ӦГРАВ, ӦГРАВ!

Ойбыт укӧтіс бӧбмӧм тӧв: унняліс, горзіс, сьыліс да чапкасис пашмӧм голиэзӧн, кӧдна гер ӧшалісӧ пӧрись кӧз вылын.

Эта кӧзыс красуйтчис-быдмис вӧр дорас, вӧлі учӧтжык мӧддэсся, зэв лапыт да вапсыра увья. Дед Митроклӧн балаганыс сы увтын оліс топ гуня пола увтын. Ӧддьӧн кужӧмӧн панӧм-керӧм, сія вӧлі шоныт и прокод кӧс. Кӧть кыдз виззяс-зэрас и сырлёль ӧшӧтчасӧ сук уввес, шуч вамасӧ да дугдасӧ видзны зэрсӧ, а старик позӧ ваыс оз сидз: балаган вевттьӧма дуб банӧн.

Вот и таой зэрыс чеччӧвтӧмӧн вартіс кӧз кузяс да гыма-йирка етшасисӧ кымӧррез, а Митроклӧ балаганын вӧлі сідз жӧ бур, кыдз гортас гор вылын.

Югдандорас кымӧррес рознитчисӧ и только рытвылас чели-пели ӧшалісӧ кынымкӧ торок. Вынтӧмсялӧм тӧв мыйкӧ шушкис пӧрись кӧзлӧ, бытьтӧ каитчис, мыля бӧбувьяс ӧддьӧн пиньлаліс сійӧ, вӧрзьӧтіс вужжесӧ. Паныт мыйкӧ шувгис и пӧрись кӧз, натьтӧ, норасис, а может, и лёкӧтчис аслас сьӧкыт судьба вылӧ.

Кин и оз вежӧрт тӧвлісь да пуэзлісь шушкӧмсӧ, а пӧрись мортлӧ сія вежӧртана. Эд кыным ни гожум старик чулӧтӧ татӧн, палёжас! Сыкӧт часто сёрнитӧ-баитӧ кеньжак, куруӧн орсӧны тарпияннэз, синмасьӧ да дразнитчӧ сюзь, кыр асыввезнас орсӧ побудка. Мый и баитны, паськыта тӧдӧны старикӧс раменнёись оліссез. Нельки ёж вовлісьӧ сыкӧт.

Сідз Митрок думайтіс нитшись керӧм перина вылын куйлікӧ. Чеччыны эз тэрмась талун: ойсӧ узис умӧля. Умӧля сысянь, что лёк погоддя тожӧ маитӧ сылісь пӧрись коскаэсӧ, кӧть и Митрок йӧз одзын асьсӧ видзӧ эшӧ чатырӧн. Ох, годдэз, годдэз! Мыйсӧ тійӧ эд мыччалӧ миян векын. А восемьдесят год овны — не ма лакны. Только созлӧй морт, созлӧй крестьянин эна годдэзӧ вермӧ уджавны.

Ӧтӧрын кыліс тырган шы, старик вӧрзьӧтчис местаас.

— Саймӧтӧ ни бӧра, тюня-параня, — серӧмтчис старик да чеччис ольпасись, пондіс тэрмасьны. Конечно, Митрок важын ни бы чеччис, да нарочно видзчисис, кӧр локтас кырыс. А кыр сё вартӧ нырнас, вӧрсӧ чанӧтӧ.

Старик лэбтіс скӧвер — пырейись гӧрдззӧм ыбӧс вевт — и петіс балагансис. Паныт койыштіс шонді югӧр, гусяліс синнэсӧ. Митрок кишупнас адззис лабичок, пуксис. Шонді дзик руша коросьӧн малыштіс куш юрвомансӧ, югӧррес сидзисӧ гӧрд йӧрнӧс да суконнӧй вешьян пыр, шонтісӧ вӧйӧм мороссӧ да ёсьмӧм пидзӧссэсӧ.

Долыт, гажа. Пукав бы да пукав этадз, шонтісь, вишкы табак, но Митроклӧ колӧ видзӧтны ассис хозяйствосӧ, тӧдны, быдӧс я ладно, эз я ыжмав ойнас лёк тӧлыс.

