн бытшöм. Вот бы и сэтчö сэтöрсö öктыны. Рытнас локтас гортö — мамыс и ошкöв керас нывкасö. И вареннёыс тöвбыт кежö тырмас. Но мунны öтнас ягöдавны сiя, конечно, полiс. Медбы кыскыны сьöрас зонкаэсö, Маня решитiс невна ошкыны нiйö.

— А тi былись смелöйöсь вöлöмась, — шуис сiя. — Пыдöстöм нюрö лысьтiт пырны.

— Эшö не сiйö адззылан, — паныт горöтчис Виталько.

— Неохота туиссö простöн гортö кайöтны, — баитiс одзлань Маняыс. — Локтö öктам невна ягöдсö.

— Öктiсь öтнат, охота дак. Öддьöнöв жадничайтан, верман кулакö пöрны.

Маня лöгасис и нюмыртiс бöра тырп дорресö.

— А кин сiя, кулакыс? Тэ тöдан? — уськöтчис Виталько вылö.

— Конечно, тöда. Эта сiя, кин йöз киэзöн аслыс добро копитö. Этö сiя, кин ачыс оз уджав, а мöдiкöс ас пондас уджöтö.

Виталько тшöк мунiс. Ордчöн сыкöт пукалiс Серёжка. Вермас зоночкаыс мыйкö умöльö думайтны, вермас лöгасьны. А öнi, кöр пондiсö тöдны, что Пыдöстöм нюрын оз ов некытшöм змей, что нюрыс терпитö не только мортöс, но и куканёкöс, лöгавны некыдз оз туй.

И нiя эз лöгасьö. Гортö кайтöн, кык ёрт чожа баитчисö ашын жö мунны нюр саяс, пантасьны изыскателлезкöт, ветлöтыштны öтлаын ныкöт.

— Кöр локтасö экскурсияись челядьыс, дак ёна и дивуйтчасö,— шуис Серёжка.— Сэк вöлись видзöтам, кытшöм карикатура рисуйтас Петька Лунегов. Ого!

РАЗВЕДКА ПОНДÖТЧÖ

Яганёвскöй парма...

Кöр каян Горба керöс вылö да дзарнитан öтмöдöрö, дак перво нем он и казяв — быдлаын вöр и вöр. Нёджжöвтан шульгалань, кытчö визывтö Шерваыс, — сулалö лэчыт йыввеза кöзъяин. Видзöтан веськытлань — бöра сэтшöм жö кöзъяин, а ойланьö конецтöг кыссьö настоящöй тайга, зелёнöй море. Быдлаын вöр.

Только деревняыс дынын и эмöсь неыджыт ыббез. Шочыника тöдчöны неыджыт кушиннэз. Этö тыэз да нюррез, кытчö оз быдмы вöрыс. Кöр нёджжöвтан бытшöмика, то неылiсь казялан и Пыдöстöм нюрсö. Чукыля полосаöн кыссьö сiя кытчöкö орлытöг, Кайскöй волокö. Абу пыравлöмась Перкоягись отирыс эта нюр сайö. Оз пö туй. Эшö важын ни важын монаххез висьтасьлöмась, бытьтö ойезнас нюрсис петö кытшöмкö би, мукöдпырся рявзö лешак, и прокод мыйкö бульчикайтö. Мунöм пö кöркö нюрас öтiк монах кошшыны лекарственнöй турун и абу локтöма бöр. Мунöм сьöкыт военнöй годö вийны лоссезöс том охотник Öжын Митей и тожö бöр абу локтöма.

Поколеннёись поколеннёö вуджлiс легенда: кин мунас нюр саяс, сiйö лешак джагöтас нето змей ньылыштас. Сэтшöм уж эта окояннöй места — Пыдöстöм нюр. Перкоягын олiссез öлiсö ассиныс челядьнысö: эд мунö нюрас. Мый кошшыны? Пикан охота öктыны, дак вон видзыс ордчöн эм. Ягöд колö — дак пет баняэз сайö, ягöдыс сэтöн и эм. А Пыдöстöм нюр сайын керны нем.

И челядь эзö ветлывлö.

Эзö бы мунö нюр саяс и Виталько да Серёжка, кöбы эз вöв гажтöм деревняас, кöбы эз мунö сэтчин изыскателлез. А разь лысьтiсö бы зоночкаэз пырны нюрас, если бы эз тöдö, что змейез сэтчин абу и некöр эз вöлö? Ого, некöр бы эз пырö! Конечно, эмöсь нюрас неыджыт тыэз — осьтаэз, но эд нiйö позяс орддьыны: не слепöйöсь жö зоночкаэс, казяласö юкмöссэсö. Сэтчö жö, нiя босьтiсö сьöраныс лямпаэз. Серёжка гусьöн лэдзис сарайись, слегаэз коласiсь, öддьöн паськыт лямпаэз, кöднö керлöма эшö дедыс. Керöма, тыдалö, пипуись: лямпаэс кокнитикöсь, кöть и дорöмöсь лось кучикöн. Сэтшöм жö лямпаэз адззис и Виталько. И сылöн дедыс вöлöма вöралiсь, тожö тöввезнас волок меряйтöм. Поди, неöтпыр Пыдöстöм нюр сайö пыравлiс. «Интересно, вöлi сылöн талисманыс али эз?»

Куим верста вöлi Важ мельница дынöдз. Совсем не уна.

А зоночкаэз лэдзчисö часся дыржык. Мунны ковсис маласьöмöн. Вöрын сулалiс сэтшöм сук туман, что нюжöтан киэтö — и чуннез он казяв. Вöлi одз асыв. Вöрын некин эз шумит. И вöлi бы совсем лöнь, кöбы не вотьва. Гырись воттез тёпöтiсö мöймуся кöс листтэз вылö, горöн кышöтiсö турунын, инмывлiсö сикöдж коласöт куш яй вылö и дзик бытшкасисö емöн.

— Талун бöра жар лоас, — шуис Серёжка. — Кöр асывнас дыр оз пуксьы туман, сэк луныс пыр жар овлö.

— А часöт кöдзыт. Бр-р!..

Поснитик ва бус лякасис чужöм бердö, бытьтö чераньвез, сывьялiс синнэз. Серёжа, кöда оськалiс одзын, часто сувтчывлiс и старайтчис вежöртны, правильно я мунöны. Эстöн эмöсь уна туйвежжез, и казявтöг верман кежны бокö.

— Одзöв вöрзимö. Колiс терпитыштны невна, — шуис Виталько.

— А тэ бы узьыштiн эшö, одзöв дак! — шыасис Серёжка. Челядьлöн вешьяннэз и курткаэз вамисö шучкöп, кышöтiсö дзик бановöйöсь, вазисö нямöттэз. Нинкöммез, кöднö натодиль кöмалiсö мунны нюрас, перво дзуртiсö, вöлiсö öддьöнöв кöсöсь, а öнi шлюпкöтiсö: лысва кöтöтiс и нiйö.

Важ мельница сайын зоночкаэз дзебисö лямпаэзнысö понуллез увтö, асьныс мунiсö загон дынö. Дед Петрован эз узь. Сiя вашöтöма куканнесö поскотинаö и öнi пуис костёр вылын кытшöмкö сёян.

— Тi кытчö эта одза? — юалiс сiя дивуйтчöмöн, кöр казялiс зоночкаэсö.

— Чериавны мöдам, — шуис Серёжка.

Петрован малыштiс тошоксö, и челядь вежöртiсö, что ны локтöмöн сiя кольччис довольнöй. Кöр дед довольнöй, дак пыр тошоксö малалö.

— Öльöшкасö, тыдалö, водтöтiсö больницаас. Эз вовлы детинаыс, — шуис сiя. — Загрек дыр пондас куйлыны, ковсяс сэк меным кукань пастухö пöртчыны.

— Ми тэныт пондам отсавны, деда, — дзирыта шуис Серёжка. — Мыла ни бырис весь-ту овны. Тэ только висьтав мамöлö, медбы картов кучитны эз тшöкты.

Дед кöсйисис висьтавны Серёжка мамлö, что картовсö кучитны зоныслö öнi лоас некöр, и Серёжка радмис.

Туман рознитчис. Совсем матын, Пыдöстöм нюр саяс, горöн кривзiсö туриэз. Нюрас шыасьлiсö кытшöмкö кайез, нёштöмасисö канюккез. И сразу, кыдз только рознитчис туманыс, нюрсис утугаöн петiсö номмез. Нiя лэбалiсö быдса кымöррезöн, дзингисö пель одзын, курччасисö, кыдз тшыг поннэз, и ковсис прокод öвтчыны кыдзовöй улöн, вашöтны нiйö чужöм дынiсь.

Кытöнкö ылын-ылын, деревняыс ладорын, гургис трактор.

А эстöн, избушка дынас, быд турун за увтын чирскисö кöбывкаэз, шупыта, кыдз пуляэз, лэбалiсö мошшез.

Пондöтчис настоящöй гожся лун. Этшöм лунö настроеннё пыр овлö бур, нельки номмез озö вермö тшыкöтны сiйö.

Кöр дед Петрован мунiс куканнес дынö, Виталько да Серёжка пукалыштiсö эшö невна и öтдруг кыкнанныс дзарнитiсö нюр саяс. Сэтчин, кыдз и тöн, стенаöн сулалiс пемыт вöр. Вöр весьтын уялiс кокнитик лöз тшынок — мароса. Верстася не унажык эта вöр дынöдз, а мунны полöм петö.

Но вот Серёжа сувтiс кок йылö, шуис решительнöя:

— Раз баитчим мунны, дак колö мунны!

— Конечно, колö мунны, — висьталiс Виталько.

И нiя босьтiсö понуллез сайись лямпаэз, лэдзчисö нюр дорас. Эстöн адззисö кузь беддез и тожö босьтiсö сьöраныс.

— Мунны пондам веськыта, — шуис Серёжка. — Перво мунам вон ыджыт бадьыс дынöдз. Сэсся бöрьям мöдiк куст и бöра пондам оськавны веськыта.

Виталько и этöн согласитчис. Конечно, колö мунны веськыта. Пондан кö гöгравны нюрсö, дак ягыс дынöдз лунтыр колас мунны. А сiдз — сэтчинöдз час, да бöр локны час, да эшö ягас öтiк час öшас. Дед Петрован нельки синöн кваркыш оз ешты керны, кыдз нiя локтасö бöр.

Зоночкаэз перыта пырисö бадь кусттэз коласö. Лысва эстöн абу на косьмöм. Гырись воттез сiдз и брызнитiсö быд улок вывсянь, а турунын кольччисö паськыт следдэз. Первöй шаг вöлi керöм.

Одзжык, кыдз и колö настоящöй командирлö, мунiс Серёжка. Сiя быд шаг бöрын чуткалiс мусö бедёкöн, быд шаг бöрын сувтчывлiс и дырöн нёджжасис кок увтас, Виталько эз тэрмöт другсö, тöдiс, что нёджжасьтöг оз туй: верман сразу жö инмыны осьтаö, укнитны зыбунö.

Кынымкö сажень бöртi пондöтчис нёштöм кöчкарник. Вöснитик кузь кöчкаэз сулалiсö öтамöд бердö жмитчöмöн и ёна вачкисисö мыррез вылö. Кажитчö, неважын эстöн вöлöмась вöрзаптiссез, быдöс пуэсö кералöмась, öктöмась да кытчöкö нöбöтöмась, а мырресö кольöмась. Öнi тырöмась нiя небытик турунöн, нитшöн, и кöр тальччан сэтшöмыс вылö, пондö сразу жö дюттясьны, пöлiнясьны, сiйö и видзöт, медбы не берездасьны онняюрöн.

Кöчкаэз коласын мукöдлаын сулалiс сьöд ва, а мукöдлаын вöлi нач кöс. Кöсжык местаэзöттяс и мунiсö кык дружок. Кыкнанныс чожа бöра вамисö пидзöсви, ештiсö пымавны. Эд нiя чеччалiсö кöчка вывсянь кöчка вылö, конувтын нöбöтiсö лямпаэз, спинаэз сайын — пестеррез, а пестеррезын — нянь, кольттез, сов, лук. И кин тöдö, мый эшö вöлi быд пестерын.

Виталькоöс маитiс эшö сiя, что öддьöнöв пессис сьöлöм. Тöн рытнас, кöр лöсьöтчисö мунны, ровно быдöс бур вöлi; и сьöлöм радъялiс, и юрын дума, дзик борда кай, лэбалiс, и быдöс кокнитöн кажитчис, а талун мый и лоис. Нильдыштас кокыт кöчка коласö, а сьöлöм сэтöн и эм — усьыштас кытчöкö увлань, нельки зубыткодь лоас. И ньылöм! Мыля сiя сiдз петö? Он ешты чышкыны кымöстö, а сiя бöра ва ни. «Эта, натьтö, сiйöн, мыля ме пола, — думыш керис зоночка. — Повны оз ков".

А номмес! Виталько аслас векын некöр эшö эз адззыв сымда номсö. Кымöррезöн лэбалiсö нiя чужöм дынöт, дзингисö нёштöма. И курччасисö и курччасисö, кыдз кöиннэз. Зоночкаэз дугдывтöг öвтчисö киэзöн, сöталiсö то кымöс, то чужöм кузя. Натьтö, миллионся унажык ни вийисö номмесö, а нiя немымда эз чинö, мöднёж, кажитчö, эшö содiсö.

— Виталько, нiя ульöн сёясö! — шыасис Серёжка. — И мыля нiя сэтшöм лöгöсь?

— Тшыгьялöмась. Эта нюрöт некин эз ветлöт, некинöс вöлi сёйнытö. Кыштасö миянöс невна и пöтасö. Да вон и кушин ни тыдалö. А бабö пыр баитö, что шондi югöр вылын номмес оз лэбалö, полöны пö, медбы госныс эз сыв, — перыта баитiс Виталько. Кöр баитан, дак етшажык полан. Этö кöть кин сiдз шуас:

Кыдз и баитчисö, зонкаэз мунiсö веськыта. Нiя чожа петiсö ыджыт бадь дынас, невна шоччисьыштiсö, адззисö виль ориентир — кöс пöлiньтчöм кöз и иньдöтчисö одзлань. И сэтöн вдруг кинкö кыдз кышнитас! Серёжка чуть гатш эз усь, а Виталько сразу несйис... Недыр мыйись кыкнанныс сералiсö. Повзьöтiс нiйö ыджыт лягуша.

Чожа зоночкаэз петiсö баддез коласiсь и казялiсö шульгаланись сiйö тысö, кöдö адззылiсö тöн. Сiя вöлi не öддьöн паськыт, свиттялiс сьöд рöмöн. Кöр челядь сибöтчисö матöжык сы дынö, нырö вачкис нёштöм дук, а кок увтын пондiс бульчикайтны ва. Зыбун. Сибöтчыны тыыс дынöдз — нем и думайтны; казявтöг бузгисян горшви, а верман и совсем пырны. И кутчисьны нем бердö. Эстöн эз быдмö не пуоккез, не туруннэз, а вежöтiс только небытик нитш.

— Сiсьмöм эстöн местаыс, — бедьнас мусö чуткалiкö шуис Серёжа.

— Не только муыс, но ваыс сiсьмöма, — содтiс Виталько. — Кылан кытшöм дук?

— Эта газ...

Друггез казялiсö, что сэтöн, кытöн быдмöны бадёккез да осока, почваыс етшажык дюттясьö, сэтöн и нитшыс кытшöмкö мöдкодь: чорытжык да кузьжык, кыдз сiм проволока. Сэтшöм местаэз и кошшисö зоночкаэс, кöть и старайтчисö не öддьöн чуклясьны.

Мунiсö эшö дас оськöв мымда, поиктiсö, кыдз мыдзöм вöввез, нёджжасисö öтмöдöрö. А видзöтнытö вöлi нем. Гöгöр кöчкаэз да нитш, быдлаын чорыт осока, золотушнöй баддез. А одзын, совсем неылын, сьöд видзис яг. Совсем неылын, а он эд котöрт.

— Мунам веськыта! Мый лоас, дак сiя и ло!

— Мунам.

Керисö бöра кынымкö оськöв, бöра нёджжасисö, бытшкалiсö нюрсö кузь беддезöн. Кöчкаэз пондiсö öшны. Öтi-öтi только пантасьлiсö нiя и вöлiсö не сэтшöм ни кузьöсь, кыдз одзжык. А мукöд местаын совсем эз вöлö. Только небыта дюттясис кок увтын зыбун, бульчикайтiс ва. Вот и медбöрья кöчка. Одзын кушин. Натьтö, сiйö и шуис Селькоыс палестинанас.

Мöртiс Серёжа бедьсö, а сiя — пурс! — пырис метрся пыдынжык! Тальччис нитш вылас, а сiя паськалiс öтмöдöрö и осьтаись поллезöн петiс сiмöм ва.

— Кышав лямпаэтö, — тшöктiс Серёжка.

Виталько кышалiс лямпаэз, надёжнöя домалiс нiйö нинкöммез бердö гезокöн. Совсем кыдз тöвнас, кöть часöт жö керöс вылö кай. Серёжа тожö сувтiс лямпаэз вылö, чушки-пашки мунiс невночка, сэсся лэбтiс öт коксö да кыдз сöтас зыбуныс кузя! — только вачиррез öтмöдöрö лэбзисö.

— Терпитö! — шуис сiя гажöна.

— Вот и бур! — серöмтчис Виталько.

