* * *

Асъя шондіыскӧд эскӧм чужӧ,
Луныс мыйкӧ выльтор меным ваяс.
Гашкӧ, сэтшӧм кыв ме шуны кужа,
Сьӧлӧм шонта кодлыськӧ на тайӧн.

Гашкӧ, дойсӧ пӧттӧдз кылӧм бӧрын,
Личӧдас да ола на во комын.
Ывлаыс со лымъя, кыдз тӧв шӧрын,
Кӧть октябрь на сӧмын кильчӧ помын.

Му вывсьыд ӧд тайӧ шебрас сылас,
Тайӧ сӧмын сылы шоныд сетысь.
А кор мортлы водас морӧс вылас
Еджыд дӧра, сідзкӧ лолыс петіс.

Кусас вежӧр, лӧняс став му вылыс,
Медся югыд луныс сэки пемдӧ.
Ловъя сьӧлӧм сӧмын дойтӧ кылӧ,
Эн жӧ сьӧдас воштӧй ассьыд нэмтӧ.

Мусанытӧ радейтӧй, эн полӧй.
Видзӧй сійӧс ті и биысь-ваысь.
Мустӧм морткӧд мырдӧнӧн эн олӧй,
Лёк йӧз сӧмын дивитасны таысь.

Муслун биысь сӧмын оз ков повны,
Сыӧн ӧзтӧм сьӧлӧм зарни кояс.
Сетас вынсӧ уджавны и овны,
Югзьӧдас да шонтас олӧм вояс.