РУДЗӦГ НЯНЬ

Котӧртӧны-пошиктӧны сикт кузя пӧсялӧм йӧз.

— Ӧдйӧджык, ӧдйӧджык!

— Ок, бара нинӧм оз сюр!

Воисны. Чышкыштісны пӧсьсӧ. Зэв нин эськӧ ӧдйӧ котӧртісны, но кодъяскӧ нӧшта на тэрыбджыкӧсь вӧлӧмаӧсь. ОРС-са магазинын йӧзыс сымда кок пӧвтӧ некытчӧ сюйны. Мыйла нӧ та мындаыс чукӧрмӧма, оз-ӧ нин верблюд петкӧдлыны? Либӧ, гашкӧ, вайисны Африкаысь страус колькъяс да сеталӧны ӧти урӧн кольк Но магазинысь петысьяс страус колькъясӧн оз ошйысьны, а шудаа нюмъялігтырйи нуӧны киняуланыс сэтшӧм дона тӧвар кодӧс некутшӧм кольк вылӧ он веж. Мукӧдъяс завидьпырысь видзӧдӧны шуда ньӧбасьысьяс вылӧ да сьӧкыда ышлолалӧны. А и эм мыйысь ышлолавнысӧ. Ӧд шуда ньӧбасьысьяслы, кӧть и сьӧкыдпырысь да и ыджыд шумӧн, но век жӧ удайтчис ньӧбны... рудзӧг нянь! Да,да, нинӧм шензьыны, сёрниыс мунӧ прӧстӧй рудзӧг нянь йылысь. Вӧлӧмкӧ, ОРС-са магазинӧ вайӧмаӧсь няньсӧ Ыргӧн — Шарысь, йӧзыд и уськӧдчӧмаӧсь ньӧбны.

Кельчиюрын эм пекарня. Водзсӧ пӧжасис кык смена, а ӧні — ӧти смена. Лиза Хозяинова да Ульяна Канева водз асывсянь да сёр рытӧдз пӧжасьӧны. Деомид Ильич Вокуев, сельпоса председатель, оз сетлывлы налы весиг шойччан лунсӧ. Но кӧть ныр выланыс усьтӧдз пӧжасясны кык мортыд, а нёль деревнятӧ оз вермыны вердны.

Библияса мойдъясысь ӧтиын висьтавсьӧ, мый Иисус Христос пӧ коркӧ вит нянь торйӧн вит тысяча мортӧс вердӧма, дай кольӧма на няньыс. Дерт, Кельчиюрскӧй сельпоса председательнас кӧ вӧлі Иисус Христос, гашкӧ, эськӧ няняӧсь вӧлім. Но сельпонас юрнуӧдӧ Деомид Ильич, а сійӧ этша няньнад уна йӧзтӧ оз вермы вердны. Сы вӧсна колӧ корсьны кутшӧмкӧ петан туй: ӧти-кӧ, позьӧ звӧнитлыны небеснӧй канцелярияӧ да юавны, озӧ сӧгласитчы Христосыс уджавны сельпоса председательӧн (та вылӧ слаб надея: шуӧны, Христосыд пӧ абу и вӧвлӧма). Мӧд-кӧ, вайны няньсӧ Сыктывкарысь, коймӧд-кӧ, заводитны пӧжасьны Деомид Ильичлы аслыс, а нёльӧд-кӧ, корсьны содтӧд нянь пӧжалысьясӧс.

Ог тӧд, кутшӧм петан туй медся ёна воас сьӧлӧм вылас Деомид Ильичлы?