АНГЛИЯ

Öтласа сьведеннёэз

Англиа – дiа государство. Быдладöрсянь сiйö гöгöртöны саридззез. Саридззез вылöт ветлöны паракоддэз, öткö, Америка коласын, мöдкö, Европа материк коласын.

Медыджыт дiэз, кöдна вылын куйлö Англиа – Ыджыт Британиа да Ирландиа. Сiдз жö сэтчö пырöны и Шотландскöй да Оркнейскöй дiэз, ойладöрын – Гебридскöй дiэз, лунладöрын Франциа береггез дынын – Нормандскöй дiэз да сэсся 5 сюрс мында мöдiк поснитик дiэз.

Асывладöрсянь Ыджыт Британиа граница пöлöн куйлö Ойвыв (мöднёж Немецкöй) саридз. Лунладöрсянь Ламанш да Па-де-Кале проливвез (Па-де-Кале токо 31 км пасьта). Ыджыт Британиалöн рытвывлань берег шöр пöлöн куйлö Ирландскöй саридз, а ойвывладорсянь, рытладорсянь да лун-рытвывладорсянь – Атлантическöй океан.

Англиалöн береггез бура орлалöмась. Ыджыт Британиа дi вылын öтiк чут саридз дынсянь абу ылынжык 120 километрася. Саридз пыдына пырö кöсiнö и уналаын шогмöтö природаöн лöсьöтöм гаваннез. Чуть-ли не быдöс юэс öтамöдкöт йитсьöмась каналлэзöн, а сiдз жö и саридзвывса порттэзкöт да кöрттуйезкöт. Саридзса ва юэз кузя пырöны страна пытшкö дас километраэзöн.

Страна оборона понда, а сiдз-жö торговлясö да саридзöт уялöмсö зорöтöм географическöй положеннёлiсь выгодасö да териториалiсь природнöй особенноссесö используйтöмась вöлi Англиаын экономика быдмöмлöн медважнöй условиа.

Быдöс отир Англиаын лыддиссьöны 47 сюрс морт. Териториа абу öддьöн ыджыт – 245 сюрс кв. км, сiйöн отир эстöн лоö мушар пасьта мöдiк странаэс сьöртi медтшöк. Шöрöт лыдöн 1 кв. км вылын олöны 150 мортся унажык. Шочжык отирыс медыджыт дiэз ойвывланьын, а медтшöка олö Ыджыт Британиа шöрын.

Мировöй война кадö (1914–1918 воэзö), война бöрын и öддьöнжык медбöрья воэзö отир пондiс содны етшажык. Англиаын морт чужöмыс öнi медъетша быд европейскöй странаынся.

Профессиональнöй состав сьöртi мöдiк государствоэзкöт ортчöтiкö Англиаын рабочöйез вылö усьö медыджыт процент. Быдöс отирись, кöдна олöны асланыс докодöн, промышленносьын уджалöны 52 % гöгöр, транспортын да торговляын 22 %, а му-видз уджалöмöн токо 8 %; 18 % – мöдiк профессиаэза отир (чиновниккез, армиа да флот, враччез, поппез, полицейскöйез да мукöд). Ны коласын уна богатöйез, кöдна олöны капиталiсь босьтöм проценттэз вылын. Сэтшöм капиталиссэз йылiсь байитiкö В. И. Ленин эшö 1916 воö гижис: «рантье пöлöс Англиаын 1 миллён морт гöгöр».

Государство управляйтöм сьöртi Англиа – корольöн юралана монархиа. Ачыс ыджыт капиталис, король ки увтын абу быдöс влась: сiя «царствуйтö, но оз веськöтлы». Медыджыт министра (премьер) юралöм увтын странаöн веськöтлöны министраэз, а министраэз сувтöтчöны кытшöм либо буржуазнöй партиаöн ^/^.