ОЙСЯ ЦВЕТТЭЗ ВОЙСЯ ДЗОРИДЗЬЯС
Кӧр Льӧмва сайсянь пӧльтыштас тӧлок, сэк юыслӧн чужӧмыс дзик моршитчӧ, и кокнитик валлэз тэрмасьӧмӧн локтӧны менам поплавоккез дынӧдз, вӧрӧтӧны нійӧ. Эта жӧ кадӧ дрӧгнитӧны паськыт уввеза пипуэзлӧн листтэз, и спина сайын расыс пондӧ гажӧн шушкӧтчыны. Но тӧлокыс сэтшӧм вынтӧм, что минута бӧрті ӧшӧны юыслӧн чукыррес, пипулӧн листтэз ӧшӧтчӧны — и бӧра быдлаын шы не тӧв. Кор Льӧмва сайсянь пӧльыштас тӧвру, сэк юыслӧн чужӧмыс чукырӧссьӧ, да кокньыдик гыяс тэрмасьӧмӧн локтӧны менам вугыр табъяс дорӧдз, вӧрӧдӧны найӧс. Сійӧ жӧ здукас дрӧгнитӧны паськыд увъяса пипулӧн коръясыс да мыш сайын вӧрыс заводитӧ гажаа шӧпкӧдчыны. Но тӧвруыс сэтшӧм вынтӧм, мый ӧти здук мысти вошӧны юыслӧн чукыръясыс, пулӧн коръясыс люньгысьӧны — и бара гӧгӧр шы ни тӧв.
Пукавны сьӧкыт. Кӧть сибалӧ ни рыт, а июльскӧй шонді сё эшӧ пӧжӧ жалейттӧг, визывтӧ ньылӧм. Номмез — а нія татӧн быдса кымӧррезӧн лэбалӧны — лякасьӧны чужӧм бердӧ, дзингӧмӧн пырӧны йӧрнӧс сикӧдж увтӧ, и менам яйкучикӧ важын ни садейтӧ сідз, бытьтӧ койыштісӧ сы вылӧ крепыт кунва. Пукавны сьӧкыд. Кӧть матысмӧ нин рыт, а июль тӧлысся шонді пыр на пӧжӧ жалиттӧг, киссьӧ пӧсь. Номъяс — а найӧ тані быдса кымӧръясӧн лэбалӧны — ляскысьӧны чужӧмӧ, пырӧны юрйыв костті дӧрӧм улӧ, и менам кучикӧй важӧн нин зӧлитӧ, быттьӧ киськалӧмаӧсь крепыд кунваӧн.
А юрын думаэз кокнитӧсь, гажаӧсь. Мортлӧ пыр овлӧ долыт, кӧр сія локтас сэтшӧм пельӧсокӧ, кӧда чужтӧ памятяс приятнӧй касьтылӧм. Меным эм мый касьтывлыны. Мӧйму, эта жӧ кадӧ, неделяся дыржык ветлӧті эна местаэзӧт, узьлі, кытӧн шедас: кӧз увтын, ю дорын, киссьӧм сарайын, быд лун кошши тшаккез да ягӧд, чериалі. Гортӧ татісь нӧбӧті ыджыт туисын свежӧй щукаэз, тело вылын — бронзовӧй загар, пельпон вылын, кыдз сёрӧнжык баитіс ӧтік тӧдса, вайи городӧ пуд здоровье. А юрын думъяс кыпыдӧсь, гажаӧсь. Мортлы пыр овлӧ долыд, кор сійӧ выльысь воӧ важ тӧдсаинӧ, коді паметяд чужтӧ приятнӧй казьтылӧм. А меным эм мый йылысь казьтывны. Кольӧм во вежонысь дырджык ветлӧдлі тайӧ жӧ местаясӧдыс, узьлі кӧні веськалӧ: коз улын, ю дорын, тыртӧм сарайын, быд лун тшак да вотӧс воті, чери кыйи. Татысь гортӧ вайи ыджыд туис тыр свежӧй сиръяс, яй вылын бронза рӧма гож да пельпом вылын, кыдзи бӧрынджык сераліс ӧти тӧдса, гортӧ кыски пуд здоровье.
Ме тӧвбыт мечтайті, кыдз бы вились сюрны Льӧмва вылӧ, эта гажа пельӧсокӧ, и талун, павжун кадӧ, паром вылын вуджи паськыт таёжнӧй ю Вильва, невна шоччисьышті кузь туй бӧрын Тыраяг деревняын, сэсся вит верста мымда оськалі вӧрӧт и петі татчӧ. Петі и сразу жӧ пукси вуграсьны. Кузь тӧвбыд ме виччыси, кыдзи выльысь веськавны гажа Льӧмва дорӧ, и талун пажын кадӧ бара паромӧн вуджи вӧрса паськыд Выльва ю, кузь туй бӧрын ичӧтика шойччышті Тыраяг сиктын, сэсся вит верст гӧгӧр восьлалі вӧрӧд и петі татчӧ.
Ме татӧн не ӧтнам. Ордчӧн мекӧт пукалӧ сьӧд тошока и гардчӧмкодь уссэза мужик, ӧт конувтас сылӧн ӧшалӧ пешорка, мӧдас — быдкодь узӧррезӧн да свиттялан кружоккезӧн басӧксьӧтӧм сермӧт. Ме тӧда сійӧ. Мӧйму, кӧр ковсис мунны гортӧ, сія кыскис менӧ посадӧдз и кузьтуй висьтасис, кыдз дозирайтӧ ойнас колхознӧй вӧввезӧс, а мукӧдпырся кыскалӧ почта. Годдэз сылӧ пятьдесят гӧгӧр ни, но деревняын, Тыраягын, кытӧн мужикыс олӧ меддорись керкуын, сійӧ инькаэз шуӧны сё эшӧ челядь нимӧн — Митяӧн, а мужиккез содтӧны эта ним дынӧ кыв — Сюромка. Сюромка Митя — вот кыдз шуӧны этӧ мужиксӧ. И не весь. Ме кылі, бытьтӧ ён да ыджыт мыгӧра Митя вермӧ ловзисьтӧг юны джын ведра мымда шӧма сюромка. Этӧн и знаменитӧй аслас соседдэз коласын, да эшӧ, пожалуй, сійӧн, что, кӧть годдэс диво ни, чожа старикӧн лоас, а олӧ ӧнӧдз ӧтнас, иньтӧг. Ачыс сія песлалӧ паськӧм, сысъялӧ ырӧш, пӧжалӧ нянь — быдӧс керӧ ачыс. Тані ме абу ӧтнам. Мекӧд орччӧн пукалӧ сьӧд тошка да тӧрӧканлӧн кодь кузь уска мужик. Ӧтар киняулас сылӧн ӧшалӧ сумка, мӧдас — быдкодь сыръясӧн да югъялысь кытшъясӧн мичмӧдӧм сермӧд. Мӧйму, кор ковмис мунны гортӧ, сійӧ нуӧдіс менӧ районнӧй центрӧдз, кузь туй чӧж висьтасис, кыдзи видзӧ войяснас колхознӧй вӧвъясӧс, а мукӧд дырйи новлӧдлӧ почта. Сылы ветымын ар гӧгӧр нин, но сиктас, Тыраягын, кӧні олӧ меддор керкаас, бабаяс шуӧны сійӧс челядь нимӧн — Митяӧн, а мужикъяс содтӧны тайӧ ним дорас Ырӧш кыв. Ырӧш Митя — со кыдзи шуӧны тайӧ мужиксӧ. И оз прӧста. Татчӧс олысьяссянь ме кывлі, быттьӧкӧ тайӧ ыджыд мыгӧра ён дядьӧыс лолыштлытӧг вермӧ юны ведра джын шома ырӧш. Тайӧн и тӧдчана сійӧ аслас суседъяс костын да ещӧ, пӧжалуй, и сійӧн, мый, кӧть и олӧма морт нин, регыд лоас старикӧн, олӧ ӧтнас, гӧтыртӧг. Сійӧ ачыс песласьӧ, ачыс сысъялӧ ырӧш, ачыс пӧжалӧ нянь — быдтор вӧчӧ ачыс.
— Охота меным тӧдны, мыля тэ ӧнӧдз эн гӧтрась? — юалі мӧйму, посадас мунтӧн. — Окота тӧдны, мыйла тэ ӧнӧдз эн гӧтрась? — юалі ме мӧйму, кор мунім сиктӧ.
Сія бытьтӧ эз и кыв юасьӧмӧс, ылӧтіс мӧдӧрӧ: Сійӧ быттьӧ эз и кыв юалӧмӧс, бергӧдіс мӧдарӧ:
— Лок мӧдчид миянӧ. Чериок бӧра кыян, шоччисян. Ме тэнӧ, вонӧ, бытшӧм сюромкаӧн гӧститӧта... — Мӧд во бара лок миянӧ. Черитор кыям, шойччан. Ме тэнӧ, вокӧ, чӧскыд ырӧшӧн гӧститӧда...
Ме шынньӧвті и дугді юасьны. Ме гусьӧн нюммуні да дугді юасьны.
Мыля пӧрисьмытӧдз эз гӧтрась Сюромка? Тыраягын этӧ некин оз тӧд. Ӧтіккез сералӧм могись баитӧны, бытьтӧ эта богатырьлӧн оз тырмы прокыс овны инькакӧт, мӧдіккез сайласьтӧг шуӧны сійӧ сэтшӧмӧн, кӧдалӧн «не быдӧс гортас». А дядя Митя сё олӧ и олӧ ӧтнас, гордӧя новйӧтӧ ассис нимкодьсӧ, некытшӧм басни вылӧ и синӧн кваркыш оз кер. Талун, кӧр пантасим ю дорас, сія медперво кыскис бадь кусттэз коласісь ыджыт лагун и нюжӧтіс меным. Мыйла Ырӧш пӧрысьӧдз эз гӧтрась — Тыраягын тайӧс некод оз тӧд. Ӧтияс сералӧны, быттьӧкӧ тайӧ багатыръяслӧн оз тырмы сямыс овны гӧтырыскӧд. Мӧдъяс веськыда шуӧны сійӧс сэтшӧмӧн, кодлӧн «абу ставыс гортын». А дядя Митя пыр олӧ и олӧ ӧтнас, некутшӧм сёрни пыдди оз пукты. Талун, кор аддзысим ю дорын, бадь кустъяс пӧвстысь сійӧ перйис ыджыд лагун да мыччис меным:
— Ю жӧ, вонӧ, бытшӧм сюромкаокыс аркмӧма. Пешлы. — Юышт, вокӧ. Чӧскыд артмӧма шома ырӧшыс. Видлы.