Кыссисö жагвыв одзлань, шыннялiсö. Кöть вöлi гожум, а нiя вот кыдз мунöны — лямпаэзöн. Совсем кыдз тöвнас — кокнита, веськыта. Вöлöма, лысваа нитш кузя лямпаэз ыскöвтöны öддьöн бура. И сёжö минута бöртi кыкнанныс шай-пай лоисö: одзын свиттьöвтiс сьöд ва и сыын уялiсö уткаэз. Кыт васö орддьыны?

Видзöтiсö одзлань кык друг, пишкисö ныррезöн. Неылын сулалiс ягыс, корис дынас. Сэтчин кривзiсö туриэз, летiс вижлоксö кöк. Неылын китшкис катша. Катша пыр сэтöн, кытöн морт бергалö. Лэбзьыштас кысянькö боксянь, пырк-пырк керас борддэзнас и давай кыдзкö страннöя китшкыны. Дзик не китшкö, а сералö йöзыс вылын.

А яг, эта таинственнöй пемыт яг, вöлi былись матын. Зоночкаэз бура ни адззисö нюр дорсис ыджыт кöс пожуммез, вековöй кöззэз. Мукöдыс сiдз пöрисьмöмась, что абу вермöмась видзсьыны кок йылын — чегöмась и пöрöмась öтамöд вылö. Но сiдз только нюр дорас. Чуть ылынжык тыдалiс настоящöй пемыт тайга. И эта тайгаöт, натьтö, ветлöтiсö часöт изыскателлез, керисö визиррез, кошшисö Шерва дорö буржык туй места. Вот дивуйтчасö нiя, кöр казяласö зоночкаэсö!

— Мунам! Адззан, матын ни ягыс. Кыдз-нибудь вуджам,— командуйтiс Серёжка.

И сразу жö чепöссис ваыс дынö. Лямпаэз шыльöтiсö, эз и думайтö вöйны. Зоночкаэз локтiсö топ ваыс дынöдз, повзьöтiсö нинкöм ыжда лягушаэзöс. Шлёп-шлёп-шлёп! — чеччалiсö лягушаэс осокалань. Шлёп-шлёп! — усялiсö ваö.

Виталько вдруг казялiс, что завидуйтö нылö. Вöлi бы лягушаöн, дак нем бы эз видз, тожö чеччöвтiс бы ваас, уйис и уйис бы веськыта пемыт ягöдз.

Кин тöдö, может, и Серёжка сiдз думайтiс.

Перво öтыс, сэсся мöдыс меряйтiсö васö беддезöн. Беддес эз и судзö пыдöссö, бытьтö тыыслöн пыдöсыс эз и вöв. Да, не весь нюрсö нимтöмась Пыдöстöмöн. Мöртан бедьтö, а сiя сё пырö и пырö кытчöкö. Васис петöны гырись поллез, потласьöны пышиктöмöн. Газ васис петö.

Мый керны?

— Веськыта мунны оз туй. Ковсяс гöгöртны тысö, — горöтчис Серёжка.

— Давай гöгöртам. Только кылö сьöлöмö: рытöдз ковсяс нювсьыны эстöн.

— Но и мый? Позяс и рытöдз. Пöжас мамö боккезöс шатьöн — сымда и дело. Зато нюрсö видзöтам.

Баитыштiсö невна да сы сорöн вöрзисö тыыс бокöт. И только ештiсö керны кынымкö шаг, кыдз кылiсö дед Петрованлiсь повзьöм голос:

— Виталько! Серёжка! Да тi мый этö, кульпияннэз... Бертö, öнi жö бертö! Вот ме тiянöс!

Невежöртана делоыс. Кыдз этö дед Петрован кватитчис вöтчыны? Вон мый ылына ни мунiсö, а дедлöн голосыс сiдз и пуктö пеллезö, бытьтö ордчöн старикыс сулалö. Дзар керисö дружоккез бöраныс, а дедныс сэтöн и эм. Петiс сiя кусттэзiсь и пондiс чеччавны кöчка вывсянь кöчка вылö, конувтас тёссэз я мый я видзö.

Паймыштiсö Виталько да Серёжка, недолыт лоис. Вот тэныт и изыскателлез, вот тэныт и государственнöй дело. Вöтас нiйö Петрован, лöгувьяс тэчöв керас горббезö кулакнас и нуöтас гортö. А гортын, нем и думайтны, аймаммезсянь неумöля дöнзяс.

— Котöртам чожжык, вöтас! — шуис Серёжка. Виталько чожжык нетшкöвтчис другыс сьöрö. Лямпаэс сiдз и нильдöны нитшыс кузя, ньылöм шоррезöн визывтö, пырö öмö, тырппез солалö. Гхы! Гхы! — сьöкыта лолалöны зоночкаэз.

— Виталько! Серёжка! — чирзiс Петрован. Сiя горöтлiс эшö кытшöмкö кыввез, но челядь эзö вежöртö нем.

Чожа нiя казялiсö кузь осока. Чепöссисö сылань. И кöр локтiсö туруныс дынöдз, казялiсö виль векнитик ты. Сiя вöлi кык шаг пасьта, но сёжö ты. Зоночкаэз сувтiсö, кваркыш-кваркыш керисö синнэзöн. Воштiсьны вöлi некытчö. Неужели ковсяс бертны?

— Не! Оз вот! Адззан — баддез? — горöтчис Серёжа. —

Сэтчин берег. Сэтчин и тыыс помассьö. Давай чеччöвтам канавасö.

— Кыдз?

— Кыдз, кыдз... Вот сiдз!

Серёжка чожа чöвтiс лямпаэсö, öтсö ештiс нельки чапкыны тыыс сайö. Сiя мöдiс чеччöвтны тысö бедь вылö нырыштсьöмöн. Но вдруг пöлiньтчис перво öт ладорö, сыбöрын мöдöрö, паськöтiс киэсö, сэсся ойнитiс и жагöник пондiс пырны муас.

— Виталько!

Виталько ёна повзис. Сiя перво эз и вежöрт, мый колö керны. Только сыбöрын, кыдз горöн несйис, нюжöтiс другыслö кисис бедьсö. Серёжа кутчисис сы бердö, старайтчис петны нятьсис. А зыбун кыскис сiйö улö, эз сет лэбтiсьны. Виталько локтiс матöжык, медбы Серёжкаыс вермис кутчисьны лямпаэс бердö.

А дед Петрован сё горöтлiс и горöтлiс. Сiя вöлi совсем ни матын. Старик проворнöя уджалiс. Чапкас одзас öт тёссö, котöртас сы кузя, сэсся чапкас мöдсö, вуджас сы вылö, судзöтас первöйсö и бöра котöртас чапкöмыс кузя. Мукöд местаöт сiя кыссис кынöм вылас, мунiс чибу-чаньöн, но сётаки мунiс, вешшис одзлань.

— Вöят! Вöят, стрижпияннэз! — горöтлiс старик.

Кин тöдö, может, и вöйисö бы кыкнанныс, но дед Петрован ештiс аскадö. Сiя локтiс ны дынö, кыдз лягушаöс, кыскис зыбунсис Серёжкаöс и... öдззис несйыны! Челядьыс дынын сулавны эз позь. Ны дынсянь пöльтiс сэтшöм нёштöм дук, что нырвуж пиньöвтiс. Осьтасис, кытчö инмывлiс Серёжкаыс, петiс кольмöтан газ.

— Тьфу! Тьфу! — сьöласис дед. — Ой, кытшöм недолыт! А синнэс сералiсö. И кыдз пыр, кöр вöлi довольнöй, старик малалыштiс тошсö.

ПЫДÖСТÖМ НЮР САЙЫН

Вöрзисö туйö кыкöн, а Пыдöстöм нюр сайö петiсö куимöн. Не весь йöзыс баитö: поснит челядь да пöрись морттэз — öткодьöсь, нiя чожа баитчасö öтамöд коласын.

Сiдз сiя и вöлöма.

Кöр Виталько да Серёжка садясисö, нiя первöй делоöн нёджжöвтiсö таинственнöй ягыслань. Вот сiя, ордчöн. Сыбöрын зоночкаэз нёджжöвтiсö веськыта Петрованлö синнэзас и вежöртiсö, что пужыс нылö талун кытчöдз оз ло. Старик шыннялiс. Сiя вöлi довольнöй, что вöтiс челядьсö. Тышкасьны Петрован эз и думайт. Добрöй кöсыник старик осокаöн зыртiс Серёжа бердiсь дука нятьсö, кисьтiс зыбунсö зонкаыс паськöмись и баитiс нюжвыла:

— Вот сiдз. Вот, вот... Öнi тэ порссес коласын первöй лоан. Миян деревняись зыбунын эшö öтiк порсь эз купайтчы, а тэ ештiн. Вот сiдз.

— Деда! — баитiс эта коста Виталько. — Деда! Пемыт ягыс, адззан, совсем матын. Мунам.

— Мунам, деда! — корис и Серёжка.

— Охо! — дивуйтчис дед. — Век мечтайтi сэтчин вöвны, да некöр эг лысьтлы вöрзьыны, а öнi, думайтат, вöрзя? Курöггез серавны пондасö.

— Деда, ми некинлö огö висьталö. Только ветлам — и бöр. Видзöтам, мый изыскателлес керöны, и сразу жö мунам. Ми, деда, кöть кöр тэнö кывзыны пондам. Сэтчö жö, öддьöн охота тöдны, мый Пельтöм Селькоыс сайлалö? Ми думайтам, сылöн кытшöмкö тайна эм. И видзö тайнасö нюр саяс.

Старик дыр видзöтiс ягыслань, мыйкö думайтiс. Сэсся шуис мечтайтöмöн:

— Интересно, мый сэтчин, а?

— Лок ветлам, видзöтам. Чапкам тёссэсö ваыс весьтöт и вуджам. А сэтчин баддез ни вон, муыс чорыт, натьтö. Огö вöйö...

Старик öвтыштiс кинас:

— А, мунам!

Сымда и вöлi. Сымда и колiс добрöй стариклö.

Сiя чапкис тыок весьтö тёссэсö, вуджис сай ладорас и бытшöмика пешлiс мусö. Ежа терпитiс стариксö, немымда эз дюттясь: эстöн вöлöма кыз торф, сiйö быднёж вурöма чорыт нитш, и гöнит кöть верзьöмöн!

— Локтö вуджö. Беда бур татöн, — корис старик челядьсö. И вот нiя пукалöны Пемыт яг дорын, нёджжасьöны. Быдлаын лöзöтö турун, окласьöны пашмöм юра умраэз, тыдалöны пикан почкаэз — пöляннэз. Турунын, кыдз и Монастырскöй мельница сайын, чирскöны кöбывкаэз, вöрын шыасьлöны кайез. Нем особеннöйыс абу, только разь сiя, что вöрыс татöн сулалö стенаöн: öтамöд бердö топыта жмитчöны вылын пожуммез да кöззэз, шушкöтчöны кыдззез. Татчö абу на сибавлöмась вöрзаптiссез, татöн быдöс эшö дзонь.

Интересно, кытöн изыскателлес? Кытчö нiйö нуöтiс Пельтöм Селько? Охота вöлi чожжык мунны вöрас, горöтлыны, кошшыны изыскателлесö, но старик öлiс челядьсö: эд тэрмасьö. Тöдтöм вöрын быдторыс вермас шогмыны, колö нёджжасьöмöн, осторожнöя, жагöник.

— Перво сёйыштам да шоччисям, вöлись и видзöтам берег дорсö.

И быль, перво колiс сёйыштны, кынöм важын сималiс. Эд нiя талун эз на и сёйö эшö нем.

— Висьталö спасибо, что Монастырскöй прудсö лэдзисö и жар таво гожумыс: шуралöма нюрыс. А сэтöн прокод ва сулалiс. Эд прудыс одзжык эта нюрöдз кайлiс, — висьтасис старик. — И зэра гожумö татчö эдö бы вермö пырны.

— Деда, а кыдз тэ вежöртiн, что ми нюрас пырим? — юалiс Серёжка.

— А лысваыс! Локтi костёрö дынö, видзöта: тiйö абу. Но, мыся, кытчö нiя воштiсисö? Дзарнитi кусттэз коласö, а сэтi дзик пыжöн уйöмась, сы ыждаö тi следсö кольöмась. Но ме и вежöртi, — неладно делоыс, натьтö, пырисö, мыся, нюрас вежöммез. Эд не весь жö тi чепсасит тöн, пешлiт ежасö. А талун висьталiт, бытьтö вуграсьны локтiтö, а вугыршаттезныт абу. Ме бöра казялi: неладно делоыс. Вот сiдз.

Дед кыскис Виталько пестерись нянь да луккез, тшöктiс челядьлö сёйны.

— А мыля не менчим? — лöгöнмоз юалiс Серёжа.

Тошсö малалiкö, Петрован шынньöвтiс лукавöя, гогинялыштiс юрöн:

— А ноко видзöт, мый тэнат пестерат...

Осьтiс Серёжа пестерсö, а сэтiсь нять рудзалö, дук петö.

— Тьфу! Купайтчöм няньыс öтлаын мекöт.

Сьöласис Серёжка шынньöв пыр, кокнит сьöлöмöн, дзик баитiс не сёян йылiсь, а кытшöмкö мöдiк тор йылiсь, кöда вöлi совсем не жаль. Зонка вöлi рад, что сэтшöм кокнита шедiсö нюр саяс, вöлi довольнöй сiйöн, что öтлаын ныкöт дед Петрован, опытнöй пöрись морт. Сыкöт повны нач немись, нельки няньтöг позяс олыштны, эка беда. Главнöйыс — подвиг!

— Но и вот, казялi ме, что нюрö тi пырöмась, и сiдз повзи, чуть садь эз быр. Мыся, вöясö стрижпияннэз, беда лоас. Павтыртi чожжык загоныс вылiсь кык тёс. И тiян сьöрö. Бур, что аскадö ештi.

Кыдз и челядьыс, старик вöлi радся-рад. Перкоягись эшö некин татöн эз вöв, а сiя, Петрован, пöрисьувьяс шедiс Пыдöстöм нюр сайö, первöйöн шедiс, виль му, позьö шуны, осьтiс. Кытшöм сiя, эта муыс?

Да, рад вöлi дед.

А Виталько йылiсь и баитны нем. Сiя табанитiс öмас ыджыт нянь тор, сёйис чöскыта и горшöн, и эта коста пельсайесö адззис. Вот видзöтiс бы Маня Онянова, кыдз сiя нюрöт повтöг оськалас, натьтö, сразу бы кывсö курччöвтiс, некöр бы сэсся трусöн эз шу.

Шоччисисö, сёйыштiсö — и бöра одзлань. А öтмöдöрын вöлi вöр. Учöтик руд каёк дюттясис паськыт льöмпу ув вылын и дугдывтöг юасис: чив-чив? Пушистöй гöрдкодь комок шур-шур кайис вековöй пожум вылö, ляпкисис уввез коласö и полöмöн нёджжасис бисер кодь синоккезöн. Кур-р-р! — лэбзьыштiс кок увтiсь сьöкыт тар, ёна повзьöтiс мунiссесö. Ток-ток-ток! — кокасис кöс ньыв вылын кыр, кошшис аслыс öбед.

Тöдтöм, таинственнöй вöр олiс аслас оланöн. Дыша шушкöтчисö сьöкыт лыссэз, чуть-чуть вöрисö пипуэзлöн да кыдззезлöн листтэз, омöн вöр пасьтас кöвьясис крепыт сир дук, пуэз коласын орсiсö вуджöррез, быдлаын мыйкö кышöтiс, дзик матын ветлöтiс кытшöмкö ловья существо. Вöлi гажтöмкодь.

— Эстöн, натьтö, ошшез олöны, — шуис гусьöник Виталько.

— Мыйыс, поди, абу, — висьталiс старик.

Серёжка думайтiс изыскателлез йылiсь. Кытöн часöт нiя? Поди, совсем матын ветлöтöны? А поди, адззисö ни вöр кыскалан туй увтö бур места и мунiсö бöр гортö? Вот бы чирöстны-горöтны быд вын, натьтö, шыасисö бы паныт. Но дед Петрован висьталiс, что тöдтöм вöрын горöтлыны оз туй. Некин оз вермы висьтавны, кин олö тöдтöм вöрас. Вермас страшнöй зверь пантасьны, вермас эшö мый-нибудь шогмыны. Вöрын пыр колö лоны осторожнöйöн, а этшöм дзибын и подавно. Вот мыля нiя мунiсö гусьöник, старайтчисö не ризьöтны уввезöн, не шумитны.

Ветлöтiсö нiя вель дыр ни. Перво пырисö тайгаас, сэсся кежисö шульгалань и оськалiсö ордчöн нюрыскöт. И кöть бы öтi туёк пантасис, кöть бы öтiк след! Некин абу ветлöтöма эта дзибын, некин абу пыравлöм тальны турунсö.

Вöр... Пемыт, кондовöй. Тоша уввеза кöззэз жмитчöны öтамöд бердö, сiдз паськöтöмась уввезнысö, нельки шондiыс оз тыдав, мунан дзик гуöт. Веськыт пожуммез, кыдз золотöй колоннаэз, пыкöталöны небо. Некин нiйö эстöн абу вöрöтöма, абу дойдöма черöн.

Тайга, настоящöй тайга.

Но вот дед Петрован лэбтiс веськыт кисö, шушкыштiс:

— Кылат? — гусьöн юалiс сiя. Челядь нем эз кылö.

— Кытöнкö шорок больгö...

