ЮРСИГУСЬЮрсигусьыс чожа пышъя, Быттьӧ ачым — коньӧр геб. Кӧть и юрам вӧсни чышъян, Век жӧ юрситӧ он дзеб. «Мыйла шусьӧ юрсигусьӧн? — Пӧчлысь юалі ме сэк. — Гашкӧ, сійӧ нетшкӧ гусьӧн Йӧзлысь юрси йылавек?» Пӧчӧй вочавидзис: «Часлы, Юрсигусьыд — повтӧм лов. Ӧбичатӧм нывкаяслысь Юрси нетшкытӧг оз ов». Ты дорӧ ме збоя лэччи (Сідзсӧ ме ӧд зэв на сюсь). Мыйлакӧ тай сьӧлӧм чеччӧ — Мелань лэбӧ юрсигусь. Сыысь ӧдйӧ пышъя-тӧвзя: Повзьӧм ыжтӧ видлы кый. Сӧмын ӧнӧдз на эг ӧвсьы: Юрсинас нӧ вӧчӧ мый?