Ме пешлі. Юаныс вӧлі уксус кодь: сэтшӧм шӧма, что, кажитчӧ, койышт лагунсис ош вылӧ, и сылӧн гӧныс кыртас син одзын. Дядя Митя видзӧтіс, кыдз пиньӧвтчисӧ менам аннэзӧ, и шынняліс довольнӧя: Ме видлі. Юанторйыс вӧлі уксуснӧй кислота кодь шома, кажитчӧ, ош вылӧ кӧ койыштан и сылӧн гӧныс усьӧ син водзад. Дядя Митя аддзыліс, кыдзи кезйӧдлӧ менӧ, да шпынняліс:
— Первӧй сорт, а? — Первой сорт. Збыль ӧд?
— Кулитны ог вермы. Бытшӧм... — Кулитны ог вермы, чӧскыд, — шуи ме.
Миян бӧрын, вӧрокас, тронгӧны джынняннэз и кылӧ, кыдз дядя Митялӧн вӧввез марскӧны турун да швычкӧтӧны бӧжжезнаныс — вашӧтлӧны дынсиныс номмезӧс. Невна увланьынжык, паськыт нюрын, кривзӧны туриэз. Мышладорын, вӧрас, троньӧдчыны жыннянъяс, кылӧ, кыдзи дядя Митялӧн вӧвъясыс варскӧны турунсӧ да бӧжъяснаныс швачӧдӧны бокъясаныс, дінсьыныс вӧтлалӧны номъясӧс. Неуна улынджык, паськыд нюрын, кривзӧны турияс.
— Сідз!.. Адзза, кыскӧ тэнӧ миян ладорӧ, — баитӧ Митя. — Сідз. Гажа татӧн, бур местаыс. Ме, вонӧ, тожӧ эд овны ог вермы Льӧмваыстӧг. А эта, пустӧй местаыс, — дядя Митя ӧвтыштіс кинас веськытлань и сьӧвзис ваас, — син одзӧ оз ков. Эг бы и видзӧт сы вылӧ. Да... — Сідзкӧ, кыскӧ тэнӧ миянладорӧ? — юаліс дядя Митя. — Гажаӧсь ӧд тані местаясыс. Ме, вокӧ, ог жӧ вермы овны Льӧмватӧгыс. А этайӧ пустӧй местаыс, — кинас ӧвтыштіс сійӧ веськыдвылӧ да сьӧвзис, — син водзӧ оз ков: зывӧк видзӧдны сы вылӧ. Да-а.
Веськытланьын, кытӧн тыдалӧны шутёммез и видзоккез, пыдын лог дорын сулалӧны куим пӧліньтчӧм керку, кынымкӧ сарай и крышави муӧ пырӧм важ баня. Этӧ кӧркӧся отруб починок Чаняыб. Эшӧ год-мӧд бӧрланьын сэтӧн оліс отир. Но неважын, льӧмвинскӧй вӧррезын оссис ыджыт лесопункт, и кынымкӧ семья мунісӧ сэтчин, а мукӧдыс, ны коласын и Сюромка Митя, строитісӧ виль керкуэз Тыраягӧ, уджалӧны колхозын. Важ отруб кольччис нач пустӧй. Сюромка эта йылісь висьтасьӧ гажӧн: Веськыдвылын, кӧні тыдалӧны пожӧмъяс да видзторъяс, лог дорын пыдын сулалӧны куим пӧлыньтчӧм керка, кымынкӧ сарай да вевтӧдзыс муӧ вӧйӧм важ пывсян. Тайӧ коркӧся пӧчинок Чаняыб. Ещӧ во-мӧд сайын на сэні олісны йӧз. Но неважӧн Льӧмва дорса вӧръясын воссис лесопункт, и кымынкӧ семья мунісны сэтчӧ: вӧр лэдзны, а мукӧдыс, на лыдын тшӧтш и Ырӧш Митя, стрӧитісны выль керкаяс Тыраягӧ, уджалӧны колхозын. Важ пӧчинок коли дзик тыртӧм. Ырӧш та йылысь кыпыда висьталіс:
— Сьӧвзимӧ сы вылӧ, нельки керкуэсӧ пес вылӧ эг пилитӧ. Мед досповна сісьмӧны. Сідз нылӧ и колӧ... И если ме каждӧй ой узьла не берег дорын, а Чаняыбас, то только сійӧн, мыля керку бокын лысва абу и номмез етшажык курччасьӧны. Да... Тэ эн думайт, что жаль отрубыс... Син одзӧ оз ков... — Сьӧвзим сы вылӧ, ӧвтыштім киӧн, весиг керкаяссӧ эгӧ пилитӧ пес вылӧ: мед дзикӧдз сісьмӧны асланыс местаясын. Сідзи налы и колӧ... И ме быд вой узьла не берег вылын, а Чаняыбын сы вӧсна, мый керка бокас абу лысваыс да номъяс омӧльджыка курччасьӧны. Да-а. Тэ эн думайт, мый жаль пӧчинокыс. Син водзӧ оз ков...
Сюромка ыджыт гульккезӧн юис лагунсис, сэсся вугыр бердісь мездӧтіс чочком сьӧма кельчиӧс, сразу жӧ весӧтіс сійӧ и сюйыштіс пешоркаӧ. Меным охота тӧдны, мыля сылӧ важ селитьбаыс син одзӧ оз ков, и юася: Меным окота лои тӧдны, мыйла сылы сэтшӧм мустӧм важ оланіныс, да юалі:
— Видно, не чӧскыта овсис татӧн? — Сідзкӧ эз чӧскыда овсьы тані?
— Кытшӧм, лешак, чӧскыта! Сорок год сэтӧн олі, а мортӧн эг ло. Зверь моз олі... да... Мыйсӧ ме только эг терпит эта отрубын, ась би сійӧ сотӧ, тьфу! Колӧ тэныт, вонӧ, тӧдны ӧтік тор. Этӧ сійӧ, что мамӧс ош гыжьялӧма как раз сія гожумӧ, кӧр меным тырас кык год. Айӧ, царство сылӧ небеснӧй, гӧтрасьӧм недель бӧрті, босьтӧм кикимора Парасьӧс (тожӧ коскаэс ни, натьтӧ, сісьмисӧ), а менӧ сетӧма быдтыны Гаврил Опоньлӧ. Вӧлі татӧн сэтшӧм кулак и вирьюись. Ог тӧд, кытӧн ӧні олӧ, может, тожӧ кашниккез ни керӧ. Но да ладно. Вот и быдтіс менӧ эта мужикыс. Ох, лешак, кыдз сія менӧ быдтіс! Вит годсяӧн пинялі ни, дас годсяӧн летъялі гӧр бердын, а кӧр тырис двенадцать, уджалі ни ректас вылын, ветлі туйӧ, мельницаӧ, дозирайті вӧввез и мужиккезся не умӧльжыка юи сюромка. — Кутшӧм, лешак, чӧскыда! — ӧвтыштіс кинас Ырӧш, горша юис лагунысь, вугырысь мездіс еджыд сьӧма кельчиӧс, сюйис сумкаас да водзӧ висьталіс: — Нелямын воысь дырджык олі сэні, а мортӧн эг ло. Зверьяс моз олім. Мыйсӧ сӧмын ме эг терпит тайӧ пӧчинокас! Тьфу, мед би сотӧ сійӧс! Менсьым мамӧс тані ош косявлӧма сійӧ гожӧмас, кор меным тырӧма кык ар. Батьӧ, царство небеснӧй сылы, гӧтрасьӧма вежон мысти, вайӧма кикимера Парасьӧс (важӧн жӧ нин кувсис), а менӧ сетӧма быдтыны Гаврил Опоньлы. Вӧлі тані сэтшӧм мужик, озыр кулак, вир юысь (ог тӧд, кӧні мый вӧчӧ ӧні, гашкӧ нюжӧдіс жӧ нин кыссӧ). Вот и быдтіс менӧ сійӧ. Вит арӧса детинкаӧн агсаси нин, дас арӧсаӧн летъялі гӧр бӧрся, а кор тырис дас кык ар, ме уджалі ректас вылын, ветлывлі туйӧ, изі мельничаын, видзи вӧвъяс да мужикъясысь не омӧльджыка юи шома ырӧш.
Дядя Митя мездӧтіс вугыр бердісь бӧра учӧтик кельчиӧс, весӧтіс бытшӧмика и пуктіс пешоркаас. Ме кыйи кынымкӧ ёдіпиянӧс и важын ни думайті пуны черива. Ю дорын пондӧтчис везъясьны туман, ыркытсяліс. А номмез сё эшӧ лякасьӧны чужӧм бердӧ, бытшкалӧны голя. Сюромкалӧн чужӧмыс пыктӧм ни, киэс гӧрдӧтӧмась вирсянь. Юрсиыс сылӧн пашмӧм, и номмез сибдӧны пилиммес коласӧ. Сэтӧн и дзингӧны вӧснитика-вӧснитика. Дядя Митя бара мездіс вугырсьыс ичӧтик кельчипи да сюйис сумкаас. Ме кыйи кымынкӧ сынпи да важӧн нин думайта пуны юква. Ю вылӧ вольсасьны кутіс вӧсньыдик ру, лои ыркыдджык. А номъяс век дӧзмӧдчӧны. Ырӧшлӧн чужӧмыс пыктӧма нин, ляксьӧм вирысла киясыс гӧрдӧсь.
— Тьфу, лёквир, — пондіс сьӧласьны сія, кӧр ыджыт ном лӧсяліс ӧмас. — Баитны оз сетӧ... Лок, вонӧ, Чаняыбас. Сёр ни эд, а эшӧ черива колӧ пуны. — Тьфу, стерво! — лёкысь сьӧвзис сійӧ, кор ыджыд ном веськаліс вомас. — Сёрнитны оз лэдзны... Мунам, вокӧ, Чаняыбас, сёйыштам юква.
Ми вуджим Гырка логсӧ, сибӧтчим дорись керкуокыс дынӧ. Вӧлі сія лажмытик, пӧввезӧн дорӧм ӧшына, крышатӧм. Сісь дук вайӧтіс учӧтик гид ладорсянь, пӧльтіс пӧжшӧм назёмӧн. А ордчӧн керкуыскӧт шумитісӧ листтэзӧн ӧшӧтчӧм уввеза кыдззез, кынымкӧ льӧмпу. Ми вуджим Гырка логсӧ, локтім меддор керка дінас. Сійӧ вӧлі вевттӧм, ляпкыдик, ӧшиньяссӧ пӧвйӧн тупкӧма. Ичӧтик картасянь ӧвтӧ сісь дук. А керкаыскӧд орччӧн быдмӧны паськыд увъяса кыдзьяс, кымынкӧ льӧм пу.
— Вот, вонӧ, эта коромина увтын и олі ме... Да... — Вот, значит, тайӧ короминаас и олі ме. Да-а...