Старик резыштіс чужӧмас чуманокись ва да бадьӧгасис-муніс мош карӧ, кыдз шуис сія пасекасӧ.

Мачуркаэз сулалісӧ ота кушинын лёдзӧн-лёдзӧн и аркмӧтісӧ учӧтик городок. Сэтӧн вӧлісӧ нёль уличка. Быд уличкалӧн аслас ним: Кипряжник, Кӧчвоняин, Ключьюр, Сьӧлавидз. Сідз нійӧ шуис Митроклӧн внучек Минька.

Митрок ылісянь казяліс, что тӧвчик гудралӧма-даки ӧтік уличкаын.

— Ок тэ, тюня-параня, — пондіс клопӧтны боккесӧ мошвидзись. — Пукалан, лёгостай, тоштӧ косьтан, а сія то мый пансьӧ: мачуркаыс пӧрӧма! — и ӧдззис ляшмасьны-котрасьны, лӧсьӧтны одззася порядоксӧ.

Эта удж сайись старикӧс застанитіс павжун. Позис бы и сёйыштны, да внучекыс сё абу. А ӧтнаслӧн кынӧмыс оз симав.

Миня тӧн эшӧ муніс гортас лукла да кушманла. Эта карчыс Митроклӧ медбур сёян. Иньдӧтас старухаыс берсясӧ: и кольттез, и рисьтупӧссез, и шаньгаэз — старик перво-медперво кушман пестерсис кыскӧ. Кыскас, тёритас сійӧ, маӧн сорлалас да няньӧн тюкӧ-курмалӧ. Тюкӧ, ошкӧ ассис стряпнясӧ, Миняӧс велӧтӧ:

— Ме моз, тюня-параня, сёй — сто год олан.

Миня сералӧ:

— Маыс и ӧтнас чӧскыт. Ме кушсӧ сёя.

— Сія-ту сідз, — соглашайтчӧ старик, — да кушмантӧг абужык пользительнӧй. Кушманыс, сія... Вот босьтам кӧрт. Дорӧт сэтісь чер — ныж петас. А содтышт кӧртас углярод...

— Углерод, деда. Бӧра не сідз шуин.

— Но ась углерод... Нето этійӧ... кыдз сійӧ, тюня-параня...

— Хром, — адззӧ Миня колана кывсӧ, кӧдӧ не ӧтпырись ни кывліс дедыссянь.

— ...содтасӧ сэтчӧ хром — бритваэз керӧны. Сідз и кушманыс. Углярод туйӧ мортыслӧ. Коскаэтӧ чорзьӧтӧ, яйтӧ суктӧ. Ме моз сёй — сто год олан и кушык-кашык он кер.

— Нечӧскыт кушманыс, деда, — бӧра шуас Миня.

— Мый тэ и баитан, — дивуйтчӧ дед. — Ма сорнас и отопка ньылыштан, он казяв!

Старик видзчисис-керис зонкасӧ, сія эз лок, и муніс куртны.

Умӧль кайис таво туруныс, шоч да дженыт, но Митроклӧн куим кос ни ӧксис. Керны эшӧ сымда жӧ, и Серанькаыс тӧвсӧ бӧбӧтас. Мошвидзись эз мӧд таво турунавны, да старухаыслӧ эз лысьт поперечитны. Сыкӧт унасӧ он вермась. Сьӧкыт характера инька. Ог, шуӧ, мӧс родсӧ орӧтӧ и быдӧс. Йӧвтӧг пӧ ме и годсӧ ог ов. А юав тэ сылісь, уна я йӧвсӧ сёйӧ. Стакан етш луннас юас дак ладно. Остаткисӧ внучеккеслӧ новйӧ, рись тупӧссезӧн джын деревнясӧ потшшуйтӧ. Вельмӧма, мый и шуны. Нывканас лӧнься-лӧнь вӧлі, лишньӧй кыв эз висьтав, а петіс жӧник саяс — кузь пиня пила кодь лоис и нырсӧ клюкаӧн он судзӧт. Неӧтпыр жӧникыс юрси бердӧ кутчыліс. Правда, вӧлі мый понда: мошвидзись часто маӧн потшшуйтліс инькаэсӧ. И, конечно... Да кыдз тэ он нетшкӧвт ягӧд тусьсӧ, кӧр сія ачыс ӧмӧ готов пырны? Вӧвлі грехыс. Митрок ачыс винитчис сыбӧрын. Но юрсиыс разь виноват? Поди, сысянь и кушмис юрыс. Видзӧт, тошсӧ эз вӧрӧт, дак сё зу кодь тшӧк.