Старик кежис невна бокö, муныштiс тэлляинöт. Зоночкаэз вöтчисö сьöрас. Чожа нiя казялiсö кыдззаин. Чочком симöта пуэз вöлiсö кызöсь и веськытöсь, и кöр тöлок вöрзьöтлiс уввезнысö, вöрын кылiс нежнöй шушкöтчöм. Руыс эстöн боссьöма пöжсьöм корось дукöн, вöлi небыт и чöскыт кöра. Кок увтын путриктiс кузь турун.

Туруныс коласын больгис шорок. Сiя вöлi совсем учöтик, кык шаг пасьта. Эта вöлi, пожалуй, ключ, кöда визывтiс Пыдöстöм нюрö. Öтiк местаын шороксö йöрйöма сiсь колода, и, сiйö вуджикö, ваыс больгис горöн, кажитчö, лöгалöмöн.

— Вот эстöн позяс и миссьыны. Серёжка, гывьяв вывсит тинасö, — тшöктiс Петрован.

И вдруг барöтiс синнэсö, мыйиськö ёна повзьыштiс. Витальколö кажитчис, что старик нельки пернапасасис, а тырппес сiдз и вöрисö, бытьтö лыддьöтiсö молитва. Мый сыкöт лоис, кинöс казялiс?

— Чуманок... Адззат, чуманок öшалö...

Быль, шорыс сайын, неыджыт кыдз ув вылын öшалiс чуманок, учöтик чумпель, кöдаись позьö юны ва. Дак вот мый сэтöн вöлöма! Сiдзкö, эта ягын кинкö ветлöтiс, кинкö юис эта шорокись ва... Чуманок вöлi нач эшö виль, немымда абу кöрчитчöм и сьöдöтöм. Сiйö керöмась эна луннэзö, тöн нето удерлун. Сiдзкö, морт, кöда сiйö керис, ветлöтiс татi совсем неважын. Кин сiя?

— Изыскателлес! Видзöт, кытöн вöлöмась, — радуйтчöмöн шуис Серёжка.

— Ми чожа нiйö панталамö, — содтiс Виталько. — Вот дивуйтчасö.

Куимнанныс вуджисö колода вылöт шороксö, сибöтчисö чуманыс дынö. Шорокыс дынын турунас тöдчисö морт следдэз.

— Мунам, деда, следдэс кузя, — корсисö челядь. — Может, панталам нiйö.

Мунiсö невна шорокыс пöлöн, сэсся пырисö бöра тэлляинö, вуджисö неыджыт ляга и казявтöг петiсö кушин вылö. И бöра казялiсö сэтшöмö, мыйсянь дед сiдз и барöтiс синнэсö. Кушиныс вöлi ытшкöм. Патшыра кöззэз коласын сулалiс неыджыт зород.

— Вот тэныт и на! — дивуйтчöмöн шуис дед. — Да эстöн неважын быдса артиль ветлöтöм.

Челядь чöлiсö. Да и мый нiя вермисö шуны? Висьтавны, что ытшкисисö изыскателлез? Дак нылöн сьöраныс некытшöм литовка эз вöв. Да и мыйлö нылö туруныс?

Вуджисö этö кушинсö, орддисö расок и бöра петiсö кушин вылö. И бöра сiя вöлi бытшöмика ытшкöм, гогналöм. И бöра кöззэз коласын сулалiс учöтик зород. Да мый эта сэтшöмыс? Кин эстöн туруналiс? Неужели Кайскöй волокись кинкö вовлiс? Эта ылына?

Дед Петрован дзарнитiс öтмöдöрö, дзик мöдiс казявны кинöскö и иньдöтчис зородыслань. И видзчисьтöг тран сувтiс, сэсся пондiс жагöник петитчыны. Сылiсь кымöссö öтiк секундаö вевттис гырись ньылöм... Зородыс дынын кынöм вылас узис морт!

БЕДОЛАГА

Зород дынын узис морт. Сiя водöма кыминь, юрсö кутöма киэзнас, вевттисьöма кытшöмкö зипунöн. Кажитчö, мый эстöн сэтшöмыс? Уджалiс морт, мыдзис и водiс шоччисьны. Етша разь сiдз овлö? Но дед только треситiс тошокнас, ылöстöма видзöтiс зородыслань и эз вермы нем горöтчыны. И эшö бы. Кузь век олiс, пыр думайтiс, что Пыдöстöм нюр сайын мортлöн и кок след эз вöв, а сэтöн видзöт мый шогмö! Интереснöй история...

— Деда, локтам сы дынö, саймöтам, — шушкыштiс Виталько.

— Кыдз саймöтам? А вдруг сылöн киас пишаль?

— Мыля — пишаль?

— Быдторыс вермас лоны: кин тöдö, кытiсь сiя шедiс. Давайте сайöвтчам. Мунам вон кöззэс сайö...

Нiя мунiсö невна бокö, кöззэс дынö, кöдна сулалiсö вöр дорас. Куимнанныслö эз терпитсьы тöдны, кыдз татчö шедiс мортыс, кин сiя? Куимнанныс думайтiсö, мый керны одзлань. Виталько вдруг казялiс, что нырпыссö бытьтö пондiсö гильöтны. «Часöт несъя...»— повзьыштiс сiя. И быль — несйис! Да сэтшöм горöн, дзик вöв пырснитiс. Серёжка сiдз и чеччöвтiс бокö, сыбурна повзис, дед Петрован осьтiс öмсö. А сыкöт, кöда узис зород бокас, пондiс шогмыны мыйкö неладно. Сiя, дзик заводнöй, чеччöвтiс кок йылö, сэсся усис кыминь, пондылiс эшö сувтны, но эз вермы и давай котöртны чибу-чаньöн. Морт ылöстöмсялiс, тыдалö: котöртiс сiя не йöзыс дынсянь, а веськыта ны вылö, мыйöн неумöля шардöтiс куимнаннысö. Нiя тожö лöсьöтчисö котöртны. И котöртiсö бы, пышшисö бы вакрамешö, если бы тöдтöм мортыс вдруг эз понды герьявны мымда прок:

— Мама-а! Мам-ма!..— шувлiс сiя синвасорöн, дзик кагаок.

И дед Петрован бöра барöтiс синнэсö да осьтiс öмсö. И бöра вöлi мыйись: голосыс кажитчис тöдсаöн.

— Да эта жö Öльöшка!— чирöстiс вдруг Виталько.

— Быль, сiя! — шуис Серёжка.

Дед Петрован лэбтiс веськыта кисö, медбы пернапасавны кымöссö, кöть быдлаын висьтасис, что еныслö немымда оз верит. «Но и но, но и но...» — шушкисö сылöн тырппес.

А Öльöшка, кöр кылiс челядьыслiсь баснисö, сiдз и брякнитчис му вылас и öтiк шаг сэсся эз вермы керны. Кöр Петрован локтiс сы дынö, детина вöлi дзик неловья. И асьсö сiйö öдва позис тöдны: чужöмыс сьöдöтöм, пыктöм, синнэс кылалöмась и мый самöй страшнöйыс — Öльöшка вöлi дзор! Да, сылöн юрсиыс вöлi дзор, кыдз стогодся стариклöн. А эд Öльöшкалö вöлi только пятнадцать гöгöр.

«Страннöй делоэз шогмöны, — думайтiс Виталько. — Öддьöн страннöйöсь. И кытшöм бур, что дед Петрован вöтiс миянöс...» Серёжка чувйыштiс сылö бокас, шуис негорöн:

— Бура тэ несйин. И как раз аскадö.

Öльöшка дрöжитiс быдöс вывтырнас, сылiсь öмсö пиньöвтiс кытшöмкö нечистöй вын. Детина йирис пиннесö. Старик сувтiс сы весьтö кекеркаöн, малыштiс чужöмсö.

— Öльöш, дитя, кыдз тэ татчö сюрин?

Зонка чеччöвтiс кок йылö, тыдалö, мöдiс пышшыны, но бöра шлёпкисис му вылас. Сылöн эз вöв садьыс. И кöр вежöртiс, что пышшыны оз удайтчы, мымда вын öшöтчис дедлö коккес бердö.

— Вий менö! Деда, вий! Кöртав голяам галя и чапкы зыбунö! Ме ачым мöдi уськöтчыны нюрас, но ог вермы. Деда, мезды менö бедасис: сюйышт онняюрöн нятьö...

Сiя сыркьялöмöн пондiс горзыны, гырись синва чепöссис визывтны нятьöсь чужöмыс кузя, тырппес пиньласисö. Дед малалiс сылiсь пашмöм юрсö, старайтчис бурöтны:

— Дугды, дитя, мый тэ сiдз... Ми нем тэныт умöльсö ог керö. Тэ жö тöдан, ме радейта тэнö. Дугды, эн бöрд.

— Вий, деда! Ог вермы сэсся. Мыла орис. Öльöшка баитiс гусьöник ни, спокойнöйжыка, и Петрован вежöртiс, что детиналö лоö буржык.

— Виталько, — корис старик. — Вай ноко пестертö! Вердам Öльöшсö кольттезöн, няньöн. Тэнат и рисьтупöсь, тыдалö, кольччис.

Сэсся малыштiс несчастнöйлiсь дзор юрсö, пуксис сыкöт ордчöн.

— Сималö кынöмыт? Эх, бедолага, бедолага... Вот сейчас мийö тэнö гöститöтам, вердам, юкталам и быдöс лоас бур.

Виталько осьтiс пестерсö, кыскис быдöс, мый сэтöн вöлi. Öльöшка ылöстöм синнэзöн дзарнитiс сёянсö и, кыдз пон, уськöтчис нянь вылö. Сiя, тыдалö, абу сёйöма не öтiк сутки ни. Дед пöвсалiс пöжалöм кольть, нюжöтiс сылö:

— Сёй, дитя. Ёна тэ тшыгьялöмыт. А тi, — шуис челядьыслö, — чукöртö кöс уввез, симöт. Часöт костёр керам, чай шонтам.

Öльöшка öвтыштiс киэзöн:

— Оз ков, оз ков бисö. Смерть лоас. Дедö сiдз и шуис: öзтан би — начкыла.

— Эка беда, кытчöдз тэнö сiя воштöма. Видзöт — дзормöмыт...

Öльöшка сыркьялiс. Сiя ньылалiс няньсö, полöмöн дзарьялiс öтмöдöрö и дугдывтöг вирскис нырнас. Челядь видзöтiсö сы вылö дзик могилаись петöм покойник вылö и эз лысьтö горöтчыны öтiк кыв.

«Дак вот кытчö иньдöм сiйö Пельтöм Селькоыс, — думайтiс Виталько. — Кыт сiя татчö шедiс? Мыйлö локтiс?»

Эта вопрос маитiс не только сiйö. И дед Петрован, и Серёжка думайтiсö эта йылiсь. А Öльöшка сёйис и эз тэрмась висьтавны нем. Но вот бырсис няньыс, зонка öктiс öлöдзсис медбöрья крöшкиэз, чапкис нiйö öмас.

— Ог вермы сэсся! Ась кöть мый лоö, а пышша татiсь. Ме и гортiсь пышша, деда. Садь бырис.

Сiя косöя дзарнитiс вöрас, дрöгнитiс быдöс вывтырнас и чеччöвтiс кок йылö.

— Вон сiя... вон, вон...

Старик и челядь эз адззö нем. Одзын сулалiс вековöй тайга, шушкöтчисö пуэз, кытöнкö кöкис кöк. Вöр дорас быд пуок вылын сьылiсö кайез, турунын чирскисö кöбывкаэз. Шондi öшалiс самöй юр весьтын, жалейттöг кисьтiс му вылö югöррез, сылöтiс сир. Вöрас пуэз коласын кöвьясис лöз тшынок. Кинöс сэтчинiсь адззис Öльöшка?

— Кык ой узи татöн. Сэсся ог вермы. Тырмас! Деда, лок мунам гортö. Деда, отсав меным! — дзирыта баитiс сiя.

— Мунам, деда, — шуис и Виталько. — Полöм петö. У-у...

— Ладно, мунам, — согласитчис дед.

ВА УВТЫН ПОС

Медодзын öнi мунiс Öльöшка. Сiя не мунiс, а дзик лэбзис. Старик öдва вöтчис сы сьöрö. Мымда вын котöртiсö и Виталько да Серёжка. Нiя полiсö дзарнитны бöраныс, сiдз и кажитчис, бытьтö кинкö вот-вот öшöтчас пельпоннэз бердö, трекнитас и кыскас чашьяö.

Öльöшка шысеттöг петiс туёк вылö и котöртiс крутик вывсянь эшö перытжыка. «Видзöт тэ, туёк, — думайтiс дед. — Быдса артиль ветлöтöма вöрöттяс. Кинлö бы лоны?..»

Уна вопроссэз бергалiсö Петрован юрын. Перво-наперво колiс бы тöдны, мыйлö Пельтöм Селько иньдiс татчö внучексö, кыдз Öльöшкаыс вуджис нюр саяс, тöдö я, кытöн изыскателлес. И мöдiк вопроссэз маитiсö, но старик решитiс кытчöдз нем не юасьны. Локтас кад, и Öльöшка висьталас быдöс ачыс. «Эка беда, кытчöдз сiя локтöма, дзормöма детинаыс...» — жалейтiс зонкасö дед.

Вöр туёк лэдзчис нюрыслань, чуклясис лягаэз да выскыррез бокöт. Петрован вежöртiс, что детинаыс эстi и локтöма. «Тыдалö, нюрас тожö туёк эм. Вот тэныт и на!»

— Да жагöнжык тэ мун, атшалi, — корис старик Öльöшкаöс. — Сiдз и лэбзьö, сiдз и лэбзьö...

Баитiс старик унажыксö сысянь, мыля öдöлейтiсö быдкодь думаэз.

— Мунам чожжык, мунам! — шуис Öльöшка. — Вдруг сiя чеччас и вöтас миянöс. Смерть лоас! Вермас и дедö локны. Сiя талун кöсйисис. Вияс быдöннымöс. Сiдз и тöд — вияс!

— Кытöн сiя, дедыт?

— Да ныкöт мунiс, анчихристтэзкöт. Но, ныкöт, кöдна туйсö кошшöны.

— Изыскателлезкöт, — вежöртiс Серёжка. — Кытöн нiя, он тöд?

— Ог тöд. Дедö тай шуис: мыччала ме нылö туй, кыт и лешакыс оз ветлöт, пырта пö кытчöкö урманö.

— Мый жö эта сэтшöмыс, кытшöм дивовежа? — повзис

Виталько.

— Нем ог вежöрт, — шушкыштiс Серёжка. — Ме сiдз думайта: Селькоыслöн татöн былись кытшöмкö тайна эм. Сылö колö, медбы татчö, нюр саяс, некин эз пырав. Вежöртiн?

— Конечно!

Туёк эта коста кежис невна веськытлань, пырис кусттэз коласö. Кöть вöлi луншöр кад, а кусттэз вылын сё эшö öшалiсö лысва, доноккез, кок увтын кышöтiс уль турун.

Кынымкö шаг бöртi мыччисис Пыдöстöм нюр. Öльöшка тран сувтiс, барöтiс ылöстöм синнэсö. Дед Петрован чуть эз кай сы вылö.

— Тэ мый? — юалiс повзьöмöн.

— Вияс! Сiдз и тöд — вияс дедö. Эд ме клятва сетi — не мыччавны туйсö. И святöй лик окалi...

Дед, тыдалö, лöгасис. Сiя крепыта кутiс Öльöшкаöс пельпоннэзöт, трекнитiс, дзарнитiс веськыта синнэзас:

— Вот мый, бöбöв! Тырмас тэныт. Висьтав, ноко, мыля больницаас эн мун, а татчö локтiн? Кин шогья пышшалан?

Ылöстöмсялöм Öльöшка сiдз и брякнитчис му вылö, öдззис вартчыны киöн и кокöн. Дед Петрованлö ковсис öштыны неетша кад, медбы бурöтны сiйö. И только сэк, кöр старик висьталiс, что чожа Öльöшка мунас армияö, лоас сэтчин генералöн и сэк сiйö дедыс и чальöн оз лысьт вöрзьöтны, детина лöнис, кыдзкö шымыртчис быдöс, öшöтчис, кыдз сырлёль.

— Но мыйись повзин, бöбöв? — баитiс одзлань дед. — «Вияс, вияс...» Да кыдз сiя тэнö вийны лысьтас. Эд сэк сiйö асьсö тожö виясö. Ноко лок мунам деревняас. Дзеба ме тэнö аслам амбарö, замок сайö. Некытшöм чёрт тэнö сэтiсь оз адззы. Вежöртiн? А сэсся сельсоветö котрася, милиционерöс вайöта. Мыччалас сiя дедытлö пужсö, сразу чижовкаö йöртас. Да и то шуны — важын кад. Вот кытчöдз тэнö воштöма. Разь позьö внучек вылын тешитчыны? Эта понда сразу тюрьма.

Сьöкыт вöлi вежöртны, мый шогмис Öльöшкакöт. Зонка сiдз и шойöтiс, öдва видзсис кок йылас, киэс öшöтчисö, кыдз плеттез. Ёна сiйö повзьöтöма дедыс, быдöс умоксö бергöтöм-сорöм, арт абу.

— Ох, мый меным лоас, мый лоас, — пильскис Öльöшка. И вöрзис одзлань.

Нюрас эз вöв некытшöм туёк, только шочыника пантасьлiсö морт следдэз, но Öльöшка мунiс увереннöя. Кусттэз коласöт тыоккез бокöт сiя петкöтiс куимнаннысö паськыт ты дынö, повтöг пырис тинаö.

Дед бöрöн-бöрöн петитчис ылöжык, сувтiс, дзик кынмöм. А Öльöшка мунiс и мунiс одзлань, вылына лэбталiс коккесö.