Дядя Митя ӧвтыштіс кинас и бӧра сьӧвзис лӧгӧн, дзик керкуыс вӧлі мыйӧнкӧ виноват. Сэсся петкӧтіс гидсис сісь пӧв торрез, кынымкӧ бырӧм отопки, ӧзтіс кыдззез увтӧ би. Дядя Митя бара ӧвтыштіс кинас да лёкысь сьӧвзис, быттьӧкӧ мыйӧнкӧ мыжа вӧлі тайӧ керкаыс. Сэсся картасьыс петкӧдіс сісь пӧв торъяс да кыдзьяс улӧ пестіс би.
— Колӧ тэныт тӧдны, — би весьтӧ котёлок ӧшӧтікӧ баитіс сія, — что эта отрубын олісӧ вит семья. Сэтчин, вӧр дорас, сулаліс Гаврил Опоньлӧн керку, ордчӧн сыкӧт — Ошнямыр Сергалӧн. Богатӧсь вӧлісӧ кыкнанныс, сійӧн и торйӧн строитчывлӧмась мӧддэс дынсянь. А кытӧн ӧні богатствоыс? Тю-тю, нельки керку местаэс оз тӧдчӧ, петшӧрӧн тырисӧ. А вот эна кык керкуын олісӧ воннэз: Нетулика Сеня да Тулика Прокоп. ӧтыс колхозын ӧні уджалӧ, старик ни, а мӧдыс, колӧ тэныт тӧдны, Льӧмваын, Нетулика Сеняыс, значит. Эм Нетуликалӧн зон, ылӧстӧм Проня. Но, висьтала ме тэныт, — мо-орт! Тӧвнас кӧмтӧг котрасьӧ и кӧть бы мый! А эд видзӧтны нем вылӧ: кульӧм ур и только. Ӧтік годся мекӧт, лешак, а гробӧ ни видзӧтӧ. Вина сет, дак сымда юас, мымда вӧв оз вермы ва юны... Да... — Колӧ тэныд тӧдны, — би вылӧ пӧрт ӧшӧдігмоз висьталіс сійӧ, — тайӧ пӧчинокас оліс вит семья. Сэні, вӧр дорас, сулаліс Гаврил Опоньлӧн керкаыс, сыкӧд орччӧн Ошнямыр Сергалӧн. Кыкнанныс озырӧсь вӧліны, сійӧн мукӧд семьяясысь торйӧн стрӧитчылӧмаӧсь. А кӧні налӧн озырлуныс ӧні? Чӧрт сюр йылас! Гашкӧ и керка местаясыс нин оз тӧдчыны. А вот тайӧ керкаясас олісны кык вок — Нетулика Сеня да Тулика Прокоп. Ӧтиыс колхозын ӧні уджалӧ, старик нин, а мӧдыс, колӧ тэныд тӧдны, Льӧмваын, Нетулика Сеняыс, значит. Эм Нетуликалӧн пи, тӧлктӧм-сямтӧм Проня. Висьтала ме тэныд: мортыс тӧлын кӧмтӧг котралӧ, и — веськодь! А ӧд видзӧднысӧ нинӧм вылӧ: кульӧм ур — кульӧм ур и эм. Менам годок, лешак, да гуӧ нин видзӧдчӧ, а вина кӧ сетан, юас сы мында, мыйта вӧв оз вермы юны васӧ. Да-а...
Дядя Митя висьтасьӧ аслас соседдэз йылісь, висьтасьӧ гажӧн. Но сійӧ кывзікӧ менам син одзын чужӧны нёштӧм картинаэз. Дядя Митя видзӧдыштіс увъяс костті енэжлань кайысь да Льӧмвалань кыссьысь тшын вылӧ, кывзысьыштіс герчканъяслӧн вӧрын герчкӧм вылӧ, сэсся тэрмасьтӧг водзӧ висьталіс аслас вӧвлӧм суседъяс йылысь:
Олісӧ отир, и эз тӧдӧ нія некытшӧм счастье, эз тӧдӧ, мыйлӧ и олӧны светас. Праздник коста вина юӧны, сур, сэсся тышкасьӧны ӧтамӧдкӧт. Тышкасьӧны мужиккез и инькаэз. Нетулика Сеня тузитӧ ассис томжык вонсӧ, Тулика Прокопӧс; Прокоплӧн иньыс кыскалӧ юрсиӧт Санко Петрикаӧс. Санко Петра видзӧтас, видзӧтас эта вылӧ, сэсся босьтас кляч, гусясьӧмӧн локтас тышкасись иннез дынӧ и — раз! раз! — сӧтас кыкнанныслӧ, кытчӧ инмас. Сы сорӧн и рознитчасӧ... — Сідз, значит. Вит семья олісны тані. Ӧти вужйысь коркӧ петлӧмаӧсь. Ӧткодь пемыдӧсь, ош кодьӧсь. Эз тӧдлыны некутшӧм шуд, эз тӧдлыны, мыйла олӧны кыз му вылас. Олісны — и ставыс. Праздникъясӧ вина-сур юисны, сэсся тышкасисны. Тышкасисны мужикъяс и бабаяс. Нетулика Сеня нӧшалӧ томджык воксӧ, Тулика Прокопӧс, а Прокоплӧн гӧтырыс кыскалӧ юрсиӧдыс Санко Петырлысь гӧтырсӧ, мыйла сійӧ, кӧбыла, нёльӧд во нин кыскасьӧ Прокопыскӧд. Сашко Петра видзӧдас-видзӧдас, босьтас пес поткӧдлан нӧш, гусьӧн матыстчас пачесайтчысь нывбабаяс дінӧ, кыкнанныслы сӧтыштас... и найӧ торйӧдчасны. Да-а...
А мукӧдпырся семьяэзӧ пыравліс и гаж. Кулас, шуам, Нетулика Сенялӧн мӧс — остальнӧй семьяэзын праздник. Радӧсь быдӧнныс, что соседныс мӧстӧг кольччис... Нетулика Сеня лӧгувьяс осьтӧн коляс Санко Петра йӧрись завор, пырасӧ сюӧ вӧввез да мӧссэз, джынсӧ сёясӧ да талясӧ. А мӧддэс радуйтчӧны. Но Санко Петра ой и лун думайтӧ, кыдз бы Сенялісь керкусӧ ӧзтыны... Корсюрӧ семьяяс и нимкодясьлісны. Кулас, шуам, Нетулика Сенялӧн мӧскыс — мукӧд семьяясын праздник: радлӧны. Лӧгысла Нетулика Сеня восьсӧн коляс Санко Петра ыб вылысь заворсӧ, вӧвъяс да мӧсъяс став сюсӧ сёясны, таляласны. «Вот и бур!» — радлӧны мукӧдъяс. А Сашко Петра думайтӧ нин, мый эськӧ керны сэтшӧмӧс, медым Тулика Прокоплӧн керкаыс сотчис. Да-а... вот сідзи и олім, вокӧ.
Черива пусис чожа. Сёйим пӧттӧдз. И, медбӧрья чериоккесӧ вильӧттӧн, Сюромка бӧра ӧдззис висьтасьны, кыдз Ошнямыр Серга да Гаврил Опонь видзисӧ асланыс киын быдӧс отрубсӧ, уджӧтісӧ и стариккезӧс, и томмезӧс, уджӧтісӧ пипу качсора нянь кусӧк понда. Висьтасис сія, кыдз Опоньлӧн иньыс прокод кыскасьӧма Ошнямыркӧт, а Ошнямырлӧн иньыс — Опонькӧт. Дядя Митя баитіс бура, кокнита, и ме некыдз эг вежӧрт, мыля сійӧ Тыраягын лыддьӧны сэтшӧм мортӧн, кӧдалӧн «гортас не быдӧс». Юква пусис ӧдйӧ. Пӧртйысь кайис сэтшӧм чӧскыд ру, мый менам дуль ваӧй петіс. Пӧттӧдз сёйим, став черисӧ вильӧдім, и Ырӧш бара висьталіс, кыдзи Ошнямыр Сергей да Гаврил Опонь кач сора няньтор вылӧ уджӧдісны пӧчинокысь став пӧрысь и том йӧзӧс. Сёрнитіс сійӧ мичаа, кокниа, быттьӧ книга лыддис. Ме некыдз эг гӧгӧрво, мыйла сійӧс Тыраягын лыддьӧны сэтшӧм мортӧн, кодлӧн «абу ставыс гортас».
Но вот Сюромка зубыта сӧтіс кидолоньнас кымӧс кузяс и чожа чеччӧвтіс кок йылӧ, дзик зор увтсянь пышшис. Друг Ырӧш ки пыдӧснас шлапкис кымӧсас да сувтіс кокъяс йылас.
— Кытшӧм талун луныс? — ылӧстӧма юаліс сія. — Кутшӧм талун луныс? — йӧйсямӧн юаліс сійӧ.
Ме повзи сідз, что нем эг письты висьтавны. А сія видзӧтіс чужӧмам, видзчисис ответ и тӧдчӧмӧн нервничайтіс: уссэс вӧрисӧ, кыдз налькӧ шедӧм крысалӧн, тырппес дрӧжитісӧ. Ме быдӧн повзи, нинӧм эг сяммы шуны. Сійӧ видзӧдіс менам чужӧмӧ, виччысис, нервничайтӧмысла вӧрис ускыс, тіраліс вомдорыс.
— Середа? Висьтав — середа талун? Эх, лешак! Вот кытчӧдз ылалі баснинам! Вонӧ, тэ висьтав меным — середа талун али не? — Среда? Среда талун? Ок, лешак, сёрнинад кыдзи ылалі! Висьтав, вокӧ, среда талун али абу?
И кӧр ме висьталі, что талун былись среда, сідз кыдз вӧрзи ме городісь тӧн, а тӧн вӧлі вторник, Сюромка кулӧм не ловья шлёпкисис костёр бокас, сэсся дрӧжитана киэзӧн босьтіс лагунсӧ и пондіс юны. Сія юис, а ырӧшыс горӧн гулькӧтіс лагунас и Сюромка кынӧмын. Юис сэтчӧдз, кытчӧдз садьыс эз быр. Ме артышті и висьталі, мый талун збыльысь среда. Ырӧш шлёпкысис-пуксис би дорӧ, тіралан кияснас босьтіс лагунсӧ да гулькйис-юис лов тыртӧдзыс. Сӧмын и булякыліс шома ырӧшыс лагунас да юысь кынӧмын. Кор вермыштны кутіс лолавны, шыасис:
— Тӧдан мый? Да... Тӧдан мый? — сюльтыртіс сія, кӧр пондіс вермыны лолавны и невна лӧньсис. — Мунін бы тэ татісь, а? Котӧртін бы, но шуам, Тыраягӧ нето Льӧмваӧ. Буржыка шоччисян сэтчин отирыс дынын. А эстӧн талун, веськыта висьтала, неладно делоыс! — Да-а... Тӧдан мый? Бурджык, мунін эськӧ тэ татысь, котӧртін, шуам, Тыраягӧ либӧ Льӧмваӧ. Сэні бурджыка шойччан йӧз дінас. А тані, веськыда висьтала, омӧль талун лоӧ.
