ЛУНВЫВ ӦШИНЬ

Лунвыв ӧшинь вӧлі медся муса
Менам пӧчлы — кывтӧм важся ёрт.
Сыкӧд орччӧн луныс лэбас-кусас,
Быттьӧ могӧн тэрмасьысь туй морт.

Ӧшинь пырыс рӧмыд сӧдзны пондас,
Шондісӧ кор дзебас енэжтас.
Кевмысьыштас пӧчӧй рӧдвуж понда,
Чӧвтас лӧняс куим пернапас.

Вермис ӧмӧй пӧчӧй тӧдны сэки,
Мый часовня коркӧ кыптас тан?
Гашкӧ, сэки ёнджык эськӧ эскис:
Чужан сиктлӧн югдылас на бан.

Тыдалӧ часовня бура ӧні
Пӧчлӧн муса лунвыв ӧшинь пыр,
Енэжыскӧд муыс йитчӧ кӧні,
Кутӧ сійӧс киас Ягвыв кыр.

Збыльмӧдны кӧ позис сьӧлӧм корӧм —
Керка пытшкын гаровтыштны кад!
Видзӧдны часовня — ӧшинь пырыс —
Кутшӧм эськӧ пӧчӧй вӧлі рад!
Кутшӧм эськӧ пӧчӧй вӧлі рад...