Да, характер... А мӧдкодьыс Митроклӧ бӧра оз ков. Кытшӧм сія хозяйка, кӧдалӧн ӧмас ва кынмӧма? Асныртӧм инькаыт дзик дуб нянь. Семьяат инькаыс, батя, мош матка туйӧ. Сы гӧгӧр и ройыс каттисьӧ...

Старик аскӧттяс сёрнитікӧ лёдзалыштіс ытшкӧмсӧ да чукӧртіс зород бокас. Локтас Миня, тальны пондас зородсӧ, а Митрок лэбтас турунсӧ.

Лун вӧлі мича, шонді ма сотьӧн ӧшаліс юр весьтын, и Митрок тӧдіс, что зэр оз костіав сылісь уджсӧ. А кыдзи сідз, то позьӧ и шоччисьыштны.

Пуксис сія чирйисян турун вылӧ, бокӧ чапкис аскатайтӧм шляпасӧ. Воск рӧма юрыс свиттьӧвтіс склянка моз и вӧлі ва. Старик кыскис йи сайись чышкӧток, малыштіс сійӧн юр вывсис ньылӧм дзуллесӧ. Сэсся шовкнитіс-осьтіс табакерка, судзӧтіс чепӧльнас табак, пешаліс нырпыссэзас и лӧсьӧтчис чӧскыта несйыны, да эз ешты: кыліс горӧтлӧм шы.

— Минькаыс кылӧ локтіс, — шуис старик. — Пажнайтамӧ ӧні.

Деревича кока Миня тшакыльӧн тарӧвтчис балаган дынсянь и мыйкӧ чирзіс. А мый — старик эз вежӧрт.

— Ӧка ванзӧ, бытьтӧ ӧшӧм, — эз ошкы внучексӧ дед.

— Морт, мыся, кулӧма, морт, — юӧртіс зонка, кӧр ышки-пойки сувтчис зород бокӧ. Дзӧдзыв кодь лэчыт синоккезас тӧдчис повзьӧм.

— Кытшӧм морт, кытӧн? — том прытьӧн лэбтісис старик. — Морт моз висьтав, эн тараторит.

— Этчинка, Турпан лог дорас. Пу увтӧ шедӧма.

— Ок, тюня-параня! Кыдз нӧ сія? — досадуйтіс Митрок. — Беда.

Зонка тэрмӧтіс дедсӧ, кыскис сійӧ киӧттяс, и старик проворнӧя иньдӧтчис логланьӧ, нельки вунӧтіс босьтны шляпасӧ. Мунісӧ туйтӧг, веськыта мырьяинӧт. Одзаныс пӧлінясисӧ кык вуджӧр — сажень да аршин. Миня косӧйӧн видзӧтліс пиньласись вуджӧр вылас и берегитчис, мед не тальччыны сы вылӧ. Бедаыс, натьтӧ, сія и эм, вуджӧрыс. Прокод тэ сьӧрын ветлӧтӧ. Сійӧ и видзӧт, мед эз кутчы тэ бердӧ. Луннас даки тыдалӧ, а вот ойнас...

Митрок думайтіс тожӧ бедаыс йылісь. Только мӧднёж. Сійӧ, бедасӧ, ордйыны позьӧ, ежели синтӧ да пельтӧ лэчыта видзны, тӧдны, мый керсьӧ одзат и бӧрат.

— Кытӧн? — юаліс дед.

— Чегӧм пусӧ адззан? Сы увтын.

Старик дзар керис йывтӧм ньыв вылӧ, и быдӧс вежӧртана лоис. Морт муніс эта пу бокӧт, тӧвнырӧн нетшкӧвтіс сісь пулісь йывсӧ, чегӧтіс да брякнитіс улӧ, кольмӧтіс мунісьсӧ. Трагедия. Ежели бы сэк локны, может и мездін бы мортсӧ смертьыс налькись. А ӧні нем ни он кер. Только юӧртан гортас, мед дзебисӧ.