Ме лэбті синнэзӧс.
— Мый сэтшӧмыс? — юалі повзьӧм голосӧн. — Мыйкӧ умӧль дело я мый я? — Мый сэтшӧмыс? — чуйми ме.
— Э-э, кыдз бы тэныт шуны, э-э... — мыкталіс Сюромка. — Да... Тӧдан мый? Повзьӧтчыны Чаняыбыс пондіс. Кыдз ой, сідз и оказзё. А медӧддьӧнсӧ повзьӧтчӧ середа ойӧ. — Э-э, кыдз тэныд шуны... — мыкталіс Ырӧш. — Да... Тӧдан мый? Повзьӧдчыны Чаняыбыс кутіс. Кыдзи вой, сідзи и ӧказия. А медъёна повзьӧдчӧ среда войӧ.
— Но-о-о! — Но-о-о! — шензи ме.
— Быль баита! — Сюромка вешшис матӧжык ме дынӧ и повзьӧмӧнмоз шушкис: — Кӧть верит, кӧть эн, а ачым адззылі кольӧм середа ойӧ... Ох, лучше не касьтывлыны, мый ме адззылі... Полӧм петӧ висьтасьнытӧ. — Збыль шуа! — Ырӧш матыстчис ме дінӧ, чужӧм вылас ёна повзьӧм петкӧдлӧмӧн, гусьӧн вашкӧдіс: — Кӧть верит, кӧть эн, а кольӧм среда войӧ ачым аддзылі... Ок, лучшӧ не казьтывны, мый ме аддзылі... Висьтавнысӧ пола.
— А тэ висьтав. Может, оз жӧ сьӧлӧмӧ пот. — А тэ висьтав. Оз жӧ ӧд, гашкӧ, пот сьӧлӧмӧй.
И Сюромка висьталіс: И Ырӧш висьталіс:
— Кузь юрсиа инька васис петаліс... Он верит? — Кузь юрсиа нывбаба васьыс петаліс. Он верит?
— Ог. — Ог, — юрӧс пыркӧді ме.
— Быль баита. Пукси ойнас берег дорас, вуграся. И вдруг буль-боль ваас керис. Нёджжӧвті сэтчин, думайта: мый лоис? И чуть гатш эг усь. Петіс васис нач куш инька, юрсиыс чочком, каджви ӧшӧтчӧма, яйкучикыс дзик зелёнӧй, сідз и свиттялӧ тӧлісь увтас. Петіс и ӧдззис котрасьны вӧрӧттяс. Сэсся давай менӧ кытсавны. Корӧ этадз нюжвыв голосӧн: «Митю-у, Митю-у». Но ме и садь ӧшті. Кыла только, кыдз инькаыс котрасьӧв-керис да и шуис сэсся: мӧд середа ояс бӧра пӧ пета... Вот кытшӧм делоыс, вонӧ... — Збыль висьтала. Войнас пукси берег дорас, вуграся. Друг, кыла, ваыс буль-бульмуні. Видзӧдлі, мый нин, мися, лоис, и муртса гатшӧн эг усь... Васьыс петіс дзик пасьтӧм нывбаба. Юрсиыс еджыд, коскӧдзыс лэччӧма, яйыс турунвиж, сідзи и дзирдалӧ тӧлысь югӧр улас. Петіс да мӧдіс вӧр дорас котравны. Сэсся нюркйӧдлана гӧлӧсӧн кутіс менӧ чуксавны: «Митю-ю, Митю-ю!» Ме и садьӧс вошті. Кыла сӧмын, кыдзи нывбабаыс котраліс-котраліс да и шуӧ, мӧд среда войнас пӧ бара пета... Со кутшӧм делӧыс, вокӧ...
— Но и мый жӧ? Ась петӧ. Видзӧтам кыкӧн, — шынньӧвті ме. — Но и мед петӧ, — торки ме сійӧс. — Кыкӧн видзӧдам.
— Не, дружок, тэ эн кольччы татчӧ. Оз сія кыкыс дынӧ пет. А меным... но тӧдан... стрась охота адззывны сійӧ. Ӧддьӧн ни гленитчис. Басӧк сія, да и голосыс бытшӧм, дзик серебрянӧй сильканок тиньгӧ. — Эн, другӧ, тэ эн кольччы татчӧс. Кык водзад сійӧ оз пет. А меным, тӧдан, вывті окота аддзывны сійӧс. Вывті нин ёна воис сьӧлӧм вылӧ: мича, гӧлӧсыс эзысь кӧлӧкӧльчиклӧн тиньӧдчӧм кодь.
— Сказка эта, дядя Митя, челядьӧс бы сійӧн повзьӧтлыны, — шуи ме серьёзнӧя. — Да и кытчӧ ме ӧні муна? Адззан, ой локтӧ, а туйесӧ умӧля тӧда. Ӧшны верма. Сэтчӧ жӧ, мыдзи ёна, коккезӧ сідз и сотчӧны. Вода кыдззес увтӧ и онмӧсся сразу. — Мойд тайӧ, дядя Митя, челядьӧс повзьӧдлыны позяс, — серьёзнӧя шуи ме. — Да и кытчӧ ӧні ме муна? Аддзан, вой пуксьӧ, а туйяссӧ омӧля тӧда. Вошны верма. Сэтчӧ жӧ, ёна мудзи, кокъяс сотчӧмӧн-сотчӧны. Вода кыдзьяс улас да пыр и унмовся.
И былись, сибаліс ни ой. Локтіс сія жагӧник, гусясьӧмӧн. Перво ыждісӧ вуджӧррез, нюжалісӧ, сэсся пемытыс кыдзкӧ сразу, ӧтік мигӧ, уськӧтчис вылісянь, петіс вӧрись и лог пыдӧсісь, казявтӧг ньылыштіс мусӧ, пуэсӧ, сісьмӧм керкуоккесӧ, а ӧтлаын ныкӧт и миянӧс. Збыльысь матысмис вой. Сибӧдчис сійӧ ньӧжйӧ, гусьӧник. Первой ыдждісны, нюжалісны вуджӧръяс, сэсся кыдзкӧ пемыдыс друг уськӧдчис вылісянь, петіс вӧрысь и сён пыдӧсысь, казявлытӧг ньылыштіс мусӧ и пуяссӧ, сісьмӧм керкаяссӧ, накӧд тшӧтш и миянӧс.
Сюромка дыр пукаліс чӧлӧмӧн, пишкис нырнас. Ме вежӧрті, что дзуга сылісь кытшӧмкӧ планнэз. Сія думайтӧма чулӧтны татӧн ойсӧ ӧтнас, может, мӧдіс мыйкӧ керны гусьӧн, и вот мешайта ме сэтӧн. Унаись кывлі, что татӧн оліссез любитӧны глушитны чери, кӧть тӧдӧны, что керны этӧ оз туй. Может, и Сюромка бӧбавны мӧдӧ? Ужо, видзӧтам... Ме чорыта решиті не мунны татісь, мый бы эз ло, а тӧдны, мыйлӧ Сюромкаыс кольччӧ бы ӧтнас. Пондас кӧ глушитны чери, ме, конечно, падмӧта, ог сет бӧбавны. Ырӧш дыр пукаліс чӧв ланьтӧмӧн, чипсасис нырнас. Ме гӧгӧрвои — дзуга сылысь кутшӧмкӧ план. Сійӧ кӧсйылӧма войсӧ коллявны тані ӧтнас, гашкӧ вӧчны мыйкӧ гусятор, и со мешайтча... Ме унаысь кывлі, мый тані олысьяс радейтӧны глушитны чери, кыйӧны сійӧс кулӧмъясӧн, кӧть тӧдӧны — тайӧс вӧчны оз позь. Гашкӧ, и Ырӧш кӧсйӧ йӧйтавны? Видзӧдлам! Ме чорыда шуи аслым: не муніны татысь, тӧдмавны, мыйла ӧтнас кӧсйӧ кольччыны Ырӧш. Чери глушитны ме сійӧс нинӧм вылӧ ог лэдз.
Дыр чӧліс Сюромка. Сія думайтіс, тыдалӧ, кытшӧмкӧ виль «оказзё», кӧдӧн позис бы повзьӧтны менӧ. Но бурыс, видно, нем эз адззись. Сія босьтіс бӧра лагунсӧ, юис пӧттӧдз, чышкис шабур поланас чужӧмсӧ и тырппесӧ, сэсся нюжӧтіс юансӧ меным. Дыр чӧв оліс Ырӧш, буракӧ, думайтіс, кыдзи менӧ повзьӧдны, выжывитны татысь. Но нинӧм, тыдалӧ, эз вермы думыштны, бара босьтіс лагунсӧ, юис пӧттӧдзыс, шабур пӧланас чышкаліс чужӧмсӧ и вомдорсӧ, сэсся шома ырӧшсӧ мыччис меным.
— Ю, вонӧ, — кыдз бытьтӧ нем эз и вӧв, добрӧя висьталіс сія, — ю да вод, пожалуй, кыдззес увтӧ. Морт тэ, адзза, простӧй, честнӧй, а честнӧй дынӧ, может, и петас сія. Ме вода вон керкуыс бокӧ, торйӧнжык. Повзяс тэись, дак меись оз повзьы. Торйӧн эд лоамӧ... — Ю, вокӧ, — быттьӧкӧ нинӧм эз и вӧв, бура шуис сійӧ. — Ю да вод, пӧжалуй, кыдзьяс улас. Мортыс тэ, аддза, прӧстӧй, честнӧй, а честнӧй дінад, гашкӧ, и петас сійӧ. Ме вода торйӧнджык, керка бокас. Тэысь кӧ повзяс, меысь оз повзьы. Торъяӧсь ӧд лоам...
Костёр миян кусіс совсем, и ме казялі, что ойыс не сэтшӧм ни пемыт, кыдз кажитчис одзжык. Пондіс вӧйсасьны тӧлісь: мыччисяс вӧр весьтас, минута-мӧд нёджжасяс и ӧшас бӧр. Усис лысва. Турунын сё эшӧ чирскисӧ кӧбывкаэз, неылын тронгисӧ джынняннэз. Ме босьті плащӧс и лӧсьӧтчи сайись кыдззес дынӧ. Сюромка чеччис тожӧ, дыр сулаліс шы сеттӧг, кывзісис. Миян бипур дзикӧдз ваймис, и ме казялі, мый войыс абу нин сэтшӧм пемыд, кутшӧмӧн кажитчис водзджык. Заводитіс мыччасьны тӧлысь. Мыччысяс вӧр весьтас, минут-мӧд вашъялас и бӧр пырӧ. Лысва усис. Турунын век на чирскисны чиркъяс, неылын троньӧдчисны жыннянъяс. Ме босьті плащӧс да мӧдӧдчи кыдзьяс дорӧ. Ырӧш чеччис жӧ, дыр сулаліс шы сеттӧг, кывзысис.