И вот сiя пырис ваö. И только сэтöн старик вежöртiс, что мунö зонкаыс кытшöмкö тöдтöм туй кузя. Маласьöмöн пырис тожö тинаас, бедёкöн, кыдз слепöй, бытшкалiс одзсис васö. Коккез эзö вöйö. Коккез увтын вöлi мыйкö чорыт. «Да эстöн плашкот! — вежöртiс сiя. — Ваас кинкö лэдзöма плашкот»!

КÖР ЭТА ВÖЛI

Кöр эта вöлi? Важын ни, öддьöн важын. Тридцать годся унажык чулалiс сэксянь. Да, тридцать годся унажык. А дед Петрован памятьын быдöс öзйыштiс сэтшöм ятнöя, бытьтö быдöс эта вöлi совсем неважын — тöн или удерлун.

Быдöс пондöтчис сэксянь, кöр локтiс Перкоягö Краснöй Армияись том солдат-комсомолец Андрей Сальников. Локтiс сiя тöвнас, крещеннё панытö. Ветлöтыштiс лун-мöд деревня кузя, дивитiс йöзсö бур военнöй паськöмöн, виль хромовöй сапоггезöн, кузь руд шинельöн. Баитiс йöзыскöт олан йылiсь, висьтасис, кыдз служитiс армияас, кытшöм муэз адззылiс.

— Уна местаэзын вöлi, уна адззылi и бурсö и умöльсö. А татiсь кодь олансö некытiсь эг адззыв. Умöля тi олат. Сё эшö сiдз, кыдз Николка дырни мырсит да пессит. Сё эшö беднöйез богаттё вылö уджалöны, сё эшö лун и ой енлö кейматö, монастырьö туй талятö. Тьфу бы этö монастырьсö! Быдöс странаын важын ни нiйö разисö-каждiсö, а татöн кöть бы мый — тронгö! Вот уж действительно нюр пыдöсын оламö, лешаччöй местаын, сё бытьтö татöн Советскöй властьыс абу, сё эшö дзик пыд ой! Вот сiя, миян дикостьыс!

Солдат сьöласис лöгöн, видiс монаххесö сивöй мериннэзöн, а енсö, кöдалö уна веккез перкоягчи тэчисö поклоннэз, шуис кузь пилима чёртöн. Пемыт инькаэз только пернапасавлiсö кымöссэз, мужиккез полöмöн дзарьялiсö святöй ликкез вылö. «Господи, господи, öнi жö чарöтас!» Но ен некинöс эз чарöт, солдат сё вöлi ловья, сё ветлöтiс керкуись керкуö, «згальничайтiс», а чожа кывсис, что аслас пöрись мамлiсь, вдова Маремьяналiсь, петкöтöма святöй ликкесö öтöрö и жельдöма учöтик тороккез вылö.

— Но öнi чарöтас ни сiйö, антихристöс, — öтiк öмись шуисö енлö веритiсь перкоягчи.

А солдатöс и сэтöн эз чарöт. Ветлöтiс сiя деревняöт бодрöй, треситiс кудриэзöн, дзуркöтiс ременнезöн да виль хромовöй сапоггезöн.

— Умöля олат, добрöй отир, — баитiс сельчаналö. — Ошшез моз олат. Бытьтö революцияыс эз и вöв. Да-а... А вот йöзас олöны, да-а...

— А кыдз сэтчин олöны? — юасисö смелöйжыккес.

— Бура олöны. Йöзас колхоззэз организуйтiсö. Артеллез. Кывлiт, поди? Но дак вот. Сэтчин быдöс керöны öтлаын. Гöрöны, кöдзöны, урожай босьтöны. И некытшöм нужда оз тöдö.

Колхоззэз йылiсь Перкоягын кывлiсö ни. Часто вовлiсö районiсь уполномоченнöйез, висьтасисö, кыдз колö артавны виль олансö, тшöктiсö организуйтны колхоз. Перкоягскöй мужиккез только гыжьялiсö юрбöррез, мыйкö асмознаныс бобгисö ныр увтаныс, а колхозö пырны полiсö. «Вот видзöтам, кыдз йöзыс... вöлись, буди...»

Андрей Сальников кутчисис том йöз бердö. Чукöртiс нiйö аслас пустöй енугöла керкуö, кытшöмкö книгаэз лыддьöтiс, комсомолия йылiсь баитiс, кулаккезöс да поппезöс ёрдiс. Чожа томмес ячейка организуйтiсö, коммуна йылiсь ой и лун йöзыс коласын боньгисö.

— Вот и Вильгортын колхоз организуйтчис, и Важгортын тожö, а тiйö мый, мужиккез, думайтат? Сё важмоз овны мöдатö? — юасисö нiя.

— Быль, и Вильгортын, и Важгортын, Перкояг дынiсь медматiсь деревняэзын, колхоззэз пö керöмась. Ветлiсö Перкоягись сэтчин кынымкö мужичок, видзöтiсö быдöс, юасисö бытшöмика кыдз да мый — гленитчöма нылö: кокнитжык пö öтлаын уджавны.

А эта коста Перкоягöт ветлöтiсö монаххез, повзьöтлiсö йöзсö страшнöй судöн, ёрдiсö нiйö, кин колхозö тшöктö пырны.

— Колхоз — эта антихристлöн поз. Кин пырас колхозö, сылö öтiк туй — веськыта адö, — жевгисö нiя.

Андрей Сальников и монаххесö репöтiс.

— Ме тiянлö мыччала, пöрись ракаэзлö, ад! Ме тiянлiсь чожа чеглала борддэзнытö. Рикын важын примитiсö постановленнё — розоритны тiянлiсь зi познытö. Вот ужо...

Перкоягын и эта йылiсь важын кывсис. Быль, примитöмась пö сэтшöм постановленнё: быдöс монастырскöй добро конфискуйтны, быдöс пашня да угоддёэз сетны нылö, кин пырас колхозö.

Эта тöлö, тысяча девятьсот тридцать четвёртöй годся тöлö, Перкоягын шогмис колхоз. Пырисö перво беднöйез, сэсся середняккез, а вöлись — бытьтö нем эз и вöв — Пономарёв Гавриллöн зоныс, Пельтöм Селькоыс, заявленнё вайис, тожö колхозö корсис. Шумыс мымда вöлi! Сельколöн айыс горöтлiс мымда вын, вартлiс зонсö бедьöн, а мöдыт сёравно колхозö корсис. Андрей Сальников сувтлiс вöлi паныт, кулаккесö огö пö примитö, но посадiсь локтiс бумага: примитны, если морт корсис. [...] зоныс пондiс уджавны сы мельницаын: мельницаыс лоис колхознöй.

Тулыснас, кöр перкоягчи лöсьöтчисö петны кöдзны, öзйис колхознöй амбар. Быдöс кöдзыс сю сотчис биын-öгырын, öтiк тусёк эз кольччы. Быдöс сельсовет пасьта кывсис юöр: бандиттэз мыччисьöмась, ветлöтöны пö вöррезöт, петавлöны деревняэзö, сотöны колхознöй амбаррез, вийлöны активисттэзöс.

Андрей Сальников ветлiс районнöй посадö, вайис кынымкö винтовка, а чожа и милиционеррез локтiсö. Нiя организуйтiсö отряд, лöсьöтчисö пантавны бандиттэсö. И как раз сiя лунö, кöр мöдiсö конфискуйтны монастырьлiсь добросö, одз асывнас перкоягчи казялiсö монастырьыс весьтiсь ыджыт би югöр. Котöртiсö сэтчин, а ыджыт монастырь местын только головняэз ни шаитöны. Кин сотiс постройкаэсö? Этö некин эз тöд. Быдöс монаххез мунöмась кытчöкö, нельки след абу кольöмась.

— Но и мед мунöны вакрамеш, — шуис Сальников. — Нытöг сöстöмжык воздухыс лоас.

Колхозниккез öктiсö виль кöдзыс сю, мымдакö государство сетiс. Сев чулалiс бура, аскадö. Мужиккез уджалiсö дружнöя, пемытсянь пемытöдз, вежöртiсö — ас понда быдöс керöны. А сэтöн виль оказия. Öтiк асылö локтiсö нiя Сальников ордö, пырисö керкуас, медбы баитны, а сэтöн джодж шöрас кык покойник валяйтчöны: Андрейöс и мамсö бытшкалöмась штыккезöн, поткöтлöмась юррезнысö. Андрейлöн пышналöм морос вылö бандиттэз кольöмась записка: «Кин сувтас миян туй вылö, сылö — смерть».

Паймисö колхозниккез, оз тöдö, мый керны. Милиционеррез гöняйтiсö öтмöдöрöт, быдöс вöрсö сыналiсö, быд выскыр увтö дзарнитiсö, — некинлöн некытöн и след абу...

Уна быд берсяыс шогмис эта гожумö. Öшисö колхозлöн мöссэз, сотчисö колхознöй гунаэз, эшö кынымкö активист вöлiсö вийöмöсь. Милиционеррезлöн садь бырис, а кутны некинöс эз вермö. Бандиттэз вöлiсö дзик бордаöсь. И быдпырся нiя петавлiсö сэк, кöр милиционеррес вöлiсö мöдiк деревняын. Кинкö юöртлiс нылö эта йылiсь.

Öтпыр арнас ни Петрован ветлiс Монастырскöй ягö кульны симöт. Арнас симöтыс бура кыртö, кыдз и тулысöн. Уджалiс сiя дыр, эз и казяв, кыдз рыт сибалiс. Сэтчö жö зэрмис, лоис пемыт, кыдз гуын. Кватитiс Петрован симöт тупыллесö, и чожажык гортö. Локтiс сiя мельница дынöдз, казялiс: избушкаас биок дзуз видзö. «Вот и бур, шоччисьышта невна сэтöн, баитыштам Селькоыскöт», — решитiс Петрован. Сибöтчис избушкаыс öшынок дынö, дзарнитiс пытшкас да сiдз и тувдiс местаас: избушкаас пукалiсö тöдтöм отир. Пукалiсö мужиккез, и быд киын вöлiсö винтовкаэз. «Бандиттэз!» — вежöртiс Петрован и чепöссис котöртны деревнялань. А бöрсяняс кыдз рякöстас кинкö: «Стой!» И эз ешты Петрован туй вылас петны, кыдз бандит бузгис-лыйис пишались. Пуля лэбзис Петрован юр вевдöрöт. Кöбы ыджытжык вöлi мортыс, как раз бы юрас инмис. Чеччöвтiс сiя вöрас, давай кöч моз котöртны мымда вын. А бöрас эшö лыйисö пишались. Но, слава богу, бöра эз инмö. Избушкаыс дынын караул сулалöма.

Не кулöм не ловья локтiс сiя гортас, тревога лэбтiс. Да мый толкыс: деревняын öтiк милиционер абу, быдöнныс мунöмась кытчöкö мöдiк бандиттэз сьöрö. А бандиттэс сэтöн и вöлöмась. Пуксисö мужиккез вöввез вылö и гöнитiсö мельницаыс дынö, лэбтiсö ыджыт шум. Гöгöртiсö избушкасö, кынымиськö лыйисö öшынас.

— Сетчö ловйöн, а то сотам избушкасö! — чирзiсö пемытiнас.

— Мунiсö, мунiсö нiя, вирьюиссез! Ох, пышшисö, — шыасис ойзöмöн Селько. — Ох, ох!

Пырисö колхозниккез избушкаас, а сэтöн öтнас Селькоыс. Куйлiс сiя джоджас, вöлi кöрталöм жын-жын вожжиöн, вöрзьöтчыны оз вермы. Бандиттэз пизьдöмась сылiсь чужöмсö, не син не бан оз тыдав.

— Ох, ох! Чуть эз вийö, — ружтiс мельник. — Но и вартлiсö, мыля колхозас пыри. Айö пö тшöктöма.

— А кытчö мунiсö? — юасисö колхозниккез.

— Вöрас, вöрас кытöнкö. Нiя, сволоччез, люзь вамöмась. Косьтiсьны пыралiсö.

Гöгöртiсö Перкоягчи вöрсö, быдлаö карауллэз сувтöтiсö, асылöдз кошшисö. Сэтчö и милицейскöй отряд локтiс. Бöра быдöс вöрсö сыналiсö, быд выскыр увтö дзарнитiсö, а бандиттэзлöн некытöн и след абу.

— Да мый жö эта сэтшöмыс? — дивуйтчисö быдöнныс. — Нюр пыдöсас я мый я олöны.

— Не чёрттэз жö нiя.

Ветлiсö милиционеррез нюр дорас, кошшисö-керисö, кытчöдз öтiк милиционер эз инмы «öшынö». Но некинöс эз адззö. Только зыбун быдлаын быльск видзö. Сэтчö, батя, он пыр.

Арбыт гöняйтiсö милиционеррез монастырь дынöт, арбыт пукалiс Важ мельницаын засада, да сiдз некинöс эз и кутö. Бандиттэз дзик му пытшкö пырисö.

И вот только тридцать пять год бöртi вежöртана лоис быдöс: нюр сайын вöлöмась нiя. Селько нылöн вöлöм отсасисьöн. И вартлiсö Селькосö бандиттэз, колö думайтны, нарочно, медбы эз кватитчö милиционеррес, что сiя öтлаын гудыртö...

ÖЛЬÖШКА ПОНДIС БАИТНЫ

Плашкот вöлi паськыт, ён. Дед Петрован чуткалiс сiйö бедьöн и только юрнас гогинялiс: этшöм плашкот вылöт быдса полк строевöй шагöн мунас, а бандиттэз йылiсь и баитны нем. Нiя, натьтö, ой шöра ой ветлöтiсö эстi и некытшöм горе эз тöдö...

Öльöшка мунiс одзын, шагнялiс увереннöя. Тöдчис, ветлöтö сiя эта туй кузя не первуись. Сьöд торфянöй ва вöлi только вонясянöдз, зонка эз и сувтчывлы, чеччалiс веськыта. Дед Петрован да челядьыс бöра öдва вöтчисö сы сьöрын. Мый шогмис челядьыс сьöлöмын — и висьтавны оз позь. Дружоккезöс пöдтiс сэтшöм чувство, бытьтö нiя осьтiсö талун виль планета. И не только осьтiсö, но и ветлiсö сы вылö. А öнi вот локтöны ыджыт победаöн гортö...

— Деда... Деда... — шыасьлiсö то öтыс, то мöдыс.

Но дед мунiс чöлöмöн, нельки юрсö эз бергöтлы. Только сэк, кöр кончитчис плашкотыс и быдöнныс тальччисö зыбуна нятьö, дед шуис негорöн:

— Ужо, сыбöрын, сыбöрын баитыштам...

Зыбун, кытчö одзжык зонкаэз некöр бы эз лысьтö пырны, вöлi совсем не пыдын: кок увтын вöлi бöра мыйкö чорыт и терпитiс бы не только мортöс, но и вöлöс. Но тырмöмви вöлi керны бокö неосторожнöй шаг, кыдз дед кынöмви укнитiс дука нятьö. Öдва сiя петiс чорыт полоса вылö...

— Рака табун! — бобгыштiс старик. — Векнитикö туйсö керöмась... Натодиль, натьтö...

— Деда, кин сiйö керöма? — шыасис Виталько.

— Ужо, сыбöрын...

Но вот и дюттясяна ежа, вот и турун кок увтын. Туруныс вöлi нöитöм, тальöм, но некин бы эз шу, что ветлöтöмась морттэз. Эз тöдчы некытшöм свальнöй туй визь. Ветлöтöмась морттэс öддьöн осторожнöя.

Öльöшка гöгöртiс тшöк баддясник, муныштiс осокаöт, кöда быдмис веськыта ваас, и вöлись только петiс чорыт туй вылö. Петiсö нiя как раз сiя местаö, кытöн кöркö сулалöма монастырьыс. Эстöн öнi вöлi неыджыт шутём. И эстöн бöра Öльöшка дзарнитiс кöин моз öтмöдöрö, öшöтчис Петрован пола бердö:

— Деда! Кыдз жö сiдз? Деда? Эд ме клятва сетi, что кувтöдз йöз мортлö туйсö ог мыччав! Клятва!..

— Дугды, бöбöв, эн нёштöмась, — горöтчис дед. — Мунам чожжык сайласьöмöн деревняö. Сэтчин дзеба ме тэнö амбарö. Дедыт оз и тöдны понды, кытчö тэ воштiсин.

— А еныс?

— А сiйö ми — тьфу! Мыччалам сылö, пöрись чёртлö, шыш — вот и быдöс. Тэ думайтан, еныс мыйкö адззö? Нем сiя оз адззы, слепöй лоöм пöрисьувьяс.

Деревняö нiя мунiсö вöрöт, нельки куканнес дынö эз кежалö. Баняэз бöрöт локтiсö карчйöррез дынö, мышкыртчöмöн, дзик воррез, пырисö льöмпуэз увтö, йöр пöлöн кыссисö дедлöн оградаö.

— Но вот и быдöс, — шуис старик. — Öтiк син эз адззыв. Давай пыр сразу амбарö.

Öльöшка шысеттöг пырис амбарас, брякнитчис кыминь. Вöснитик пельпоннэс сылöн вöрисö. Öльöшка, тыдалö, горзiс.

— Адззылiт, мый шогмö чочком светас? — Ох-хо... — баитiс минута бöртi дед. — Интереснöй делоэз шогмöны. И давайте, дружоккез, чöлö кытчöдз. Некинлö эд лёбö нем. Сыбöрын вöлись баитыштам-керам. А часöт шоччисьö невночка и котöртö веськыта Вильгортö, сельсоветö. Висьталат Наган Наганычыслö, мед чожжык татчö локтö. Сiдз и висьталö Наган Наганычлö: дед Петрован важнöй делоöн корис. Давайте живо-два...