Но морт эшӧ лолаліс и бледӧтӧм тырппес мыйкӧ шамйисӧ. Может, кыдз часто овлӧ эттшӧм кадӧ, детина мӧдіс горӧтчыны меддженыт и меддона кыв — мам? А поди кытсаліс, ежели гӧтыра, инькасӧ, мӧдіс сетны сылӧ медбӧрья наказ, мӧдіс тшӧктыны берегитны челядьсӧ да не вунӧтны пӧрись аймамсӧ.

Деда-внучека чапкисӧ бокӧ пу йывсӧ. Му вылас, кытӧн неважын старик ытшкис турун, куйліс дженытик плаща да кузь сапога тӧдтӧм мужик. Кин сія: пастух, нефтеразведчик, ягӧдалісь? Кин бы эз вӧв, а морт. Колӧ мырддьыны сійӧ смертьыс киись.

— Видзӧт, деда, компас, — шуис Миня.

Но дед эз кывзы сійӧ.

— Ваок да ма вай... Тӧвчикӧн!

Митрок сувтіс пидзӧс вылас, лэбтіс мортлісь шапкатӧм юрсӧ. Юрсиыс ва, коколясьӧм, дзугсьӧма. Кымӧс дынас чунь кузя чочком визь — рана. Чегӧм улӧн зыртыштӧма, кульыштӧма кучиксӧ, и юрчашкаыс тыдалӧ.

«Вон сія кӧда», — казяліс старик вирӧсь увсӧ. Ранаыс косьмӧма ни, но Митрок сётаки кӧртыштіс сійӧ чышкӧтокнас.

Атшалӧм Миня вайис ма туисок да чуманокӧн ва. Этӧ туисоксӧ мошвидзись тыртіс майскӧй взяткаӧн и ӧнӧдз эз на осьтлы. Лекарство туйӧ видзис, меддона гӧссез понда берегитіс.

Старик дрӧжитан киэзнас содтіс чуманокас ма, сетіс дозсӧ Минялӧ:

— Кисьт ӧмас. Да эн пӧдты.

Садьтӧм морт бытьтӧ кыліс энӧ кыввесӧ и ачыс осьтіс ӧмсӧ. Юис горша, дзик баня бӧрсянь, но кыдз видзчисисӧ деда-внучека, эз шыась. И синнэсӧ эз осьт.

— Врачӧс колӧ, — шушкыштіс Миня.

Митрок чӧліс. Чӧліс да думайтіс. Врачӧс... Кысь тэ сійӧ часӧт ваян? Медматісь деревняӧдз дас верста, а районӧдз нёль сыным. Миня самокатсӧ гортас кольӧма. Подӧн мунны — ойыс вӧтас. И мортыс сымдасӧ чередь терпитас. Кӧть бы председательыс легковушканас кайис. Кӧсйисис эд талун да...

— Чу, машина локтӧ, — висьталіс Миня. — Кылан, деда?

Турпан лог сайын былись кыліс кытшӧмкӧ шум, и сылӧн горыс быд секундаӧн содіс. Деда-внучека радмисӧ, да недыр кежӧ. Вежӧртісӧ, что эта самолёт, что сія немӧн оз отсав нылӧ, и ӧшӧтісӧ юррезнысӧ.

— Ок, тюня-параня, — чидіс дед. — Котӧрт-ко, Минька, Карин мысӧ. Может, лесникыс туруналӧ эшӧ. Вӧлӧн коран. Кыдзи абу — деревняӧ пӧльт, бригадирыслӧ висьтав, ась машина иньдас.

Миня ньӧвьёсьӧн уськӧтчис логас.

А небоӧт уйис вертолёт. Лэбзис сія жагӧна и лажмыта, ровно смекайтіс кинӧскӧ вӧр колассис.

— Вертолёт, деда, вертолёт! — Миня горӧтіс дедыслӧ лог сайсянь. — Пожарник! Макайт, деда, сія пуксяс!

