ВОЙНАЛӦН ЙӦЛӦГА

1

Сибирӧ лэбӧ самолёт,
И чожкӧд майшасям ми сэні.
А гашкӧ, сійӧ дзик мӧд морт,
А миян дядь кӧ, кутшӧм ӧні?

Ог лэбӧй гӧститны ӧд ми,
И абу госпитальын сійӧ.
Фашистӧн ӧзтӧм ыджыд би —
Войнаыс мортлысь вежӧр виӧм.

И со нин орччӧнӧсь кык чож,
Он шу, мый найӧ абу вокъяс.
И бур нин, мортыс мый эз вош,
И чужан муас кувны локтас.

2
 
И воис салдат, 
			вайис ранаяс, дойяс.
Война торкис гӧтрасьны, 
			ни пи ни ныв.
И бӧрдіс вок вӧснаыс 
			пӧрысьмӧм чойыс.
А мамыс кызь во сайын 
			колис му выв.
Ветымынӧд во, 
			кытчӧ письмӧыс вошис,
Кӧн юасис мам йывсьыс 
			«вошӧм» салдат.
Ӧд медводдза пи, 
			кыдзи меддона вожыс
Устиньялӧн. Тӧдіс кӧ, вӧліс, дерт, рад.
И ачыс на мӧдіс Сибирӧдзыс подӧн,
Да тайӧлы лоны сэк кодкӧ эз сет.
И грек и спасенньӧ тэн, код вылӧ водіс
Неыджыд письмӧысь поклон да привет.
Сэк ыджыд мам сизимдас арӧса вӧлі
И му вылас оліс нин некымын тӧв.
А страдна дыр кадӧ сідз кулыштіс 
				чӧла,
Кыдз олігас гораӧн некор эз вӧв.

3

Эн кедзовт ассьыд пиянтӧ,
Чужан му.
И олысьяскӧд, миянкӧд,
Бур кыв шу.
Дерт, югыдін да шоныдін,
Кысь нин сэн.
Но ас муӧ кӧ водӧмыд,
Сідзкӧ, эм.