Мунiкас кежалö Панько отрубö, ытшкисиссез дынö. Корö мужиккесö гортö. Ась чожжык локтöны. Адззат, рыт ни сибалö, тэрмасьны колö. Живо-два...

Кöр челядь петiсö оградасис, дед Петрован кытсöвтiс Маняöс. Нывка ньöвьёсьöн петiс керкусис, гымнитiс посöдз ыбöсöн.

— Лöсьöт мыйкö сёйыштны. Ох и мыдзи ме талун. Кыдз пон...

Джын час бöртi Öльöшка пукалiс амбарын джек вылын и вырскис пым шыд, курччалiс небыт нянь. Сёйис зонка тэрмасьöмöн, дзик полiс, что мырддясö сёянсö и сiя бöра кольччас тшыгйöн. Дед Петрован пукалiс ордчöн, жалейтöмöн видзöтiс детинаыс вылö. Эка, кыдз сiя тшыгьялöма, беда...

— Тэ разь няньтöг нюр саяс олiн, а?

— Вöлi няньыс, да избушкаыс дынö коли. Первöй жö ояс коли, — висьталiс Öльöшка. — Водi турун вылö, куни синнэзöс, думайта. А сiя петiс вöрсис, локтiс ме дынö. Но ме и чеччöвтi котöртны...

— Кин петiс?

— А вöрисьыс! Пуэзся ыджытжык, паськыт пельпоннэза и — тоша.

— Но, но, висьтась. Да тэ сёй, сёй! Эн жалейт няньсö. И шыдсö паняв. Вот кольттез сёй. И йöлоксö, йöлоксö... Ю давай.

Öльöшка сёйис и юис, кынöмыс син одзын польдiс. Дедлöн ласковöй баснисянь сiя тöдчöмöн лöньсис, сё етшажык дзарьялiс кöин моз öтмöдöрö. Сiя сёйис и висьтасис:

— Мöйму дас кыным старуха вовлiсö могила вылас. Кык неделя юрбитiсö да святöй ваöн öтамöдöс коялiсö. Сэсся мунiсö. А чожа мыйись старичоккез локтiсö, кытшöмкö шогалiсь детинаэз. Öтiклöн кок ныррес бöрлань видзöтöны, мöдiклöн — горб спинаас кайöм. Бöра могилаыс дынын юрбитiсö кык неделя, святöй ваöн коясисö, пидзöссэз вылын кыскасисö, сё счастье да здоровье енлiсь корисö. И мунiсö бöр. А öтiк старик, кöсыник и чочком тоша, эз вермы муннытö, шогавны пондiс. Быдöс сiя пыктiс, лöзöтiс, не киöн не кокöн вöрзьöтны оз вермы. Но, дедö и шуис сылö: «Эн пов, святöй вон Еромей, быдöс арталам. Нуöта ме тэнö гортö, баняын пывсьöта, молитва лыддьöтам-керам, святöй ва юам, — и веськалан». Босьтiс дедö старичокыс юрöдзись котомка, сетiс меным. Сэсся лэбтiс стариксö киэзас и пондiс нöбöтны, кыдз кагаöс. Сiя нач ни жеб вöлi, сьöкыта лолалiс, но эшö вермис висьтавны дедöлö спасибо. Нöбöт, шуö, гортат, сувтöт менö кок йылö... И вот мунам. Одзас дедö оськалö, бöрас ме котомкасö нöбöта. Локтiм тыыс шöрö. Сэтöн дедö и уськöтiс стариксö ваас. «Мый, мыся, лоас?» — юалi ме. А дедö серöмтчис да шуö: «Душаыс сылöн сöстöм вöлi, югыт — райö лэбзяс. А коскаэс и эстöн сiсьмыны вермасö. Важын ни кад...» Петiм берегö, кусттэз коласö пырим. Сэтöн дедö и осьтiс стариклiсь котомкасö, кыскис кытшöмкö учöтик лик. «Святöй эта ликыс, цена сылö абу. Рисуйтöма богоматерьсö стариннöй знаменитöй мастер, а рамкаыс, адззан — чистöй золото», — шуис дедö. Но ме и вежöртi: нарочно уськöтiс стариксö ваас, ловйöн тинаö сюйыштiс. Ме думайта, эта старичокыс и петавлiс ме дынö ойезнас.

— Висьтась, висьтась...

— А таво кыкись унажык старухаэс локтiсö городiсь. Быдöнныс монашкаэз я мый я. Бöра юрбитны мöдiсö, святöй ваöн коясьны. Öтiк страшнöй старуха локтiс. Городскöй попыс вöрсис могиласö святöй ваöн киськавны сылö тшöктöма. Но и вот, юрбитiсö нiя быдса неделя. А сэтчö неважын эшö öтiк старуха локтiс, юöр вайис: вöрас пö антихристтэз локтöны, нюр сайö туй кошшöны.

— Этö изыскателлес? Кылi ни, зонка, кылi. Но висьтась... Öльöшка и кортöг висьтасис. Тыдалö, вежöртiс, что сайласьны сэсся нем, и баитiс тэрмасьöмöн, кыдз и сёйис:

— Попыс тшöктöма сайöвтны юрбитiссесö, петкöтны нюр сайсис да иньдыны гортаныс. Ась пö быдöс лоö шито-крыто. Мыйись-мый пырасö антихристтэс нюр саяс, дак нем оз казялö. Сэтчин, деда, землянкаэз пö эмöсь кытшöмкö урманын, а землянкаэзас — монастырьскöй добро куйлö. Дедö ойбыт баитiс старушкаыслö, что землянкаэсö и лешак оз адззы. Нiя гусьöн баитiсö, но ме кылi.

— А могилаас кин узьö? Не отец ли Исидор?

― Сiя пö. Кулöма коллективизацияыс вотöдз. Öнi могиласö святöйöн шуöны. А сы весьтын нельки и крест абу, только чашья да выскыр... Но и вот, петкöтiм ми дедöкöт старухаэсö, кыдз ягöдалiссезöс, иньдiм вöрас — мунö со Христом городö. А öтiк старуха, медстрашнöйыс, кöдалö тшöктöмась могиласö киськавны, бöра, кыдз и мöйму старичокыс, шогавны пондiс, не киöн не кокöн оз вöрзьöт: кынмалöма нюрас. Дедö водтöтiс сiйö избушкаö, кытшöмкö лекарство сетiс и висьталiс: «Петкöта тэнö, матушка-матка, ойнас гортö...» Да эз ешты петкöтнытö. Как раз рытнас локтiсö нiя, кöдна туйсö кошшöны. Сэк дедö и шуис: «Кежöта ме антихристтэсö бокö, урманö пырта, а тэ эта коста дзимляв святöй старухасö». А ме разь лысьта? Ме откажитчыны пондi. Ог, мыся, öтнам мун, кöть юр орöт.

— Сiдз, зонка, сiдз. И мый жö одзлань?

— А мый... Вартлiс дедö кулавлытöдз, вийны мöдiс. Кытчö воштiсян? Сiдз и этадз смерть.

— Тэ этö и мöдiн висьтавны, кöр рытнас пыралiн миянö?

— Мыйнö... Ме важын ни быдöс мöдi висьтавны, да эг лысьт. Эд неöтпыр святöй крест окалi...

— Мда... Неправильно тэ керин, колiс висьтавны. Видзöтан, быдöс бы делоыс мöднёж петiс. Дедтö важын бы кутiсö. Эх, Öльöшка, Öльöшка, кытчöдз тэнö вайöтöмась.

Дед öшöтiс юрсö, мыйкö дыр думайтiс. Öльöшка сёйис быдöс, мый вöлi одзас, пондiс витшыктыны. Сэсся öшöтiс тожö юрсö. Сылöн петiс, тыдалö, оныс.

Оградаын ветлöтiс Маня. Нылочкалö кулавлытöдз охота вöлi тöдны, кинкöт баитö амбарас дедыс, но эз лысьт сибöтчыны ыбöс дынас:

— Но и мый жö? Веськалiс, поди, святöйыс? — лэбтiс юрсö старик.

— Ог тöд. Кöр лöсьöтчи ме нюр саяс, дедö сетiс вот этö, — Öльöшка кыскис писис учöтик склянка, — и тшöктiс юктавны шогалiсьсö. А эстöн гуткулантшакись настойка, настоящöй яд. Ачым адззылi, кыдз дедö мöйму эшö керис... Юктав, шуö, старухасö, и сiя нюжöтас коккесö. Сэк вöлись, шуö, голясис орöт пернасö и котомкасö босьт да дзеб выскыр увтö. А асьсö, шуö, старухасö кыскы нюрö да сюйышт зыбунö...

— Вот кыдз! Этö мыйлö жö?

— Золотöй пö сылöн пернаыс... А котомкаас святöй крест. И тожö золотöй. Быдöс, шуö, эта миянлö дöнзяс. Медбогатöй йöз пö ми лоамö. Кöр, шуö, антихристтэслöн воляыс оз ло, сэк виль монастырь строитам, медглавнöйезöн сэтöн лоам. А ме эг пырав избушкаас старухаыс дынö. Некыдз эг вермы. Только локта, а сэтöн старикыс сулалö, сразу синнэз пемдыны пондöны. Ылöстöмсялi ме сэтчин, деда. Садь бырис.

— Ылöстöмсялан, пожалуй, — шуис дед. — Сэтöн кöть кин ылöстöмсялас. Эх, отир, отир! Тöдöм отец Исидор, кинöс кольны дозирайтны ассис добросö. Настоящöй бандитöс кольöм.

МЫЙ ЭШÖ ВИСЬТАЛIС ÖЛЬÖШКА

Дед Петрован вöлi пöрись морт, пöрись солдат. Сiя уна ни адззылiс аслас кузь векын, шедлiс, кыдз баитöны мукöддэс, не öтiк переплётö. И сiя, суровöй морт, кужис видзны чувствоэсö и асьсö «аслас киэзын», вермис öмавтöг кывзыны любöйöс и не мыччавны эта коста не возмущеннё, не дивуйтчöм. Пукалö и кывзö. И быдöс.

Но талун, кöр кылiс Öльöшкалiсь висьтасьöмсö, дед пондiс сiдз волнуйтчыны, что öдва пукалiс местаас. Сылö сё кажитчис, что шедiс кытшöмкö мöдiк мирö, и ёна полiс, что милиционер Наган Наганыч оз верит челядьыслö, оз лок кутны Пельтöм Селькоöс, и сiя, дед Петрован, сiдз и кольччас öтнас эта страшнöй невежöртана мирас. Дед öдва видзис асьсö, ассис чувствоэсö. И медбы успокоитчыны, сё тэрмöтiс и тэрмöтiс Öльöшкалiсь баснисö. А Öльöшкаыс кыным унажык висьтасис, сыным ёнажык вежсис: пондiс баитны увереннöйжыка, кокнитжыка, и синнэс югьялiсö не ни полöмöн.

— А поссö, поссö кин строитöма? — юалiс дед. Öльöшка и этö тöдiс.

— Монаххез керöмась. Мöйму узисö миянын странниккез, кык кöсыник старичок, нiя дыр баитiсö дедöкöт эта пос йылiсь. А ме куйлi гор вылын и кылi быдöс. Пöрöтöмась монаххес кыз лиственнез, йитöмась öтамöд бердö кытшöмкö «хитрöй замоккезöн» и лэдзöмась ваас козлаэз вылö. Не öтiк год уджалöмась, не öтiк монах вöйöма эта коста. Эшö революцияыс вотöдз керöмась, а пуэс öнöдз ёнöсь. Ва увтын и простöй пуыс пö оз сiсьмы, а лиственьыс и подавно.

— Этö ме тöда. Ачым тöда, зонка. Только некыдз ог вежöрт, мыйлö монаххеслö ковсис керны сэтшöм страшнöй уджсö? Эд тыыс не векнит, натьтö, джын верста лоас. Да и ты саяс тожö тина, зыбун. Сэтöн некокнит уджавнытö...

— Отец Исидор тшöктöма керны. Юрбитiсь йöзыслö сiя кытшöмкö чудо мöдöм мыччавны. Кыдз Христосыс пö море кузя, дзик кöсiнöт, Ерданьö ветлöм. Бöбöтны мöдöма йöзсö, медбы унажык локтiсö юрбитны монастыряс, чудосö видзöтны.

— От, от, варнак! От, шарлатан! — эз вермы видзсьыны старик. — Этö лоö сiдз: пырас отец Исидор ваас, мунас пос кузя и мыччалас юрбитiссеслö чудо: «...И ходил Христос, по морю, яко посуху». Кывлi сэтшöм баснисö. Но не варнак ли сiя!

— Но абу ештöм мыччавнытö, костiалöм революцияыс, — шуис Öльöшка. — А посыс сёравно пригодитчöма: быдöс монастырскöй добросö монаххес нöбöтöмась сы кузя нюр саяс и дзебöмась надёжнöй местаö.

— А асьныс, монаххес, бандиттэзöн лоисö. Этö тöда ме, зонка. И дедыт вераöн-правдаöн служитiс нылö, вир отирлiсь юис.

― Юис, натьтö. Ме думайта, и мамöс сiя вийис. Пыр эта йылiсь думайта. Нiя эд, мамö да дедö, абу лöсялöмась, пыр пö видчöмась, мыля менö вичкуöт кыскалöма дедö...

— Сiдз эта вöлi, сiдз. Эз лöсялö. Мамыт иродöн дедтö пыр шуис. А ми нем эг и вежöртö. Вермас лоны, что былись иродыс мамыт лов вылö кисö пуктiс. Поди, мамыт кытшöмкö тайна тöдiс и мöдiс висьтавны йöзыслö. От, варнак! Вермас лоны. А мийö олiм ордчöн сыкöт и нем эг тöдö. Вот эд кыдз делоыс аркмас... И тэ тожö бур. Тöдiн дедыт йылiсь и шы некинлö эн сет. Мыля?

— Вийис бы сразу. Дедö сiдз и шуис: висьталан кинлö — смерть. Эта пос йылiсь, шуö, тöдамö только ми, сэсся некин. Дедö и öння юрбитiссесö вуджöтлö нюр саяс только пемыт ойезö, медбы не мыччавны, кытöн посыс. И бöр петкöтö тожö только ойезнас, кöр юрбитiссес окаласö святöй лик и сетасö страшнöй клятва некинлö не висьтавны. Локтасö юрбитiссес монастырскöй ягö кыдз ягöдалiссез, пантасясö дедöкöт, сетасö уна деньга, и сiя нуöтö нiйö могилаыс дынö, А «ягöдалiссесö», — нiйö дедö мошшезöн шуö, — городiсь поп татчö иньдö. И не быдöнöс, а только кöдна надёжнöйöсь, пöрись монашкаэзöс да мый да.

Öльöшка чöлiс невна, шоччисьыштiс.

— И этö поссö дедö ен туйöн шуö. Сiя, шуö, вердö-юкталö миянöс, сiя богатство сетö. Эд нюр саяс куйлö монастырскöй добро, куйлö, натьтö, и золото. Сэтчин жö табуннэзöн ветлöтöны лоссез, поздiсьö пöтка. Быд арö, кöр кынтас, дедö вийö дас кыным лосьöс, уна быдкодь зверьöс. И быдöс вузалö кытшöмкö тöдсаэз пыр городö да леспромхозовскöй столовöйезö. Тöвнас лоссесö сiя турунöн бöбöтлö. Ытшкас гожумнас, солалас турунсö, сэтчö и велалöны лоссес. И мачуркаэз сэтчин неетша. Монаххес эшö кольöмась. И деньгаыс дедöлöн тыр мешöк ни, натьтö. Пыр меным шуö: отсась меным, ло ме кодь жö. Кöр, шуö, кула, дак быдöс тэныт дöнзяс. И ен туйыс тожö... А висьталан кинлö — смерть!

— Сiдз, зонка, сiдз. Вийис бы, пожалуй. Но öнi... Öнi джендöтасö сылiсь киэсö. Вот локтас Наган Наганыч...

Дед Петрован водтöтiс Öльöшкаöс тулуп увтö, тшöктiс невна узьыштны. Öльöшка водiс мугтöг. Висьталiс быдöс и лöньсис. Бытьтö сьöкыт из пельпоннэз вылiсь чапкис.

ТРЕВОГА! ТРЕВОГА!

Эшö сэк, кöр петiсö нюрсис, Серёжка казялiс, что сы сьöлöмын пондiс шогмыны мыйкö неладно. Кытшöмкö гаг, лэчыт, кыдз пыжьян, пырис сы моросö. И давай жö виклясьны да чуткасьны, давай жö сöскыны вир.

Серёжка кыдз вермис, сiдз и öлiс гагсö, грöзитчис тальны сiйö кок увтын, кыдз гадöс, а сiя чуткасис сё ёнжыка и ёнжыка. Перво сьöлöмас чуткасис, а сэсся и юрвемö чепöссис. И давай буравитны, мöртчыны самöй юр пыдöсö. Истово напарья. Серёжкалö вдруг пондiс кажитчыны, бытьтö сылiсь мыйкö гусялiсö. Перво кажитчис, что гусялiсö невночка, а сыбöрын пондiс кажитчыны, что гусялiсö öддьöн уна. И кин гусялiс? Виталько!

Да, Виталько. Самöй сiя, кöдö босьтiс сьöрас Пыдöстöм нюр сайö.