— Лок бӧр, — корис Митрок зонкасӧ. И кӧр Миня вуджис логсӧ, сетіс сылӧ вывсис чӧвтӧм йӧрнӧссӧ.

— Макайт, поди казялас.

Но вертолёт сярзис-лэбзис одзлань. Лётчик эз казяв улісь морттэсӧ. Деда-внучека бӧра жӧв керсисӧ.

— Пожарник, шуан? — юаліс старик. — Пожарник... А ноко котӧрт балаганас, спичкаэз босьт и... ӧзты зородсӧ.

Зонка эз верит аслас пеллезлӧ.

— Мы-ый? — юаліс сія.

Дед топнитіс кокнас, горӧтіс лӧгӧн:

— Но, кинлӧ шуӧны?! Ӧтмӧдӧрсянь ӧзты!

Вертолёт ӧшис ни син одзись, кӧр вывланьӧ лэбтісис перво сьӧд тшын, сыбӧрын гӧрдӧтіс зород и нетшкӧвтчисӧ неболань сажённӧй бикыввез. Руас пондіс кӧвьясьны сотчӧм дук, Митрок босьтіс уськӧтӧм йӧрнӧссӧ, бадьӧгасис-муніс пылайтан зородлань. Муніс и лёка серӧм пыр бобгис ныр увтас:

— Бертан, тюня-параня, бертан! Тэ он вермы не бертны. Тэнат должностьыт сэтшӧм — пожарник. Сотчы, турунӧй, ӧграв, ӧграв!

И былись, кыдз только Митрок сибӧтчис биӧн кутӧм зород дынӧ, вертолёт бӧра мыччисис. Старик адззис куран, кышаліс сы бердӧ йӧрнӧссӧ и, дзик флагӧн, пондіс ӧвтны сійӧн юр вевдӧрас.

Вертолёт лажмӧтчис улӧжык, кытшӧвтіс шутём вевдӧрӧт и пуксис Турпан лог дорас. Старик да зонка котӧртісӧ паныт лётчиклӧ.

— Кин ӧзтіс? — лӧгӧн юаліс лётчик, билань мунікӧ.

— Морт доймис, — шуис Митрок. — Кулӧмви ни.

Лётчик сувтчис, и Миня висьталіс:

— Операция колӧ керны...

Лётчик рамжыка ни нёджжӧвтіс Миня вылӧ, йӧрнӧстӧм старик вылӧ, кӧда пельпон вылас знамя моз видзис курансӧ, юаліс:

— Кытӧн сія?

— Вон тайка, — мыччаліс кинас зонка. — А туруныс асланым, дядя лётчик. Некин сы понда оз вид, — и гажтӧма видзӧтіс дедыс чужӧмӧ, кӧдалӧ, натьтӧ, дӧнзяс-даки Маля бабсянь.

Доймӧм морт сё сідз жӧ куйліс гатш и перыта чашыктіс. Чужӧмыс вӧлі блед, ӧтрӧма чышкӧтокыскӧт; син увттэс польдчӧмась, лӧзӧтӧмась, дзик покойниклӧн.

— Ноко, нӧбӧтам, — командуйтіс лётчик и лэбтіс мортсӧ конувттэзӧттяс. Деда-внучека кутісӧ коккесӧ. Садьтӧм морт небурика ружтыштіс и чуть вӧрзьӧтіс синкыммезнас. Кабинаись петіс мӧдік лётчик да отсаліс пыртны доймӧм мортсӧ. Ыбӧсок пӧднассис, и ыджыт сярканыс ӧдззис куртны-сынны пым русӧ.

Деда-внучека вешшисӧ бокӧ, вертолёт лэбтісис и юрсигусьӧн ыскӧвтіс вӧр сайӧ.

Старик дыркодь видзӧтіс сылань, кытчӧ лэбзис вертолётыс да вӧлись юаліс:

— Кушмансӧ вайин, Минька?

— Эт кузяӧ кайӧті, — паськӧтыштіс киэсӧ зоночка.

— Давай ужнайтны пондамӧ, — шуис Митрок и малыштіс внучекыслісь быгалӧм руд юроксӧ. — Ок, тюня-параня...