— Эх, привольеыс кытшӧм татӧн! — шуис сія сыбӧрын. — Видзӧтан-керан, да и сьӧлӧм пот мунас. Да... — Сэсся бергӧтчис мелань и содтіс кыдзкӧ мечтайтӧмӧн: — А сёжӧ муна ме татісь. Муна, вонӧ. Пантасьлі ӧтік леспромхозісь ыджыт начальниккӧт, дак корис уджавны. Вӧввез, шуӧ, миян эмӧсь. Пондан пӧ дозирайтны нійӧ да товар кыскавны. — Ок, лӧсьыд жӧ тані паськыд вӧр-ваыс, господи! — медбӧрын шуис сійӧ. — Видзӧдан-видзӧдан, да и сьӧлӧмыд ёкмунӧ. Да-а... — Сэсся бергӧдчис мелань и кыдзкӧ мечтайтігмоз содтіс: — А век жӧ муна татысь. Муна, вокӧ. Паныдасьлі ӧти леспромхозса ыджыд начальниккӧд, и сійӧ корис уджавны. Вӧвъяс, шуӧ, миян эмӧсь. Кутан пӧ видзны найӧс да тӧвар кыскавны.
— Мый татӧн оз гленитчы? Шуан тай: приволье эстӧн, сьӧлӧм радуйтчӧ... — Мый тані оз во сьӧлӧм вылад?
— Счастье абу, — простӧя шуис Сюромка, — овны оз сетӧ. Томмес менӧ озӧ вежӧртӧ, а пӧриссес — кокаласӧ... — Сэсся содтіс гажтӧма: — Шудыс абу, — прӧстӧя шуис Ырӧш, — оз туй овнысӧ. Томъяс менӧ оз гӧгӧрвоны, а пӧрысьяс — кокаласны...
— Вот адззыла сійӧ — и муна. Ог сэсся вермы терпитны. Мыла бырис. Ог вермы сэсся татӧн овны, вынӧй бырис. Вот аддзӧдла кузь юрсиасӧ и муна.
— Неужели тэ веритан, что быльнӧй морт васис петас? — юалі ме, ольпасьӧс лӧсьӧтікӧ. — Эта жӧ сказка... — Неужели тэ веритан, мый збыльысь морт петалас? — юалі ме вольпасьӧс лӧсьӧдігмоз. — Тайӧ жӧ мойд...
— Сказка, шуан? А тэ верит. Кӧр веритан, сэк кокнитжык овнытӧ. Колӧ тэныт, вонӧ, тӧдны, что юас кӧркӧ не ӧтік инька вӧйӧтчисӧ. Пондасӧ жӧниккезныс ӧддьӧнӧв тешитчыны, вартлыны да мый да, и нія — бульк! — ваӧ. Ӧні, кӧр отрубыс пустӧй лоис, вот и петавлӧны. Гажтӧм жӧ нылӧ. Вот висьтала ме тэныт ӧтік оказзё, а тэ кывзы. Тэ, адзза, юра детинаыс, тэныт позьӧ висьтавны. Вӧлі татӧн Ошнямыр Сергалӧн ныв. Но, кыдз бы тэныт висьтавны, дзик цветок вӧлі. Да не простӧй, а ойся. Да, ойся. Эмӧсь сэтшӧм цветоккез. Луннас оз тыдалӧ, вевттисьӧны, дзик стыдитчӧны шондіыссянь. Но зато ойнас оссьӧны. И видзӧтін бы тэ, кытшӧм нія сэк басӧкӧсь. Нёджжӧвтан ны вылӧ и орӧтчыны сэсся он вермы. Сідз и кыскӧны дынаныс. Вот сэтшӧм и вӧлі Сергалӧн нылыс. И пондіс сія радейтны ӧтік зонӧс, татісь жӧ детинаӧс, соседӧс, позьӧ шуны. И верма ме тэныт висьтавны, бура нія радейтісӧ ӧтамӧдӧс. Зонкаыс вӧлі честнӧй да добрӧй сьӧлӧма, мича чужӧма да бытшӧм статя. И вот петіс оказзё. Кӧть нем эшӧ эз и вӧв ны коласын, а кинкӧ бӧбалӧм могись мавтӧма Ошнямырыслісь воротасӧ дьӧгӧдьӧн. Аслам синнэзӧн ме адззылі, кыдз асывнас ӧксисӧ эта ворота дынӧ отир, пондісӧ ванзыны-серавны. А Ошнямыр босьтіс чер, ӧтік минутаӧ пизьдіс воротасӧ чагоккезӧ, а сэсся петкӧтіс нывсӧ ӧтӧрӧ. Петкӧтіс, юрсиӧттяс кыскӧмӧн. Да... Мый сэтӧн вӧлі, ог ме тэныт висьтав. Оз тырмы мыла, вонӧ. Только висьтала, что кынымкӧ лун бӧрті, кӧр нывкаыс ловзис вартлӧмсяняс, айыс сетіс сійӧ ылӧстӧм Проня сайӧ. Эн позорит, шуӧ, менӧ, кӧбыла. Ов законнӧй жӧниккӧт. Тыраягын кытшӧмкӧ тӧдісь морт венчайтӧм нійӧ сьӧд баняын, ен нимӧн гӧрӧдалӧм. Вот сідз... А недель бӧрті инькаыт лэдзчӧм ю дорӧ. Проняыс ой и лун вартлыны пондӧма да. Лэдзчӧм, а сэтӧн видзчисьӧ сійӧ сьӧлӧмшӧрыс, кӧдӧ радейтіс. Мӧдӧмась кыкнанныс уськӧтчыны ваас, медбы, значит, не маитчыны. Да петӧма сэк васис ӧтік инька и висьталӧм нылӧ: эд вӧйӧтчӧ пӧ, умӧль пӧ татӧн. Сетӧ пӧ лучше ен одзын клятва не вунӧтны ӧтамӧдӧс, радейтны пыр. Сэк пӧ и му вылас овны позяс... Вот кытшӧм делоэз вӧлісӧ, вонӧ... Конечно, недель бӧрті Ошнямырӧс судитісӧ нывсӧ вартлӧм понда. Судитісӧ, кыдз кулакӧс, иньдісӧ тюрьмаӧ, да мый толкыс? Нылыс ӧнӧдз маитчӧ Пронякӧт. — Мойд шуан? А тэ верит! Колӧ тэныд, вокӧ, тӧдны, мый коркӧ не ӧти ныв вӧйтчыліс. Кутасны жӧникъясныс ёна тешитчыны, нӧйтны да мый да — найӧ ваӧ бульк, и — ставыс! Ӧні, кор пӧчинокыс тыртӧм лоис, со и петавлывлӧны: гажтӧм жӧ налы. Вот висьтала ме тэныд ӧти ӧказия, а тэ кывзы. Тэ, аддза, детинаыс юра, тэныд позьӧ висьтавны: гӧгӧрвоан. Вӧлі тані Ошнямыр Сергалӧн ныв. Но, кыдзи эськӧ тэныд висьтавны, дзик дзоридз вӧлі. Да не прӧстӧй, а войся дзоридз вӧлі. Эмӧсь сэтшӧм дзоридзьяс. Луннас оз и тыдавны, вевттьысьӧны, быттьӧкӧ яндысьӧны шондісьыс. Зато войнас воссьӧны, и видзӧдлін эськӧ тэ, кутшӧм найӧ сэк мичаӧсь. Синтӧ чӧвтан на вылӧ и орӧдчыны он вермы. Сідз и кыскӧны ас дінаныс. Вот сэтшӧм и вӧлі Сергаыслӧн нылыс. И кутіс сійӧ радейтны ӧти зонмӧс, татчӧсӧс жӧ, позьӧ шуны, суседсӧ. И верма ме тэныд висьтавны, ёна найӧ радейтісны ӧта-мӧдсӧ. Зонмыс вӧлі честнӧй да бур сьӧлӧма, мича чужӧма да статя. И вот артмис татшӧм ӧказия. Кӧть на костын нинӧм на эз вӧв, кодікӧ йӧйталӧм могысь мавтӧма Ошнямырыслысь калитасӧ дьӧгӧдьӧн. Аслам синъясӧн аддзылі, кыдзи пӧчинокса став йӧзыс чукӧрмисны тайӧ калитка дорас, ваксисны-сералісны. А Ошнямыр босьтіс чер, ӧти здукӧн керавліс калитасӧ чагторъясӧ, а сэсся, юрсиӧдыс кыскӧмӧн, петкӧдіс нывсӧ. Да-а... Мый сэні вӧлі, тэныд ме ог висьтав. Вынӧй оз тырмы, вокӧ. Сӧмын висьтала, мый кымынкӧ лун мысти, кор нӧйтӧм бӧрын нылыс бурдыштіс, батьыс сетіс сійӧс тӧлктӧм-сямтӧм Проня сайӧ. Эн, шуӧ, позорит менӧ, кӧбыла. Ов законнӧй верӧскӧд. Тыраягын кутшӧмкӧ тӧдысь морт венчайтӧма найӧс сьӧд пывсянын, ен нимӧн гӧрддзалӧма. Вот сідз... А вежан мысти ичмоньыд лэччӧма нин ю дорӧ. Проняыс вой и лун нӧйтны пондӧма да. Лэччӧма, а сэні виччысьӧ сійӧс сьӧлӧмшӧрыс, кодӧс радейтіс. Кӧсйӧмаӧсь кыкнанныс шыбитчыны ваас, медым не маитчыны. Но петӧма сэки васьыс ӧти нывбаба и висьталӧма налы: энӧ вӧйтчӧй, омӧль тані. Лучшӧ сетӧй пӧ кыв некор не вунӧдны ӧта-мӧднытӧ, пыр радейтны. Сэки пӧ и му вылас овны позяс... Вот кутшӧм делӧяс вӧвліны, вокӧ... Дерт, вежон мысти Ошнямырӧс нывсӧ нӧйтӧмысь судитісны, пуксьӧдісны тюрьмаӧ, да мый тӧлкыс? Нылыс ӧнӧдз маитчӧ Пронякӧд.
— Ӧнӧ-ӧ-дз?! — дивуйтчи ме. — А мыля сія оз мун сы дынісь? — Ӧнӧдз?! — шензи ме. — А мыйла сійӧ оз мун сы дорысь?