«Мыйлö ме сiйö босьтi? — юасис ассис Серёжка. — Мыйлö? Вот эшö пондас боньгыны быдлаын, что быдöс керис сiя öтнас. И сылö веритасö. Конечно, веритасö. Виталькоöс самохвалöн некин эз шу, а менö Порсев Васька размöд шуис. И кöр висьтала, что Пыдöстöм нюр сайö первöйыс лöсьöтчи ме, сiя бöра шуас самохвалöн. А Витальколö веритасö».

Эх, да кыдз жö этö Серёжка одзжык эз вежöрт! Вот юртöм! Вермис бы гымгыны Витальколö горбас и мунны нюр саяс öтнас. Дасiсь бы буржык вöлi. И быдöс славаыс öтнаслö дöнзис бы. Сэк бы вöлись... Ух, тэ!

Сiдз думайтiс Серёжка. А Виталько, тыдалö, нем эз думайт. Сiя котöртiс и котöртiс туёк кузя, тэрмасис Панько отрубö. Серёжка, кöда прокод любитiс котрасьны одзын, часöт аслас гаг увья öдва-öдва вермис вöтчыны Виталькоыс сьöрö. Охота вöлi кутны сiйö моросöт, трекнитны бытшöмика, мыля вöтчис нюрас сы сьöрö, клёнгыны сивилёнас, медбы юрас музыка орсiс.

И клёнгис бы, кöбы не дед Петрованлöн важнöй заданнё. Заданнё вöлi, конечно, важнöй, и сiйö колiс тыртны.

Мый бы эз вöв, а колiс тыртны.

И Серёжка тышкасьны эз понды. Сiя тожö котöртiс.

Панько отрубöдз локтiсö öддьöн чожа. Чожа адззисö бригадирöс, Пиля Степанöс, и öтамöдöс одзалöмöн висьталiсö сылö, кытшöм зi поз адззисö талун Пыдöстöм нюр сайись. И, конечно, ылалiсö баснинаныс, нельки эз и казялö, кыдз пондiсö чукöртчыны ытшкисиссез. Перво локтiс Витальколöн айыс, сэсся Серёжалöн мамыс, а ны бöрын и мöдiккез.

— Тэ мый татiсь кошшан, а? — кылiс Серёжка мамыслiсь голос. — Бöра тöв чужьялан?

— Ужо, чöв, кума, — öмалiс сiйö Пиля Степан. — Угланнэс... этö... Дело баитöны. Ноко, ноко, мый жö одзлань? — бергöтчис сiя челядьыс дынö.

— Но, мунам ми вöрöттяс, а сэтöн зород бокын Öльöшка узьö, — шуис Виталько.

— Сiя дзормöма, дядь. Кыдз старик лоöм, — одзалiс ёртсö Серёжа.

Сэтöн вöлись казялiс сiя, что уна ни öксьöма отирыс, и пондасö кö быдöнныс юасьны, кыдз да мый вöлi, неетша кадыс öшас. А дед Петрован строгöя закажитiс, медбы живо-два арталiсö делосö.

— Дядя Степан, чожа колö. Дед Петрован корис. А мийö эшö милиционер дынö котрасям. Ми чожа.

Бригадир тшöктiс кынымкö мужиклö верзьöмöн гöнитны гортö, а ачыс уськöтчис мотоцикл дынö.

— Пуксьö бöрам кыкнанныт. Чожжык! — шуис зоночкаэзлö.

Инькаэз сулалiсö зород дынын и сярзисö öтамöдкöт.

— Мый пö, мый, кума?

— Вот тай висьталiсö: Пыдöстöм нюр сайö пö ветлöмась, а сэтчин Öльöшка...

— Ох, ох, сусхристос... Да быдöс я ладно?

— Поди, лешакыс öнджа керис да?

Но зонкаэз этö эзö ни кылö. Нiя вожасисö седло вылö, бригадир — раз, раз, раз! — нырыштiс кокнас кöрток, и моторыс öдззис шовкöтны сэтшöм горöн, что нем эз понды кывны. Бригадир петкöтiс мотоциклсö туёк вылö, содтiс газ, и чудеснöй машина, кыдз бура вердöм вöв, сiдз и нетшкöвтчис-тарöвтчис веськыта Вильгортö.

Эх, адззылiс бы öнi Виталькоöс Маня Онянова, натьтö, öмсö бы осьтiс. Ого! А Серёжка думайтiс мамыс йылiсь. Тöв пö чужьялан! Кыдз бы не сiдз. Ачыс бригадир мотоциклöн гöняйтöтö! Öнi вунöтан, небось, картовыт йылiсь.

Счастливöйöсь вöлiсö кык ёрт, öддьöн счастливöйöсь. Только Наган Наганыч невна повзьöтыштлiс. Шутка разь тiянлö — милиционер сiя. Кыдз эшö панталас, мый шуас? Вильгортскöй сельсоветын быд умöлик морток узьö и вöтасьö этö милиционерсö. Шедан сы киö, дак он ни мезмы. Не весь жö — Наган Наганыч.

Важын ни Иван Иваныч Петухов локтiс районнöй посадiсь Вильгортö участковöйöн. Вöлi сэк сiя томыник, кокнит походкаа, мича чужöмбана. Кытчö бы эз пет, а сьöрас сёравно наган босьтö. Вильгортскöй сельсоветын часто баитлiсö пышшалiссез йылiсь, воррез йылiсь — нагантöг милиционерлö некыдз оз позь.

Öтпыр Иван Иваныч кутöм кытшöмкö код хулиганöс, вайöтöма сельсоветö. Хулиган давай кулаккезöн öвтчыны, а милиционер и мыччалöм сылö ныр увтас нагансö.

— Этö адззылiн, эн? Тöдан, мый эта сэтшöмыс? Эта наган. Вежöртiн?

Хулиган сразу лэдзас кулаккесö. А милиционер тшöктас сылö пуксьыны пызан сайö, одзас пуктас бумага лист, киас сюйыштас карандаш.

— Давай гиж! Да чожжык, мый сунасян? Гиж: на-ган. Гижин? А часöт лыддьöт одзсянь и бöрсянь. Мый петiс? А? Вежöртiн, кытшöм хитрöй штукаыс? И бöрсянь и одзсянь — сёравно наган. А тэ кулаккезöн öвтчан, стыдтöм!

Сэтöн не только хулиганыс осьтöма öмсö, но быдöн, кин сельсоветас вöлöм. Кыдз жö сiдз? Лыддьöтан одзсянь — наган, бöрсянь лыддьöтан — бöра наган. Быль, хитрöй штукаыс. Тыдалö, уважайтны сiйö колö. И медбы уважайтны, пондöмась Иван Иванычлiсь хитрöй оружиесö шуны Наган Наганычöн. И öнöдз сiдз шуöны, кöть милиционер почти прокод нагантöг ветлöтö. И некин оз тöд, кинöс сiдз величайтöны: то ли оружиесö, то ли хозяинсö сылiсь. Мый шогмас кытöн, дак сё шуöны: корö Наган Наганычöс.

Вот кытшöм вöлi эта милиционерыс!

Мöйму Виталько, Серёжа да эшö кынымкö зоночка пондывлiсö мунны колхознöй карчйöрö гусявны огуреццез, но аскадö усис тöдвыланыс Наган Наганыч, и джын туй вывсянь бертiсö бöр гортö.

Интересно, кыдз сiя панталас талун?

Милиционер панталiс нiйö бура. Пукалiс сiя посöдзын и как раз весöтiс нагансö, зыртiс сiйö кытшöмкö трепичокöн. Бригадир жмитiс сылiсь кисö, мыйкö шушкыштiс пель одзас. Милиционер, паськыт уссэза, паськыт мороса богатырь, сiдз и чеччöвтiс кок йылö, горöтiс иньыслö керкуö:

— Наталья! Ремень кобураöн петкöт! Да кылiн тэ, эн?..

Натьтö, и минута эз чулав, а Иван Иваныч Петухов ештiс ни ременясьны, пуктiс Наган Наганычöс кучиковöй кобураö, заводитiс мотоцикл.

— Эй, герой! — шуис Витальколö. — Пуксьö бöрам!

Но вот и пондöтчö ни! Кыдз думайтiс Серёжка, сiдз сiя и петö. Виталькоöс шуисö ни геройöн, а сiйö эшö некин эз шу. Эх! Кыдз этö терпитнытö! Не, колö мыйкö керны...

Сьöкыт вöлi Серёжкалö. Öддьöн сьöкыт. Нельки вунöтлiс минута кежö, кытшöм нiя подвиг керисö.

А Виталько вöлi радся-рад. Сiя, кыдз ур, чеччöвтiс милицейскöй мотоцикл вылö, лякасис седло бердас, дугдывтöг шыннялiс.

Но вот кыкнан машина петiсö туйö. Нiя лэбзисö, кыдз пуляэз, тöвчикöн локтiсö Перкоягö. Дас верста мымда вöлi Вильгортсянь татчöдз, а туяс, натьтö, и вит минута эз чулав. Нiя шакардаöн, ыджыт шумöн чывкнитiсö дед Петрованлöн ворота дынö. А сэтöн видзчисьöны ни мужиккез, бабка Аграфена котрасьö, дед Петрован места оз адззы. И мый главнöйыс, Маня Онянова сэтöн жö. Кыдз и думайтiс Виталько, сiдз сiя и эм: Маня осьтöма öмсö!

Мед öнi дивуйтчö, ась трусыс вылö видзöтö!..

БЫДÖС ЛОАС БУР

Мужиккес пырисö керкуö, мыйкö сёрнитiсö сэтчин. Наган Наганыч тшöктiс саймöтны Öльöшкаöс, кöда, кыдз вийöм, узис тулуп увтас. Дед Петрован полiс, что детина бöра пондас мугны, бöра шардас. Но Öльöшка саймис чожа, невна тулис синнэсö и юалiс деловитöя:

— Локтiс ни милиционерыс?

— Локтiс, локтiс, дитя. Тэ эн пов сыись. Сiя добрöй,— ласковöя баитiс старик. — Тэ висьтав сылö быдöс. Кылiн? Быдöс висьтав. Сэк дедтö живо-два кутасö.

— Быдöс висьтала. Тырмас сiйö терпитны, — шуис Öльöшка и решительнöя пырис керкуö. Невна и узьöм зонкаыт, а вежсьöма ёна: эз ни дрöжит, кыдз ва вылын шать, эз пильскы.

Кытчöдз милиционерыс да колхозниккес сёрнитiсö керкуас, Серёжка да Виталько тожö сёрнитiсö. Не, нiя не сёрнитiсö, а споритiсö. И пондöтiс спорсö, конечно, Серёжа.

— Тэ мый сэтшöм рад, небоись звезда я мый я судзöтiн? — юалiс Серёжа.

— Звезда? Мыйлö меным сiя, звездаыс?

— Мыйлö! Тöда ме тэнö. Небось öдззан öнi боньгыны челядьыслö: «Ме да ме. Ме первöйыс висьталi, что Пельтöм Селькоыс да старухаыс нечестнöй морттэз. Ме первöйыс висьталi, что колö ветлыны нюр саяс...»

Виталько, вежöртана, сразу казялiс, кытчö кöстö дружокыс. Казялiс и шуис кыдзкö тешитчöмöн:

— Эн пов. Ме некинлö нем ог висьтав.

— Он. Тöда ме тэнö. Ноко сет честнöй кыв!

— Мыйлö честнöй кывсö? Раз горöтчи — ог висьтав, значит, ог. Эн пов. Менам тожö характер эм!

Кöть веритö, кöть эдö, а Виталько сiдз и шлёпнитiс-шуис: «Менам тожö характер эм!»

И кöр сiя шлёпнитiс этадз, сразу казялiс: быль, сылöн тожö характер эм. И сылö лоис сэтшöм кокнит да долыт! Виталько шыннялiс.

Серёжка буравитiс сiйö синнэзöн. Перво эз мöд буравитнытö. И споритны эз мöд, да кытчö воштiсян? Гаг вермис зонкасö. И сылö вöлi умöль.

И эшö умöльжык лоис, кöр локтiс ны дынö Маня Онянова . да висьталiс:

— Серёжа, ме миськалi тэнчит пестертö. Нятьыс сэтöн вöлi быдса пуд. И эшö тöдан мый адззи нятьсис? Трубка! Тэ мый, куритан я мый я?

Серёжка гöрдöтiс, сiдз и пыкнитiс, кыдз мак, но шы эз сет. Сэк Маня юалiс Витальколiсь:

— Сiя куритö трубка?

— Вот эшö! Кыдз позьö куритны? Не, Серёжкаыс оз курит. Сiя адззис этö трубкасö нюр сайись. Кинкö öштöма.

— Басöк трубкаыс. Öддьöн симпатичнöй чёртокыс. На, Серёжа, видз кыдз память. Ме сiйö тожö миськалi.

Маня сетiс Серёжкалö волшебнöй трубкасö. Серёжка чожжыка сюйыштiс сiйö карманас. Кин тöдö, может, эшö пригодитчас...

Серёжка гöрдöтыштiс, лöгöнмоз дзарнитiс Манялань, но нем эз шу. А Манялö стрась охота вöлi баитны, охота вöлi тöдны, мый зонкаэс адззылiсö нюр саяс.

— Мыля менö колит? Ме бы тожö ветлi, — шуис сiя. Виталько сiдз и барöтiс синнэсö, а Серёжка осудитöмöн гогинялыштiс юрнас, дзик висьталiс: но и но.

— Тэ — нюр сайö? — юалiс Виталько. — Кашасö етша сёйин.

Дзуркнитiс-оссис ыбöс, и посöдзö петiсö мужиккес. Перво Наган Наганыч, а сыбöрын и остальнöйес.

— Враг эм враг. Сыкöт колö пессьыны решительнöя и смелöя, — баитiс Наган Наганыч. — Мымда ни сiя бöбöтлiс менö. А старухасö, старухасö... кыдз ми сiйö лэдзим! Эх, кутны бы срамöс да юавны, кин сiйö татчö иньдiс.

Милиционер вöлi строгöй. Синнэс сiдз и койисö бичироккез, чужöм вылас везъясьöм решимость. Не шутейнöй делоыс. Пыр учöтик воррезкöт да хулиганнэзкöт только и воюйтiс, а сэтöн — настоящöй враг, пöрись бандит Пельтöм Селько. Куш киэзöн сiйö он кут.

Наган Наганыч пыртiс мотоциклсö оградаö, мужиккез лэдзисö вöввезнысö йирсьыны. Мунны решитiсö подöн, медбы не лэбтыны вöрас лишньöй шум.

— Но, Алёша, мыччав туйсö, — корис Наган Наганыч. Öльöшка петiс одзö, смелöя иньдöтчис вöрлань.

— Ме тiянкöт немись ог пов, — шуис сiя. Мужиккез шагньöвтiсö сы сьöрö.

— А ми? — повзис Виталько. — Кольöны я мый я?

— Кольöны миянöс, челядь. Мыдзит пö тi, шоччисьö, — шуис Петрован дед. — Тi эшö учöтöсь, ме пöрисьми ни, а врагыс — страшнöй. Озö миянöс босьтö боевöй заданнё вылö. А кöркö... Эх, кöркö медодзын ме гöняйтлi. Нö да ладно, — гажтöма кончитiс дед.

Вот тэныт и на! Да кыдз жö сiдз?

Витальколöн öбидасянь петiсö синваэз, вöрисö тырппес. И если бы эз вöв ны дынын Маня Онянова, натьтö, öдззис бы сыркьялöмöн горзыны. Но Маня сулалiс сэтöн, и Виталько видзсис. Эз понды горзыны и Серёжка. Мöднёж, сiя, кажитчö, нельки радмис. Нельки шынньöвтiс кыдзкö страннöя. И Виталько вежöртiс, что сы юрö пырис кытшöмкö виль «идея». Интересно, мый сiя мöдö керны?

Локтiсö видз вывсянь инькаэз. Чожа локтiсö мöссэз. Перкояг деревня сразу жö тырис парнöй йöв дукöн. Мöссэз горöн баксiсö, тшöктiсö чожжык высьтыны. А инькаэз дзик вунöтiсö ны йылiсь. Быдöнныс чукöртчисö Петрован дынö, дугдывтöг юасисö:

— Мый шогмис, мый?

— Сусхристос, быдöс я ладно?

— Быдöс ладно. Öнi быдöс ладно лоас. Кутасö Пельтöм Селькоöс, этö пöрись кöинöс — вот и бур лоас, — тошсö волькöтiкö, негорöн висьталiс дед Петрован.

Старик дженытика юöртiс быдöс, мый адззылiсö вöрас и нюрас. Инькаэз клопöтiсö боккезнысö, дивуйтчöмöн дзарьялiсö öтамöд вылö.

— Сiдзкö, Селькоыс бандит вöлöм?

— Ох, ох!

— Бандит сiя вöлöм. И хитрöй, сотана. Кузь век олiс миянкöт ордчöн, а мийö эг и кватитчö. Не весь баитöны: хитрöйыс и песокись гез кыяс, — висьталiс Петрован. — Но öнi кутасö сiйö и быдöс лоас бур.

Локтiс кысянькö Серёжкалöн мамыс, кватитiс зонсö киöттяс и, кыдз баитöны миянын, бордпавкйöн кыскис гортас. Аграфена баб варыш моз уськöтчис Виталько вылö и тожö нуöтiс гортас.

А инькаэз дыр эшö эз рознитчö, дыр эз водö узьны. Не öтiк хозяйка талун вунöтiс высьтыны мöссö. Кöть вöлi пемыт ни, кöть дед Петрован лэдзчис ни Важ мельница сайö дозирайтны куканнесö, а нiя сё дивуйтчисö, горöн обсуждайтiсö кылöм вильторсö, нёштöма видiсö Селькоöс. Кöбы кутiсö öнi Селькосö, дак, натьтö, сразу жö кучиксö кулисö бы.

