ПОЗЬӦ МӦЙ ТОРЙӦДНЫ ШОНДІ ДА МУ!

1

Сьӧлӧмӧн кылі кор
			муслунлысь дойсӧ,
Олӧмыс сэтшӧма
			некор эз ков! 
Кыдзи нӧ коллявлі
			тэтӧг лун-войсӧ?
Шуны кӧ веськыда,
			эг и ме ов.
Яла яг шӧрӧ вай
			кыпӧдам керка,
Неылын визувтӧ кӧн
			ичӧт ёль.
Рӧмпӧштан пыддиыс
			лоӧ ва веркӧс,
Вольпасьным пыддиыс —
			туруна оль.
Юр весьтын дзирдалас
			мед югыд кодзув,
Пармаыс меліа
			вашкӧдас мойд.
Чеччыны шондікӧд
			кутам ми водз зэв.
Радейтысь сьӧлӧмъяс
			некод оз дойд.
Вӧр-ваыс вашъялас
			мед долыд нюмӧн,
Енэжыс лоас мед
			сӧстӧм да лӧз.
Ки на ки орччӧн ми
			олӧмті мунам;
Лоас-ӧ миянысь
			шудаджык йӧз?
Вермам на радейтны,
			мичмӧдны мусӧ.
Висьӧмлы сетчыны
			некыдз оз ков.
Му вылас олӧмыд
			нӧшта на муса,
Инмас кор кыкӧнлы
			ӧти любов.

2
 
Кык олӧм му вылас
			некод эз овлы на,
Кутшӧм кӧть вежӧра
			вӧлі да сюсь.
Быдӧнлы мунны на
			олӧмсьыс ковмыліс.
Кольлывліс паметь,
			код дженьыд, код кузь.
Кутам ми овны,
			мед бур йӧзыс ошкисны.
Лёк йӧзлӧн, колӧкӧ,
			петас мед веж.
Водз на зэв миянлы
			пемыдас воштысьны.
Му шарыс дыр на
			ас туйсьыс оз кеж.
Эм сылӧн Шонді,
			и нинӧмысь повнысӧ.
Сетӧ пыр олӧмсӧ,
			разӧдӧ ру.
И ӧта-мӧдыслы
			оз дышӧд ковнысӧ.
Позьӧ мӧй торйӧдны
			Шонді да Му!