— Э-э, вонӧ, да тэ тай юртӧм! А еныс? Кытчӧ, шуӧ, муна, кӧр грех эта... Вот эд мый! Висьтала ме тэныт, сія, еныс, вына эшӧ миян инькаэз коласын, авторитетнӧй, позьӧ шуны, пӧрись лешак. И колӧ висьтавны, пыр сы нимӧн отирсӧ повзьӧтлісӧ, не чожа вунӧтан. — Э-э, вокӧ! Тэ тай юртӧм вӧлӧм. А енмыс? Кытчӧ, шуӧ, муна, кор тайӧ грек. Вот ӧд мыйын делӧыс! Висьтала ме тэныд, енмыд, пӧрысь лешак, миян нывбабаяс пӧвстын вына на, позьӧ шуны, авторитетнӧй. Дерт жӧ, ӧд сы нимӧн йӧзсӧ пыр повзьӧдлісны. Регыдӧн оз вун!
И вдруг Сюромка вились сӧтіс кымӧс кузяс, горӧтчис: И друг Ырӧш бара кучкис кымӧсас, асьсӧ дивитіс:
— Тьфу, пӧрись икота, бӧра тай ылалі! Ой ни локтіс, а ме сё иза кывнам. А сія эд видзчисьны оз понды, кӧр дугда боньгыныт. Ладно, вонӧ, узь, а ме смекайтчышта невна. — Тьфу, пӧрысь выжыв, бара тай ылалін! Вой нин пуксис, а ме век иза кывнам. Сійӧ ӧд оз кут виччысьны, кор ме дугда больгыны. Ладнӧ, вокӧ, узь, а ме кыйӧдчышта.
Сія ӧвтыштіс мелань кинас, тшӧктіс онмӧссьыны и муніс керку бокӧ, кытӧн мудьӧт вылын сылӧн вӧлі ольпась: перина туйӧ кыза вӧвдӧм турун, а юрӧдзас — пешорка. Сійӧ ӧвтыштіс меным кинас, унмовськӧдчы пӧ, и муніс керка бокӧ, кӧні мудӧд вылын вӧлі сылӧн вольпасьыс: перина пыдди кыза вольсалӧма турун, а юрлӧс пыдди пестер.
Сюромка эз вод ольпасяс, а пуксис керку пельӧсас, юрсӧ ӧшӧтіс морос вылас, кывзісис. Ме пыри аслам плащ увтӧ, жмитчи кыдзыс вуж бердӧ. Думайтны Сюромка висьтасьӧм йылісь вӧлі неохота, но юрӧ нет-нет да и пырисӧ гажтӧм думаэз, син одзын вежмасисӧ нёштӧм картинаэз. Маитіс кытшӧмкӧ беспокойство. Ёртӧлӧ, тыдалӧ, вӧлі ӧддьӧн охота, медбы ме чожжык онмӧсси, и юаліс недыр мыйись: Ме шебраси аслам плащӧн, жмитчи му улысь мыччысьӧм кыз вуж бердӧ. Ырӧшлӧн висьталӧмтор йылысь думайтны эз вӧв окота, но юрын век жӧ бергалісны гажтӧм серпасъяс, эз вӧв лӧсьыд. Ырӧш эз вод вольпасяс, а пуксис керка пельӧсӧ, юрсӧ ӧшӧдіс морӧс вылас, кывзысис. Сылы, тыдалӧ, зэв ёна колі, медым ме регыдджык унмовси, да недыр мысти юаліс:
— Но кыдз, вонӧ, бур узьнытӧ? — Но кыдзи, вокӧ, бур узьнытӧ?
Ме эг шыась, а нарочно сэтшӧм горӧн понді пишкыны нырнам, что кынымкӧ минута чӧлісӧ турунын кӧбывкаэз, и нельки джынняннэз гусьӧнжык пондісӧ тронгыны. Сюромка сэтшӧм пишкӧмӧн кольччис довольнӧй и жалейтіс менӧ: Ме эг шыась. Мӧдарӧ, заводиті гораа кыскавны нырӧн. Ырӧшлы лои нимкодь да весиг жалитіс менӧ:
— Былись эд мыдзӧма, беднӧйка... — Збыль ӧд мудзӧма, коньӧр...
Чулаліс джын час мымда. Сюромка пукаліс вӧрзьӧтчытӧг, только мукӧдпырся зубыта сӧтліс кымӧс кузяс, нилис номмесӧ. Ме видзӧті, кыдз небоын орсісӧ звездаэз, вӧйсасис тӧлісь. Вӧлі мылякӧ гажтӧм. Вӧрас шумитісӧ паськыт лыссэз, шушкӧтчисӧ, дзик ловьяӧсь, и меным кажитчис, бытьтӧ сэтчин кинкӧ ветлӧтӧ. Ю дорын, лажмыт местаэзын, тожӧ кылісӧ кытшӧмкӧ шыэз, дзик кинкӧ ружтіс сэтчин и кыскаліс турунӧттяс мыйкӧ небытикӧ. Коли час джын гӧгӧр. Ырӧш пукаліс вӧрзьӧдчывтӧг, чӧв ланьтӧмӧн. Ме видзӧді, кыдзи енэжын ворсісны кодзувъяс, сунласис тӧлысь. Мыйлакӧ вӧлі гажтӧм. Вӧрас ловъя моз вашкӧдчисны паськыд лысъяс, и меным кажитчис, быттьӧкӧ кодкӧ сэні ветлӧдлӧ. Ю дорас, ловъясын, тожӧ кылісны кутшӧмкӧ шыяс, дзик быттьӧ кодкӧ ружтіс да турунӧдыс кыскалісны мыйкӧ небыдтор.
Ме куті ачымӧс сы вылын, что пола видзӧтны вӧрас. Меным кажитчӧ, бытьтӧ пуэз коласын кинкӧ сулалӧ и видзӧтӧ мелань. И пырис юрӧ дума, что вот петас вӧрсис кытшӧмкӧ ошнямыр, локтас ме дынӧ и юалас кыз голосӧн: «А ноко висьтав, лешакпиян, мыйлӧ татчӧ локтін?» Юалас и сӧтас юрвоманӧ зорӧн. Нервъяс ворсӧны. Ме гӧгӧрвои, мый пола видзӧдны вӧрас. Меным кажитчӧ, быттьӧкӧ кодкӧ сулалӧ пуяс костын да видзӧдӧ мелань. Юрӧ пырис дум, мый вот-вот вӧрсьыс петас кутшӧмкӧ ошнямыр, локтас кыдзьяс дорӧ да кыз гӧлӧсӧн юалас менсьым: «Нолы, висьтав, лешак пи, мыйла татчӧ локтін?»
Чулаліс эшӧ джын час мымда. Сюромка сё пукаліс важ местаас, пукаліс вӧрӧтчытӧг, нельки дугдіс вашӧтлыны номмесӧ. А вӧрыс шушкис и шушкис гажтӧма, и меным вӧлі ӧддьӧн охота, медбы Сюромка эз мун некытчӧ. Коли ещӧ час джын кымын. Ырӧш век на пукаліс местаас. А вӧрыс пыр шувгис и шувгис гажтӧма. Ме полі, мед жӧ эськӧ Ырӧшыс некытчӧ эз мун.
И — мый эта? Кытӧнкӧ дзик мыйкӧ тарснитіс, кинкӧ уфнитіс, бытьтӧ сьӧкыта ловзисис. Ме ятнӧя кылі, кыдз совсем неылын кышӧтіс турун. Юрӧ ачыс бергӧтчис эта шылань, синнэз оссисӧ паськытжыка, а сьӧлӧм токӧтіс горӧн-горӧн. Ток-ток, ток-ток... Ме нёджжаси пемытінас, видзӧті орӧттӧг керкуоккез коласӧт, но некинӧс эг казяв. Дыр видзӧтӧмсянь синнэз мыдзисӧ, куньсисӧ. А кышӧтӧмыс сё кыліс одзза местаын, керкуыс бокын, и бӧра кинкӧ дзик ойнитіс гусьӧн-гусьӧн. И кӧр ме вились осьті синнэзӧс, то казялі сэтшӧмӧ, мыйсянь ӧтік минутаӧ быдсӧн менӧ сывьяліс страшнӧй повзьӧм, сэтшӧм повзьӧм, кӧр охота кутчисьны кыкнан киӧн морос бердӧ и видзны сьӧлӧм, медбы эз пот сія нето эз чеччӧвт аслас местаись: керку пельӧс сайсянь вӧджжис кузь вуджӧр. Точнӧйжыка шуны, эта вӧлі кытшӧмкӧ сьӧд фигура. Кӧр вились мыччисис тӧлісь, вуджӧрыс сразу нюжаліс, лоис руд рӧмаӧн. Ме ӧні бура адззи, кыдз сія жагӧник вешшис стена пӧлӧн, и первӧйыс, мый пырис юрӧ, дак этӧ чеччӧвтны местаись, ӧдззыны котӧртны, пырны му пытшкӧ, ваӧ — только не адззыны, не кывны, кыдз страннӧй фигураыс кышӧтӧ керкуыс бокын. Вӧлі и мӧдік дума: ме просто пола, и эта быдӧс меным кажитчӧ Сюромкалӧн страшнӧй висьтасьӧм бӧрын. И кӧр понді думайтны этадз, меным лоис кокнитжык, нельки верми казявны, что Сюромка важмоз пукалӧ пельӧсас, оз и думайт вӧрзьӧтчыны. И — мый тайӧ? Кӧнкӧ мыйкӧ трачмуні, кодкӧ уфнитіс, быттьӧ сьӧкыда лолыштіс. Ме бура кылі, кыдзи дзик неылын кышакыліс турун. Юр ачыс бергӧдчис тайӧ шыланьыс, синъяс паськыда воссисны, а сьӧлӧм кучкаліс морӧскудйӧ: ток... ток... ток. Синъяс мудзисны, куньсисны, но некодӧс эг аддзы. А кышӧдчӧмыс век кыліс воддза местаас, керка бокын, и бара кодкӧ гусьӧн-гусьӧн быттьӧкӧ ойӧстіс. Кор ме выльысь восьті синъясӧс, мышку кузя котӧртіс йирмӧг, а кияс кутчысисны морӧсӧ, мед сьӧлӧм оз чеччышт аслас местаысь, оз пот... Керка пельӧс сайын вӧрис кузь вуджӧр, и сійӧ вӧлі морт вуджӧр кодь. Стӧчджыка кӧ шуны, тайӧ вӧлі кутшӧмкӧ сьӧд фигура. Сійӧ ёна топӧдчӧма стен бердӧ, пӧрӧма сук сьӧд массаӧ, и кор выльысь мыччысис тӧлысь, вуджӧрыс пыр жӧ нюжаліс, лоис руд рӧма. Ме ӧні бура аддзи, кыдзи сійӧ ньӧжйӧник вешйис стен пӧлӧныс. Окота лои чеччыштны местаысь, мыйвынысь котӧртны, пырны му пытшкӧ, ваӧ, мед сӧмын не аддзыны, кыдзи тешкодь фигураыс вуджрасьӧ керка бокын. Такӧд тшӧтш юрын визнитіс мӧд дум: Ырӧшлӧн страшнӧй висьт бӧрын ме пола, и ставыс тайӧ меным кажитчӧ. Тадзи думыштӧм бӧрын меным лоис кокньыдджык да весиг казялі: Ырӧш важ моз пукалӧ пельӧсын, оз и думайт вӧрзьӧдчыны.