— Да кытöн сiя, вирьюись? Кытчö юрсö пиньöвтiс? Эд сiя, кöин, вермас вийны изыскателлесö?

— Ох, ох, то тай эшö мый!

СТАРУХА ШЕДIС

Виталько эта ойö узис öддьöн умöля. Почти ойшöрöдз сiйö маитiс ыджыт öбида, мыля мужиккес эз босьтö сьöраныс, а кöр тэнö маитö ыджыт öбида, сэк верман разь бура узьны? Некöр он вермы. Только кунян синнэтö, только пондан вунöтчыны, а сэтöн усяс бöра тöдвылö öбидаыс — и прощай он.

Ойшöрöдз маитчис Виталько. Зато асыв ладорас сыбурна онмöссис, что эз и кыв, кыдз мамыс мунiс уджавны, а бабыс вашöтiс поскотинаö мöс.

Саймöтiс Виталькоöс талун Маня Онянова. Сiя минута-мöд бергöтлiс зонкасö бокись бок вылö, горöтлiс пель одзас, а толкыс нем эз вöв. Виталько узис дзик садьтöм. Только сэк, кöр Маня зубыта чепöльтiс Витальколiсь пельсö, зонка осьтiс синнэз. А кöр осьтiс синнэсö да казялiс, что саймöтö сiйö не бабыс, а Маня Онянова, сiя, кыдз шардöм, чеччöвтiс ольпасись.

— Мый лоис?!

— Вот и мый! Узян, бытьтö кольмöм. А узьны часöт оз ков, — перыта, медбы Виталько эз ешты лöгасьны, пондiс баитны Маня. — Сэтöн сэтшöм делоэз, а сiя узьö.

— Кытшöм делоэз?

— Петкöтöмась ойнас нюр сайсис старухасö и кыскöмась посадö. Сiя кулöм ни вöлöма. Мамö баитiс тэнат бабкöт, а ме кылi этö. И тöдан эшö мый? Тэ, Виталько, кывзы. Ме только часöт кокошника старухасö адззылi...

— Да тэ мый!

— Былись адззылi. Лэдзчи логас вала, а сiя Селькоыс баня дынын сулалö. Кöр казялiс менö, дак сразу шыркнитiс баняас. Мый сiя сэтчин керö?

— Мунам Серёжка дынö! — решительнöя шуис Виталько. Сылöн чужис ни дума: мый бы эз вöв, а кутны этö старухасö. Эд милиционер Наган Наганыч сiдз и шуис, что колö кутны сiйö. А öтнат кутан разь? Колö Серёжкакöт. Сiя смелöй, сыкöт позяс. Но Маня висьталiс:

— Абу Серёжкаыс. Ме ветлi сы ордö, а ыбöс выланыс замок. Кайлi сараяныс, и сэтчин Серёжкаыс абу. Тыдалö, мамыс сьöрас сiйö нуöтöма...

Виталько паймис. Сiя эз и тöд, мый керны. Мунiс кö Серёжкаыс видз вылö, то тöдтöм старухаöс он ни кут. Эх!

— Тэ, Виталько, думайт. Колö думайтны, мый керны одзлань. Эд деревняас часöт некин абу. Некин миян понда думайтны оз понды.

Виталько думайтiс. Сiя думайтiс минута, сыбöрын мöдiкö и вöлись шуис:

— Мунам баняыс дынö. Пондам вöджжыны.

Кыдз и баитiс Маняыс, деревня талун вöлi пустöй. Кöть шондiыс только ештöм калькавны пу йыввез бердiсь, а инькаэз мунöмась ни ытшкисьны, мужиккез сё эшö абу локтöмась вöрсис. Нельки пöрись старухаэз гортын эзö вöлö. Нiя вашöтöмась мöссэзнысö поскотина вылö и абу локтöмась гортö: полöны кольны подасö дозирайттöг, — медбы Пельтöм Селько лöгувьяс эз кер нем умöльсö.

Маня и Виталько шупыта котöртiсö лог дорö, полöмöн видзöтiсö Сельколöн пöлiньтчöм баня вылö. Старуха некытöн эз тыдав.

— Поди, пышшис ни кытчöкö да, — шуис Виталько.

— Кин тöдö. Поди и пышшис, — горöтчис паныт Маня. — Сiя, кöр казялiс менö, дак шыр моз чуйнитiс баняас.

Кокчуннез вылын кыкнанныс локтiсö баняыс дынö, кывзiсисö. Нырö вачкис сiсь корось дук, тшын да ульсöт сора ру. Пеллез эзö кылö нем.

И сэк Виталько гусьöник пырис передникас. Эстöн сiя сразу жö казялiс, что Селько игнавлöма банясö замок вылö: косяк бердас дорöма крепыт пробой, а ыбöс бердас клямка. Талун баняыс вöлi осьта. Передникас валяйтчисö кöс пессэз, кыдзовöй зор, быдкодь ёг. Виталько босьтiс зорсö. Невна думайтiс-керис и тэрмасьöмöн пыкöталiс ыбöссö. Ежели старухаыс баняас, то и пукав öнi сэтчин, кытчöдз милиционер оз лок!

Старуха вöлöма баняас.

Да, сiя вöлi сэтчин!

Кöр кылiс передниксис шыэсö, сiя сэк жö чирöстiс: оте-те-тёть! — и юалiс повзьöм голосöн:

— Öльöшка, этö тэ?

Виталько шысеттöг чывкнитiс öтöрö, висьталiс Манялö:

— Öнi оз мезмы! Ме пыкöталi ыбöссö.

— Тэ ёна пыкöталiн?

— Висьталi — оз мезмы!

Витальколöн синнэс югьялiсö, быдöс чужöмыс шыннялiс. Зонка вöлi радся-рад. Эшö бы! Маня дырни сэтшöм дело керис. Ась öнi шуö труснас, ась! Жаль только, Серёжка нем эз адззыв. Эх, мыйлö сiйö мамыс видз вылас нуöтiс? Кыкöн бы кытшöм бур вöлi.

— Виталько, кытшöм тэ решительнöй. Ме эг и думайт! — шуис Маня.

Зонка толька öвтыштiс кинас:

— Оз ков! Тэ лучше вот мый... Тэ, Маня, лучше дозирайт банясö, пукав эстöн. А ме тöвчикöн ветла мельницаыс сайö, кора кинöскö.

Маня киöн и кокöн öдззис пыксьыны:

— Виталько, да тэ мый! Виталько, сiдз оз ков керны. Ме öтнам ог вермы кольччыны. Давай кыкöн. Чожа, поди, локтасö.

— Висьталiсö тэныт — дозирайт! Вот и быдöс, — чорыта шуис Виталько.

Но Манялö и кывджын эз тöр. Мый сэтöн керны?

Керны вöлi нем. Он жö понды тышкасьны эта нывкакöт. Пожалуй, пышшас эшö гортас. Сэк дозирайт банясö öтнат.

— Тэ думайт, Виталько. Может, мыйкö и пырас юрат, — баитiс Маня.

— Думайт! Думайт кöть эн — сёравно сымда. Мый вермас юрö пырны?

И быль, натьтö, нем бы эз пыр Виталько юрö, кöбы не движок. Кöбы не сiя движокыс, кöда качайтö колхознöй парниккез дынö ва. Эта движок вдруг пондiс горöн шовкöтны, и Виталько юрö сразу пырис буртор. Сылö усис тöдвылас карчвöдитiсь Öльöксан.

— Маня, — горöтчис Виталько, — котöрт парниккес дынö, кор Öльöксан дядьсö. Сiя отсалас миянлö.

Маня мымда прок чепöссис котöртны.

И, натьтö, дас минута эз чулав, кыдз локтiс бöр. И не öтнас, а Öльöксанкöт.

— Йöртiт? Баняö йöртiт?! — юасис сiя. — Ах, молодеццез, ах горадзуллез. Тэ, Виталько, обязательно геройöн лоан. Тэ лоан настоящöй разведчикöн. Вежöртiн? И тэ, Манюш, геройöн лоан.

Эна кыввез бöрын Öльöксан летыштiс ыбöссö, пырис баняö. Пырисö сэтчö и челядьыс.

Старуха пластöн куйлiс джоджын. Киэсö сiя тэчöм кынöм вылас, синнэс кылалöмась, öмсис петiс быг.

— Кулöм я мый я? — повзьыштiс Öльöксан.

Сiя мышкыртчис старухаыс весьтö, кутiс сылiсь кисö.

— Не, ловья. Сьöлöмыс токöтö. Тыдалö, кудоба зэвтöма. Но, ужо, эм менам гортын лекарство. Ловзьöтам.

Баняын вöлi пемыт, но Витальколöн лэчыт синнэс сёжö казялiсö полок вылiсь ыджыт пестер.

— Мый сэтöн?

Öльöксан осьтiс пестерсö, пыркöтiс сiйö. Пестерись джоджö усялiсö... ликкез. Вöлiсö нiя пуовöйöсь, кöртовöйöсь, сьöдöсь, лöзöсь, ыджытöсь и учöтöсь. И эшö усисö джоджö пернаэз, кытшöмкö чунькытшшез. «Вон сiя, кöс тшакыс! Вон öреххес!» — вежöртiс Виталько.

— Тьфу, сякöй срамсö мымда öктöм! — дивуйтчис Öльöксан. — Тыдалö, монастырскöй добросö кытчöкö невнаöн кыскалö. Тi вот мый, дружоккез. Мунö öнi жö Важ мельница сайö, висьталö мужиккеслö, кинöс кутiм. Котöртö чожжык. А ме сiйö часöт жö ловзьöта и йöрта, кытчö колö. Эд полö, менам киэзiсь сiя оз мезмы.

Челядь этö тöдiсö. Кин шедас Öльöксан киэзö, дак оз ни мезмы. Да, челядь этö тöдiсö.

Маня и Виталько петiсö туйö, öдззисö котöртны Важ мельница сайö.

Вöрын, кыдз пыр овлö гожся асылö, мыйкö кышöтiс, меднöй пожуммез коласöт кöвьясис сир дука мароса, шондi югöр увтын пежьялiсö паськыт кöз лыссэз. Гажа гожумся асыв. И вдруг...

БÖРА ВАЖ МЕЛЬНИЦА САЙЫН

И вдруг, как раз сiя кадö, кöр челядьыс локтiсö поскотина дынö, Пыдöстöм нюр саяс кинкö кожгис-лыйис пишались. Ыджыт говк валлэзöн локтiс татчöдз, вöрзьöтiс бадь листтэз и пу йыввез вылöт тарöвтчис кытчöкö ылöжык. Маня сидз и чирöстiс: «Деда-а!» Нiя эшö перытжыка чеччалiсö избушкалань, котöртiсö веськыта, туёктöг.

Осьта ыбöса избушка дынын сулалiс дед Петрован. Сiя вöлi пашмöм юрсиа, гынмöм тошока. Старик сiдз видзöтiс нюр саяс, что эз и казяв, кыдз локтiсö челядьыс.

— Мый сэтчин, деда?

― Кин лыйсьö?

И только сэтöн челядьыс казялiсö, что дед Петрован избушкаыс дынын не öтнас. Нюр дорын сулалiсö кык мужик, Нiя тожö орöттöг видзöтiсö ты сайö. Кыкнанныслöн паськöмыс вöлi куш нять, не öтiк местаöт косяссьöм-нетшкиссьöм, и Витальколö ёна ковсис нёджжасьны, медбы тöдны изыскателлезöс:

— Маня, эд этö нiя! Видзöт, локтöмась! — горöтчис зоночка.

Да, этö вöлiсö нiя.

Сергей Петрович да Владимир Васильевич казялiсö Виталькоöс, шынньöвтiсö сылö, кыдз добрöй тöдсалö.

— А-а, этö тэ? Но, кыдз ни олан? — юалiс Сергей Петрович. Кыдз пö олан! Да нiя, тыдалö, нем эшö оз тöдö! Витальколö лоис невна не ас сьöртi. Но Сергей Петрович локтiс сы дынö, дзирыта, кыдз ыджыт мортлiсь, жмитiс кисö.

— Но, но, герой! Кылi ни, бура кадсö чулöтöмась. А ми... эх, да мый ни баитны: стыд петö. Бöбöтiс миянöс лешакыс, кыдз учöтик кагаоккезöс, корсис проводникöн, туй мöдiс мыччавны и лешки-вошки бöбöтiс. Куим лун гöгралiмö тайгасö, сё старайтчимö вуджны нюр саяс, но быдпырся инмывлiмö зыбунö, дука нятьö, кынымиськö чуть эг вöйö.

Сергей Петрович вöлi лöг. Сiя сьöласис и видiс Пельтöм Селькосö кöинöн, адззывлытöм лешакöн, а асьсö — ылöстöм кагаöн.

— Эд колö жö! Пыртiс миянöс сэтшöм чашьяö-колодникö, öдва ловьяöсь кольччим. Висьтала ме тiянлö — урман! Кöркö мунöма сэтi тöвчик, пöрöтöм кöньöсся кызжык пуэз, тэчöма сiдз и этадз — беда. Пырим ми сэтчö кыдзкö казявтöг, сё кытчöкö мунiм, а сэсся не одзлань, не бöрлань. Быдса лун öштiм, паськöм да кöмкöт летiм.

— Да эшö котомкаэзтöг кольччим, — гажтöма шынньöвтiс Владимир Васильевич.

— Да, и котомкаэзтöг кольччим. Кöр петiм колодниксис, вöлi рыт ни. Ми лöсьöтчим шорок дорö узьны. Керим биок, чай юим и водiм. А ойнас Селько кыдз бузгас пишались, ми шардöмöсь сувтiм кок йылö. «Мый лоис?» «Ош! — шуис Селькоыс. — Осьтi синнэзöс, а сэтöн ош нюкайтчö. Вон этчин котöртiс, шор саяс!..» Но, ош дак ош. Сылiсь следдэсö ми и луннас неетша адззывлiмö. Котöртiс и ладно. Водiм бöра узьны, шоччисьны. А кöр чеччим асывнас, видзöтам — öтiк котомка абу. Нöбöтöма ошыс...

Сергей Петрович сьöвзис бöра кок увтас, видiс Селькосö нёштöм кыввезöн.

— Кык лун няньтöг олiм, только сэтöр да пиканнэз сёйим. Вийлiм кынымкö сьöлаöс, да мый толкыс — совтöг разь сёян? Вот сiдз и петiм татчö. Спасибо деднытлö, вердiс няньöн. И только сiя висьталiс, кытшöм ош вермис котомкаэз дзебны — конечно, ачыс Селькоыс. Ох, шедiс бы сiя меным сэк ойнас, пыркöтi бы. — А мыйлö сiя дзебис?

— Да медбы эг мунö сэсся нюр саяс, бöр бертiм гортö! Маня локтiс дедыс дынö, мыйлöкö дзарнитiс избушкаас.

Дзарнитiс и синнэсö барöтiс. Избушкаас нар вылын узис... Серёжка.

— Деда, мыля сiя татöн?

— Локтiс ойнас. Меным, шуö, подвиг колö керны, а не гортын узьны. Смелöй, срам. Абу и повзьöма, öтнас локтöма. И видзöт, кыдз подвигсö керö. Узьö, дзик садьтöм. Тэ сiйö эн вöрöт ась узьö.

Но Маня эз кывзы дедсö. Сiя пырис избушкаас и саймöтiс Серёжкаöс.

— Тэ, Серёжка, эн узь. Тэ локтiн керны подвиг, дак кер. Кылан? Ми, Серёжка, керимö ни подвигсö. Ми деревняас кокошника старухаöс кутiм. Вот. Ми Виталькокöт пыкöталiм сiйö баняö, а сэсся корим Öльöксан дядьöс. И лоис быдöс бур.

— Кытшöм эшö старухаöс? — юалiс дед Петрован.

— Кокошникаöс!

Серёжа нем эз юав. Сiя эз письты горöтчыны нем.

Эх, Маня, Маня! Мый тэ керин! Мыля сэтшöм юöрсö вайин Серёжкаыслö? Эх, адззан, мый сыкöт шогмö?

Мый шогмис Серёжкакöт?

Совсем невежöртана дело.

Перво чужöмыс сылöн гöрдöтiс, сэсся бледöтiс, сэсся лоис кытшöмкö не гöрд, не чочком.

Перво тырппес Серёжкалöн жмитчисö, сэсся пиньöвтчисö, а вöлись пондiсö паськавны, паськавны, паськавны... Паськалiсö сэтчöдз, кытчöдз зонкалöн öмыс эз понды вачкисьны буква «о» вылö.

А сэсся мый и лоис, Серёжа пондiс шыннявны! Кöть веритö, эдö — пондiс шыннявны.

— Маня, — шуис Серёжка. — Да кытшöм жö тэ смелöй вöлöмыт, Маня, тэ жö герой!

— Серёжка, тэ мыля сiдз менö ошкан? Серёжа, тэ эн ошкы менö, — стыдитчöмöн горöтчис Маня. — Тэ лучше Виталькоöс ошкы. Вот сiя смелöй. Пыкöталiс ыбöссö — и кöть бы мый. А тэ мыля öнöдз узян? Тэ, Серёжа, эн узь. Эд вöрас лыйсьöны. Сэтчин бой мунö.

— Лыйсьöны? Бой?!

