ТУЙӦ

Гудыр кымӧрыс енэжӧд уйӧ,
Ӧтка ӧшиньӧс вевттьӧ дзор пу.
Колӧ пырысь-пыр петны мем туйӧ,
Коми сиктъясӧд, сьӧлӧмӧй, ну.
Колӧ аддзысьны войтыркӧд меным,
Налысь шогъяссӧ тӧдны и гаж.
Тадз ӧд узьӧмӧн коляс и нэмыд,
Эг нин йӧз дорас вӧвлы ме важ.

Эжва йылӧ, кӧть Ижмалань сетча.
Луза вожӧ кӧть — ставыс мем ас.
Тырмас нюжвидзны вольпасьын, чечча,
Колӧ аддзывны ыбъяс и рас.
Тадз ӧд пӧрысьмас кадысь водз сьӧлӧм,
Нинӧм лябны, кор ворсӧ на вир.
Олӧм помад мед нимкодь тэд вӧлі,
Мый эн прӧста тэ сотчы да быр.
Сиктсянь сиктӧ, кӧть подӧн, а пета,
Менӧ, мусаӧй, талун эн кут.
Тайӧ ветлӧмыс сьӧлӧм мем сетас,
Сӧмын йӧз дінын гажӧй и шуд.