Но керкуыс бокын, туй ладорсяняс, мыйкӧ сё вӧрис, и ме вежӧрті, что сэтӧн кинкӧ ловья... Да, эта вӧлі кинкӧ морт кодь! Сія видзӧтіс мелань и вешшис жагӧник, кывзісьӧмӧн, и кышӧтіс коккезнас. Неужели быль, мый висьтасис Сюромкаыс? Неужели? Нет, оз вермы лоны! Но кин эта?! И ог тӧд, мый бы ме кери одзланьын, если бы эта ловья существоыс эз шыась морт голосӧн: Но туйладор керка бокас мыйкӧ век вӧрис, и ме гӧгӧрвои, мый кодкӧ сэні ловъя... Да, тайӧ вӧлі морт! Кутшӧмкӧ олӧма нин нывбаба сулаліс пельӧсас да видзӧдіс мелань... Видзӧдіс и ньӧжйӧникӧн вешйис, кывзысис, кокъяснас кышӧдчис. И бара лои окота чеччыштны плащ улысь, котӧртны ылӧджык. Неужели сійӧ збыль, мый висьталіс Ырӧш? Оз, оз вермы лоны! Но коді тайӧ? Ог тӧд, мый эськӧ вӧчи ме, эз кӧ тайӧ ловъя лолыс шыась настӧящӧй морт гӧлӧсӧн:
— Митю-у-у... — Митю-у-у...
Сьӧлӧм вылісь усис сьӧкыт из, кокнитжык лоис лолавны.
И коліс адззыны, кыдз Сюромка чеччӧвтіс кок йылӧ! Дзик пуртӧн сійӧ бытшкисӧ нето лэдзисӧ сы пырйӧт вына электрическӧй ток. Аддзылінныд кӧ эськӧ ті, кыдзи Ырӧш чеччыштіс кок йылӧ! Дзик быттьӧ пуртӧн сутшкисны сійӧс либӧ сы пытшкӧ лэдзисны вына ток.
— Тэ?.. Локтін? — шыасис сія дрӧжитана голосӧн и тулис синнэсӧ. — Тьфу, кыдз повзьӧтін, чуть сьӧлӧмӧ эз пот... — Тэ?.. Локтін? — дрӧжжитан гӧлӧсӧн шыасис сійӧ да тілис синъяссӧ. — Тьфу, кыдзи повзьӧдін...
— Т-с-с, — ӧмаліс сійӧ инькаыс и мыччаліс мелань кинас. — Кин? — Т-с-с, — вомаліс сійӧс нывбаба да мелань индіс кинас: — Коді?
— А-а, эта? Да городскӧй ӧтік... Мӧйму тай чериаліс татӧн... Кыскалӧны сійӧ куллес, керны нем да. А тэ эн пов. Мыдз сія, узьӧ, кыдз вийӧм. Сэтчӧ жӧ, сюромкаӧн ме сійӧ юкталі, литра куим, натьтӧ, больскис и син одзын коддзис, мыля некӧр сійӧ абу ювлӧма. — А-а, тайӧ? Карса... Кольӧм во тай кыйсис тані... Кыскалӧны сійӧс бесъясыс, кернытӧ нинӧм да. А тэ эн пов. Сійӧ мудз, узьӧ...
— А ме думайті — тэ сэтӧн узян. Джын час сьӧрна, чомору, эг лысьт петнытӧ. Мыся, эн узьлы тай сэтӧн да... — А ме думайті — тэ сэні узян. Час джын кымын эг лысьт матыстчыны, мися, тэ сэні узян...
— Ме? Мый, менам аслам ольпась абу? Тожӧ... — Ме? Мый, менам аслам вольпась абу? Тожӧ...
Инька вӧлі неыджыт мыгӧра. Пасьталӧма то ли сарафан, то ли вылын костуя дубас, юр вылас пуктӧма кокнитик чышьян, ӧт кияс сія видзис кытшӧмкӧ сумка, мӧднас вылына лэбтӧм дубас подувсӧ, медбы не вадны лысваас. Кӧр сія пуксис ордчӧн Сюромкакӧт, ме казялі, что чужӧмыс сылӧн векнитик, ачыс кӧсыник, высиныс невна горбыльтчыштӧма. Сюромка ордчӧн сыкӧт кажитчис богатырьӧн. Нывбаба вӧлі неыджыд тушаа. Пасьталӧма то ли сарапан, то ли вылын коска дубас, ичӧтик чышъяна. Ӧти киас кутшӧмкӧ сумка, мӧднас лэптӧма дубас подолсӧ, мед эз кӧтась лысванас. Кор сійӧ пуксис Ырӧшкӧд орччӧн, ме казялі: чужӧмыс сылӧн векни, ачыс косіник, неуна гӧрбыльтчыштӧма.
— Мый нӧ дыр эн лок? — инькасӧ ас бердас жмитікӧ юаліс сія. — Пукалі, пукалі, тэнӧ видзчисьтӧн, и ланьтсьӧма... — Мый нӧ татшӧм дыр эн лок? — нывбабасӧ ас бердӧ топӧдігмоз юаліс сійӧ. — Виччысигад вугыртсьӧма...
Инька мугтӧг жмитчис Сюромка бердӧ, юрсӧ сюйыштіс кытчӧкӧ сы конувтӧ, бытьтӧ вӧлі кӧдзыт сылӧ, чышьяныс эта коста лэдзчисис пельпоннэз вылас, ачыс, тыдалӧ, дрӧжитіс. Нывбаба топӧдчис сы бердӧ, кӧдзыдысла юрсӧ сюйис киняулас, чышъяныс лэччис пельпом вылас.
— Дыр эз ланьт, — горӧтчис сія негорӧн. — Быдса бутылка лакис да сё боньгис нетуликасӧ. Сэсся иньдіс менӧ мӧдік бутылкала. Локті гортӧ, а сія узьӧ ни джоджас... — Дыр эз ланьт, — гусьӧнмоз шуис сійӧ. — Быдса бутылка лакис, пыр ӧтарӧ сӧрис сямтӧма... Сэсся ыстіс менӧ мӧд бутылкала. Гортӧ локті, а сійӧ узьӧ нин джоджас...
— Сідз, — шуис равнодушнӧя Сюромка и малыштіс инькаыслісь юрсӧ, пельпоннэсӧ. Мӧдыс пукаліс сё сідз жӧ юрсӧ сайӧвтӧмӧн, мыйкӧ шушкис гусьӧник, дзик ас кежас, сэсся ыш ловзисис. Ме вежӧрті, кин эта инькаыс, кӧр кылі тӧдса ни меным кыв — нетуликасӧ. Сія вӧлі ылӧстӧм Пронялӧн иньыс. А Сюромкаыс — не кин мӧдік, кыдз сія добрӧй и небыт сьӧлӧма детинаыс, кӧдӧ любитіс Ошнямырлӧн нылыс... Дак вот мыйлӧ ковсьӧм Сюромкалӧ кольччыны татчӧ ой кежас ӧтнаслӧ! А ме думайті... Но да сёр ни каитчыны. Не чеччыны жӧ ӧні да мунны кытчӧкӧ, кӧть бы вакрамешӧ... Меным только ӧтік тор и кольччис керны — этӧ думайтны, что важ ни отрубыс, совсем пустӧй, и керкуэс сісьмӧмась ни начӧдз, а видзӧт, сё эшӧ олӧ кытшӧмкӧ страннӧй и невежӧртана оланӧн. А думайтны умӧля эна кык морт йылісь ме эг вермы. Сьӧлӧмӧ пырис чувство, кӧда тшӧктіс относитчыны ны дынӧ уваженнёӧн. Эд кыным ни год нія пантасьлӧны гусьӧн, кытшӧм бы эз вӧв сьӧкыт, а любитӧны ӧтамӧдӧс! — Сідз, — шуис Ырӧш да малыштіс нывбабалысь юрсисӧ, пельпомъяссӧ. Мӧдыс пукаліс век сідз жӧ юрсӧ сайӧдӧмӧн, гусьӧн мыйкӧ вашкӧдіс, сэсся сьӧкыда ышловзис. Ме гӧгӧрвои, коді вӧлі тайӧ нывбабаыс. Кор гарыштіс миянлы тӧдса «сямтӧм» кывсӧ, ме пыр и тӧді: тайӧ вӧлі сямтӧм Пронялӧн гӧтырыс... Ырӧш, сідзкӧ, дерт нин сійӧ «бур да небыд сьӧлӧма зонмыс», кодӧс радейтіс Ошнямырлӧн нылыс... Эк, со мыйла ковмӧма вой кежлӧ Ырӧшлы кольччыны татчӧ ӧтнаслы!
Инька калькӧтчис Сюромка бердісь, серӧмтчис гусьӧн: Нывбаба калькӧдчис Ырӧш дінысь, гусьӧн серӧктіс:
— А ме тэныт кӧч нянь вайи... — А ме тэныд кӧч нянь вайи.
И кыскис сумкасис нето чышьян, нето пызандӧра, ольсаліс му вылас, сэсся кыскис кытшӧмкӧ посуда, стакан, кольттез, нянь. И перйис сумкасьыс нето чышъян, нето пызан дӧра, вольсаліс му вылас, сэсся перйис ичӧтик туис, стӧкан, котлетъяс, нянь.
Сюромка радмис, кыдз кага, кӧдалӧ нюжӧтасӧ чӧскыттор, шыасис дивуйтчӧмӧн: Ырӧш гажмис, быттьӧ кагалы мыччисны чӧскыдтор, шензис:
— Эхма, быдса петырлун! И сурок, тыдалӧ, эм... — Со ӧд, быдса петырлун! И суртор, тыдалӧ, эм...
Инька бӧра жмитчис Сюромка бердӧ, чӧліс. А мӧдыт кисьтіс стаканӧ сурсӧ, юис и курччӧвтіс няньтор. Нывбаба бара топӧдчис сы бердӧ, чӧв ланьтіс. А Ырӧш кисьтіс сурсӧ, юис да курччис нянь тор.