Серёжка, кыдз пуля, чеччöвтiс öтöрö, чожжык локтiс дед Петрован дынö, сэсся виноватöя шынньöвтiс изыскателлеслö, а сэсся вöлись и Витальколö.

— Мый эстöн шогмö? — юалiс сiя.

Эта кадö нюр саяс бöра кожгис-лыйис пишаль, ыджыт говк бöра повзьöтiс быдöс каёккесö, локтiс челядь дынöдз. Виталько да Серёжка дрöгнитiсö, полöмöн видзöтiсö то изыскателлес, то дед Петрован вылö. Маня жмитчис дедыс бердö сiдз, что и калькöтны бы эн вермы.

— Киннэз сэтчин, деда?

— Да колхозниккес. И Наган Наганыч сэтчин. Нiя засада керисö. Петкöтiсö ойнас старухасö, иньдiсö посадö, асьныс пырисö вöрас бöр, медбы видзчисьны Селькосö. А сiя, тыдалö, только неважын локтiс.

— Сiдз, неважын локтiм. Вайöтiс миянöс Селькоыс вон этчин шутёмок вылöдз и шуис: «Мунö эта туёк кузя, деревняас петат, а ме зород видзöтны ветла. Ытшки, шуö, этчин вöрас турунок и колö дозирайтны, эз я травитчы». Сэтчö жö кытшöмкö детина пантасис. Селькоыс и юалiс сылiсь: «Кыдз здоровьеныт?» А детинаыс паныт: «Кыдз ен шуис». И кольччисö сэтчин.

— Кин жö детинаыс вöлi?

— Да Öльöшкаыс, — шуис дед. — Нылöн пароль сэтшöм вöлöм.

— Но вот, кольччисö нiя, а ми, нем ог и думайтö, петiм дедныт дынö. И только сiя осьтiс синнэзнымöс, висьталiс быдöс, — шуис Владимир Васильевич. И вдруг сiя босьтiс киас пишаль, бергöтчис старикыслань:

— Дед, нуöт миянöс нюр саяс, мыччав туйсö. Сэтчин, может, мый и шогмö, а ми сулалам эстöн.

— Мунам, дед, — корис и Владимир Петрович.

— Эка тi кытшöмöсь! — бобгыштiс старик. — Эд висьталi ни: эз тшöкты милиционерыс некинöс лэдзны. Сiдз ни, шуö, народыс унаöв. Селькоыс, конечно, пырис ни сэтчин внучекыскöт. А ныр увтас засада. Натьтö, кутiсö ни сiйö.

Серёжка да Виталько öдва сулалiсö местаын. Нылö öтлаын изыскателлезкöт охота вöлi чожжык мунны нюр саяс, асланыс синнэзöн видзöтны, кыдз кутасö Селькосö. Но дед чорыта висьталiс, что некинöс оз лэдз.

А нюр саяс эз ни кыв нем. Пишаллезiсь сэсся эзö лыйсьö. Витальколö вдруг мыйкö зубыта чуткис сьöлöмас, зонка пондiс бледöтны. А мый, если Селько вийис кинöскö? Эд сэтчин, öтлаын мужиккезкöт, и сылöн айыс!..

— Мунам кöть шутёмыс дынöдз, — корсисö челядь.

Тöдчис, дед и ачыс ёна беспокоитчис. Сiя сiдз и дзöрис избушкаыс дынын. И кыдз не беспокоитчыны? Враг эм враг. Кöр пондас шедны, дак кыдз ранитöм ош, вермас и пишаля мортöс монлавны.

— Мунам, — согласитчис сiя. — Панталам мужиккесö.

ВОТ СIЯ, ВРАГЫС

Шутём дынö мунтöн Сергей Петрович юалiс Серёжкалiсь:

— Но кыдз, бура узин, герой?

Серёжка дзарнитiс сылö синнэзас, дзик мöдiс вежöртны, шутитö али оз изыскательыс, и шуис серьёзнöя:

— Бура, дядя! Только ме — не герой.

— Кыдз этö не герой? Разь не тэ Пыдöстöм нюр сайö ветлiн? Разь не тэ ойнас лысьтiн татчö лэдзчыны?

― Ме, конечно. Да сёравно не герой.

— Гм, нем ог вежöрт. Морт керис геройскöй подвиг и вдруг — не герой... Если не герой, дак кин нö сэк?

— Ачым ог тöд. Васька Порсев менö кыкись ни самохвалöн шуис. Видно, самохвал и эм.

— О-о-о, дак кыдз жö этö сiдз? — дивуйтчис Сергей Петрович. — Тэ мый, любитан асьтö ошкыны? Быль? О-о-о, эта, вонö умöль делоыс. Тэ, тёзка, некöр асьтö эн ошкы. Ась лучше йöзыс тэнö ошкö. Сэк быдöс лоас бур. Вежöртiн?

— Вежöртi, дядя.

Джын верста нiя мунiсö некой пору. И локтiсö как раз аскадö.

Серёжка, кöда öт синнас видзöтiс изыскателлес вылö, а мöднас нюр саяс, вдруг горöтчис радöн:

— Вон, кутöмась ни! Вон, вон!

Быль, кутöмась. Ты сайись быдöнныс казялiсö мужиккезöс. Медодзын мунiс Селько. Тасянь позис казявны, что сiйö ёна каттьöмась гезöн: Селько эз öвт киэзнас, оськалiс дженыт оськöввёзöн, кыдз сьöвталöм вöв. Селько бöрын мунiс милиционер, сы бöрын сьöрсьöн-бöрсьöн кыссисö мукöддэс. «А кытöн нö айö? Кытöн сiя?» — повзьыштiс Виталько. И сразу ёна радмис. Айыс тожö оськалiс öтлаын быдöнкöт.

— Ая! — горöтiс Виталько. — Ая! Ме татöн!

Кылiс я сiйö айыс, висьтавны оз позь. Сёжö ылынкодь вöлi тыыс сайöдз.

Рад вöлi не только Виталько. Радуйтчисö Маня и Серёжка, изыскателлез и дед Петрован.

И вот Пельтöм Селько петiс васис, милиционер Наган Наганыч шуис сылö: «Давай, давай эн падьяв, стыдтöм! Мужиккез, паськыта шыннялöмöн, сувтiсö чорыт му вылö.

— Куим лун да ой гöгралiм тайгасö, сё мöдiм нюрсö вуджны, а сiя, туйыс, видзöт, сэтöн и вöлöм, — баитiс Владимир Васильевич.

— Новйöтöв-керис, кöин, — лöгалiс Сергей Петрович.

А Селько былись вачкисис настоящöй кöин вылö. Сылöн синнэс сiдз и сотiсö быдöс светсö, сiдз и бытшкасисö, кыдз пыжьяннэз. Шед этшöмыслö öтнат векнит туй вылын, дак няж-няж только керас, сымда и олан. Эх, страшнöй врагыс вöлöма.

Кыдз Виталько, сiдз и Серёжка, конечно, уна ни тöдiсö. Нiя лыддьöтiсö не öтiк дас книга, лыддьöтiсö шпионнэз йылiсь, пограничниккез йылiсь, сы йылiсь, кытшöм подвиггез керисö миян солдаттэс война вылын. Тöдiсö нiя, что враг эм враг. Но öтiк дело, кöр врагыс только книгаын, и совсем делоыс мöдiк, кöр сулалö сiя тэ дынын, синнэз одзат. Кöр сiя ловья.

И Виталько пондiс думайтны. Сiя думайтiс сы йылiсь, что ловья враг, кöр сiя абу на кöрталöм гезöн, кöр сiя йöзыс коласын асьсö мыччалö быдöнлö другöн, — öддьöн опаснöй и страшнöй.

Враг эм враг. А мымда нiя вöлiсö миян страналöн, честнöй советскöй отирлöн! Революция да гражданскöй война коста народлö паныт мунiсö капиталисттэз да помещиккез, чочком офицеррез, генераллэз да поппез, быдöн, кин эз уджав ачыс, а уджöтiс ас вылас мöдiкöс. Коллективизация коста народлö паныт сувтiсö кулаккез, быдкодь бандиттэз... Великöй Отечественнöй война коста быдса ордаэзöн локтiсö фашисттэз. Быдöнныс нiя кисьтiсö вир, вийисö отирöс. Быдöнлöн киын вöлi оружие. И мымда жö ковсис миян отирлö пессьыны эна враггезкöт! И кытшöм жö колiс вын, медбы победитны быдöннысö нiйö!

Сiдз думайтiс Виталько.

Думайтiс часöт и Серёжка. Сiя видзöтiс Селькоыс вылö и думайтiс: «Верми бы ме сiйö öтнам кутны? Некöр бы эг вермы. Печиктiс бы кымöсам — и быдöс. А милиционерыс да колхозниккез кутiсö. А верми бы ме тöн öтнам мунны нюр саяс? Некöр бы эг вермы. Первöй жö гöпокö вöйи бы. Дак мый нö сэк ерепенитчи Виталькоыс одзын? А трубкаыс? Тьфу, кытчöдз локтi. Нельки чёртлö веритны пондi».

Бура думайтiс Серёжка. Эз и казяв, кыдз юрыс морос вылö öшöтчис.

Виталько дынö локтiс айыс, кисö пуктiс зоныс пельпон вылö.

— Но вот сiдз. Сьöвталiм лешаксö, каттим гезöн, кыдз учöтик кагаöс трепиччезöн.

Виталько казялiс, что волькöтö айыс сылiсь юрсö шульга кинас, а веськытсö жмитöма моросыс бердö. И эшö казялiс: веськыт киыс вöлi домалöма чышьянокöн. Чышьянокыс пырйöт петöма вир.

— Ая, да кыдз жö сiдз? Киыт куш вир... Айыс серöмтчис горöн, трекнитiс юрнас:

— Нем! Веськалас... Сiя, вон ошыс, ештiс сётаки марснитны киöс, курччöвтiс. А пиннес сылöн... Ого! Кыдз вöвлöн. Коскаöдз мöртчисö.

Сэтöн и мöдiккез серöмтчисö.

— Тэныт, Митрей, ковсяс больницаö ветлыны, уколлэз примитны.

— Мыйлö?

— А вдруг пиннес ядовитöйöсь? Кулан...

А нюр саяс вöлöма вот мый.

Кöр Пельтöм Селькоыс локтас внучекыскöт засадаыс дынöдз, Öльöшка эшö шуас жагöна: «Быдöс, кыдз ен шуис!» и чеччöвтас куст увтö. Сэк избушкаыс сайсянь и петас Наган Наганыч да кыдз рявкнитас: «Стой! Да киэтö, киэтö лэбты, стыдтöм!»

Пельтöм Селько ештöм эд чеччöвтны вöрас, саясьöм понулляинö и лыйöм милиционерыслö. Да öддьöнöв дрöжитöмась киэс, абу инмöма, только фуражкасö пуляыс писькöтöм. Лöсьöтчöм лыйны мöдöтпыр, но эта кадö Витальколöн айыс чеччöвтöм Селько вылö бöрсяняс, уськöтöм кок йылiсь. Усьтöнняс Селько эшö лыяс чочком светас. И милиционерыс тожö шовкнитöм наганiсь, просто сiдз, медбы повзьöтны бандитсö.

Но Селько и сэтöн абу повзьöм. Сiя вермöм Витальколiсь айсö чапкыны вывсис и курччöвтны кисö. Кöин дак кöин и эм. Опытнöй бандит. Пессьöм сiя сэтчöдз, кытчöдз киэсö и коккесö абу каттьöмась гезöн, кöдö Наган Наганыч босьтöма натодиль эта понда.

— Вот сiдз и вöлi делоыс, — шуис бригадир Степан. Öльöшка сулалiс йöзыс спина сайын, гусьöник шыннялiс, кöть и полiс пантасьны дедыс синнэзкöт. Селько бергöтчис сылань, сотыштiс внучексö гöрд бугыллезöн, жекыртiс пиннез:

— У-у, понгöн! Жаль, эг ешты юртö мургыльтны. Ужо, шедан эшö!

— Киэт дженытöсь, — гажöна шуис Öльöшка да сьöвзис кок увтас.

Дед Петрован сё старайтчис локны Селькоыс дынö, öвтiс киэзöн и, кöр удайтчис сибöтчыны матöжык, шуис довольнöя:

— Но мый, шедiн сёжö? Понöс сёйин, а бöжнас джагалiн? Томсянь бöбалiн, бандюга. Вир отирлiсь чупкин, мукöддэсö ловйöн муö сюйин, но шедiн, варвар!

Селько жекыртiс бöра пиннесö, паськöтiс мороссö, дзик мöдiс орöтны гезсö.

― У-у, сволоччез! У-у, ёрда быдöннытö! Син одзын бы эд вöлö... Чожа быдöннытлö смерть лоас! Гымгасö бомба, сымда и олат. И кыдз ме тiянöс терпитi, мыля деревнянытö öнöдз эг сот öтлаын тiянкöт? У-у!..

― Но, но, тырмас тэныт! — строгöя шуис Наган Наганыч.

Сэсся бергöтчис бригадирлань, сетiс приказ:

— Лöсьöт подвода. Кыскам сiйö, кытчö колö.

Серёжка эта кадö жагвыв вешшис бадь кусттэс дынö, кыскис кармансис кытшöмкö предмет и ыджыт вынöн свистнитiс сiйö кусттэс сайö, нюрас. Маня аслас лэчыт синнэзöн ештiс казявны предметсö. Эта вöлi трубка.

— Тэ мыля сiйö чапкин? Чапкыны, Серёжа, эз ков. Этшöм симпатичнöй чёрток вöлi. Дзик ловья.

— Сiдз колö, Маня, — шуис Серёжа гажöна. — Кытшöм бы эз вöв басöк, а сёравно чёрт. А раз чёрт, дак мед куйлö нюр пыдöсын.

Висьталiс этö Серёжа и шынньöвтiс. Да сэтшöм басöка шынньöвтiс — истово майскöй шондi.

И вöлi сылö öддьöн долыт.

А мыля?

Да сiйöн, мыля Серёжа вермис гагсö! И веськыта кö шуны, сiя керис öддьöн ыджыт подвиг. Ого! Настоящöйö.

* * *

Но вот и быдöс. Вот сэтшöм дело вöлi таво гожумнас Перкоягын.

Кыдз ме сы йылiсь пондi тöдны?

А вот сiдз.

Роднöй крайöт путешествуйтiкö, ме неважын кежавлi Перкоягö. Вöлi жар гожумся лун. Небоын эз уяв öтiк кымöрок, эз ымрав воздухын уль тöлок. Ме сiдз мыдзи и пымалi, что öдва-öдва верми локны деревняыс шöрись кедррез дынöдз и сразу жö пукси лабичок вылö вуджöрас.

Неыджыт пуовöй пирамидка дынын уджалiсö морттэз: векнитик чужöма старичок и кык зоночка. Старик керис пирамидкаыс гöгöр виль штакетник, а зоночкаэс мавтiсö пирамидкасö гöрд краскаöн.

— Виталько, ветлiн бы гортат да вайин кöдзыт квас, — шуис старикыс. — Адззан, мыдзöма мортыс.

— Сейчас вая, Петрован дед, — шуис понпутша Виталько и котöртiс гортас.

— А тэ, Серёжа, чышкы чаггесö, дзимляв быдöс, — тшöктiс Петрован мöд зоночкаыслö.

Чожа локтiс Виталько, вайис туисын быгья кöдзыт квас, гöститöтiс менö, сэсся стариксö.

— Ылiсянь локтiн? — юалiс менчим Петрован.

Ме висьталi. Петрован малалыштiс тошсö, дыр любуйтчис аслас уджöн — виль штакетникöн, ошкис челядьыслiсь уджсö.

— Кин могилаас узьö? — юалi ме.

— Бытшöм морт, зонка.

Старик дыр висьтасис, кин узьö могилаас.

— А кытöн жö Маняным? — вдруг юалiс сiя.

— Маняыс, дед Петрован, бöра жадничайтö. Оз кö лет видз йывсис быдöс цветтэсö, дак оз и лок, — шуис Серёжка.

Но Маня вермöма янсöтчыны видзыскöт. Котöрöн локтiс сiя пирамидка дынö, вайис быдса ноша цветтэз, басöка тэчис могилаыс вылö. Сэсся локтiс кедр дынö, дыр сiдз и этадз видзöтiс зонкаэзлiсь уджсö, горöтчис лöгöнмоз:

— Этö кин жö сiдз звездасö мавтiс? Краскаыс сiдз и визывтöма...

— Дугды, Маня, оз ков. Бура ми уджалiмö. Тырмас вильöдз. Тöн правленнёын решитiсö настоящöй обелиск сувтöтны эта пирамидка туйö, — шуис Петрован дед.

Вот сiдз и шогмис, что кедррез дынын пукавтöн дед Петрован, Серёжка, Виталько и Маня висьталiсö меным, кытшöм дело вöлöма медбöрья луннэзö Перкоягын.

— Интереснöй делоыс, а? — юалiс старик.

— Öддьöн интереснöй, — шуи ме. — И мый жö, адззит вöрсис землянкаэсö, монастырскöй добросö?

— Землянкасö адззим, а вот золотоыс абу. Только важ пишаллез, наганнэз, быдкодь сiсьмöм монастырскöй срам, а золото абу. Тыдалö, кытöнкö мöдiк местаын куйлö.

— Ми адззам, обязательно адззам, — висьталiс Серёжка.

— Быдöс гарьям и адззам, — содтiс Виталько. Зоночкаэз дзарнитiсö öтамöд вылö, шынньöвтiсö. Витальколöн понпутшшес эта кадö öзйисö сэтшöм ятнöя — кöть росöн чышкы.