МИЯН ВЛАСТЬ

Ми тайӧ власьтсӧ асьным перйим,
Ми асьным сылы сетім ним.
А нимсӧ сэтшӧмӧс ми бӧрйим,
Мый оз и сійӧс вӧрзьӧд сім.

Сӧвет! Быд сьӧлӧмлы зэв дона!
Сӧвет! Мӧд сэсся ним оз ков,
Да-й бурджыкыс оз вермы лоны,
Кор тайӧ — кынтӧ враглысь лов.

Эз ляблы ужалысь Россия,
А вылӧ лэптіс ассьыс флаг.
И аслас туйӧд мунӧ сійӧ
Да кутӧ веськыдладор фланг.

Быд лун странаӧ выльтор пыртӧ,
Тшӧтш, сідзкӧ, радлун вайӧ мем.
Мед кодсюрӧлысь муссӧ зыртӧ
Сӧвет. А сылы — овны нэм.

Ӧд тӧлыс, кызьӧд нэмлӧн тӧлыс,
Кыдз меӧдз шуліс нин поэт,
Оз миян парусӧ мӧй пӧляв?
И сымын вынсялӧ Сӧвет.

Быд честнӧй мортлысь сьӧлӧм шонтӧ.
Оз сибӧд лёклунсӧ, оз лэдз.
Сӧветскӧй му. Выль властьлӧн шонді.
Ме — сылӧн сьылысь да боец.