— Ох, сьӧкыт меным, Митю, стыд маитӧ, — шушкис инькаыс. — Грех эд... — Ок, сьӧкыд меным, Митю, яндзим мучитӧ, — вашкӧдіс нывбаба. — Грек ӧд...
— Эка, кытчӧ кӧстӧ! Грех... А сія тэнӧ дугдывтӧг вартлӧ, дак эта не грех? Тэ вот мый... Мунам татісь! Эх, кыдз ми пондам овны тэкӧт! Мунам ашын жӧ. — Со ӧд, кытчӧ синан! Грек... А сійӧ тэнӧ комын во нин нӧйтӧ, да тайӧ абу грек. Тэ вот мый... Ог вермы сэсся ме терпитны, колӧ решитчыны... — И пӧся содтіс: — Мунам татысь! Эк, кыдзи ми кутам овны! Аски жӧ мунам.
— Ашын? Ой, Митю, пола! — Аски? Ой, Митю, пола!
— Бӧбӧв! Тырмас сыкӧт маитчыныт! Тэ видзӧт, кин вылӧ вачкисян? Куш коска. А ме тэнӧ барыня туйӧ видзны понда, ме тэнӧ... — Йӧюкӧй, тырмас сыкӧд маитчыны! Но видзӧд, код вылӧ тэ мунан? Кос-косьмӧмыд. А ме тэнӧ баруня моз кута видзны, ме тэнӧ...
Инька шы эз сет. Нывбаба шы эз сет.
Сурыссянь Сюромка коддзыштіс и видзис асьсӧ смевжыка: малаліс инькалісь мороссӧ, жмитліс ас бердас. Мӧдыслӧ, тыдалӧ, эта эз гленитчы, сія вешшис ылӧжык бокӧ и шуис лӧгӧнмоз: Сурӧн коддзыштӧм Ырӧш сывйыштіс сійӧс. Нывбаба вешйыштіс:
— Но, кытшӧм тэ! Кольлав менӧ кӧть джын туйсӧ, пола ӧтнам вӧрас. Куим верста эд... — Кутшӧм тэ... Колльӧд менӧ кӧть джын туйсӧ: вӧрас пола ӧтнам... Куим верст ӧд...
Сюромка бӧра жмитіс сійӧ морос бердас, мыйкӧ баитіс гусьӧн, лолаліс сьӧкыта. Инька мездӧтчис, сувтіс кок вылӧ. Ырӧш мыйкӧ гусьӧн вашкӧдіс, сьӧкыда лолаліс. Нывбаба чеччис:
— Мунам, ужо... — Мунам нин...
И босьтіс киас сумка. И босьтіс киас сумкасӧ.
Сюромка дыша чеччис местасис, пыркӧтіс вешьян бердсис турунчирсӧ, кутіс инькасӧ пельпоннэзӧт, жмитіс. И мунісӧ жагӧник, ӧтамӧд бердӧ кутчисьӧмӧн, саясисӧ керку пельӧс сайӧ. Ырӧш дыша чеччис места вывсьыс, паськӧмсьыс пыркӧдіс турун чиръяссӧ, бара кутыштіс нывбабаӧс пельпомӧдыс... И мунісны ньӧжйӧник, ӧта-мӧд бердӧ топӧдчӧмӧн, саялісны пельӧс сайӧ.
Кадыс вӧлі, натьтӧ, матын ни югдандорын. Лоис кӧдзыткодь. Турун вылӧ усис сьӧкыт лысва. Кокнитик тӧлок пӧльтіс вӧр ладорсянь крепыт сира руӧн, вайис сьӧрас ульсалӧм лыс дук. Вӧрыс важмоз ружтіс и сё кышӧтіс, бытьтӧ сэтчин кинкӧ ветлӧтіс, ляшмасис, коккесӧ кыскалӧмӧн. Но ме эг ни пов эта кышӧтӧмись, думаэз юрын вӧлісӧ кокнитӧсь. Кадыс вӧлі, гашкӧ, югдандор нин. Лоис кӧдзыдкодь. Турун вылӧ усис сьӧкыд лысва. Ичӧтик тӧв пӧльыштіс вӧрладорсянь, ӧвтіс уль лыс да свежӧй сир дук. Вӧрыс важ моз ружтіс да пыр кажитчис, быттьӧкӧ кодкӧ сэні ветлӧдлӧ кокъяссӧ кыскалігтыр. Но ме эг нин пов тайӧ кышӧдчӧмсьыс, юрын думъяс вӧліны кокниӧсь.
Шондіпетандор локтіс Сюромка. Вӧлі сія мыдз, пидзӧсви вамӧма. Медбы саймӧтны менӧ, сія чувйыштіс кынӧмам плеть оропӧн, шуис гажӧн: Шонді петандор локтіс Ырӧш. Сійӧ вӧлі мудз, гач кокъясыс пидзӧсӧдзыс кӧтасьӧмаӧсь лысванас. Медым садьмӧдны менӧ, плеть воропнас тувкыштіс кынӧмам, гажаа шуис:
— Думайтан, чериыс видзчисьны тэнӧ пондас? Мун жӧ вугрась, как раз кадыс. И ыркыт, и мича, этшӧм асылас ёна кокалӧ. — Думайтан, чериыс кутас виччысьны тэнӧ? Мун да вугрась: буретш кад.
— Не, дядя Митя, Льӧмваӧ колӧ мунны. Охота видзӧтны, кыдз вӧрсӧ заптӧны... — Ог, дядя Митя, Льӧмваӧ колӧ мунны. Окота видзӧдлыны, кыдзи вӧрсӧ лэдзӧны.
Сюромка эз кыв медбӧрья кыввезӧс. Сія ӧддьӧн радмис менам юӧрсянь, чужӧмыс вевттисис паськыт шынньӧлӧн, синнэс свиттялісӧ. Ырӧш эз кыв менсьым бӧръя кывъясӧс, радысла чужӧмыс тыри нюмӧн, синъясыс югъялісны:
— Льӧмваӧ? Мӧдан Льӧмваӧ мунны? Ах тэ, лешак! — сія перыта котӧртіс аслас ольпась дынӧ, босьтіс ӧт киас пешоркасӧ, мӧдас лагун и нюжӧтіс нійӧ меным. — Босьт! Босьт чериоксӧ, пригодитчас. А лагунсис ю, бытшӧм сюромкаыс! — Льӧмваӧ? Льӧмваӧ кӧсъян мунны? О, господьӧ! — сійӧ тэрыба котӧртіс аслас вольпась дорӧ, ӧти киӧ босьтіс чери туиссӧ, мӧдӧ шома ырӧш тыра лагунсӧ да мыччис меным: — На, босьт черисӧ... тэныд пригӧдитчас. А лагунсьыс ю, чӧскыд ырӧшыс!
Черисис ме откажитчи, а лагунсис ковсис юыштны. Чериысь ме ӧткажитчи, а лагунсьыс ковмис видлыны.
— Но мый, адззылін кузь юрсиасӧ? — Но мый, аддзылін кузь юрсиасӧ? — вомдорӧс чышкалі ме.
— Кытшӧм, лешак, адззылін! — серьёзнӧя шыасис Сюромка и ӧвтыштіс кинас. — Вӧввезӧ тай вуджӧмась сай берегас, ойбыт вӧтліси. Да и тэ, увья ректан, мешайтчин тожӧ. Баиті, мыся, оз сія кыкыс дынӧ пет, дак тэныт кывджын эз тӧр. — Кутшӧм, лешак, аддзылан! — зэв збыльысь шуис Ырӧш да ӧвтыштіс кинас. — Вӧвъясыс, чӧртъяс, вуджӧмаӧсь мӧдар берегас, войбыд ковмис вӧтлысьны. Да и тэ, сюртӧм бес, мешайтчин жӧ. Висьтавлі тай, мися, кык дінад сійӧ оз пет, да тэ эн кывзысь.
— Виноват! Сейчас муна вот, а тэ смекайтчы, дозирайт сійӧ. А нывкаыс, кӧда вӧйӧтчыны тай мӧдӧм, ойся цветок вылӧ вачкисис, шуан? — Мыжа, ӧні жӧ муна, а тэ кыйӧдчыв. А нылыс, шуан, коді тай вӧйтчынысӧ кӧсйыліс, войся дзоридз кодьыс?
Этӧ вопроссӧ Сюромка бытьтӧ эз и кыв, ылӧтіс менӧ мӧдӧрӧ: Тайӧ юалӧмсӧ Ырӧш бара эз кыв, сёрнисӧ бергӧдіс мӧдарӧ:
— Бӧр мунтӧн кежав Тыраягас, пырав ме ордӧ. Ме, вонӧ, настоящӧй ырӧшӧн гӧститӧта, может, и винатор адззисяс. — Бӧр мунігад кежав Тыраягас, пырав ме ордӧ. Ме, вокӧ, настӧящӧй ырӧшӧн гӧститӧда, гашкӧ и винатор сюрас.
И ми янсӧтчим. Сюромка вашӧтіс вӧввесӧ деревняӧ, а ме муні Льӧмваӧ. И ми янсӧдчим. Ырӧш нуӧдіс вӧвъяссӧ деревняӧ, а ме муні Льӧмваӧ.
Юны Сюромкалісь настоящӧй ырӧшсӧ сідз эг и ешты. Кӧр, кык неделя бӧрті, гортӧ ни мунтӧн, сувтчи Тыраягӧ, меным юӧртісӧ, что дядя Митя кытчӧкӧ мунӧма татісь. И не ӧтнас. Юны дядя Митялысь настӧящӧй ырӧшсӧ меным эз удайтчы. Кор кык вежон бӧрын, гортӧ мунігӧн, сувтлі Тыраягӧ, меным висьталісны, мый Ырӧш мунӧма татысь кутшӧмкӧ ылыс леспромхозӧ, а керка ӧшиньяссӧ тупкӧма пӧвъясӧн. И мунӧма абу ӧтнас.
— Инькаӧс жӧник дынісь гусяліс, нёштӧм рака, — жевгис ӧтік старушка. — Мыйнӧ, мыйнӧ, этшӧм грех... Страшнӧй суд лоас сылӧ, вежӧмлӧ. — Нывбабаӧс верӧсыслысь гусялӧма, мисьтӧм рака, — броткӧдчис ӧти старука. — Страшнӧй суд сылы лоас, вежӧмлы.
Эта юӧрыс эз дивит менӧ. Ме тӧді, что Сюромка мунас. И мунас не ӧтнас... Тайӧ юӧрыс эз шензьӧд менӧ. Ме тӧді, мый Ырӧш мунас. И мунас не ӧтнас...
Комиӧн (Перым ногӧн) гижис
Минин Иван Алексеевич
Комиӧн